Inuusuttut aperipput:

Peeraqarnissamut inuusuppallaartoqarsinnaava?

„Anaana, ittangavallaarnak, 50-kkunniikkunnaareerpugut. Kikkut tamarmik peeraqarput, meeraajunnaareerpunga.“ — Janie, 16-nik ukiulik. *

PEERAQARNISSAMUT meeraavallaarnerarneqarluni ajuallannarsinnaavoq. „Biibilimi allassimasutut ataataga anaanagalu ataqqerusuppakka, ilumoorsorinngilakkali. Naluaraluunniit manna pillugu qanoq ilillunga oqaloqatigissanerlugit,“ angut inuusuttoq oqarpoq. Immaqa aamma illit misigivutit angajoqqaatit piumasaqarpallaartut, paasinngikkaatsillu. Immaqa nuannarilluakkannik naapitsisimavutit, ilisarinerulernissaalu kissaatigalugu. Immaqaluunniit misigivutit peeraqaleruit atuaqatinnit allaaneruvallaarunnaassallutit. „Naqisimanninneruvoq,“ Michelle oqarpoq. „Peeraqanngikkaanni atuaqatinit eqqumiitsutut isigineqarnarpoq.“

Meeqqat inuusuttuaqqallu ’peeraqarnermut’ isiginnittaasiat pillugu ilaqutariinni siunnersuisartoq oqarsimavoq: „Tassuunakkut angajoqqaat piumasaqarpallartutut isigineqalersarput.“ Angajoqqaatilli ilumut piumasaqarpallaarpat? Guutimmi ajoqersoqqullutit, ilinniarteqqullutit, illersoqqullutit siulersoqqullutillu akisussaaffilersimavai. (5 Moses 6:6, 7) Imaasinnaannginnerpa angajoqqaavit ajunnginnerpaamik illersorumallutit ernumanerat tunngavissaqartoq? Anaanaq oqarpoq: „Navianartut takusinnaavakka tamakkulu isumaalutsippaannga.“ Sooq angajoqqaarpassuit meeqqamik inuusuttuaraallutik peeraqalertarnerat annilaanngatigaat?

Misigissutsit navianartut

„Nuannarisaqarneq angajoqqaama ajortutut oqaatigaat,“ Beth 14-ninik ukiulik oqarpoq. Angajoqqaalli kristumiuugunik nalunngilaat angut arnarlu kajungereqatigiittussatut Guutip pinngortikkai. (1 Moses 2:18-23) Nalunngilaat kajungerneq taanna pissusissamisoortoq pinngortitsisullu inunnut ’nunarsuaq tamakkeqqullugu’ siunertaanut naapertuuttoq. — 1 Moses 1:28.

Angajoqqaat nalunngilaattaaq ’inuusunnermi’ kinguaassiuutitigut kajumissuseq qanoq sakkortutigisinnaasoq. (1 Korinthimiut 7:36) Aamma nalunngilaat ernertik panitsilluunniit misilittagakitsuusoq pilerissutsillu tamatuma aqunnissaa suli ilikkarsimanagu. Nukappiaqqamut niviarsiaqqamulluunniit ilagiinnermut, oqarasuaatikkut oqaloqatigiinnermut allaqatigiinnermut e-mail-ikkulluunniit attaveqatigiinnermut piffissarujussuaq atortaleraanni qularnanngitsumik kajungeqatigiinneq piffissap ingerlanerani sakkortunerulissaaq. Immaqa aperissaatit ’tamatuma suna ajoqutigigamiuk?’  Apeqqutaavorli: Qanoq ilillutit pisariaqartitatit nutaat ajortumik iliornak matussusissagitit? Ilumut misigissutsivit kingunerata atornissaa — katinnissat — piareersimaffigaajuk? Ilimananngilaq.

