Aappariinnersi annaanneqarsinnaavoq

Aappariinnut unnersuussutinik atoriaannaasunik Biibili ulikkaarpoq. Tamanna tupaallannanngilaq, Biibilimi aappariinnik pilersitsumit isumassarsiarititaavoq.

BIIBILIMI aappariit piviusorsiortumik isigineqarput. Allassimavoq aappariit tamarmik ’uinngup piisigut naalliuuteqassasut’ imaluunniit New English Bible-p nutserneqarneratut ’aliasuuteqarlutillu anniaateqassasut’. (1 Korintumiut 7:28) Biibilimili aamma allassimavoq aappariinneq aappariinnut pilluarfiusinnaasoq nuannersuusinnaasorlu taamaattariaqartorlu.  (Ussatit 5:18, 19) Oqaatsit taakku imminnut akerliunngillat. Takutiinnarpaali aappariit ajornartorsiungaaraluarlutik qanimut asannittumillu attaveqaqatigiissinnaasut.

Aappariinnersi ajalusooqqajaava? Ajornartorsiutit pakatsinerillu qanga tatigeqatigiinnissinnit nuannaarnissinnillu aappariinnissinni malunnarneruppat? Ukiorpassuarni asanasi aappariikkaluarlusi annaasimasarsi uterteqqissinnaavarsi. Soorunami piviusorsiortuusariaqarpoq — angutip arnalluunniit naammaalluinnanngitsup kialuunniit aappariinneq naammalluinnartoq angusinnaanngilaa. Ajorseriataartarnerit akiorniarlugit iliuuserineqarsinnaasut arlaqarput.

Tulliuttut atuaatigalugit aappariinnissinnut soqutiginarsinnaasut maluginiariakkit. Aapparpit kukkussutigisartargai isiginiarnerunagit, siunnersuutit sorliit illit atorsinnaanerlugit maluginiarsinnaavat, unnersuussutillu Biibilimeersut malillugit. Immaqa paasilissavat ilimagisannit aappariinnissinnut neriuutissaqarnerusoq.

Siullermik eqqortumik isiginnittaaseqarnerup pingaaruteqarnera takoriartigu. Aappariinnermut atatillugu pisussaaffimmut isiginnittaaseq aapparmullu misigissutsit pingaaruteqarluinnarput.

Aappariittut pisussaaffik

Aappariinnersi pitsaanerulersikkusukkukku siunissami ungasinnerusoq eqqarsaatigalugu sulissuteqarusuttariaqarputit. Angut arnarlu avissaartitassaanngitsutut aappariilersillugit aappariinneq Guutimit pilersinneqarpoq. (1 Moses 2:24; Matîuse 19:4, 5) Aapparmut attaveqarneq suliffimmut soraarfiusinnaasumut inimilluunniit attartornermut isumaqatigiissummik unioqqutitsigaluarluni qimassinnaasamut assersuunneqarsinnaanngilaq. Inuit marluk katikkaangamik qanorluunniit pisoqassagaluarpat aappariiginnarniarlutik ilumoorsaarlutik neriorsuisarput. Aappariinnermut atatillugu pisussaalluinnarneq ukiut 2000-ngajaat matuma siorna Jesus Kristusip oqaasiini erserpoq: ’Guutip katititai inuup avissaartissanngilai.’ — Matîuse 19.6.

Immaqa oqartoqarsinnaavoq: „Ilami suli aappariippugut. Pisussaaffigeqatigiittutut misiginitsinnut uppernarsaataanngila?’ Immaqa taamaappoq. Allaaserisamili siullermi eqqaaneqartutut ilaat aappariipput nikeriarfeqanngitsutut, asanani aappariinnermi parnaarussaasutut, misigalutik. Aappariinnerup naammaginartuuginnarnani nuannersuunissaa anguniagarisariaqarpaat. Pisussaaffigeqatigiittutut misigineq aappariinnermik aaqqissuussinermut  ilumoornerinnaasariaqanngilaq, aammali asajumasamut sernigiumasamullu ilumoornerusariaqarluni. — Evfisumiut 5:33.

