Inuusuttut aperipput:

Nunami allamiinnera qanoq iluatsissinnaava?

„Mittarfimmut mikkatta angerlarnissara kisiat kissaatigaara! . . . Takusassarsiorusukkunnaavissimavunga ilisimasassarsiorusukkunnaavissimallungalu.“ — Uta.

NUNAMI allami kisimiinneq annilaanganarsinnaavoq. Inuusuttorpassuilli nunamut allamut nuukkallartarput. Ilaat ilinniagaqarniarlutik immikkulluunniit ittunik pikkorissarniarlutik taamaaliortarput. Ilaat oqaatsinik ilinniarusuttarput. Ilaat aningaasarsiorniaannartarput. Ilaallu Guutip naalagaaffia pillugu oqaluussisartunik pisariaqartitsiffiusumi kiffartorniarlutik nunanut allanut nuuttarput.

Aallarnissannut pissutissaqarluaruit — anersaakkullu pisariaqartitatit anguniakkatillu eqqarsaatigereerlugit * — nunami allamiinnerit iluatsitsinniarlugu qanoq iliorsinnaavit?

Naleqqussarnissat aalajangiusimajuk

Pingaarnerpaamik naleqqussarusussuseqartariaqarputit. Imaanngilaq kristumiunut najoqqutassiat unioqqutissagitit anersaakkulluunniit ileqqut taamaatissagitit. Imaassinnaavorli nerisassat allatut ittut sungiuttariaqaritit, pissuserissaarnermut najoqqutassiat nutaat ilinniartariaqaritit periaatsilluunniit nutaat ilinniartariaqaritit. Ileqqut taakku nutaat angerlarsimaffinni sungiusimasannit allaanerujussuusinnaapput. Jesusilli ’eqqartuussinaveersaarnissamik’ oqaaqqissaarutaa matumani atorneqarluarsinnaavoq. (Matîuse 7:1) Naggueqatigiit kikkulluunniit imaluunniit kulturi sunaluunnit allanit pitsaanerusutut misigisinnaatitaanngillat. (apustilit suliait 17:26) Soorlu utoqqaat siornatigut inuusuttut ullumikkut inuusuttunut isornartorsiuiniarlutik naleqqiutissanngikkaat, taamatulli inuusuttut nunami allami najugaqartut nuna takornartaq nunaminnut isornartorsiorpaluttumik naleqqiutissanngilaat. (Nalunaajaasup oqaasii 7:10) Nunap nutaap kulturillu nutaap ajunngitsortai sammiuakkit. Aammattaaq eqqarsaatigiuk nunap oqaasii ilikkapallannerugukkit sungiussipallannerussaatit.

Ajoqersuiartortutut apustili Paulus kulturinut assigiinngitsunut pitsaasumik naleqqussartarsimavoq ’tamanut tamalaasutut ikkumagami’. (1 Korintumiut 9:22) Assingusumik isiginnittaaseqaruit ajornannginnerusumik naleqqussarsinnaavutit. Adrianne ilaqutariinni Tysklandimi kiffaavoq. Oqarpoq: „Sumulluunniit piareersimasariaqarpunga, allat uannut  naleqqussarnissaat naatsorsuutigisinnaannginnakku.“

’Angerlarserpunga!’

Sapaatip-akunnerini siullerni nuannaanngittarneq angerlarsernerlu nalinginnaavoq. Biibilimi allassimavoq Jakob ukiut 20-t sinnerlugit nunami allami najugaqareersimagaluarluni ’ataatami illuanut angerlarseqisoq’. (1 Moses 31:30) Taamaattumik tupaallassanngilatit ilaannikkut nikallungasaruit. Qimatatilli eqqarsaatigiuaannarukkit nikallornerussaatit. (4 Moses 11:4, 5) Pissutsinut nutaanut sungiussiniarluni iliuuseqaraanni nikallunganeq qaangerneqarluarsinnaaneruvoq. Allannikkut sianernikkulluunniit ilaquttatit attavigisarukkit pitsaagaluartoq, sianerpallaarnerpit immaqa sumiiffimmut nutaamut sungiussitinngitsuussavaatit.