Inuusuttuaraalluni peerartaarnissaq navianaatunik ilungersunartunik nassataqarpoq. Biibilimi allassimavoq: „Kina aamanik saarmioqarsinnaava atisani ikuallatsinngitsoorlugit?“ (Ussatit 6:27) Inuusuttuaraatilluni peeraqaleraanni tamatigorluinnangajak kingunerisarpaa suli katissimanani kinguaasiuutitigut atoqatigiinneq, nappaatipalaamik tunillatsittoorsinnaavutit niviarsiararluunniit naartulersoorluni. (1 Thessalonikamiut 4:4-6) Assersuutigalugu Tammy isumaqarpoq angajoqqaani piumasaqarpallaartut peeraqarnissani akueriumanngimmassuk. Taamaammat isertortumik nukappiaraq atuarfimmi naapittalerpaa. Sivitsunngitsoq naartulerpoq, inuuneralu allanngorpoq. Maanna nassuerpoq: „Peeraqarneq oqaatigineqartarneratut pissanganartiginngilaq.”

Inuusuttummi assuarnartumik attualaarineq pinngitsoorniaqqissaarpassuk? Taamaakkaluarpalluunniit timikkut kajungeqatigiinnerup sakkortuallaalersinnaanera navianarpoq. (Erinarsugassiat Pingaarnersaat 2:7) Pilerissuseq ineriartortikkaanni, aatsaallu siunissami ungasissumi akuerissaasumik piviusunngortinneqartussaasoq annikilliortitsingaatsiarsinnaavoq.

Aamma imminut aperisinnaavutit aapparilerumaagassanni suut maluginiassanerlugit nalunnginnissaanut inuuninni misilittakkatit naammannersut. (Ussatit 1:4) Akerlianilluunniit: Uitut nuliatulluunniit asaneqarnissannut ataqqineqarnissannullu piginnaanerit ileqqullu pigaagit? Sivisuumik aapaqarnissannut naammattumik naammagittassuseqarlutillu angusaqarusussuseqarpit? Ajoraluartumik inuusuttuaqqat asannilersoornerat sivikitsuinnaasarpoq. Ikittuinnaat ataavartumik aappariinnermik kinguneqartarput.

Monicap 18-nik ukiullip ataatsimut katillugit oqaatigilluarpai oqarami: „Atuarfimmi ikinngutinnaama tamarmik peeqqatik oqaluttuarisarpaat. Kisianni katiaarsimallutik imaluunniit katinnissaminut piareersimannginnamik qimaannartarsimapput.“ Brandon oqaluttuarpoq: „Paasillugu akisussaaffeqalernissamut piareersimanani, peeraqalernermi tamannarpiaq iliuuserisimallugu paatsiveerunnarpoq. Aapparisaq ajuallatsinnagu qanoq qimattoqarsinnaava?“

Angajoqqaavit qularnanngitsumik alianartunik paatsiveerunnartunillu atugaqannginnissannik illersorniaraluarpaatsit katissinnaalertinnak peeraqannginnissannik piumaffigalutit. Oqaluussisartup oqaasiini 11:10-mi isumassarsiarititaasumik siunnersuut eqqortoq malinniaannarpaat, ’Annikilliorneq uummatinnit peeruk, ajortorlu inuunermit nigorsimatiguk.’

’Neruttorit’

Imaanngilaq nukappiaqqat niviarsiaqqalluunnit ilaginngisaannassagitit. Soorli ataasiinnarmik ikinnguteqassavit? Allamut atatillugu Biibilimi kajumissaarneqarpugut ilagisartakkavut eqqarsaatigalugit ’neruttoqqulluta’ (2 Korinthimiut 6:12, 13 gl.)  Inuusuttunut siunnersuut pitsak. Ajunngitsumik malinneqarsinnaavoq ikinngutit niviarsiaqqat nukappiaqqallu arlalikkaarlugit ilaginerisigut. „Taamatut nuannarineruara. Amerlasuunik ikinnguteqarneq ajunnginneruvoq,“ Tammy oqarpoq. Monica nangippoq: „Amerlasuunik ilagisaqarneq isumassarsiatsialaavoq, assigiinngitsunik kinaassusillit takuneqarsinnaanerat pissutigalugu paasillugulu suli amerlasuut iluamik ilisarisimalersimanagit.“

