Biibilimi qanoq allassimava?

Aappariinneq inuuneq naallugu atasussaava?

SOOQ apeqqutigisariaqarpa? Kitaani aappariikkumalluni neriorsueqatigiinnermi, „atoruminartuni atoruminaatsunilu“ aamma „toqumit avissaartinneqarserluni asaqatigiikkumalluni angertoqarneq ajorpa“? Ilumut taamaappoq! Pissusissamisoorpoq aappariilerumallutik angutit arnallu neriorsoqatigiittarnerat inuunertik naallugu eqquutitikkumallugu. Amerliartuinnartulli misigipput pngaartorsiortumik neriorsuutiminnut pituttorsimanatik. Aappariit qimattartut amerligaluttuinnarnerat aarleritsannarpoq — ilaat qaammatialunnguit allallu ukiut iikittuunngitsut qaangiukkaangata qimattarput. Sooq aappariinnermut tunngasunut ataqqinninneq kinguariartorpa? Biibilimi akineqarpugut.

2 Timotheusi 3:1-3 misissoriartigu silarsuarmilu pisunut isigisatsinnut naleqqiullugit. Ilaannarsiorlugit ima oqaatigineqarput: ’Nalliukkumaarmata ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut, . . . qujasuitsut, mitallersut, asanniuitsut, . . . naammatsisuitsut.“ Siulittuutit eqquunnerat arajutsisassaanngilaq. Taamatut isiginnittaaseqarnerup aappariinneq silarsuaq tamakkerlugu ajoqusersimavaa ilumoorunneqannginneranullu pisooqataalluni, tamanna avittut amerlassusiata takutippaat.

Erseqqippoq amerliartuinnartut aappariinneq ataqqiunnaaraat. Taamatut isumaqarneq tunngavigalugu aperisoqarsinnaavoq: Aappariinneq ilumooruttariaqarpa? Oqartoqarsinnaava aappariinneq illernartuusoq? Kristumiut aappariinneq qanoq isigissavaat? Ullumikkut aappariit Biibilimit qanoq ikiorneqarsinnaappat?

Guutip aappariinnermut isummani allanngortissimavaa?

Aallaqqaammut Guutip aappariinnermi ataqatigiinneq utaqqiisaaginnaasutut oqaatiginngilaa. 1 Mosesi 2:21-mit 24-mut atuarparput qanoq angut siulleq arnarlu katitikkai, periarfissallu avinnissap averusernissalluunniit qinernissaat taaneqanngillalluunniit. Akerlianilli versi 24-imi taaneqarpoq ’angutip ataatani anaananilu qimallugit nuliani attavigissavaa, uiniulissappullu ataaseq’. Allassimaffik taanna qanoq paasisariaqarpa?

Eqqarsaatigiuk inuup timaa cellit eqimattanngorlugit timip ipiutaasartaani katiterneqarlutik sananeqarsimasut, qanorlu saarnit ninngusuunngorlugit, naggussani  aalatikkuminartuni katiterneqarsimasut. Timip pisatai ataqatigiilluarput, tupinnaannartumik qajannaassuseqalersitsisut. Timilli pisataasa ilaat taarserneqarsinnaanngitsoq annertuumik aqqunarpat, annernarpoq. Taamaattumik 1 Mosesi 2:24-imi oqaatsip „uininngussappullu ataaseq“ katissimasut marluk ataqatigiilluarnerat erseqqissaannanngilaa, aammattaarli ataqatigiittuarnissaat. Oqaatsini erseqqissumik taaneqanngikkaluartoq qilerutit taakku kipineqarpata annernangaassusianut mianersoqqusineruvoq.

Naak pissutsit ukiuni tusindelinni kingullerni allanngorsimagaluartut pisullu massakkut allatut isigineqaleraluartut, Guutip suli aappariinneq inuuneq naallugu atasussatut isigaa. Ukiut 2400-it matuma siorna juutit ilaasa nuliatik siulliit avippaat nuliarlutillu arnanik inuusunnernik. Taamaaliorneq Guutip ajoraa pruffiitimigullu Malakikkut nalunaarpoq: „’Anersaarli ilissinniittoq mianersorfigisiuk, kinaluunniit inuusuttuunermini nuliaminut ilumuunngitsulioqqunagu. Avinneq uumigaara’ oqarpoq Jehova, Israelip Guutia.“ — Malaki 2:15, 16, NV.

