Inuusuttut aperipput:

Sooruna ikinngutima ajuallatsikkaanga?

„Ikinnguterpaaloqaraluarpunga . . . Taava niviarsiaraq alla ilagisalerpaat. Ornikkaangakkilli oqalukkunnaartarput. . . . Ilagiumajunnaartalerpaannga. Tamanna ajuallaatigeqaara.“ — Karen. *

IKINNGUTIGIINNERPAANUT tamanna pisinnaavoq. Ullut ilaanni qimassinnaanngingajattarput, uullulli ilaanni oqaloqatigiissinnaanerluunniit ajorlutik. „Ikiinngut tutsuiginartuusariaqarpoq tatiginartuullunilu qanorluunniit pisoqaraluarpat qimaaffiusinnaalluni,“ Nora 17-inik ukiulik oqarpoq. Kisianni ikinngutiginerpaasaq immaqa ilaatigut akerarinerpaasatut pissusilersoratarsinnaavoq.

Ikinngutigiinneq misilinneqartoq

Suumuna ikinngutigiinneq ingerlalluartoq ajalusoortittaraa? Sandra eqqarsaatigissagaanni ajornartorsiutit aallartipput ikinngutaata Meganip tujuulua nuannarinerpaasaa atormagu. „Uannut utertikkamiuk ipeqarpoq taliatalu aappaani alilaarsimalluni,“ Sandra oqarpoq. „Eqqaanngilaaluunniit — malugisanngitsoralugu.“ Sandrap Meganip soqqusaannera qanoq isigaa? „Kamaqaanga,“ oqarpoq. „Soorlu pigisakka ataqqinngikkai . . . misigissutsikkaluunniit.“

Ajuallannerit aamma pisinnaapput ikinngutiginerpaasap oqaaserisaanik imaluunniit iliuuserisaanik namminermut ittuuallannartumik. Cindymut tamanna pisoqarpoq atuaqatini eqimattat oqaluttuummagit atuagaq allaaserinnillutik pisassartik suli atuarsimanagu. Tassanngaannaq ikinngutaata Katep naviilerpaa. „Ikinngutigut allat isigitillugit kanngusutsippaanga,“ Cindy oqaluttuarpoq. „Kamaateqaara. Pisup tamatuma ikinngutigiinnerput allanngortilluinnarpaa.“

Ilaatigut isumaqatigiinnginnerit pilersarput ikinngutip ikinngutinut nutaanut piffissaq atuleraangassuk. „Ikinngutinnaaqarsimavunga eqimattanut ilannguttumik,“ Bonny 13-inik ukiulik oqaluttuarpoq. „Soqutiginngitsuusaartalerpaanga.“ Imaassinnaavoq aamma paasilerit ikinnguppit ikinngutigiinnersi allamik pissuteqartikkaa. „Bobbylu ikinngutigiilluarsimavugut,“ Joe 13-inik ukiulik oqarpoq. „Isumaqarsimagaluarpunga taannaanera pillugu nuannarigaanga, kisianni paasilerpara uanga soqutigigaanga ataataga nioqqutissanut pilerisaarutinik suliffimmi sulisarmat taamaalillunilu timersortunut nipilersortunullu isissutissanik periaannaasarluni. Joe massakkut qanoq ippa? „Bobby qaquguluunniit tatigeqqinngisaannassavara!“ akivoq.

Ilaatigut ikinngutip paasissutissat nammineq kisimi pigisassani allanut oqaatigisassaanngitsut oqaatigisinnaavai. Assersuutigalugu Allisonip  ikinngutini Sara suleqatimi ilaata inuttut ajornartorsiutaanik oqaluttuuppaa. Aqaguani Sarap tamanna suleqatiminut toqqaannartumik eqqaavaa. „Isumaqanngisaannarpunga oqaatigissagaa! Kamaqaanga,“ Allison oqaluttuarpoq. Rachel, 16-inik ukiulik assingusumik misigisaqarnikuusimavoq ikinngutinnaami isertugaatitik oqaloqatigiissutigisimasatik allamut oqaatigisimammagit. Rachel oqaluttuarpoq: „Kanngusoqaanga aammalumi salloqittagaasutut misigalunga. Eqqarsarpunga: ’Qanoq ilillunga tatigalugu oqaloqatigeqqissinnaasanerpara?ʹ“

Ikinngutigiinneq misigissutsikkut nukittoqutaasinnaavoq ingammik isumassoqatigiilluni, tatigeqatigiillunilu ataqqeqatigiikkaanni. Taamakkaluartorli ikinngutigiinneq piffissat ilaanni ilungersunarsinnaavoq. Biibili toqqaannartumik oqarpoq: „Inuk ikinnguteqaraluarluni ajutoorsinnaasarpoq.“ (Ussatit 18:24) Sunaluunniit patsisaagaluarpat pakatsisoqarsinnaavoq ikinngummik salloqitaagaasutut misigigaanni. Sooq taama pisoqartarpa?

