Annaassiniarneq ilungersunartoq

BENINIMI Iteritsi!-p ilanngutassiortuanit

„UKU angutit pingasut uumapput Jehovap Nalunaajaasuinit annaanneqarnerinnarminnit.“ Nutaarsiassaq pingasunngornermi 19. apriili 2000-imi illoqarfimmi Calavimi Afrikap kitaani Beninimiittumi innertut sukkatigaluni tusarliunneqarpoq. Angutit taakku pingasut kikkuuppat, Jehovallu Nalunaajaasui qanoq ilanngunneqarpat?

Nalunaaqutaq ullaakkut arfineq-marlunut qiteqquttoq Phippe Elegbep Roger Kounougbellu Jehovap Nalunaajaasuisa ataatsimeersuartarfianni, Beninimi Napasuliaq Alapernaarsuiffik-iup immikkoortortaqarfianut atasumi, suliassatik aallartippaat. Ulloq taanna hundredelikkuuttaat Jesusip toqunera eqqaaniarlugu * ukiumoortumik nalliuttorsiornermut katersuuttussaapput. Ullaap nipaannera qanngorpallammit qoqernartumit tassanngaannaq kipitinneqarpoq. Philippep Rogerillu ingerlaannaq paasivaat aqqusinersuarmi ajutoortoqartoq.

Kingunitsianngua angut suaartarpaluttoq tusarpaat: „Ilinniartuutikka pingasut cementit puut ataanni matoorussaapput!“ Philippe Rogerilu aqqusinersuup tungaanut arpapput. Takulerpaat assartuut biili 20 tonsinik oqimaassusilik sannikarluni uppissimasoq. Puut cementimik imallit ikinngeqisut assartuummiit nakkaapput.

Josué Didolanvi, ataatsimeersuartarfimmi aamma sulisoq, apuutereersimalluni angut aquttarfiata cementillu puut akornisigut amuleraa naammattoorpaat. Aquttua aquttarfianit nammineerluni anillappoq annilaarsimaqaluni. Taamaakkaluartoq tamaviaavilluni suaarpoq: „Suli marluk cementit puut ataaniipput!“ Najuuttut puut illuartiterlugit aallartikkaluarpaat, uunarpallaaqimmatali taamaatiinnapallallutik. Cementi fabrikkip kissarsuutaanit anillateqqammerneqarsimavoq!

Annaassiniarneq

Philippe, Roger Josuélu annaassiniaannaqaat, cementillu puukkuutaartut qaleriiaarpassuit ataasiakkaarlugit illukaatiterpaat. Puut uunartut 50 kilonik oqimaassusillit kivittaramikkit assamikkut uutiterput. Cementi puunit alissimasunit nakkaasorsuunerata annaassiniarneq ajornaannerulersinngilaa. Assamminni uutiterput anersaartorsinnaanngingajallutillu. „Assakka, ingammik inussakka, uutiterput,“ kingornatigut Josué oqarpoq. „Puulli ataaniittut immaqa suli annaanneqarsinnaagunarnerat eqqarsaatigiinnavippara.“

Angutit taakkua pingasut puut 40-t missaaniittut illuartereerlugit ivikkanik allequtsiaq takuaat. Allequttap ataani nuannaarutigeqisaminnik taakku marluk nanivaat. Ajunngitsut! Ajutoortoqarmat angutit taakku assartukkat qaavanni allequtaq cementinut assiaqutigalugu siniffigaat. Assartuullu uppimmat nakkaramik allequtaq qallerlugit nakkarpoq, matoorussaasullu cementip kissarnissuanit illersorlugit.

Annaassiniarnerup nalaani kingornagullu isiginnaartorpassuaqarsimavoq. Philippep, Rogerip Josuéllu cementi taama portutigisoq tonsinik marlunnik oqimassusilik taama sukkatigisumik ajornakusooqisumillu illukaatitsersinnaammatigit tupigusuutigisimavaat. Tupigusuutigaataaq angutit taakku pingasut ilisarisimanngeqqinnaakkatik ikiorniarlugit iliuuseqangaarsimammata. Sivitsunngitsoq taakku sapiitsuliaat Calavimi tamanit tusarneqarpoq. (gE 8/11 2000)

[Quppernerup ataani ilanngussaq]

[Qupp. 20-mi assiliartaq]

Annaassiniarnerup kingorna ivikkanik allequtsiaq Rogerip tigummigaa