Inuusuttorpassuit kristumiut anersaakkut sammisaqaqqilerneq kiserliornaveersaatigisarpaat. (Filípimiut 3:16) Amber nunami allamiinnermini sapaatip-akunneri siulliit pillugit oqarpoq: „Unnukkut suliassaqanngikkaangat nuanniittaqaaq, taamaattumik atuaqqissaarneruniartarpunga atuakkamilluunniit atuarlunga.“ Niviarsiaq Rachelimik atilik, tuluk Tysklandimi kiffaasoq, nammineq misilittakkaminik siunnersuivoq: „Ingerlaannaq ilagiinnut akuliusimalerit. Aallaqqaammullu ataatsimiigiartarit.“ Immaqa aallaqqaammut ataatsimiigiarnissannut ikiorneqartariaqarputit. Kristumiulli ilagiivini ajunngitsunik ikinnguteqalersinnaavutit ’qatanngutissatut arnassiatullu’ ittunik. — Mákorse 10:29, 30.

Aammattaaq kristumiutut oqaluusseqataaneq anersaakkut ileqquulluartunut ilaavoq. Oqaluussineq anersaakkut iluaqutaaginnanngilaq, aammattaarli oqaatsinik nutaanik ilikkapallatsissavaatit kulturimillu nutaamik sungiussipallatsillutit.

Kiisalu qinunikkut attaveqarluarniarlutit atuaqqissaartarnermillu ileqqorilluarniarlutit iliuuseqartariaqarputit. Anersaakkut peqqissuunissaq pingaaruteqarpoq. (Rûmamiut 12:12; 1 Timûtiuse 4:15) Tamanna pissutigalugu Adrianne, siuliani taaneqartoq, nammineq oqaatsini atorlugit atuagassianik Biibililersaarutinik nassarsimavoq.

Ilaqutariinni najugaqarneq

Kristumiut inuusuttut ilaasa nunami allamiitillutik uppeqatiminni najugaqarnissartik isumagisimavaat. Najugaqarfigisanit angajoqqaatut iliorfigineqarnissaq naatsorsuutigineqarsinnaanngilaq, ikinngutaalersinnaappulli pitsaasut anersaakkullu qiimmassaasut. — Ussatit 27:17.

Ilaqutariit najugaqarfigisat ajunngitsumik atassuteqarfigissagaanni ammasumik attaveqartariaqarpoq. (Ussatit 15:22; 20:5; 25:11) Amber oqarpoq: „Akisussaaffinnik paasitinneqarneq pitsaavoq. Taava najugaqarfigisat sumik ilimasuffiginninnersut namminerlu sumik ilimasuffiginerlugit ilisimaneqassaaq.“ Illumi maleruaqqusat angerlarsimaffimmilu qanoq annertutigisumik ikiuutaarnissat naatsorsuutigineqarnersoq paasiniakkit. Tamakku eqqartorneqarluartariaqarput.

Uppeqatiginngisani najugaqaraanni suliffeqaraannilu pissutsit immikkut artornarsinnaapput. Biibilimi najoqqutassianut isummatit ilaqutariit paasinngippatigik artorsinneqariaannaavutit. (Ussatit 13:20) Immaqa piffissami anersaakkut ittunik pisussaaffeqarfiup nalaani, assersuutigalugu kristumiut ataatsimiiffiisa nalaani, illumi suleqquneqarsinnaavutit. Ilaqutariinni uppeqatiginngisani najugaqartariaqassagaanni piareersimanissaq pitsaassaaq.

 Rachel ima siunnersuivoq: „Kristumiuuninnik ilisimatikkit. Aallaqqaammulli ammasumik oqaluttuukkukkit pitsaanerussaaq.“ Upperisarsiornikkut ileqqussatigullu isummatit oqaluttuarigukkit illersuutigisinnaavat. Aammattaaq ataatsimiinnerit oqaluussinerlu ilinnut qanoq pingaartiginersut sulisitsisut paasitilluassavat. Kiisalu pingaarutillit pillugit soorlu suliffiup sivisussusia, sulinngiffik akissarsiallu pillugit, allaganngorlugu isumaqatigiissusiorneq silatusaarnerussaaq. Taamaalilluni pakatsinerit pinngitsoortinneqarsinnaapput.

