Kiisami aaqqiineq pitsaanerpaaq

TAKORLOORIARUK silarsuaq meeqqat tamarmik kissaatigineqartutut asaneqartutullu misigiffigisaat angajoqqaallu isumassuilluartut asannittullu pitsaanerpaamik siunnersuiumasut siulersuiumasullu. Takorlooruk silarsuarmi meeqqat tamarmik timikkut sianissutsikkullu peqqissuusut aqqusiniinnarmi inuusunik meeraqanngitsoq, ilaqutariinnullu aningaasarsioqataasariaqaramik meeraarnerminnik arsaagaasoqarfiunngitsoq.

Pissutsit taamaattut kissaatiginarput, piviusunngorsinnaappalli? Jehovap Nalunaajaasui taama isumaqarput, taama isumaqarnerminnut marlunnik pissuteqarput.

Angajoqqaat aaqqeeqataasinnaapput

Qularnanngitsumik isumaqatigissavatsigut inersimasut, namminneq piumagunik, ajornartorsiutit ilaannik aaqqiillutik pinngitsoortitsillutilluunniit meeqqanik ikiuisinnaasut. Aap,  angajoqqaat qitornatik ikiorniarlugit iliuuseqangaarsinnaapput.

Ilaqutariinni angajoqqaat ’nuliap uini qimassanngikkaa . . . uiusuttaarlu nuliani avissanngilaa’ Biibilimi unnersuussummik maleruaappata, averusunneq avinnerluunniit pissutigalugit angerlarsimaffimmi avissaartuuttumi meeqqat inuusariaqassanngillat. — 1 Korinthimiut 7:10, 11.

Ilaqutariinni angajoqqaat ’assuarnaatsumik inuulluapilunnani aalakoornanilu inooqqusilluni’ Biibilimi unnersuussummik maleruaappata, imerajuttunik ikiaroortartunilluunniit angajoqqaaqarnermut atatillugu ajornartorsiutit meeqqat misigissanngilaat. — Romamiut 13:13; Efesosimiut 5:18.

Inersimasut ’kinguaassiuutitigut inuunerluttuunnginnissamik’ Biibilimi unnersuussummik maleruaappata, qitornaasa alliartornerminni kissaatigineqanngitsutut misiginissaat immaqalu ilaqutariinni kisimiittumik pilersuisulinni alliartornissaat ilimanannginnerulissaaq. — 1 Thessalonikamiut 4:3; Matthæusi 19:9.

Ilaqutariinni angajoqqaat ’qitornatik narrassaarinnginnissamik qunulerseqqunagit’ aamma ’qitornaminnik asanninnissaannik’ Biibilimi unnersuussummik maleruaappata, meeqqat atornerluinernut timikkut misigissutsikkulluunniit innarliisunut sunulluunniit asattuunneqassapput. — Kolossemiut 3:21; Titusi 2:4.

Aap, pingaarnersiuinertut oqaatigineqarsinnaavoq inersimasut tamarmik Jiisusip inassutaanik maleruaarusuppata: „Inunnut qanorluunniit iliorfigeqqugussi ilississaaq taamatut iliorfigisigit,“ meeqqat millionilikkuutaat kissaatigineqanngitsutut misigissanngikkaluarput. — Matthæusi 7:12.

Qujanartumik inersimasorpassuit qulaani eqqaaneqartunik eqqortitserusupput, tamakkeratilli taamaapput, ajornartorsiullu tassaniippoq. Meeqqanik ikiuerusuttuugaluit ilungersuutitik inuup naammalluinnanngitsuuneranik pissutsinilu namminneq aqussinnaanngisaminnik piviusunngunngitsoortinneqartut misigisarpaat. Inuit meeqqat ajornartorsiutaannik aaqqiiniaqataasinnaapput, naammalluinnartumilli aaqqiisinnaanngillat.

