Qanoq ililluta ilaqutariittut ataatsimuuleqqittugut

Oqaluttuartut Lars aamma Judith Westergaard

LARSIP Judithillu illuat Danmarkimi ilaqutariit allat illuannit nuannersunit allaanerunngilaq. Illu initooq naatsiivetoqqami nunaqarfiup eqqissisimanartup qeqqaniippoq. Illup iluani meeqqat peqqissut inequnartullu pingasut iikkami assit sinerujussuannit qungujulallutik nivingapput.

Lars, illumi ataataasoq, Jehovap nalunaajaasuisa ilagiivini utoqqaanertaavoq, nulia Judith piffissaq tamaat atorlugu oqaluussisartuulluni. Takuinnarlugit aappariittut nuannaarpasipput pilluarpasillutillu. Aammami taamaapput. Taamaattuaannarsimanngivippulli. Ullumikkut kialuunniit takusinnaanngilaa assortuuttarsimasut kamaattarsimasullu, avissimasut ilaqutariittullu avissaarluinnarsimasut. Massakkut ikit mamissimapput ilaqutariillu ataatsimuuleqqilersimallutik. Tamannali qanoq pisimava?

Kisigatik oqaluttuarisinnaavaat sooq taama ajortigisumik pisoqarsimanersoq aammali suup ataatsimuulerseqqissimaneraatik. Taamaalillutik allat ikiorsinnaasoraat.

Aallartilluarpugut

Lars: 1973-mi apriilimi aappariinnitsinni pilluaqaagut, silarsuarlu uagutsinnut aammavoq. Biibili Jehovamullu nalunaajaasut naluagut, taamaattorli ilimagilluinnarparput ilungersornerulluta suligutta silarsuaq naapertuilluarnerulersinnaasoq. Taamaattumik politikkimut tunngasunik suliniartunngorpugut. Pilluarnerput minnerulinngilaq nukappiaqqat pingasut, Martin, Thomas Jonasilu peqqissut uummaarissullu meerartaarigatsigit.

Judith: Uanga naalagaaffimmi qullersatut atorfittaarpunga, saniatigullu politikkimi sulisartullu peqatigiiffiinut tunngasunik suliassat assut soqutigalugit. Tassani pingaarutilinngoriartuaarpunga.

Lars: Uangattaaq sulisartut peqatigiiffissuanni suliffeqarpunga tassanilu pingaarutilimmik atorfinillunga. Aap, suliffitsinnut tunngatillugu ingerlalluaqaagut, suullu tamarmik neriulluarnarsipput.

Avissaariartorpugut

Lars: Tamattali immikkut suliffitsinni ulapputeqangaaratta immitsinnut piffissaqarfigivallaarunnaarpugut. Parteeqatigiikkaluarpugut, tamattali ingerlatsinermi pingaarnerutitaqarluta. Nukappiaqqat meeqqerivinni namminersortuniluunniit paarineqartarput. Tamatta immikkut pisussaaffivut isumagigatsigik ilaqutariittut inuuneq torerunnaarpoq. Nalaatsornerinnakkut ataatsikkut angerlarsimagaangatta assortuunnersuaqartarpoq. Taamaammat eqqissisaatiginiarlugu imigassamut saappunga.

Judith: Sulili asaqatigiikkaluarpugut, asanninnerli paarineqarnanilu ineriartortinneqanngilaq. Taamaattumik  aappariinnerput ajorsigaluttuinnarpoq, soorunalumi meeqqanut tamanna sunniuteqarpoq.

Lars: Taava 1985-mi ilungersorlunga ilaqutariittut ingerlaqqilernissarput suliniutigilerpara. Suliffinniit soraarpunga, nunaannarmullu nuulluta. Iluaqutaalaarpoq. Pisarnitsitut nuliaralu tamatta immikkut imminuinnaq eqqarsaatigisaratta ajorsiartoqqilerpoq. Ukiuni 16-ini aappareereerluta 1989-imi februaarimi avippugut, ilaqutariittullu avissaarluta.

Judith: Meeqqanut kingunerlunnera takullugu assut ajorpoq. Kisianni Larsilu ima akeqqiussimatigaagut allaat angajoqqaatut oqartussaaqatigiinnissarput isumaqatigiissutigisinnaanatigu. Meeqqat tamaasa uanga tigummilerpakka.