Aappariit imminnut oqaloriaasiisa qanoq pisussaaffigeqatigiittutut misiginerat takutikkajuppaa. Assersuutigalugu aappaasut ilaat ilaannikkut kamannerminni isumaalliorlutik oqartarput soorlu ima: ’Qimappakkit!’ imaluunniit: ’Uannik pingaartitsisinnaasumik ujarlerniarpunga.’ Oqaatsit taamaattut ilumoorussassaanngikkaluarlutik aappariittut pisussaaffimmik qajannarsisitseqataasarput. Taamatut oqartartut oqaatiginiartarpaat anisinnaaneq periarfissariuarlugu.

Aappariinnissinni asanninneq misigeqqinniarukku siorasaarinerit taamaattut ingalassimasariaqarpatit. Una eqqarsaatigeriaruk: Inissiaq sivitsunngitsoq qimassallugu nalunngikkukku iluarsassagaluarpiuk? Taava sooq ilimagissaviuk aapparpit aappariinneq immaqa atanavianngitsoq ataavartinniarlugu iliuuseqarfigissagaa? Ajornartorsiutisi aaqqinniarlugit ilumoorlutit iliuuseqarniarlutit aalajangerit.

Arnaq uinilu eqqissiviilliortareerlutik taamaaliorpoq. Oqarpoq: „Qanorluunniit iluarinngitsigigaluaraangakku aappariinnitta kipitinnissaa eqqarsaatiginngisaannarpara. Attaveqatigiinnitsinni sunalluunniit aserorsimagaluarpat, ingerlallualeqqinnissarput kissaatigaarput. Ullumikkut, ukiut artornangaartut marluk kingorna, ilumuuvillunga oqarsinnaavunga pillualeqqippugut.“

Aap, aappariittut pisussaaffik suleqatigiinnerlu imminnut attuumassuteqarluinnarput — ineqatigiiginnarani aammali anguniagaqaqatigiilluni. Immaqali ilaat misigipput pisussaaffiinnaap aappariinnertik atatikkaa. Taamaakkaluarpalluunniit isumatsassutaasariaqanngilaq. Asanninneq qanga misigisaq misigeqqinneqarsinnaavoq. Qanorli ililluni?

 Aappat ataqqiuk

Biibilimi allassimavoq: ’Nuliariinneq tamani kanngunaakkili.’ (Eprîarit 13:4; Rûmamiut 12:10) Griikerit oqaasiat uani ’kanngunaakkili’-mik nutserneqarsimasoq Biibilimi allassimaffinni allani ’erlinnartoq’-mik, ’ataqqisaasoq’-mik aamma ’akisooq’-mik nutserneqarsimavoq. Arlaannik erligisaqaraangatta paarilluarniartarparput. Immaqa malugisimassavat angutit akisuumik biilitaarsimasut pisaartik qanoq erligitigisaraat. Biilertik asangaagartik qillalaartuinnaatittarpaat ajoquteqartinnaveersaarlugulu, kigarnimininnguaq ajunaarnersuartut isigisarpaat. Allat peqqissuujumallutik peqqiillinaveersaarneq ilungersuutigingaartarpaat.

Soorunami aappallit aappartik taamatulli soqutigitigisariaqarpaat. Biibilimi allassimavoq asannittoq ’tamatigut neriuttartoq’. (1 Korintumiut 13:7) Ima oqarluni „asanngisaannarpugut“, „katikkatta inuusuppallaarpugut“ imaluunniit „qanoq iliornerput nalugatsigu“ nakkaannarani aappariinnerulluunniit pitsaanerulernissaa periarfissaarutitiinarnagu, soormi pitsaanerpaamik neriuinnarussi attaveqarnissilu pitsaanerulernissaa sulissutigalugu naammagittarlusilu kingunissaa utaqqillugu? Aappariinnik siunnersuisartoq oqarpoq: „Sullitarpassuakka oqartarput: ’Sapilerpunga.’ Sumik pitsannguisinnaanertik misissornagu suna tamaat isumakkiiaartarpaat, ilaatigut eriagisassat ataatsimoorussareriigaraluatik, anigoreersimasatik siunissamilu ataatsimoorlutik pilersitassaminnut periarfissatik.“

