Qungujugit — ilinnut iluaqutaavoq!

JAPANIMI ITERITSI!-P ILANNGUTASSIORTUANIT

PIVIUSUUGAANGAMI tatiginninnginneq nungutittarpaa. Paqumisunneq ukiut ingerlaneranni alligaluttuinnarsimasoq peertarpaa. Pasillerneq tatiginninnginnerlu pissutigalugit uummatit manngertissimasut aqilisittarpai. Inunnut amerlasuunut iluaallaataallunilu nuannaarutaavoq. Oqarporlusooq: „Paasivakkit. Ernumanak,“ imaluunniit: „Neriuppunga ikinngutigiilersinnaasugut.“ Sunaana taamak sunniisinnaatigisoq? Qungujunneq. Immaqa ILLIT qungujunnerit.

Qungujunneq sunaava? Oqaatsinik ujarlerfissiap nassuiarpaa ’kiinnap isikkua eqit qummut saatillugit isillu nuannaartillugit; nuannaarnermut, qiimanermut, inussiarnernermullu ilisarnaat’. Tassaavoq nuannaarluni qungujunnerup isertugaataa. Oqaaseqanngikkaluarluni qungujunnikkut allanut qanoq misigissuseqarneq takutinneqartarpoq. Qungujunnerup aamma mitallerneq asissuinerluunniit nalunaarsinnaavaa, tamannali allaavoq.

Qungujunnerput assigiinngissutaava? Immaqa eqqaamasinnaavatit pisimasut allap qungujunnerata oqiluallatsitsisikkaatit imaluunniit eqqissiallatsikkaatit? Imaluunniit qungujunngitsoornerup annilaangalersikkaatit akuerineqanngitsutulluunniit misigilersillutit? Aap, qungujunneq assigiinngissutaavoq. Qungujuttoq qungujuffigineqartorlu sunnertarpai. Job, Biibilip nalaani inuusimasoq, akerlilersortini pillugit oqarpoq: „Qungujuffigigaangatsik nuannaajummernermit soorlu upperineq sapingajattaraat, saamasutut isikkoqaraangama nakussatsittarput.“ (Job 29:24) Jobip kiinaani ’qaamaneq’ immaqa eqqarsaatimigut nuannaarneranut qiimaneranulluunniit takussutissaasimavoq.

Ullumikkut nalunngilarput qungujunnerup ajunngitsumik sunniisinnaanera. Sukassimanerit inussiarnersumik qungujunnikkut qasukkartinneqarsinnaapput? Aalap naqitseruloorneratigut qalaassiviup aalaata aniaffianut assersuunneqarsinnaavoq. Misigigaangatta ilungersuummeqqalluta pakatsisimallutaluunniit, qungujunnerup ilungersornerput annikillisissavaa pakatsisimajunnaarsillutalu. Assersuutigalugu Tomokop maluginiarsimavaa allat isigikulagaanni. Isumaqarpoq inuit ajortumik isumaqarfigigaanni isaasigut qiviaraangamigit alapallattarmata. Tomoko kiserliorpoq aliasullunilu. Ullut ilaanni ikinngutaata arnap siunnersorpaa isaasigut isigisani qungujuttaqullugit. Tomokop sapaatip-akunneri marluk taamaaliorluni misilippaa tupigusuutigeqaalu tamarmik  qungujunnini akimmassuk. Sukassimajunnaarpoq. „Inuuneq nuannerseqaaq,“ oqarpoq. Aap, qungujunnerup allanut qasukkarsimaarnerulersittarpaatigut inussiarnernerulersittarlutalu.

Ilinnut allanullu iluaqutaasumik sunniinera

Qungujunnerup inuk misigissusaatigut sunnersinnavaa. Eqqortumik isumaqarnissamut ilasaataavoq. Aamma timikkut peqqissutsimut iluaqutaavoq. Imaattumik oqariartaaseqarpoq: „Illarneq peqqinnartuuvoq.“ Nakorsat oqaasissaqarluartut malugisimavaat isumakkut qanoq issuseq timip peqqissusianut sunniuteqartorujussuusoq. Misissuinerit amerlasuut takutippaat sivisuumik uisakajaartuaannarnerup misigissutsillu nikallornartut assigisaasalu timip imminut illersorsinnaassusia ajoqusertaraat. Akerlianilli qungujuinnarluta ilorrisimaartutut misigilertarpugut, illarnerup allaat timip imminut illersorsinnaassusia pitsaanerulersittarpaa.

Qungujunneq allanut sunniuteqartorujussuusarpoq. Takorlooriaruk pisimasoq allanit ilitsersorneqartutit oqaaqqissaarneqarlutilluunniit. Ilitsersortivit kiinaata qanoq isikkoqarnissaa piumanerussaviuk? Kiinaq inussiarniitsoq naakkittaatsorluunniit kamannermut, qinngarinninnermut, akuersaannginnermut allaallu akeqqersimaarnermut takussutaasinnaavoq. Akerlianilli ilitsersuisup nuannersumik qungujunnerata, qularnanngitsumik toqqissiallatsissavaatit — taamaalillunilu ilitsersuineq akueriuminarnerulersillugu. Qularnanngivissumik pisuni pissanganartorsiorfiusuni paatsooqatigiissinnaanerit qungujunnerup annikillisittarpai.