Lars: Aappariinnerput annaanniarlugu misiliigaluartarpugut. Allaat Guutimut ikioqqulluta qinusarpugut, itinerusumilli Guuti ilisimasaqarfiginngilarput.

Judith: Ilumut, allaat misigisimavugut Guuti tusarnaanngilluinnartoq. Kingunerujussuatigut paasivarput qinugaangatta Guuti ilumut tusarnaartartoq.

Lars: Taamani uagut eqqumaffigisimanngilluinnarparput nammineq iliuuseqarnissarput. Tamaattumik alianaraluartumik avippugut.

Ilimananngeqqinnaamik Larsimut pisoqarpoq

Lars: Suli kisimiitillunga, pissutsit ilimananngeqqinnaamik allanngorujussuarput. Ullut ilaanni atuagassiat marluk Jehovap nalunaajaasuinit pivakka. Ulloq taanna tikillugu nalunaajaasunik itigartitsisarneq ileqqoriinnarsimavara. Atuagassianili takusinnaavara Jehovamut nalunaajaasut Guuti Jesusilu upperigaat. Kristumiuusut nalugakku, tupaallaqaanga.

Tamatuma nalaani arnamik allamik inooqateqalerpunga, sunaaffa Jehovamut nalunaajaasuusimagaluartoq. Biibilimi takutipaa Guutip „Jehova“ aterigaa. Taamaammat „Jehovap nalunaajaasui“ isumaqartoq „Guutip nalunaajaasui“!

Isumaqatigiippugut Jehovap nalunaajaasuisa ataatsimeersuartarfiannut Silkeborgimiittumut tamanut ammasumik oqalugiaammut tusarnaariassasunga. Tamatuma ilikkagaqarusunnerulersippaanga. Illoqarfigisanni naalagaaffilersaarfik pulaarpara Biibilimillu atuaqqisaaqatigineqarnissara isumagineqarpoq. Sivitsunngitsoq paasivara inooriaasera kukkusuusoq, taamaammat arnaatiga qimappara illoqarfigisimasannullu nuullunga. Tassani nangaalaaraluarpunga, taavali Jehovap Nalunaajaasui attavigaakka Biibilimillu ilinniarteqqullunga qinnuigalugit.

Sulili nalorninartoqartippara. Ilumut Guutip innuttarai? Adventistitut perorsarneqarsimavunga. Meeraallungami ilikkagarisimasakka? Taava adventistit attaveqarfigaakka. Palasip pingasunngornikkut atuaqatigisarniarlunga neriorsorpaanga, Jehovap nalunaajaasuisa ataasinngornikkut atuaqatigisaraannga. Maannakkut Biibili najoqqutaralugu tamarmik immikkut nassuiassavaat pingaarutillit sisamat qanoq paasisimaneritik: Jesusip tikiuteqqinissaa, toqusut makinnissaat, ataasiullunilu pingasuusumik ajoqersuut ilagiillu aaqqissugaanerat. Qaammatialunnguit ilungersorlunga atuaqqissaareerama  paasinarsivoq. Immikkoortuni sisamani — allatigullumi — paasinarsivoq Jehovap Nalunaajaasuisa kisimik ilinniakkatik tamaasa Biibilimik tunngaveqartikkaat. Tamanna nuannaarutigalugu ilagiinnut peqataalerpunga. Guutimut tunniulluinnarnermik kinguneqarpoq, 1990-milu maajimi kuisillunga.

Judithimi qanoq ingerlava?

Judith: Aappariinnitta ajorsilluinnarnerata nalaani naalagiakulasorujussuanngorsimavunga. Iluarinngilluinnarpara tusarakku Lars Jehovamut nalunaajaasunngulersoq. Nukarlequtitta Jonasip qulinik ukiullip ilaannikkut ataatani pulaartarpaa, uangali Nalunaajaasut ataatsimiinnerinut nukappiaqqap ilaanissaa inerteqqutaatilerpara. Tamanna Larsip naalagaaffiup immikkoortuanut suliassanngortippaa, itigartinneqarlunili.