Guutip naalagaaffia aaqqiissutissaavoq

Atuakkiortup John Ruskinip, ilanngutassiami siuliani taaneqartup, qularutiginngilaa „nunami inunngortut meeqqat tamarmik nammineersinnaalernissaata tungaanut pitsaasumik ineqarnissaat, timikkut atisaqarnissaat, nerisassaqarnissaat ilinniartitaanissaallu naalagaaffiup pingaarnertut pisussaaffigigaa“. Ruskinili nassuerpoq: „Tamakkuli tamaasa piviusunngortissagutsigit naalakkersuisut oqartussaanermik ullumikkut sinnattutsinniinnaq oqartussaassusillit pisariaqarput.“

Naalakkersuisut Guutimik tunuliaqutaqartut kisimik oqartussaassusermik Ruskinip eqqartugaatut ittumik piumassuseqarput. Naalagaaffimmillu taamaattorpiamik inuit neriorsorneqarsimapput, Jiisusillu Matthæusi 6:9, 10-mi neriorsuutigaa. Guutip naalagaaffiata nunarsuarmut tungasut tamaasa aqulerpagit inuit tamaasa oqartussaaffigilissavai innuttaasullu, aamma meeqqat, atisassaqartissallugit, nerisassaqartissallugit, ilinniartitaatissallugit inissaqartissallugillu. (Esaja 65:17-25) Naalakkersuisulli taakku naammalluinnartut suli annerusumik iliuuseqassapput.

Guutip naalagaaffiata inuit naammalluinnartunngortissavai meeqqanik inuunermut oqimaaqatigiissaagaalluinnartumut perorsaasinnaatillugit. (Jobi 33:24-26) FN-ip Meeqqap Pisinnaatitaaffii pillugit Nalunaarutaanisulli anersaaqartumi eqqissisimasumi nunarsuarlu tamakkerlugu qatanngutigiissuartut meeqqat perorsarneqassapput. (Tussiaat 46:9, 10) Nunarsuaq tamakkerlugu meeqqat ukiuanik meeqqalluunniit pisinnaatitaaffii pillugit nalunaarummik inuit pisariaqartitseqqinngisaannassapput.

Jiisusi Kristusimut, qilammi naalagaaffiup tamatuma kunngianut, angajoqqaat meeqqallu innarluutillit peqqilluinartunngortinnissaat oqitsuussaaq. Nunarsuarmiikkallarami tupinnartuliornikkut ajorunnaarsitsisarnera taamaaliornissaanut qulakkeerisuuvoq. (Lukasi 6:17-19; Johannesi 5:3-9; 9:1-7) Allaallu Jiisusi meeqqanik angajoqqaanillu toqusunit makitsitsisinnaavoq. — Matthæusi 9:18-25.

Nuannerpa ilisimallugu Guutip silarsuarmi meeqqanik ikiuinissaanut piffissaq qanillisoq?

 [Qupp. 12-mi ungalusaq/​assiliartat]

Meeqqanut inuusuttunullu iluaqutissat

Inuusuttut ajornartorsiornaveersaarnissaannik ajornartorsiutinillu pinngitsoorneqarsinnaanngitsunik qanoq nammassinnaanissaannik ikiornissaat Jehovap Nalunaajaasuisa soqutigingaarpaat. Taamaattumik ukiut ingerlanerini meeqqanut inuusuttunullu immikkut allatanik saqqummersitsisarput. Ukuupput: atuakkat Biibilimik oqaluttuaatikka aamma Unge spørger — Svar der duer (Inuusuttut aperipput — akissutit atorluarsinnaasut) videofilmilu Young People Ask — How Can I Make Real Friends? (Inuusuttut aperipput: Qanoq ikinngutivinnik ikinngutitaasinnaavunga?) Najukkanni Jehovap Nalunaajaasuinit atuagassialluunniit matuma naqiterisitsisartuinut allallutit iluaqutissiat taakku pisinnaavatit.

Jehovap Nalunaajaasuisa asanninnertik qitornaminnut malugitittarpaat. Tamanna takutittarpaat ajornartorsiutaat pillugit akuttunngitsumik oqaloqatigisarlugit, siulianilu taaneqartuni allaatigineqartut meeqqat aalajangersimasumik ilinniartinneranni atorajuppaat. Immaqa qitornatit assingusumik iliorfigerusuppatit.