Biibili qanoq oqarpa?

Inuuneq ullorissanit uumasut assinginit aqunneqartariaqarpa?

„INERSIMASUT INUUSUTTULLU INUUNERMINNI AQQUSAAGASSAMINNIK ULLORISSANI PAASINIAASARNERAT ATUGAANGAARPOQ.“ — PAVE JOHANNES PAUL II.

APERSUINERUP takutippaa Amerikamiut sisamaagaangata ataatsip aalajangigassaqartilluni ullorissat najoqqutaralugit siulittuisarneq atortaraa. Ullorissalli najoqqutaralugit siulittuiniartarneq USA-miinnaq atorneqanngilaq. Inuit silarsuarmi tamangajammeersut niuernermut tunngasunut, angalanermi pilersaarusiornermut tunngasunik, ullormut katiffissamut, sakkutooqarnermut tunngasunik apeqqutinut suliffittaarnermulluunniit ullorissat najoqqutaralugit siulittuiniartartunut ikiortissarsiortarput. Ilaasa uumasut assingini sorlermi inunngorsimaneq najoqqutaralugu kimut katinnissaminnut aalajangiiniarnerminnik ikiorneqarsinnaanertik, imminnulluunniit naleqquttuunertik paasisinnaallugu upperaat. Ullorissat najoqqutaralugit siulittuisarneq kangianit kitaanut inunnik millionilikkuutaanik soqutiginnilersitsisimavoq. Kisianni ullorissat uumasut assingi sumit aallaaveqarpat?

Oqaluttuarisaanikkut tunuliaqutaa

Ullorissat uumasut assingisut assilineqartartut assigiinngitsut atugartuussutsit ilisimaneqartut pisoqaanersaanni nassaarineqarsinnaapput. Aamma „ullorissat, uumasut assingi“ Biibilimi eqqartorneqarput. (2 Kunngit 23:5) Itsaq hindut, Kinamiut, Egyptenimiut, grækerit inuiaallu allat ullorissanut uumasut assinginut siunersiortarsimannguatsiarput. Kisianni ullorissanut najoqqutassiat pisoqaanersaat Babylonitoqqami nassaarineqarsimapput.

Babylonimiut siunissami pisussanik ilisimasaqalerniarlutik misiliigaluarnerminni ullorissat najoqqutaralugit siulittuiniartarneq ineriartortissimavaat. Ullorissat, seqernup qaammatillu nunarsuup avataarsuani ingerlaarneri misissorneqarput, takusallu peqqissaartumik assilillugit kisittarlugillu nalunaarsorneqarlutik. Taakkualu atorlugit inuit ataasiakkaat qanoq atugaqarnissaat inuiaqatigiinnullu tamanut tunngassuteqartut siulittuutigineqartarput. Amerlasuutigut ullorissat najoqqutaralugit siulittuiniartartut siunersioqqaartinnagit siunnersuutaannillu paasisaqaqqaartinnani politikkikkut sakkutooqarnikkulluunniit aalajangiisoqartanngilaq. Palasit, tupinnartumik pissaaneqarnerartut, immikkut paasisimasaqarnerartut ilisimassuseqangaarnerartullu, tamanna pissutigalugu sunniuteqartorujussuanngorput. Ilumoortumik Babyloniami  naalaffiit annerit tamarmik immikkut ulloriarsiorfeqarput.

Ullutsinnissaaq ullorissat uumasut assingi inuppassuit inuunerannut pingaaruteqartorujussuupput. Allaat inuit ullorissat najoqqutaralugit siulittuiniarnermik upperisaqannginnerartut ilaannikkooriarlutik tamakkuninnga atuartarput, nuannariinnarlugu imaluunniit alapernaaginnarlutik. Ilumoorpoq ullorissat najoqqutaralugit siulittuiniartartut siulittuutaasa ilaat eqquuttartut. Imaappali ullorissanik siunersiuineq iluaqutaasinnaasoq? Itsaq ullorissat najoqqutaralugit siulittuiniartarneq Guutip kiffaasa qanoq isumaqarfigaat?

Navianaatit takussaanngitsut

Juutit Guutimik mianerinnittut Babylonimiut pissusiisa akerliannik ullorissat najoqqutaralugit siulittuiniartarnermik sammisaqarneq ajorput, tamannalu pissutissaqarluarpoq. Guutip ersarilluinnartumik mianersoqqusimavai oqarluni: „Ilissi akornassinni . . . naasaanik nassuiaasartoqassa[nngilaq], pisussanik eqquiniartartoqassanani, siulittuisartoqassanani angakkuartartoqassananiluunniit, serrasoqartassanngilaq, timaajagarsiortunik anersaanillu siulittuisartunik siunersiuisoqartassanani toqoreersunillu apersuisoqartassanani. Inerteqqutinik tamakkuninnga unioqqutitsisut tamaasa [Jehovap] maajugai.“ * — 5 Moses 18:10-12.

