Alianartoq qanoq anigoripput

JAMES GIARRANO-MIT OQALUTTUARINEQARTOQ

Aataajuneq aanaajunerlu inuunermi misigisat nuannernerpaat ilagaat. Nuliara Vicki uangalu perngaammik ernutartaarnissarput pissangalluta qilanaareqaarput. Panipput Theresa uialu Jonathan siorna oktobarip aallaqqaataata missaani meerartaartussanngorput. Alianangaartumik nalaataqarnissarput ilimaginngilluinnarparput.

AARFININNGORNEQ 23. septembari 2000-mi nuliara, ernerput ukuarpullu ilagalugit feeriarluta aallarpugut. Sapaatip akunnera ataaseq ilaqutavut allat ilagalugit North Carolinap sineriaani Outer Bankimiinniarpugut. Theresa naartulluni erningajalermat uinilu ilaaniarnatik aalajangerput, Ohiomi angerlarsimaffitsinniit ornitassatsinnut nalunaaquttap akunnerini aqqanilinni biilinik ingerlaartussaagatta.

Feeriarnissarput unitsiinnarusukkaluarparput, Theresalli aallaqquaatigut. Imminut isumagilluarsinnaanerarpoq. Sapaatip akunneri marluk qaangiuppata ernisussaavoq, nakorsallu piffissaq eqqorlugu ernissanerarpaa.

Pingasunngorneq 27. septembarii alianaaqaaq, tamatumalu ukiorpassuarni ilaqutariiulluta tamaanerpiaq feeriartarnitsinnik eqqaasippaanga. Ulloq naatinnagu inuunitta allanngorluinnarnissaa ilimaginngilluinnarparput.

„Theresa peqanngilaq“

Unnuk taanna qatanngutinnik Ohiomi najugaqartumit sianerfigineqarpunga. Nangaarpalulluni eqqissisimarpalunngilaq, kiisami oqarpoq: „Theresa peqanngilaq!“ Theresap tammarneranut pasinartoqarmat politiit saaffigineqarsimapput. Jonathani angerlarami paasivaa matu silarleq paarnaaqqanngitsoq. Theresap ullaakkorsiutai aningaasivialu suli nerrivimmiipput. Aammali allamik ippinnartoqarpoq: Skuui - naartunermini naammagisatuai - suli matup killinganiipput.

Jonathanip qulit qeqqata missaani nuliani sianerfigaa. Theresap arnaq biilinik tuniniakkaminnik takorusuttoq sianersimanerarpaa. Tamatuma kingorna allanik isumagisassaqarnerarpoq. Jonathan ulloqeqqanut sianeqqippoq, angerlarsimanngilarli. Ulloqeqqata kingorna sianeqqittaqattaaraluarpoq, oqarasuaalli tiguneqartanngilaq. Nalunaaqutaq 16.15 angerlamut apuukkami biilit peqanngillat. Eqqarsarpoq nuliani ernisulersimassasoq, napparsimmavimmulli sianerami peqannginnerarpaat. Ilaquttani aamma sianerfigai, arlaatali takusimanngilaat.  Uippallerujussuarpoq politiillu sianerfigalugit. Ualigaa arfinnup missaani politiit biilit angerlarsimaffiannit ungasinngitsumiittut nassaaraat. Theresali peqanngissinnarpoq.

Uagut ungasissumi North Carolinamiittugut tusagarput annilaarutigisorujussuuarput. Nuliara, ernerput ukuarpullu poortueriarluta angerlapallappugut. Ingerlaarnerput sivisuvoq ilimasupilunnarlunilu. Unnuk naallugu ingerlareerluta ullaakkut Ohiomut apuuppugut.

Ujaasinermi paasisat

Jonathan ilaqutaasalu ilaat, ikinngutit allallu politiit suleqatigalugit Theresa unnuaq naallugu ujarsimavaat. Suli ulluni tallimani tataatsassimanartuni ujarlertoqarpoq. Ataasinngornikkut oktoberip aappaanni kiisami pisoqarpoq. Politiit pingasunngornermi ulloqeqqa siorna Theresamut sianernertoq kinaanersoq paasisimavaat. Arnaq qanittumi najugaqartoq oqarasuaatikkut angallattakkakkut sianersimavoq.

Politiit arnaq killisioreerlugu pasitsapput. Unnuk taanna arnap angerlarsimaffianut uteqqipput. Matu silarleq qanilligamikku seqqorpaluk tusaavaat, iseramillu arnaq toqungasoq nassaaraat. Imminut aallaasimavoq. Politiit tupaallaatigeqisaminnik nukappiaraq inoorlaaq inimi qullermittoq nassaaraat. Tupinnartumik taamatut pisoqartillugu eqqissilluni sinerujoorpoq.

Theresali suli peqanngilaq. Nalunaaqutap akunnerini tulliuttuni politiit Theresap tamaaniissimaneranik takussutissaasinnaasunik ujarlerput. Ujaasineq biilinut iniliami marlunngornikkut ullaaralaakkut unitsinneqarpoq, Theresap timaa itersaliamut matoorneqarsimasoq nassaarineqarmat. Nakorsap politiinut ikiortip aalajangersumik oqaatigaa Theresa anaaneqarluni ilisimajunnaartinneqareerluni qatigammigut aallaaneqarsimasoq. Ingerlaannaq toqusimavoq meerarlu illiaaniit tiguneqarsimalluni. Naalliussimannginnera paasillugu uatsinnut tuppallersaataavoq.