Angutaateqalerpunga, illoqarfitsinnilu politikkikkut suliniuterpassuarnut akuliussimallunga; taamaattumik taamanikkut ilaqutariittut ataatsimooqqilernissarput eqqaaneqarsimagaluarpat, inunnik Marsiliartitsisoqarnissaatulli ajornartigisorissagaluarpara.

Jehovap nalunaajaasuinut sakkussarsiorlunga palasiliarpunga. Toqqaannartumik oqarpoq Jehovap nalunaajaasui pillugit ilisimasaqarani, taakkuluunniit pillugit atuagaateqarnani. Oqarporli ingalassimalluinnagassaasut. Soorunami taakkununnga assortuiniarninnut iluaqutaanngilaq. Takorloorsimanngisaannakkattulli nalunaajaasut naapittariaqalerpakka.

Imaakkami, qatanngutiga, Sverigemi najugalik Jehovamut nalunaajaasunngorsimavoq. Katittussanngorpoq, uangalu naalagaaffilersaarfiannut qaaqqusaallunga! Katittorsiornermi misigisap paqumisunnikka tamaasa suujunnaarsippai. Tupigusuutigeqisannik Jehovap Nalunaajaasui ’ilumoorsaartuaannanngillat’ soorlu taamatut isumaqartartunga, nuannaartuullutilli qiimasuupput.

Piffissap ingerlanerani Lars allanngorujussuarsimavoq. Akisussaassuseqarnerulersimavoq, piffissaq meeqqanut atortarpaa, allanik pingaartitsisuuvoq noqissinnaassuseqarlunilu, imertarninilu aqussinnaanngorsimallugu. Kajuminnarsisimavoq! Kissaatigiuaannakkattut ilersimavoq. Maanna ugguaatigiinnartariaqarpara uigiunnaarsimagakku, ullullu ilaanni allap uitaarissagaa.

Naapinniarlugu pilersaalerpunga. Jonas ataataminut pulaartillugu, qatanngutikka arnat marluk isumaqatigaakka Larsimukassasugut, ajaasa soraluaminnik ilassinnikkumanerat, patsisiliullugu. Tivolimi naapippugut, nukappiararlu ajaasa allamukaakkaat, Larsilu issiavimmut ingilluta oqaloqatigiilerpugut.

Siunissarput eqqartuleruttoriga Larsip atuagaq kaasarfimminit amuaa. Ilaqutariilluni inuuneq pilluarnartoq qanoq anguneqarsinnaasoq-mik taaguuteqarpoq. * Tunniuppaa siunnersuutigalugulu kapitalit ilaqutariittut pilluarnissamut uisup nuliaasullu akisussaffii pillugit atuassagikka. Oqarpoq Biibilimi allassimaffiit pingaarnerutillugit misissussagikka.

Issiavitsinnit nikuikkatta eqisimaarniaraluarpara, inussiarnersumilli peersippaanga. Upperisartaaminut qanoq isumaqarnersunga paaseqqaartinnagu Larsip uterfiginianngilaanga. Ajuallaatigigaluarpara, paasilertorparali piumasaqaataa eqqortuusoq, tamannalu qaquguluunniit aappariileqqissagaluarutta uannut iluaqutaaginnassasoq.

Aatsaat taama Jehovap Nalunaajaasui pillugit alapernaatsigilerpunga. Aqaguani piaartumik arnaq Jehovamut nalunaajaasoq nalunngisara saaffigaara; isumaqatigiippugut uinilu upperisartik pillugu paasissutississagaannga. Paasivara apeqqutikka tamaasa Biibili atorlugu akisinnaagaat. Tulleriiginnarnik tunniutiinnartariaqarsimavunga.

Piffissap ingerlanerani oqaluffimmut ilaasortaajunnaarpunga politikkikkullu suliniutikka tamaasa unitsillugit. Allaat pujortartarunnaarpunga — tamanik sapernarnerpaajuvoq. 1990-imi Biibilimik atuaqqissaaqatigineqartalerpunga, 1991-imilu apriilimi Jehovap nalunaajaasuatut kuisippunga.

