Fjernsyni isumatuumik atoruk

FJERSYNI „oqaluttuartutut, meeqqanut paarsisutut isummanillu pilersitsisartutut“ siulersortaalluni inississimavoq, nalunaarusiami Not in the Public Interest — Local TV News in America-mi, USA-mi suleqatigiinnit tusagassiuutinik nakkutiginnittunit suliarineqarsimasumi, allassimavoq. „TV-mit avatangerneqarsimavugut . . . tupap pujuatut silaannarmiippoq.“ Soorlu pujortarneq ajoraluarluni pujortarfigitinneq ulorianartuusoq, taamattaaq nalunaaquttap akunnerpassui fjernsynimi aallakaatitanik immikkoortitserinani isorinagit isigiinnaaginnaraanni aserorsaataavoq. Tamanna ingammik meeralinnut atuuppoq.

Nalunaarusiami tassani pinerluttuliornermut nakuusernermullu atatillugu allassimavoq „misissuinerit hundredet arlallit takutissimagaat nakuusertunik isiginnaarnerup meeqqat ilikkagaqarsinnaanerannut misiginneqataasinnaanerannullu sunniuteqarnerluttartoq, saassussiumatunerulersittarlugillu.“ Amerikami Nakorsat Peqatigiiffiat 1992-imi nalunaarpoq „TV-mi nakuusernermik isiginnaagassiat inuusuttut peqqissusiannut ulorianartorsiortitsisoq.“

Qanoq ililluni fjernsynimi isiginnaagassiat meeqqanut ajoqutaasinnaanersut nakkutigineqarsinnaappat? Nalunaarusiaq immikkut ilisimasallit siunnersuutaannik imaqarpoq naalagaaffiup peqqinnissaqarfiisa arlallit fjernsynip isumatusaarnerusumik atornissaanut inassutigisaannik tunngaveqartoq. Siunnersuutit ilaat ungaluusami atuarneqarsinnaapput. (gE 22/5 2000)

▪ Siumut aalajangereerit suna takussanerlugu, fjernsynimik isiginnaarnerit killileruk. Killiliigit qaqugukkut meeqqat fjernsyni isiginnaarsinnaaneraat. Meeqqat inaannut fjernsyni inissinniaqinagu.

▪ Globusimik fjernsynip eqqaanut ilisigit, aallakaatitami takutinneqartut nunat sumiiffii meeqqanut nanisinnaaqqullugit.

▪ Piviusut piviusuunngitsullu assigiinngissusii nassuiarsinnaaniassagakkit meeqqatit fjernsynimik isiginnaaqatigikkit. Meerarpassuit qulit inorlugit ukiullit taakku marluk immikkoortikkuminaatittarpaat.

▪ Fjernsyni saqqumisumi inissinniaqinagu. Ilisivimmut matusinnaasumut inissiguk. Taava ikikkuminannginnerussaaq kanalinullu allanut nooqattaarnannginnerussalluni.