Biibili qanoq oqarpa?

Salluneq illersorneqarsinnaava?

„Ilaanni sallulaarnikkut takisuumik nassuiaanissaq pinngitsoorneqartarpoq.“

OQAASEQAATIP tamatuma takutippaa inuppassuit salluneq qanoq isigigaat. Isumaqarput allanut ajoqutaanngikkuni salluneq ajortuunngitsoq. Eqqarsaat taanna allaat ilisimatuunit taaguuteqartinneqalersimavoq, pissutsinut naleqquttumik ileqqoqarnermik taaneqarluni, taanna kisiat asanninnerup inatsisaanik taaneqartup maleruarneqarnissaa anguniarlugu. Atuakkiortup Diane Kompip ima allaatigaa: „Ajunngitsumik siunertaqaruit ajunngitsumillu uummateqaruit, (taava) sallusimanerit . . . soqutaanngilaq.“

Taama isumaqarneq ullumikkut nalinginnaavoq. Naalakkersuisut nuimasut imaluunniit silarsuarmi siuttut salluliorneri inunnut aalassaataasimaqaat. Taama pisoqarrajunnera pissutigalugu inuppassuit eqqortumik oqalunneq pingaartikkunnaarsimavaat. Inuussutissarsiutit ilaannut atatillugu salluneq nalinginnaanerulersimavoq. „Salluneq aningaasarsissutigisarpara. Tuniniaalluni unamminerni ajugaasarpunga ukiullu tamaasa sallugaangama nersorneqangaartarlunga . . . Nioqquteqarnermut illiniartitaanermi tunngaviusutut isigineqarunarpoq,“ pisiniartitsisoq taama unnerluppoq. Inuppassuit sallulaarnerit ajoqutaanngitsutut isigaat. Taamaappa? Kristumiup salluliornera illersorneqarsinnaava?

Biibilip najoqqutassiaa qutsissoq

Sallunerit tamarmik Biibilimi toqqaannartumik avoqqaarineqarput. ’[Guutip] nungutittarpai sallutuut,’ tussiaasiortoq allappoq. (Tussiaat 5:7; takuuk sarĸúmersitat 22:15.) Biibilimi Ussatit 6:16-19-imi assigiinngitsut arfineq-marluk Jehovap uumigisai eqqaaneqarput, „oqaq sallutooq“ aamma „sallullutik nalunaajaasut“ taakkunani pingaartittariaqartutut taaneqarmata. Sooq? Jehovap salluliornerup kingunerisaanik ajoqusiineq uumigimmagu. Ilaatigut tamanna pissutigalugu Jesusip Satan ’sallutuumik’ ’inunnillu toqutsisumik’ taavaa. Taassuma salluliornera pissutigalugu inuiaat naalliungaarneq toqulu atortariaqalersimavaat. — 1 Moses 3:4, 5; Juánase 8:44; Rûmamiut 5:12.

 Jehovap salluneq sukannersumik isumaqarfigigaa Ananiasimi Safiramilu pisimasumi erseqqissarneqarpoq. Tunisiumatussuseq ileqqorisuusaarlugu piaaralutik apustilit salluliorfigaat. Pilersaarusiorlutik piaaralutillu taamaaliorput. Taamaattumik apustili Peterip Ananias oqarfigaa: ’Inunnut pinnatit Guutimut salluvutit.’ Marluutillugit Guutip toquppai. — apustilit suliait 5:1-10.

Ukiualuit tamatuma kingorna apustili Paulusip kristumiut kajumissaarpai imminnut salluffigeqatigiinnaveeqqullugit. (Kulorsamiut 3:9) Kristumiut ilagiissaanni unnersuussutip matuma maleruarnissaa pingaaruteqarluinnarpoq. Jesus oqarsimavoq asanninneq ajoqersukkami ilumoortut pingaarnerusumik ilisarnaatigissagaat. (Juánase 13:34, 35) Asanninneq taama ittoq peqquserlunnertaqanngitsoq aatsaat alliartortinneqarlunilu ineriartortinneqarsinnaavoq unneqqarilluinnarlunilu tatigeqatigiilluinnaraanni. Inuk alla tamatigut ilumoortumik oqaluttutut tatigisinnaanngikkaanni asanissaa sapernarsinnaavoq.