Sooq ikinngutigiinneq ajalusoortartoq

Inuusuttuni inersimasuniluunniit ajornartorsiuteqanngivissumik inooqatigiittoqarsinaanngilaq. Ullumikkuttaaq taamaappoq soorlu kristumiu ajoqersugaq Jakob allattoq: ’Tamattami qassiinik naakkiuttarpugut; oqalunnikkut naakkiunnaveersoqarpat, taanna angutaavoq iluarluinnartoq timini iluunngarlugu allaat naalakkersorsinnaallugu.’ (Jâko 3:2; 1 Juánase 1:8) Tamarmik naakkiuttarmata ilimagisinnaavarput qaquguluunniit ikinnguterput ajuallaatigisinnaasatsinnik oqaaseqarsinnaasoq. Uagut nammineq immaqa aamma eqqaamavarput arlaannik ajuallatsitsisimalluta. „Tamatta naammalluinnanngitsuuvugut ilaatigullu immitsinnut nuannarinngisatsinnik iliorfigisinnaalluta,“ Lisa 20-nik ukiulik oqarpoq.

Naammalluinnanngitsuunitta saniatigut allat aamma pissutaasinnaapput. Eqqaamajuk nammineq soqutigisat ikinngutillu soqutigisaat tamatigut peroriartornermi ineriartornermilu allanngoriartorsinnaasut. Taamaattumik inuit marluk soqutigisaqatigiissimagaluartut malugilersarpaat arriitsumik aalajangersimasumilli avissaariartorlutik. Ikinngutinnaani eqqarsaatigalugu inuusuttuaraq ima naammagittaalliorpoq: „Akulikitsunik immitsinnut sianerfigineq ajorpugut, oqaloqatigiikkaluaraagatta, arlaannaanilluunniit isumaqatigiinniartarunnaarsimavugut.“

Peroriartornermi avissaarneq allaavoq, imminnullu ajuallatsineq aamma allaalluni. Sooq taamaattoqartarpa? Ilaatigut sinnganeq pissutaasarpoq. Assersuutigalugu imaassinnaavoq ikinngut uumiginnilersoq piginnaanitit imaluunniit angusatit pillugit. (Takuuk 1 Moses 37:4; 1 Samuel 18:7-9.) Soorlu Biibilimi allassimasoq allassimasoq: „Sinngatuuneq saarnit aseruuttoornerattut ippoq.“ (Ussatit 14:30) Tamanna sinnganermik unamminermillu kinguneqartarpoq. Sunaluunniilli pissutaagaluarpat, ikinngut ajuallatsitsippat qanoq iliortoqarsinnaava?

Saamasuugit

Rachel nassuiaavoq: „Uanga paasiniaaqqaartarpunga ajuallatsitsisup piaaraluni ajuallatsinneraanga.“ Narrunarsarneqarluni oqaatsikkut iliuutsikkulluunniit ajuallatsitaasimagaanni eqqarsaat siullerpaaq atortariaqanngilaq. Tassunga taarsiullugu utaqqisinnaassuseqarluni pisoq eqqarsaatigilluartariaqarpoq. (Ussatit 14:29) Kamaammerlutit iliuuseqapallannikkut ilorraallannerussavit imaluunniit pisut ajorneruliinnassappat? Tamakku eqqarsaatigereerukkit Tussiaat 4:5-miittoq siunnersuut maleruassallugu aalajangersinnaavutit. „Kamassimariannguaritsi, kisiannili ajortuliornasi! Nalallusi pilersaarusioriannguaritsi, kisiannili nipangerlusi!“ Taava immaqa aalajangerputit ’asanninnerup ajorterpassuit matoorumaarai. — 1 Pîtruse 4:8.