Eqqarsaatit nuannersut qungujunnissaq ajornannginnerulersittarpaat

Soorunami amerlanerusugut inuussutissarsiutigalugu isiginnaartitsisartutut naalakkerneqarlutik kigutitik nuisillugit qungujussinnaasutut inngilavut; taamaannissarpullu aamma kissaatiginngilarput. Kissaatigaarput qungujunnerput pisuusaartuussanngitsoq piviusuussasorli. Ilinniartitsisoq ataqatigiinnermut atuartitsisuusoq oqarsimavoq: „Pingaaruteqarpoq qasukkarsimaarnissaq qungujunnerullu qamannga pisuunissa, taamaanngippat qungujuttuusaarninngussaaq.“ Qanoq ililluni ilumoortumik qamanngalu pisumik qungujuttoqarsinnaava? Tamatumunnga Biibilip ikiorsinnaavaatigut. Oqalunnerput pillugu Matîuse 12:34, 35-mi allassimavoq: ’Uummatip ulikkaarutaanit qaneq oqaluttaraaq. Inuup ajunngitsup ajunngitsut anisittarai uummatimi pequusivianit ajunngitsumit; inuulli ajortup ajortut anisittarai pequusivimminit ajortumit.’

Eqqaamajuk qungujunneq oqaaseqarani misigissutsinik takutitsinerummat. Eqqaamagutsigu ’uummatip ulikkaarutaanik’ oqaluttarluta, ’ajunngitsullu’ ’pequusivimmit ajunngitsumit’ pisartut, paasinarsissaaq qungujunneq piviusoq eqqarsaatitsinnit misigissutitsinnillu pilerfeqartoq.  Aap, uummatitta ulikkaarutai, qaquguluunniit ersersissavavut, oqaatitsigut iliuutitsigullu piinnarnata, aammali kiinnatta isikkuatigut. Kiinnatta isikkuata takutittarpaa allat qanoq eqqarsaatigigivut. Taamaattumik ilaquttatta, sanilitta ikinngutinnaattalu pissusii ajunngitsut pingaarnerutitsigit. Taamaappat qungujuffiginissaat ajornannginnerutissavarput. Qungujunneq piviusuussaaq, tassami uummammit ajunngissutsimik, naakkittassutsimik, inussiarnissutsimillu ulikkaartumit qungujunnerussagami. Isigut nuannaangaassapput, allallu nalussanngilaat ilumoorussisugut.

Miserratissaanngilarli ilaasa tunuliaqutatik inuillu ilagisartakkatik pissutigalugit qungujunneq allanit ajornakusoortinnerummassuk. Naak inoqatiminnut inussiarnersumik pissuseqaraluarlutik, qungujuffiginissaat sungiusimanngiinnarpaat. Assersuutigalugu ileqqutoqqat malillugit ilimasuutigineqartarpoq angutit Japanimiut tatitussusertik pigiinnassagaat misigissutsitillu ersersinnagit. Taamaammat amerlanersaasa ilisarisimanngisaminnut qungujunneq sungiusimanngilaat. Immaqa kulturini allani aamma taamaappoq. Ilaat ittoortarput immaqalu allanut qungujunnissartik ajornakusoortillugu. Taamaattumik qanoq qungujulatiginersugut, imaluunniit qanoq qungujukulatiginersugut naapertorlugu immitsinnut isummerfigisariaqanngilagut. Inuit assigiinngitsuupput, aammattaaq pissusii allanullu atassuteqartarnerat taamaapput.

Allanulli qungujunneq unamminiarnartutut isigigukku, soormi sulissutigigukku? Biibilimi imaattumik siunnersuuteqarpoq: ’Ajunngitsuliortali arajussinata . . . Taamaattumik piginnaaffissaqartilluta tamanut ajunngitsuliorta,’ (Galâsiamiut 6:9, 10) ’Ajunngitsuliornerit’ tamanut iliuuserisinnaasat ilagaat qungujuffigineri. Illittaaq taamaaliorsinnaavutit. Siulliullutit allat ilassikkit qiimmassaatissaannik oqarfigalugillu qungujukkit. Nuannaarutaangaassapput. Illittaaq paasissavat sungiukkiartuaarnerani qungujunneq ajornannginnerujussuanngortoq. (gE 8/7 2000)

[Qupp. 12-mi ungalusaq]

Mianersoqqussut

Ajoraluartumik qungujunnerit tamarmik piviusuunngillat. Iluanaarniapiluttartut, peqquserluttut, nangaassuteqaratik tuniniaasartut allallu qungujorujussuartarput. Nalunngilaat qungujunnerup inuit mianersorunnaartittarai eqqissisimalersillugillu. Inuit ileqqorluttut minguttuunilluunniit pissuteqartut aamma kajungernartumik qungujussinnaapput. Kisianni ilumoorusinngillat; peqquserluttuupput. (Nalunaajaasup oqaasii 7:6) Ingasalluta allanut ilimasupilussanngilagut, kisianni erseqqissumik paasisariaqarparput ’ulluni kingullerni’ ajornartunik nalliuttoqarfiusuni inuugatta, Jesusip siunnersuutaa malittariaqarparput ’silassorilluta pulateriaarsuttut peqqusersuillutalu tuisut’ pisariaqarpugut. — 2 Timûtiuse 3:1; Matîuse 10:16.

[Qupp. 13-mi assiliartaq]

Qungujullutit allat ilassinissaat siulliuffigisaruk