Salluneq assuarnartuaannarpoq, sallunerilli ilaat allanit ingasannerupput. Assersuutigalugu immaqa ittoorneq ersinerluunniit pissutigalugit sallusoqarsinnaavoq, allali immaqa ajussutsimi allat ajoquserniarlugit salluneq ileqquliussaasimalluni. Ajortumik siunertaqarluni sallutooq taanna allanut navianartuusinnaavoq kristumiullu ilagiissaannit anisitaasariaqarluni allamik isumataanngikkuni. Sallunerit tamarmik ajortumik aallaaveqanngillat, taamaattumik sallusoqarpat tuaviorpallaartumik isummerfigisariaqanngilaq qulakkeertariaqarporli pissutsit tamatumunnga attuumassutillit tamaasa ilisimannissaat. Pissutiginiagaa qajassuussinerunissamullu pissutaasut isiginiarneqartariaqarput. — Jâko 2:13.

’Silassorigitsi pulateriaarsuttut’

Ilumoorluni oqalunneq soorunami isumaqartariaqanngilaq aperisut tamaasa ilisimasatsinnik tamanik oqaluttuuttariaqarivut. ’Illernartoq qimminut tunniussanngilarsi, sapanngarissuutisilu puulukinut naluttassanngilasi; isikkaminnik tullaqinavaat saaffigalusilu alittorlusilu,’ Matîuse 7:6-imi Jesus mianersoqqusivoq. Ilaannikkut inuit ajortumik siunertaqartut paasissutissanik aalajangersimasunik paasitinneqartariaqanngillat. Kristumiut nalunngilaat silarsuarmi akeqqersimaarfiusumi inuullutik. Taamaattumik Jesusip ajoqersukkani mianersoqquai ’silassoreqqullugit pulateriaarsuttut peqqusersueqqullugillu tuisut’. (Matîuse 10:16; Juánase 15:19) Jesusip tamatigut eqqortoq tamaat eqqartorneq ajorpaa, ingammik imminut ajoqersukkaminulluunniit pisariaqanngitsumik ajoqutaasinnaagaangat. Allaalli pissutsini makkunani salluneq ajorpoq. Aap, nipangiinnartarpoq imaluunniit oqaluuserisaq allamut saatillugu. — Matîuse 15:1-6; 21:23-27; Juánase 7:3-10.

Angutit arnallu upperluartut Biibilimi eqqaaneqartut, soorlu Abraham, Isak, Rahab Davidilu, akeraasinnaasut naammattooraangamikkik taamatuttaaq mianersortigisarput. (1 Moses 20:11-13; 26:9; Josva 2:1-6; 1 Samuel 21:10-14) Biibilimi angutit arnallu taakku pallorfiginnittutut aalajaatsutut inuunerat naalannermik ilisarnaateqartutut eqqaaneqarput. Taamaattumik maligassaalluarput. — Rûmamiut 15:4; Eprîarit 11:8-10, 20, 31-39.

Ilaanni pisoqarsinnaavoq sallugaanni pisariinnerpaasutut isikkoqartumik. Ullumikkulli kristumiut Jesus malinniartariaqarpaat ajornartunik nalaataqaraangamik nalunngeqatiginnissusertik Biibilimit ajoqersorneqartoq naapertorlugu iliuuseqartarlutik. — Eprîarit 5:14.

Biibilimi kajumissaarneqarpugut sallunaveeqqulluta peqqusersuitsooqqullutalu. Salluneq eqqunngitsuliorneruvoq, unnersuussullu Biibilimeersoq manna maleruartariaqarparput: ’Sallussaarlusi tamassi ilumoortumik inoqatissinnut oqalugitsi avateqatigiikkatta.’ (Evfisumiut 4:25) Taamaaliorutta ilerasuuteqassanngilagut, ilagiinni eqqissineq asanninnerlu siuarsarsinnaallugit ’Guutilu unneqqarissoq’ ataqqinartittuarsinnaallugu. — Tussiaat 31:6; Eprîarit 13:18. (gE 8/2 2000)

[Qupp. 16-mi assiliartaq]

Ananiasip Safiralu sallugamik inuunertik annaavaat