Biibili qanoq oqarpa?

Kina Guutimut kiffaava?

UNNUKKUT Jesusip pilliutitut toqunissaa aqaguttoq ikinngutiginerpaasai sakkortuumik oqallipput. Lúkarse 22:24 naapertorlugu ’saqitsaatigilerpaat kina arlartik annerutinneqassasoq’. Siornatigut Jesusip apustiliisa aamma tamannarpiaq oqalisigisimavaat. Siusinnerusukkut minnerpaamik marloriarluni Jesusip eqqarsariaasiat naqqittarsimagaluarpaa.

Ajoraluartumik unnuami ilungersunartumi tamatumani Jesusip eqqaaseqqittariaqarpai kristumiut kiffartortut qanoq ittuusariaqarnersut. Ima oqarpoq: ’Annertarsi nukarlersut issavoq, suilersuisorlu kiffartortutut issavoq.’ — Lúkarse 22:26.

Tupaallaatigisariaqanngilarput apustilit qanoq isigineqarnermut oqaasissaqarnermullu eqqungasumik isiginnittaaseqarmata. Jesus takkutinngikkallarmat pingaartumik farisiiarit allakkanillu ilisimasut upperisarsiornikkut siulersuinermut atatillugu maligassatut isigisussaasimavaat. Kiffartortut ilumuunngitsut taakku, inunnik anersaakkut ajoqersuinatillu siulersuinnginnamik, inuit ileqqutoqqaannik maleruagassiaannillu pingaartitsivallaarlutik, taamaalillutik ’qilammiup naalagaaffia inunnut parnaartarpaat’. Taakkua ataqqisaanissartik inuillu isaanni takujuminartuunissartik kisiat soqutigaat, nuimarurusullutik namminissarsiortuullutillu ’inunnut isigeqqullutik’ iliuuseqartarlutik. — Matîuse 23:4, 5, 13.

Kiffartuussineq nutaaq

Jesusilli ajoqersukkaminut anersaakkut kiffartuussineq nutaaq pilersippaa. ima ajoqersuivoq: ’Ilissili ajoqersuisunik taaqqussanngilasi, ataaseq ajoqersortigigassiuk, Kristus; ilissili tamassi qatanngutigiippusi. Nunamiusorlu ataatassinnik taassanngilarsi, ataaseq Ataatagigassiuk, qilammiittoq. . . . Kisianni annertarsi kiffarissavarsi.’ (Matîuse 23:8-11) Jesusip ajoqersugaasa taamanikkut upperisarsiornikkut siuttut malinniassanngilaat. Ilumoortumik kiffartortuujumagunik Jesus malinniartariaqarpaat. Taassuma maligaasiaa qanoq ittuua?

Biibilimi griikerit oqaasiat diaʹkonos ’kiffamik’ imaluunniit ’kiffartortumik’ nutserneqarajuppoq. Qinerlerfissiami The Encyclopedia of Religion-imi nassuiarneqarpoq oqaatsimik tamatuminnga ’kiffartortup  atorfia pineqanngitsoq, kisianni kiffartortup naalagaatalu attaveqarnerat pineqartoq: Kristusimik malinninneq . . . tassaavoq kristumiutut kiffartornerup pingaarnerusortaa.’

Oqaatsip ’kiffartortup’ eqqortumik nassuiarneranut naapertuuttumik Jesus imminut tunniuppoq allat iluaqutissaannut. Naammagittarluni nassuiaavoq: ’Soorlu inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaaannik.’ (Matîuse 20:28) Jesusip namminissarsiornani piffissani, nukini piginnaaninilu allat timikkut anersaakkullu ikiornissaannut atortarpai. Sooq? Inuppassuit anersaakkut isumakkiigaasut ornimmanni nalligigamigit. Ikiorusoqai. Tunisiumatuulluni asanninnini kiffartornermini killissutigaa, ajoqersukkamilu tamatumunnga assingusumik tunisiumatunissaat kissaatigaa. — Matîuse 9:36.

