Inuusuttut aperipput:

Qanoq ilillunga naaggaassaanga?

”Aasaq qatanngut angut uannut asannilersoorpoq. Uangali ajuutiginngilara. ajuallatsinnaguli qanoq oqarfigissanerlugu nalugakku ajornartorsiutigaara!” – Elizabeth *

”Ilisarisimanerulaalissaagut?” Angummit inuusuttumit taama aperineqarnikuuvit? Immaqa * nuannaajallallutillu tulluutiallapputit, immaqaluunniit angorniorputit. Imaassinnaavorli tupallutit qanoq oqarnissalluunniit nalulerit.

Soqutigineqarngaarluni paasigaanni migissuserpassuit qaffakaasinnaapput. Ingammik katissinnaalereersimagaanni taamaattumillu ilisarisimasaqalernissamut piareeqqagaanni. * Qanorli qisuariarnermut kina aperinersoq apeqqutaavoq. Angut aperisoq misigissutsimigut inerisimalluarpat pissuserilluarpallu immaqa akissutissaaleqinarnavianngilaq. Taavami aappassap qanoq ittuunissaanik takorluukkat naammassisinnaanngippagit? Taavami pissuserikaluartorluunniit soqutiginngikkaanni?

Imaassinnaavoq aamma niviarsissap nukappiaq peerarigaa kingornali paasigaa inuunermi sinnerani aapparisinnaanagu. Qimannaguli peerariuarsinnarpaa. ”Peerariunnaarniarlugu qanoq oqarfigissavara?”, aperaaq.

Soqutiginninngikkaanni

Meeqqamik kina katissaneraat angajoqqaat itsaq aalajangertarsimagunarpaat. (Mosesimik allakkat siulliit 24:2-4, 8) Nunani killerni kristumiut aappassartik namminneq aalajangertarpaat. Biibilimili ataasiinnaq piumasarineqarpoq: kristumiu ”Naalakkami” taamaallaat katissinnaavoq. – Korinthimiunut allakkat siulliit 7:39.

Taava imaappa uppeqat kinaluunniit soqutiginninnermik takutitsisoq sivikitsuinnarmik ilisarisimasimagaluarluguluunniit katinneqarsinnaasoq?  Niviarsissap Kangiani Qiterlermi illoqarfimmi Shulamimiup maligassiaa Biibilimi eqqartorneqartoq eqqarsaatigeqqissaariassagit. Kunngi Salomop niviarsiaq maluginialersimavaa asannilersoorfigalugulu. Salomop asanninnerminik nalunaarfigimmani itigartiinnarnagu aamma illussaarsuani kiffanut arnanut ima oqarpoq: ”Ilungersorlunga oqaluffigaassi, . . . . .. asanninneq itersaqinasiuk, pileritsassaaqinasiuk nammineq piumallertinnagu!” (Erinarsugassiat Pingaarnersaat 2:7) Niviarsissap silatuup taassuma misigissutsimi allanit naalakkerneqarnissaat kissaatiginngilaa. Savanik paarsisumut inuusuttumut asannikkami Salomo asannilersoorfigeriaannaanngilaa.

Katinnissamik eqqarsaateqartut manna ilinniarfigisinnaavaat: Kinaluunniit asannilersoorfigineqarsinnaanngilaq. Naak niviarsiaq immaqa sivittalaamik peeraqarsimagaluarluni misigissuseqarfigivallaarnagu paasilersinnaavaa. Arlaannik sanngiissutaanilluunniit allamik maluginiagaqarsimaneranik pissuteqarsinnaavoq, imaassinnaavorluunniit ajuutiginartinngikkaa. Misigissutsit taamaattut sumiginnassallugit sianiitsuliornerussaaq. Sumiginnaanerinnakkut peernavianngillat. * ”Pissuserpassuisa nuannarinngisama qulartilerpaannga,” Tamara peeqqani pillugu oqarpoq. ”Tamarmik suunngitsuaraanngillat imali erloqissutigitigaakka allaat ilagigaangakku eqqissiveqarnangalu annilaangasarlunga.” Kingusinnerusukkut paasivaa peerariikkunnaarunik pitsaanerusoq.

Sooq taama naaggaarnissaq sapernartigaa

taamaatiinnarnissaq taama oqitsiginngilaq. Aallaqqaasiussami eqqaaneqartutut Elizabethitulli immaqa peeqqavit ajuallatsinnissaa annilaangassutigaat. Soorunami allat misigissusiinik qajassuussinissaq pingaartuuvoq. Kristumiut Biibilimi ’nallittuingaaqqullugit’ namminnerlu iliorfigeqqunermisulli allanut iliorfiginneqqullugit kajumissaarneqarput. (Kolossemiut 3:12; Matthæusi 7:12) Isumaqarpali peeqqat ajuallatsikkumanagu pakatsisikkumanaguluunniit neriulussinnartissagit? Qanoq misigissuseqarnersutit qularnanngitsumik pinngitsoorani paasiumaarpaa. Unneqqarissaarlutit tamanna pillugu oqaloqatigisimanngikkit paasiguniuk suli ajornerussaaq. Nalligiinnarlugu katikkaluarukku suli ajornerussaaq. Nalliginninneq pissutigalugu katissagaanni tunngavissaq aserujasuuvoq.