Guutip kiffaasa ullorissat najoqqutaralugit siulittuiniartarneq erseqqissumik akuersaanngilaat. Assersuutigalugu kunngi aalajaatsoq Josias oqaatigineqarpoq „Ba’alimut, seqinermut, qaammammut, ullorissanut, uumasut assinginut tipigissaatilliisartut . . . soraarsikkai“. Oqaatigineqarpoq „[Jehovap] iluarisaanik iliortoq“, tamannalu pillugu Guutimit pilluaqquneqartoq. (2 Kunngit 22:2; 23:5) Ilaalli imatut aperisinnaapput: „Ullorissat najoqqutaralugit silittuiniartartut siulittuutaasa ilaannaalluunniit eqquutannginnamik?“

Soqutiginartumik Kristumiut Allagaanni Grækerisuuni allassimavoq niviarsiaqqap ’piumaartussarsiortumik anersaallip eqquiniarnerminik naalakkani akissarsisingaartarai’. Qularnanngitsumik niviarsiaqqap oqaatigisaasa ilaat eqquuttarput, naalakkanimi aningaasanik akissarsisingaartarpai. Suumuna siunissami pisussanik siulittuisinnaatikkaa? Biibilimi oqaluttuarineqarpoq niviarsiaq ’piumaartussarsiortumik anersaaqartoq’. — apustilit suliait 16:16.

Biibilip takutippaa ’silarsuaq iluunngarmi ajortormiusoq’, tassa Satan Diaavulumi. (1 Juánase 5:19) Siulittuutit ilaasa eqquutitinneratigut Satanip anersaapiluillu inuit millionilikkuutaat siulittuisarnernut pileritsatsissimavaat.

Ullorissat najoqqutaralugit siulittuisarneq eqqortumik oqaatigalugu tassaavoq ’Diaavulup qoqassiiniutaasa’ ilaat, taanna aqqutigalugu inuit imminut kiffartulersittarlugit. Taamaattumik tupinnanngitsumik Biibilip kristumiut kajumissaarpai ’aalajaassinnaaqqullugit’ Satanip peqqusersuulluni sunniiniarneranut — ilaatigut ullorissat najoqqutaralugit siulittuiniarnernut. (Evfisumiut 6:11) Kisianni imaappa ilaginnaannarneqartugut ajoqersuutissaqaratalu?

Biibili — ajoqersuut tutsuiginartoq

Inuppassuit paasisimavaat arlaannik aalajangigassaqartillutik Biibili ajoqersuutaasoq tutsuiginartoq. Tussiaasiortup Davidip imatut oqaatigaa: „[Jehovap] nalunaajaatai sallusuitsuupput, paasisakitsunik ilisimatuunngortitsisarput.“ (Tussiaat 19:8; 119:105) Imaanngilarli sutigut tamatigut qanoq iliussanersugut Biibilip ersarissumik takutikkaa. Guutilli oqaasia najoqqutassianik assigiinngitsunik imaqarpoq siuneqassutitsinnik immikkoortitsisinnaanermut iluaqutaasunik. Ajunngitsup ajortullu immikkoorsusiisigut ilisarisinnaanissaannut silatuumillu aalajangiisinnaanissatsinnut ikiussavaatigut. — Eprîarit 5:14.

Taamaattumik pissutissaqarluarlutik kristumiut ullorissat najoqqutaralugit siulittuisartunut nuannariinnarlugu alapernaaginnarluniluunniit siunersiuisanngillat. Akerlianik anersaapilussiornermut, aamma peqqusersuunerusunut tamanut, Guutip oqaasiani mianersoqqussutit eqqumaffigisarpaat. Inuunerit ullorissanut uumasut assinginut siulersortinnagu Biibilimit siulersortikkukku, siunissami naassaanngitsumik Guutimit iluarisaassaatit. — Tussiaat 37:29, 38. (gE 8/11 2000)

[Quppernerup ataani ilanngussaq]

[Qupp. 27-mi assiliartaq]

Ullorissat uumasut assingi Kangiamiut atortagaat

[Qupp. 27-mi assiliartaq]

Ullorissat uumasut assingi Kitaamiut atortagaat