Jesus inuunini tamaat imminut kiffanngorumaartunut maligassaalluarpoq. ’Katersugassat amerlaqaat,’ oqarpoq, ’sulisussalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.’ (Matîuse 9:37, 38) Aap, Kristusip kiffai suliassat silarsuarmi suliarineqartussat annerpaartaannut peqataasussaapput — inuiannut tamanut anersaakkut tuppallersaallutik Guutip naalagaaffianik nutaarsiassamik nuannersumik oqaluusseqataanermikkut ajoqersueqataanermikkullu. — Matîuse 28:19, 20.

Kristusip kiffartornerata siusinnerusukkut anersaakkut siunnersuisunit allaassutigaa tunisinissani allallu pisariaqartitaannik matusinissani pingaartikkamigit. Ajoqersukkani sulisussatut ilinniartippai, anersaakkut aalisartussatut savanillu paarsisussatut, tassaassanngitsullu oqaluttuatoqalerisut ilinniarsimaqqissaartullu immikkut atisalersorsimasut ataqqineqarumallutik. — Matîuse 4:19; 23:5; Juánase 21:15-17.

Biibili qanoq oqarpa?

Ajoraluartumik, Guutip kiffaata imminut tunniusimalluni oqaluussisartunera ajoqersuisuuneranillu isuma qutsisoq namminissarsiunngitsorlu tamanna ukiut ingerlaneranni muminneqarsimavoq. Kristumiutut kiffartornertut aallartittoq ilagiinni aaqqisuugaasumik oqartussaaffilersuinermut allanngoriartuaarsimavoq. Ataqqinaasikkanik, pissaanilinnik amerlanertigullu pigissaartitaasunik immikkut inissisimaffiit atorfiillu pilersinneqarput. Taamaalilluni immikkoortiterisoqalerpoq. Palaseqatigeeqalerpoq, taakkualu upperisarsiornikkut nerliiviliartitsinerit eqqunngitsuliortunillu unnersuussinerit samminerusarpaat. Ukiuni hundredelikkuutaani tulliuttuni kristumiut ilagiivi siulliit allanngortinneqarput, aallaqqaammut upperisarsiortut tamarmik kiffartortuupput, kingusinnerusukkulli upperisarsiortunngorput suliniuteqanngitsut ikittuinnaallu oqaluussisinnaasutut ajoqersuisinnaasutullu immikkut ilinniartinneqarlutik.

Biibili naapertorlugu Guutimut kiffaasup namminissarsiunngitsumik sulinini ilisarnaatigissavaa immikkut atisalersorneq, immikkut ileqqulersorneq, immikkut akissarsiaqarneq, naalagaaffimmiluunniit atorfeqarneq ilisarnaatiginagit. Apustili Paulusip kristumiut kiffartortut isiginnittaasissaat allaatigaa. Kajumissaarpai ’ataqqineqarumanermit pinnatik, kisianni qanilaarlutik ilatik imminnit annerutinniaqqullugit’. — Filípimiut 2:3.

Paulusip oqaluussissutigisani maleruartarpai. Kristusip maligassiaa maleruaqqissaarlugu ’imminut iluaqutaasoq piniarnagu, kisianni amerlasuunut iluaqutaasoq piniartarpaa, annaqqullugit’. Paasilluarpaa immikkut akisussaaffeqarluni ’iivangkiiliu akeqanngitsumik saqqangiuttussallugu iivangkiiliukkut qanoq piginnaassutsi atussanagu’. ’Inunnut ataqqeqqutuunianngilaq.’ — 1 Korintumiut 9:16-18; 10:33; 1 Tásalûníkamiut 2:6.

Kristumiunut ilumoorlutik kiffartortunut maligassaalluarpoq! Maligassiamik tamatuminnga malinnittut Jesus Kristusillu namminissarsiorani tumai malillugit saqisut, anersaakkut ikiuiniarlutik nutaarsiassamillu nuannersumik allanut tuppallersaaniarlutik imminnut tunniuttut tassaapput Guutip kiffai ilumoortut. — 1 Pîtruse 2:21. (gE 8/7 2000)