Immaqa allaat angajoqqaavit piareersaaqatigiumassavaatsi inuusuttoqatitit qaaqqullugit nuannisaaqatiginissaannut. Anne, marlunnik meeralik nassuiaavoq: „Tamatigut sapinngisatsinnik angerlarsimaffipput inuusuttunut najoruminartuutinniartarparput. Ikinngutaat annikitsunik sutugassaqartillugit pinnguaatinillu pinnguartillugit sukisaarssaaqatigisarpavut. Taamaalillutik nuannisarumallutik illoqarfiliartariaqarlutik misigineq ajorput.“

Arlaliugaluaraanniluunniit inuup ataatsip sammivallaarnissaa suli mianersuuttariaqarpoq. Inuusuttuaqqat ilaat isumaqarput allanik najuuttoqartillugu sammineq ’peerariinnertut’ oqaatigineqasinnaanngitsoq. Imminut salloqittarnerit taamaattut mianersorfigikkit. (Tussiaat 36:3) Ikinngutitit ilagitillugit tamatigut aalajangersimasumik sammisaqartaruit, assigiinnarpaa peerariittusi. * Niviarsiaraaguit nukappiaraq imaluunniit nukappiaraaguit niviarsiaraq ikinngutigigukku peqqinnartumik siuneqassuseqarit. — 1 Timotheusi 5:2.

Sooq utaqqineq iluaqutaasoq

Immaqa peeraqarnissannut inuusuppallaartutut oqarfigineqarluni nuanninngilaq. Angajoqqaavilli ajoqusersornianngilaatsit, akerlianilli sapinngisartik tamaat ikiorniarpaatsit illersorniarlutillu. Soormi uummativit tatiginissaanut siunnersuutaasalu itigartinissaannut taarsiullugu misilittagaat ilinniarfiginianngiligit? Soormi nuannarisat pillugu tulliani ajornartorsiuteqaleruit siunnersoqqunianngilit? Ussatit 28:26-mi ima eqqaasinneqarpugut: ’Silaqassutsiminik tatiginnittoq sianiitsuuvoq.’ Connie oqarpoq: „Angutip nuannarinnitsima peerarinissaanut tatineqanginnissannut anaanama tamatuminnga oqaloqatiginera iluaqutigaara. Ikinngutimi ilaquttamilu aqqusaarsimasaannik oqaluttuussinnaavaanga, tamannalu iluaqutigaara.“

Peeraqarnissavit utaqqisinnera misigissutsikkut ineriartorninnut ajoqutaanavianngilaq kiffaanngissusikinnerulersinnalluunniit. Aappassiartaarnissap katinnissallu, akisussaaffiup inersimasutut aatsaat tigusariaqartup, kinguartinnerisigut inuusutsillutit ’qiimasaarnissannut’ periarfissaqassaatit. (Oqaluussisartup oqaasii 11:9) Utaqqiguit aamma inerilluarnissannut inuttullu ineriartornissannut, tamanillu pingaarnerusumik anersaakkut ittumik ineriartornissannut periarfissaqalissaatit. (Upputit 3:26, 27) Soorlu niviarsiaraq inuusuttoq oqartoq: „Allanik neriorsuitsinnani Jehova neriorsoqqaartariaqarpoq.“

Inersimaleriartornerit ilutigalugu siuariarnitillu tamanut malunnarsippata, angajoqqaavit ilinnut isiginnittaasiat allanngussaaq. (1 Timotheusi 4:15) Taamanikkullu peeraqalernissannut piareeruit qularnanngilaq tamakkiisumik tapersersorsinnaassagaat. (gE 22/1 01)

[Quppernerup ataani ilanngussat]

[Qupp. 20-mi assiliartat]

Arnamut angummulluunniit soqutiginnileraanni,

. . . nalinginnaasumik misigissutit asannilesoornermik kinguneqartarput

[Qupp. 21-mi assiliartaq]

Inuk ataasiinnaq samminagu, ilagisartakkanut neruttortariaqarpugut