Jesusip ukiut fire hundredet sinnerlugit kingusinnerusukkut 1 Mosesi 2:24 issuaramiuk kingornalu oqarluni: ’Guutip katititai, inuup avissaartissanngilai’ erseqqissarpaa Guutip aappariinnermut isummani allanngortissimanngikkaa. (Matiuse 19:5, 6 nutsigaq pisoqaq) Ukiut arlallit kingusinnerusukkut apustili Paulusip kistumiut ajoqersuuppai ’nuliap uini qimassanngikkaa’ aamma ’uiusuttaarlu nuliani qimassanngilaa’. (1 Korinthimiut 7:10, 11) Allassimaffiit taakku oqaluttuarput Guutip qanorpiaq aappariinneq isigigaa.

Biibili aappariinnerup atorunnaarnissanut inissaqartitsiva? Aap, aappariinneq atorunnaartarpoq aappaasoq toquppat. (1 Korinthimiut 7:39) Amma aappaasup pisuunngitsup aalajangerpagu - allasiornerup aappariinneq atorunnaarsissinnaavaa. (Matthæusi 19:9) Biibilimili aappariit kajumissaarneqarput najuinnaqullugit.

Qanoq aappariinneq inuuneq naallugu atatinneqartoq

Guutip kissaatigaa aappariinneq atajuassasoq, sivisunerusumik inuujumalluni akiuuttuarnertuunngitsoq, pilluarlunili angalanertut. Kissaatigaa angutip nuliatalu ajornartorsiutitik iluarsissagaat nuannaaqatigiillutillu. Oqaasiata ilitsersorpaatigut pilluarluni aappariittuarnissamut suna pisariaqarnersoq. Allassimaffiit tulliuttut malugikkit.

Efesosimiut 4:26: ’Seqineq tarrisinnaveersiuk narrutsassimanissinni.’ * Angut aappariinnerminni pilluartoq, isumaqarpoq allassimaffiup taassuma nulianilu ajornartorsiuteqalerniariarlutik iluarsinissaminnut ikiortaraatik. „Isumaqatigiinngissuteqarnerup kingorna sinissinnaanngikkuit, ajortoqarpoq. Ajornartorsiuteqaannarnissaq akuerissanngilat.“ Oqarpoq. Ilanni ajornartorsiutit unnuarsuarmut oqaluuserisarpaat. Iluaqutigisimavaat. Nangippoq: „Biibilimi najoqqutassiat malikkaanni, nuanningaartunik kinguneqartarput.“ Angutip taassuma nuliatalu paasivaat, ukiunilu 42-ni pilluarlutik aappariipput.

Kolossemiut 3:13: ’Kamageqatigiigitsi isumakkeerfigeqatigiillusilu.’ Angutip nassuiarpaa nulianilu qanoq iliortarlutik: „ Aappariit ajortumik iliuuseqanngikkaluarlutik imminnut narraassinnaapput, tamarmik sanngiiffeqarnerat allanullu narraataasinnaasunik pissuseqarnerat pissutaallutik. Isumakkeerfigeqatigiinnissarput ilikkarsimavarput, tamakkulu uagutsinnut ajoqutaanissaat akuerisimanagu.“ Qularnanngitsumik taama eqqarsartaaseqarnerup aappariit taakkua ukiuni 54-ini aappariinneranni ikiorsimavai.

Biibilimi najoqqutassiat inuunermi malinnerisigut appariit ataqatigiinnerat nakussassarneqartarpoq. Taamaalilluni ajunngitsumik, naammaginartumik inuunerlu naallugu aappariitoqartarpoq. (gE 8/2 01)

[Quppernerup ataani ilanngussaq]