Uiillu aappariittut sumik nalaataqarsimavisi? Aappariinnissinni qanorluunniit ajornartorsiuteqaraluarussi, qularnanngivissumik piffissanik ajunngitsunik sulianik unamminiarnartunillu peqatigiillusi anigorsimasassinnik eqqaamasaqassaasi. Misigisat taakku isiginiarnerukkit, attaveqarnersi pitsaanerulersinniarlugu ilumoorlutit iliuuseqarlutit takutiguk aappariinnersi aappallu ataqqillugu. Biibilimi takutinneqarpoq Jehova Guutip aappariit imminnut qanoq iliornerat soqutigingaaraa. Assersuutigalugu pruffiiti Malakiasip nalaani angutit Israelikkuusut nuliatik ilumoorfiginagit inuunerlullutik avittut avoqqaarai. (Malaki 2:13-16) Kristumiut aappariinnertik Jehova Guutimut ataqqinaataassasoq kissaatigaat.

Isumaqatigiinnginnerit

Aappariit isumaqatigiinnginnernik aaqqiisinnaannginnerat asanani aappariinnermi ajornartorsiutaanerpaasartut ilagigunarpaat. Inunnik marlunnik assigiittoqanngimmat aappariit ilaannikkut isumaqatigiinngittassapput. Aappariilli isumaqatigiinngittuaannartut immaqa ukiut ingerlanerini asajunnaariartussapput. Immaqa ima isummissapput: ’Immitsinnut  naleqqutinngivippugut assortuuttuaannarlutalu.’

Aappariilli isumaqatigiinginnerat isumaqanngilaq aappariikkunnaarumaartut. Una apeqqutaavoq: Isumaqatigiinnginnerit taakku qanoq aaqqinneqassappat? Aappariilluartuni uiusup nuliaasullu, nakorsap oqarneratut, „akerannaarilernatik“ ajornartorsiutiminnik oqaloqatigiinneq ilikkarsimavaat.

’Oqqap naalagaanera’

Aappallu ajornartorsiutit qanoq oqaloqatigiissutigissallugit nalunngilisiuk? Aappariit marluullutik taamaaliorusussuseqartariaqarput. Tamannali imaannaanngitsuuvoq ilikkaruminaassinnaasoq. Sooq? Tamatta naammalluinnanngitsuugatta ilaannikkut ’oqalunnikkut naakkiuttarpugut’. (Jâko 3:2) Aammattaaq ilaat angerlasimaffimmi kamannermik ersersitsingaarfiugajuttumi peroriartorsimapput. Meeraanerminniilli perorsarneqarsimapput kamalluni oqaatsit oqalorujunnerillu pissusissamisoortutut isinissaannut. Nukappiaraq avatangiisini taamaattuneersoq peroruni ’kamajasunngorsinnaavoq, puffajasoq’. (Ussatit 29:22) Taamatulli niviarsiaraq taamaattumi peroriartorsimasoq ’kamajasunngorsinnaavoq saqitsaassiumatooq’. (Ussatit 21:19) Eqqarsariaatsit iliuuserisartakkallu ileqquliulluinnarsimasat allanngortikkuminaassinnaapput. *

Taamaattumik isumaqatigiinngissutit aaqqinniarlugit oqaatsit qanoq oqaatiginerlugit eqqumaffiginissaat pingaaruteqarluinnarpoq. Biibilimi ussat imaappoq: „Oqarmi inuunermut toqumullu naalagaavoq.“ (Ussatit 18:21) Qanorluunniit pingaaruteqarpasinngitsigigaluarpat aappannut qanoq oqalunnerit aappariinnissinnut aseruutaasinnaavoq misigissuseqartitseqqilerluniluunniit. Ussat alla imaappoq: „Eqqarsariaqqaarnani oqaaserisat panatut kapisisarput, sianisuulli oqaasii katsorsaataasarput.“ — Ussatit 12:18.