Ajornartorsiutinik aaqqiinerit

Sapinngisamik iliuuseqarsimagaluaraanniluunniit ajornartorsiortoqarsinnaavoq. Assersuutigalugu najugaqarfippit nooqquppatsit qanoq iliussavit? Iliuuseqarfiginissaa ajornakusoorsinnaavoq. Arlaannik paatsuuisoqarsimappat najugaqarfigisatit eqqissisimasumik isumatusaartumillu pissutsit pillugit oqaloqatiginiarsinnaavatit. (Ussatit 15:1) Kukkussutigisimasappit nassuerutiginissaannut kajumissuseqarit. Immaqa isumartik allanngortissavaat. Taamaanngippat allami najugassarsiortariaqarputit.

Allanittaaq ajornartorsiuteqalersinnaavoq ikioqqusariaqalerlutit. Assersuutigalugu aningaasatigut ajornartorsiulersinnaavutit napparsimalerlutilluunniit. Immaqa angajoqqaannit aaneqarnissat annilaangassutigaat, taamaattumillu qanoq pisoqarneranik oqaluttuunnissaat nangaassutigalugu. Aammami ungasipput, nunamilu allami ajornartorsiummik taamaattumik qanoq aaqqiinissartik immaqa naluaat. Immaqa najugarigallakkanni ilagiinni utoqqaanertat ajornartorsiutit taamaattut misilittagaqarfigaat atoriaannaasunillu siunnersuuteqarsinnaallutik. Aamma immaqa pissutsit pillugit angajoqqaatit oqaluttuuttariaqarnerlugit aalajangerniarninni ikiorsinnaavaatsit.

Angerlaruit

Nunami allamiinninni unamminiarnartoqaraluartoq ajornartorsiuteqaraluartorlu pissarsiffiulluarsinnaavoq, ingammik aallarninnut anersaakkut anguniakkat pissutaappata. Immaqali angerlartariaqalissaatit. Andreas oqarpoq: „Eqqaamasat nuannersorpassuit nikallornartunik puiuisitsisarput — angerlarnera artorsaatigisimaqaara.“ Taamatut misigigaluaruilluunniit isummanik nutaanik angerlaassigavit ilisimagissanngilat ikinngutitit ilaquttatillu suleriaatsiminnik allannguissasut. Sumiiffinni allani qanoq iliortarnersut oqaluuseriuaannarnerisigut paaminnartooqinak. Qularnanngilaq kikkut tamaasa misigisannik oqaluttuukkusussagitit, tamarmilli tulluusimaaqatiginngippatsit pakatseqinak.

Soorunami nunamut allamut nuukkallarneq aalajangerneruvoq annertooq. Angajoqqaatillu oqaloqatigiissutigereerlugu nuunnissannut pissutissaqarluarsoriguit unamminiarnartunut naammattuugassannut sillimareertariaqarputit. Inuunermi aalajangikkatut annertuutut allatulli akissaanik naatsorsueqqaarnissaq silatusaarnerussaaq. — Lúkarse 14:28-30. (gE 22/7 2000)

[Quppernerup ataani ilanngussaq]

[Qupp. 13-mi ungalusaq/​assiliartaq]]

Isumannaanneq pillugu siunnersuutit

● Passi, aningaasat uternissamullu bilitsi isumannaatsumiitikkit.

● Passit, nunamut isernissamut akuersissut aamma/imaluunniit visumit, uternissamut bilitsit pappialallu pingaarutillit allat kopiikkit. Kopiiannik nassartarit nunannilu angajoqqaannut ikinngutinnulluunniit kopiiannik nassitsillutit.

● Nunanni angajoqqaavit ikinngutivilluunniit najugaqarfivillu telefoniisa normuinik nassartarit.

● Angutaaguit arnanut arnaaguillu angutinut ilaqutariinni najugaqarfinni, atuarfinni, suliffinni allanilu naleqquttumik pissuseqartarit.

● Nunami najugarisanni oqaatsit oqaaseqatigiillu atorneqarnerusut ilinniakkit.

● Aallartinnak nakorsamut misissortigit. Nakorsaatinik atorfissaqartissinnaasannik naammattunik nassarit.

[Qupp. 12-mi assiliartaq]

Najugaqarfitillu paatsooqatigiikkussi, eqqissillusi oqaloqatigiigitsi