Naatitartortarit!

BRASILIAMI ITERITSI!-P ALLATTUANIT

„Sungarnipput.“ „Mamaatsorujussuupput.“ „Nerinngisaannarpakka.“

TAAKKUUPPUT amerlasuunit naatitartorusunnginnermut pissutaatinneqartartut ilaannamininngui. Illimmi? Ullut tamaasa naatitartortarpit? Sooq inuit ilaasa naatitat mamarigaat, allallu mamarinngikkaat paasiniarlugu Iteritsi! apersuisimavoq.

Naatitartortartut eqqaavaat naatitartornerup pingaaruteqassusianik angajoqqaamik ilinniartissimagaatik. Akerlianillu amerlasuut naatitanik mamarisaqanngitsut meeraanerminniit naatitartortarsimanngillat. Piumanerusimavaat nerisassat ineriikkat iluamik inuussutissartaqanngitsut. Isumaqatigiissutigaalli peqqissuunissamut naatitartorneq pingaaruteqartuusoq.

Taamaattumik angajoqqaat silatusaassapput meeqqatik naatitartortarnissaannik ilinniartikkunikkit. Qanorli? Facts for Life-imi, FN-ip meeqqanut aningaasaateqarfiata saqqummersitaani, siunnersuutigineqarpoq meeqqat qaammatit arfinilinngoraangatigik minnerpaamik ullormut ataasiarlutik anaanap immuanik miluffimmilluunniit miloreernerup kingorna aserortikkanik uutanilluunniit naatitartortittarnissaat. Nerisaasa allanngorartinneri meeqqamut iluaqutaanerussapput. Dr. Vagner Lapate, Brasiliamiu meeqqanik immikkut ilisimasalik oqarpoq naak immuk meeqqap ukiut marluk siulliit pingaarnertut inuussutinnaarigaluaraa, „meeraaraq mamassutsinik nutaanik ineriartortitsinissaanik ikiorneqarsinnaasoq“ assigiinngitsunik nerisinneqartaruni.

Atuakkami Medicina — Mitos y Verdades (Nakorsaat, oqaluttuarsiat eqqortullu) Carla Leonelip siunnersuutigaa meeraaraq misilillugu annertunngitsumik appelsinap isseranik, naatitanik aserortikkanik (soorlu bananinik, iipilinik papajanillu), imerpalasut naatitanillu suppilianit FN-ip nalunaarusiaanit suli siusinnerusukkut nerisinneqarsinnaasoq. Isummalli assigiinngimmata pitsaanerussaaq peqqissaasoq siunnersoqqulluni saaffigigaanni. (gE 8/1 01)