Isumaqaraluaruilluunniit aappat tamatumani kukkussuteqarnerusoq isumaqatigiinngikkaangassi nammineq qanoq oqarnerlutit eqqarsaatigisariaqarpat. Oqaatsit ajuallannartut katsorsaasulluunniit atortarpigit? Kamannarpat sallaallinarpalluunniit? ’Oqaatsit ajuallannartut kamalersitsisarput,’ Biibilimi  allassimavoq, ’akissulli sallaatsoq kamakkunnaarsitsisarpoq.’ (Ussatit 15:1) Oqaaseq ajuallannartoq, eqqissisimasumilluunniit oqaatigineqaraluaruni, pissutsinik ajornerulersitsiinnassaaq.

Arlaannik eqqissiunnaaruteqaruit soorunami oqaatigisinnaavat. (1 Moses 21:9-12) Mitallernalli, ajuallatsitsinak nikanarsaarpalunnalluunniit taamaaliussaatit. Erseqqissunik imminut killilerit, aappannut oqaaseriumanngisannik aalajangiussigit, soorlu imaattunik: „Uumigaakkit,“ imaluunniit: „Katinngisaannarsimassagaluarakkit.“ Kristumiup apustili Paulusip Timûtiusimut agdlagkat sujugdlit 6:4, 5-imi allakkamini aappariinneq immikkut pinngikkaluaraa ’oqaatsinik assuarisassarsiorajunneq’-mik ’akerartortarneq’-millu taasai ingalassimaniassallugit silatusaarneruvoq. * Aappat taamaattarpat assinganik qisuariartariaqanngilatit. ’Ajornanngippat sapinngisannik eqqisseqatigiinniaruk.’ — Rûmamiut 12:17, 18; Filípimiut 2:14.

Kamatsilluni oqaatsit aqukkuminaassinnaapput. ’Oqaq-una inner[tut ittoq]. Inoqanngilaq oqqaminik qunutitsisinnaasumik,’ Biibilimik allattoq Jakob allappoq. ’Ajortoq-una qunutitassaanngitsoq toqunartulissuaq.’ (Jâko 3:6, 8) Kamaammileraanni qanoq iliortoqarsinnaava? Ajornerulersitsiinnarnani isumaqatigiinnginneq pinngitsoortillugu aappaq qanoq oqaloqatigineqarsinnaava?

Isumaqatigiinnginnerit qanoq pinngitsoortinneqarsinnaasut

Ilaasa misigisimavaat aappartik, inuttut saassunnagu, oqaasia iliuusialuunniit misigissutsikkut qanoq attorneqaatigalugu oqaluttuukkaangamikku saammartikkuminarnerusartoq ajornartorsiutillu pissutivia tikikkuminarnerulluni. Assersuutigalugu ima oqarneq pitsaaneruvoq: „Oqaatsitit ajuallaatigaakka,“ ima oqarnermit: „Ajuallatsipparma,“ imaluunniit: „Taamatut oqartariaqarnak nalunngikkaluarpat.“ Qanoq misiginerluni oqaatigigaanni soorunami ajuallannartumik makitarpalullunilluunniit oqaatigineqassanngilaq. Inuttaa pinnagu ajornartorsiutip saassunnissaa anguniagaasariaqarpoq. — 1 Moses 27:46–28:1.

’Nipangerfissaqartoq oqaluffissaqartorlu’ eqqaamajuartariaqarpoq. (Nalunaajaasup oqaasii 3:7) Inuit marluk ataatsikkut oqalukkaangamik arlaannaalluunniit tusarnaarneq  ajorpoq nikeriarnerlu ajorlutik. Tusarnaartussanngoraangavit ’tusarasuarlutit pigit oqalukkumaarnertullutillu’ — pingaarnerusumillu — ’kamakkumaarnertullutit’. (Jâko 1:19) Aapparpit oqaasii ajortut tamaasa ilumoorutissanngilatit ’kamaammernaveersaarlutillu’. (Nalunaajaasup oqaasii 7:9) Misigissutsit aapparpit oqaasiisa tunuliaqutaat paasiniakkit. Biibilimi allassimavoq: „Inuk silatussusiata kamajaatsunngortittarpaa, iluaatsuliorfigineqaraluarluni akiniaannginneq inummut ataqqinaataavoq.“ (Ussatit 19:11) Isumaqatigiinnginnermut pissutiviusumik silatussitsip aappariit paasitissinnaavai.