Aappassaanik katinnerat

Judith: Maanna marluulluta Jehovamut nalunaajaasuuvugut kuisimasut. Avissaarsimavugut,  Biibilili tamatta ilikkarsimallutigu. Ilitsersuutit imarisai peqqinnarlutillu inuunermik nuannersunngortitsisut pissutaallutik inuttut allanngorluinnarsimavugut. Suli immitsinnut nuannariippugut, aap, immaqa siornatigornit annerusumik. Piumagutta kateqqissinnaanngorpugut — taamaaliorpugullu. Tamatumuuna Københavnip Rådhusianiunngitsoq, Jehovap Nalunaajaasuisali naalagaaffilersaarfianni.

Lars: Upperiuminaatsumik pisoqarpoq — ilaqutariittut ataatsimuuleqqippugut. Takorloorneqarsinnaanngilaq qanoq nuannaartigisugut.

Judith: Katinnerput nukappiaraatitsinnit pingasunit, ilaquttatsinnit, ikinngutitaatsinnit ikinngutitoqatsinnillu amerlaqisunit najuuffigineqarpoq. Misigisaq nuanninngaartoq. Jonas nuannaaqaaq. Najuuttut ilaasa aappariinnitsinni siullermi ilisarisimavaatigut; aappareeqqilernerput nuannaarutigeqaat — Jehovap Nalunaajaasuisalu akornanni nuannaarneq takullugu tupaallaatigeqaat.

Nukappiaqqat

Lars: Kuisinnitta kingorna nuannaarutigeqisatsinnik ernivut marluk aalajangersimapput inuunertik Jehovamut tunniulluinnarniarlugu.

Judith: Ataataminulli pulaartalerami Biibilimit ilikkakkani Jonasip nuannarisimaqai. Quliinnarnik ukioqarluni ataataminut nuunnialersimagaluarpoq. „Ataatap Biibili maleruarpaa,“ oqartarpoq. 14-inik ukioqarluni kuisikkusulerpoq. Maanna ilinniarnini naammasseriaramiuk piffissaq tamaat atorlugu oqaluussisartunngorpoq.

Lars: Angajullequterput Martin ullumikkut 27-nik ukioqarpoq. Allanngornerujussuarput takullugu assut eqqarsaatissinneqarsimavoq. Uagutsinniigunnaarpoq illoqarfimmullu allamut nuulluni. Ukiullu marluk matuma siorna Biibilimik atuaqqissaaqatigineqartalerpoq. Qaammatit tallimat qaangiuttut kuisinnissaminut piareerpoq. Kristumiutullu inuunermini siunissami ajunngitsunik pilersaaruteqarluni.

Ernerput akulleq Thomas Jehovamut Nalunaajaasuunngilaq. Asaqaarpulli, attaveqarnerpullu ajunngitsorujussuuvoq. Ilaqutariittut allannguinivut nuannaarutigeqai. Tamatta isumaqarpugut ilaqutariittut ataatsimuuleqqinnitsinni inuunermut najoqqutassiat Biibilimi ilikkakkavut pissutaasut. Isumaqarpunga pilluaqqussutaasoq ilaqutariittut qaqugukkulluunniit katersuussinnaaleratta — nukappiaqqat pingasut, ataata anaanalu!

Ullumikkut

Lars: Oqarnianngilanga naammalluinnartunngorluta. Ilikkagaqarsimavugulli. Asanninneq ataqqeqatigiinnerlu aappariinnerup ingerlalluarnissaanut pingaaruteqarluinnartuusut. Ullumikkut aappariinnitsinni tunngaviusut siullermernit allaanerulluinnarput. Jehova Guuti uagutsinnit oqartussaanerusutut akuerisimavarput. Taanna toqqammavissaalluarpoq. Tamatuma Judithilu ataasiussuseqartippaatigut, peqatigiillutalu siunissarput qilanaaraarput.

Judith: Oqarsinnaagunarpugut, ilaqutariinnut siunnersortitut Jehova tamanit pitsaanerpaajusoq. Uagut tamatumunnga uppernarsaataavugut. (gE 22/5 2000)

[Quppernerup ataani ilanngussaq]

[Qupp. 20-mi assiliartaq]

Lars Judithillu 1973-imi siullermik katikkamik

[Qupp. 21-mi assiliartaq]

Nukappiaqqat pingasut ilaquttatik annaavaat — ataatsimuuleqqillutillu

[Qupp. 23-mi assiliartaq]

Lars Judithilu ullumikkut, Biibilip siunnersuutai iluaqutigalugit ataasiussuseqaqqilerput