Qanormi misigiguit ajuallaatigisat puigorsinnaanagu? Immaqa pitsaanerussaq ajuallatsitsisoq ornillugu oqaloqatigigukku. „Marluinnaallusi naapinniariaritsi, pisimasullu oqaloqatigiissutigalugit. Taamaaliunngikkaanni uumissuininnguuteqinaaq,“ Frank 13-inik ukiulik oqarpoq. Susan 16-inik ukiulik taamatorluinnaq misigaaq. Oqaluttuarpoq: „Pitsaaneruvoq oqarfigigaanni tatigisimallugu aammalu sumiginnarneqartutut misigalutit.“ Jacquelinep aamma marluuinnaalluni oqaloqatigiinnissaq pitsaanerutippaa. „,Pisut tamaasa qulaarlugit oqaloqatigiissutigisigit,“ taama siunnersuivoq. „Ilimanarpoq ileqquusumik ikinnguppit ammaffigissagaatit, ajornartorsiullu ingerlaannangajak aaqqissinnaassavarsi.“

 Soorunami mianersuuttariaqarpat kamatsillutit ikinngutit ornissannginnakku. Biibili oqarpoq: „Kamajasup isumaqatigiinnginneq saqitsaannerlu pilersittarpai, kamajaatsulli isumaqatigiinnginneq sallangersikkiartortarpaa.“ (Ussatit 15:18) Taamaattumik ajornartorsiutit aaqqinniarlugit iliuuseqannginninni eqqissisaqqaarit. „Aallaqqaammut kamaammernartarpoq,“ Lisa nassuerpoq, „kisianni kamaammerneq qaangiusseeqqaartariaqarpoq. Ikinngutit kamaappallaarunaarseeqqaaruk. Naggataatigut pakatsiffigisat orniguk, eqqissisimasumillu pisut oqaloqatigiissutigisigit.“

Oqaaseq „eqqisisimaneq“ pingaarneruvoq. Eqqaamajuk: Ikinngutit naveerniarlugu anguniagarinngilat, kisiannili ajornartorsiutip eqqissisimasumik aaqqinnissaa ajornanngippallu ikinngutigiinnersi annaallugu. (Tussiaat 34:15) Uummammik pisumik oqalugit. „Imatut oqarsinnaavutit: ’Ikinngutigiippugut kisiannili paasisariaqarpara susoqartoq,’“ Lisa siunnersuivoq. „Pisimasumut pissutaasoq ilisimasariaqarpat. Tamanna nalunngikkukku ajornartorsiutip aaqqinniarnissaa ajornarpallaarnavianngilaq.“

Soorunami kukkunerussaaq akiniaanissaq soorlu ikinngutit pillugu allanut mamarlerlugu oqalukkuit ilinnut illersuisussarsiorniaannarlutit. Kristumiu apustili Paulus Romamiunut allappoq: ’Ajortumik iliortoq ajortumik akileqinasiuk.’ (Rûmamiut 12:17) Qanorluunniit ajuallassimatigigaluaruit akiniaanerup pisimasoq ajorsisiinnassavaa. „Akiniaanissaq akilersinnaanngilaq, taamaalioruit ikinngutigiileqqinngisaannassaasi,“ Nora oqarpoq. Akerlianilli „inutsialattut misigilersissinnaavaatit“ sapinngisat tamaat ikinngutigiinnersi iluarsiniarukku, nangilluni oqarpoq.

Qanormi taava ikinnguppit qassiiliuutaasoq aaqqinniaraluakkat ajunngitsumik qisuariarfiginngippagu? Taamaappat eqqaamassavat ataqatigiilluni ikinngutigiittoqarsinnaavoq annerusumik minnerusumilluunniit. „Ikinngutigiit tamarmik qanimut ikinngutigiinneq ajorput,“ ilaqutariinni siunnersuisartoq Judith McCleese nassuiaavoq. „Ilisimasariaqarpat ikinngutigiinnerup pitsaassusai allanngorartupilussuusinnaammata.“ Eqqississutigiinnassavat eqqissineq anguniarlugu iliuuseqareeravit. Apustili Paulus allappoq: ’Ajornanngippat sapinngisassinnik inuit tamaasa eqqisiveqatiginiarsigik.’ – Rûmamiut 12:18.

Ikinngutigiinnerpaalluunniit ajornartorsiortarput. Ajornartorsiut atukkat qaagersimagukku nammineq naleqassutsit allanullu isiginnittaatsit akornusersimanngippata taava inersimasunngulersimassaatit. Immaqa allat „imminut aserorterniarput“, Biibilili neriorsuivoq: „Ikinngutaasoqartarporli qatanngummit tatiginarnerusunik“. — Ussatit 18:24. (gE 22/2 2000)

[Quppernerup ataani ilanngussaq]

[Qupp. 30-mi assiliartat]

Ikinngutigiinneq immaqa anaassinnaavat susoqarsimanera oqaloqatigiissutigigukku