Assersuutigalugu arnap uiminik ilagineqanngippallaarnini maalaarutigigaangamiuk, qularnanngitsumik nalunaaqutap-akunneri minutsillu pineq ajorpai, qarsupinneqartutulli pingaartinneqanngitsutullu misiginini pisarunarpaa. Taamatulli uiusup nuliami pisiortoriataarsimanerata paamiginera, aningaasanik pissuteqartuaannanngilaq, immaqali siunersiorneqannginnini pivaa. Aappariit paasisimasaqarluartut tunuliaqutaasut ajornartorsiutillu pissutivia paasiniartarpaat. — Ussatit 16:23.

Soorunalimi oqaannarneq iliuuseqarnermit ajornannginneruvoq. Ajunnginnerpaamik angusaqarniaraluarluni aappariit ilaannikkut inussiarninngitsumik oqarsinnaapput isumaqatigiikkunnaarlutillu. Assortuuteqqajaallusi malugigukku Ussatit 17:14-mi unnersuussutip malinnissaa silatusaanerussaaq: „Nipangiinnartarit saqitsaattoqannginnerani.“ Eqqissinissassi tungaanut oqaloqatigiinnerup  kinguartinnissaa ajunngilaq. Kamaatilernasi oqaloqatigiissinnaanngikkussi isumaqatigiinngisssutissi oqaloqatigiissutiginerani ikinngummik inerilluarsimasumik ikiortissarsiorneq ilalernarpoq. *

Piviusorsiortuugit

Aappariinnersi aappassiariinnissini takorluukkattulli inngippat nikalloqinak. Immikkut ilisimasallit oqarput: „Amerlanernut aappariinneq naassaanngitsumut pilluarneruneq ajorpoq. Ilaannikkut aappariinneq nuanningaartarpoq; allatigulli artornangaartarluni.“

Aappariinersi atuakkiani asanninnilersaarutinitulli immaqa inngikkaluarluni alianartuusariaqanngilaq. Naak ilaannikkut naammagittarfigeqatigiiginnartariaqaraluarlusi allatigut assigiinngissutisi soqutiginagit nuannaaqatigiissinnaavusi ikinngutigiittullu oqaloqatigiillusi. (Evfisumiut 4:2; Kulorsamiut 3:13) Piffissani taamaattuni asanninnerup misigeqqinnissaanut periarfissaqarpusi.

Eqqaamajuk inuit naammalluinnanngitsut marluk naammalluinnartumik aappariissinnaanngitsut. Taamaakkaluartoq pilluarsinnaavusi. Ajornartorsioraluarlusi aappariinnersi marluullusi nuannaarutigisinnaavarsi. Ataaserli qularnanngilaq: Aappallu naleqqussarniarlusi aapparmullu pitsaanerpaamik iliuuseqarniarlusi ilungersuuteqarussi aappariinnissi annaanneqarnissaa upperissallugu pissutissaqarluarpoq. — 1 Korintumiut 10:24. (gE 8/1 01)

[Quppernerup ataani ilanngussat]

[Qupp. 15-mi issuagaq]

Oqaatsit ajuallannartut katsorsaataasulluunniit atortarpigit?

[Qupp. 10-mi ungalusaq/​assiliartat]

ARSAQ SALLAATSUMIK MILORIUGUK

Biibilimi allassimavoq: ’Alianaatsunik oqaaseqartaannaritsi, tarajorsimasunik, kimulluunniit qanoq akissutissassinnik ilisimaqqullusi.’ (Kulorsamiut 4:6) Unnersuut tamanna aappariinnermut tunngatillugu soqutiginarluinnarpoq. Aapparmik oqaloqarteqarneq arsaannermi arsamik allamut miloriussinermut assersuunneqarsinnaavoq. Arsaannermi arsaq akoruminartunngorlugu — sakkortuumik pinnagu sallaatsumik arsaqat ajoqusernagu — miloriunneqartarpoq. Aappannut oqalukkaangavit najoqqutassiaq tamanna najoqqutarisaruk. Ajuallannartunik oqaaseqarneq ajoqutaaginnassaaq. Inussiarnersumik — alianaatsunik — aapparpit akoruminartitaanik oqaluttarit.