Immaqali eqqarsarputit: Taanna katinngikkukku immaqa katinngisaannassaanga.’ Atuagassiami Teen-imi atuarneqarsinnaasutut niviarsiaq ima eqqarsarsinnaavoq: ”Naak asavallaanngikkaluarlugu soqannginnermiit ajunnginneruvoq, niviarsiatoqanngornissaralu kissaatiginngilara.” Aappaqarusuummertoqarujussuarsinnaavoq. Kissaatigisamilli nalerisimaarnissamillu naammasinninniaannarneq tamanna aappaqarusunnerinnarmit isumaqarneruvoq. Asanninnermik piviusumik asasinnaasaq Biibilillu uiusunut akisussaaffiliussaanik naammassinnissinnaasoq ujartariaqarpoq. (Efesosimiut 5:33) Aalajangipallaqinak. Eqqarsaatigilluaqqaarnagu katissimasut ilarpassui peqqissimisarsimapput.

Aamma imaassinnaavoq niviarsissap peeqqami arlalinnik sanngiissuteqarnera paasereeraluarlugu peerariinnaraa. Immaqa ima eqqarsarsinnaavoq: ’Allanngussajunnarsivoq.’ Silatusaarnneruva? Ileqqupalaat iliuutsillu pigiliutiinnakkat allanngortikkuminnaatsorujussuusarput. Allanngortitserujussuartoqarpallu  allannguutit attatiinnassanerai qulakkeerneqarsinaanerpa? Karenip taamatut ajornartorsiutillip assigiinnik anguniagaqaratik paasigamiuk peeqqani qimanniarlugu aalajangersimavoq. Ima oqaluttuarpoq: ” Asannilersooqqaqigama ajornakusooqaaq. Pitsaanerpaassasorli nalunngilara.”

Sallaatsunnguamik iliuuseqarit

Itigartitsissalluni oqitsuinnaanngilaq. Mianersornartoqarmat sallaatsunnguamik iliuuseqartariaqarpoq. Siunnersuutit uku iluaqutigilluarsinnaavatit.

Angajoqqaannut ilagiinniluunniit kristumiuni inersimalluartumut oqaloqatiginnissutigiuk. Ilimagisatit piviusorsiortuunersut paasiniarlugit immaqa ikiorsinnaavaatsit.

Eqqortumik paasiuminartumillu oqalugit. Qanoq misiginersutit paasitilluaruk. NAAMIIGINNARLUNI nuliarsartut amerlanersaat neriukkunnaarsinneqarsinnaapput. Pisariaqassappat itigarterujussuaruk: ”Ajuallatsinnianngikkaluarpakkit soqutiginngilakkilli!” Isumaqartinniaqinagu qasusuittuarpat isummat allanngortissagit. Paatsiveerutsinnginnerussaaq pakatsininilu qaangipallannerussavaa misigissuseqarfiginagu paasitilluarukku.

Unneqqarissuugit pissuserissaarlutillu. Ussatit 12:18-mi ima allassimasoqarpoq: ” Eqqarsariaqqaarnani oqaaserisat panatut kapisisarput.” Unneqqarissaarnissaq pingaartuuvoq, Biibilimili oqaatigineqarpoq ”inussiarnersumik tarajulimmillu” oqaluttassasugut. – Kolossemiut 4:6.

Aalajangiussat aalajagiusimajuk. Ikinngutivit qanoq tunngavilersuuteqarlutit aalajangersimanernik ilisimasaqanngitsut ajunngitsumik isumaqarlutik peerariinnaqqullugu immaqa sunnerniaraluassavaatsit. Naggataatigulli illit aalajangernerpit kinguneri atortussaavatit – ikinngutippiunngitsoq.

Oqaatsitit eqqortikkit. Sionatigut immaqa ikinngutigiissimagaluarpusi, pissusissamisuuinnarporlu taamaattoqaqqilernissaanik kissaateqaruit. Amerlasuutigulli taamaattoqarsinnaaneq ajorpoq. Ikinngutivit asannilersoorfigaatit. Susoqarsimanngitsuusaartillugu misigissuseerunnissaa ilimagineqarsinnaava? Soorunami ikinngutigiiginnarsinnaassagussi pitsaanerussagaluarpoq, akuttunngitsunilli oqarasuaatikkut oqaluuttarussi imaluunniit katerisimaaqatigiittarussi qularnanngitsumik naalliukkaluttuinnassaaq. Misigissusiinik pinnguarinninneq assigiinnassavaa asannittuliornerunngilarlu.

Apustili Paulusip kristumiut ”ilumoortumik” oqaluttaqqullugit kajumissaarpavai. (Efesosimiut 4:25) Tamanna ajornakusooraluarluni ingerlaqqinnissamut iluaqutaasinnaavoq.

[Quppernerup ataani ilanngussat]

[Qupp. 29-mi issuagaq]

Kinaluunniit asannilersoorfigineqarsinnaanngilaq

[Qupp. 30-mi assiliartaq]

Eqqortumik paasiuminartumillu oqalugit