[Qupp. 11-mi ungalusaq/​assiliartaq]

EQQAAMASALIKKERSAARITSI!

Ukiut ingerlanerini allagarsiarisimasatit atuakkit, assillu qangarnisat isiginnaakkit. Imminut aperigit: ’Taamani aappanni suna kajungeraara? Pissusii sorliit nersornerusimavakka? Sunik sammisaqaqatigiittarpugut? Suna illarnarisarparput?’ Taava eqqaamasat tamakku aappallu oqaloqatigiissutigisigik. Oqaloqatigiinneq ima aallartittoq: „Eqqaamaviuk taamani . . . ?“ aappallu qanga immissinnut misigissuserisimasassinnik immaqa misigiteqqissinnaavaasi.

[Qupp. 12-mi ungalusaq]

ALLAMIK AAPPARTAARNEQ, AJORNARTORSIUT TAANNA

Inuit ilaat asanani aappariinnermi parnaarussaasutut misigisarput immaqa allamik aappartaarlutik aallaqqaataaneerusulersarput. Biibibilimili allasiorneq avoqqaarineqarpoq. Allassimavoq taama ajortuliortoq ’isumaatsutut iliortoq imminullu aseruutissarsiuinnarluni’. (Ussatit 6:32) Allasiortoq peqqissiminngitsoq Guutimit iluarisaajunnaassaaq, inuup nalaassinnaasaa ajornerpaaq. — Eprîarit 13:4.

Allasiornerup sianiilliornerussusia aamma allatigut ersertarpoq. Assersuutigalugu aapparminit avittup allamillu aappartaartup aappaqarnermini siullermi ajornartorsiutigisani qularnanngitsumik ajornartorsiutigeqqissavai. Dr. Diane Medvedip aamma eqqarsaatigisariaqagaq alla taava: „Aappartaappit paaseqqaagassaa tassaavoq allasioriaannaasutit. Nalunngilaa ilumoorfigiumallugu neriorsorsimasannut nakutitseriaannaasutit, utoqqatsissutissarsiullaqqissutillu. Aamma aappartaappit nalunngilaa neriorsuutigisannik eqquutitsinngitsoornissannik killinneqarsinnaasutit, illigussusipiluillu kissaatippillu naammassinissaat nakkaannarfigissagitit. . . . Pileritsatsinneqaqqinnginnissat aappartaarpit qanoq qulakkeersinnaavaa?

[Qupp. 14-mi ungalusaq]

BIIBILIMI USSATITNIT ILISIMASSUTIT

• Ussatit 10:19: „Oqaluppallaaraanni ajortulioqqajaanartaqaaq, silatuujuvoq oqqaminik naalakkiisartoq.“

Oqqatilluni immaqa oqaaseriumanngisanik oqartoortoqarsinnaavoq — kingusinnerusukkut peqqissimissutigisamik.

• Ussatit 15:18: „Kamajasup isumaqatigiinnginneq saqitsaannerlu pilersittarpai, kamajaatsulli isumaqatigiinnginneq sallangersikkiartortarpaa.“

Annernartumik aappat pasillerukku imminut illersorniartiinnassavat, naammagittarlutilli tusarnaarukku marluullusi aaqqiiniarnissinnut iluaqutigissavarsi.

• Ussatit 17:27: „Silatuuvoq oqalunnerminik ingasaassinaveersaartoq, imminut naalakkersinnaasoq angutaavoq silassorissoq.“

Kamakkiartuinnarluta malugigutta saqitsaaterujussuarneq pinngitsoortinniarlugu nipangiinnarneq pitsaaneruvoq.

• Ussatit 29:11: „Sianiitsup kamannini tamatigut anittarpaa, sianisuulli nunusinnaasarpaa.“

Imminut naalakkersinnaaneq pingaaruteqarluinnarpoq. Oqaatsinik sakkortuunik aniatitsineq aappannut ajuallaataaginnassaaq.