Naalungiarsuk inoorlaaq napparsimmavimmukaanneqarpoq paasineqarlunilu ajoquteqarani peqqittuusoq. Dna-kkut misissuinerup uppernarsarpaa nukappiaraq ernutarigipput. Jonathanip meeraq Oscar Cavinimik, Theresalu toqqakkaminnik, atserpaa. Oscar 8 pundinik oqimaassusilik sivikitsumik napparsimmaveereerluni, ulloq 5. oktobar ataataminut tunniunneqarpoq. Ernutartaarput nuannaarutigeqaarput, Theresamilli eqitaarneqarsinnaannginneranik artorsaateqanngaarnerput oqaatigineqarsinnaanngilaq.

Najugaqarfigisami inuit qisuariarnerat

Ilaqutariilluta ikiorneqarnerput killissutigeqaarput — ilaatigut inunnit ilisarisimanngisatsinnit. Ulluni Theresap tammaaneqarnerani inuit hundredellit arlallit ujaaseqataaniarlutik nalunaarput. Arlallit aningaasanik tapiissuteqarput. Najugarisami allaffimmi atortussaarniarfiit akeqanngitsumik, ujaasinermik nalunaarutiginasuarniakkamik agguaassasanik tuusintilinnik naqiterititsipput, piumassutsiminnillu agguaassisorpassuit Theresap angerlarsimaffiata eqqaaniittunut agguaappaat.

Uppeqatitta ilaat advokatimi sulisuuvoq, pisimasumillu oqaluttuukkamiuk advokatip ikiorusulluta neqeroorfigaatigut. Neqeroorutaa akueraarput, sunaaffalimi iluqutaangaarumaartoq. Tusagassiortut inatsisitigullu apeqqutit akinissaannut ikiorpaatigut. Aamma paasiniaasartunik namminersortunik marlunnik suliamut ilungersuussisunik innersuussivoq. Isumassorneqarnerput qujamasuutigingaarparput.

Ernutarput angerlarmat inunnnit ikiuutisiarpassuit eqqussuutilerput. Niuertarfiit arlallit nerisassanik, eqqiaanermut atortussanik tunissuteqarput, inuinnaallu Oscarip atisassaanik, nangissaanik, immuttugassaanik pinngussanillu tunissuteqarput. Oscarip pisariaqartitai sipporlugit tunineqaratta, tunissutit ilaat ernisarfimmut tunniuppagut. Alianartoq tusagassiutitigut tusarliunneqarpoq, tamatumallu kinguneranik tuusindilikkaanik allagarsivugut, illoqarfitsinniinnaanngitsoq aammali nunarsuarmi tamaneersunit.

Tapersersuineq tuppallernartoq pingaarnerusumik erserpoq sapaatikkut 8. oktobar Theresamik eqqaaniaanermi. Nalunngilarput amerlasuut aggerumasut, peqataasulli ilimagisatsinnit  amerlanerungaarput. Eqqaaniaaneq atuarfiup inersuani pivoq, 1400-llu sinnerlugit peqataammata ulikkaarluinnarpoq. Ilaqutaasut, ikinngutit, politiit, borgmesteri allallu illoqarfimmeersut najuupput. Eqqaaniaaneq aamma tusagassiortunit peqataaffigineqarpoq. Najugarisami fjersynikkut aallakaatitsisartut oqalugiaat aallakaatippaat, aamma internetikkut toqqaannartumik aallakaatinneqarpoq. Taakku saniatigut inuit hundredillit atuarfiup isaariaani silamiluunniit siallersumi alanngittaalisarlutik oqalugiaat nipittortaatikkut tusarnaarpaat. Oqalugiartoq Biibili tunngavigalugu upperisatsinnik nalunaajaalluarpoq.

Kingornatigut inuit hundredillit misiginneqataanertik ersersinniarlugit naammagittarlutik tulleriiaarput. Najuuttut tamaasa nalunaaquttap akunnerini pingasungajanni eqittarlugit peqataanerannut qutsavigaagut. Illoqarfimmi hotelit ilaat tukkorluni ilaqutavut, ikinngutivut allallu 300-nik amerlanerusut ernutatsinnik ujaasisimasut nerisassaat isumagaat.

Amerlaqisut — amerlanerit ilisarisimanngisavut — ikiuinerannut qujamasunnerput oqaatigineqarsinnaanngilaq. Tamatuma kinguneranik suli annerusumik oqaluussinermi eqiasuinnerulernissarput aalajangiupparput, sulimi inussiarnersunik inuppassuaqarpoq Guutip naalagaaffianik tusagassamik nuannersumik tusarlerusutatsinnik. — Matthæusi 24:14.

Ilagiit ikiuinerat

Pisimasup tataannartup aallaqaataaniilli qatanngutivut angutit arnallu ikiuipput. Ataavartumik ikiuinerit ilagiitsinnit ilagiinnillu eqqaamiutsinneerput.

North Carolinami feriarfitsinnit suli apuutinngitsugut utoqqaanertat Theresamik ujaasitsitsilereersimapput. Qatannguterpassuagut angutit arnallu suliffimminnit sulinngiffeqarlutik ujaasinermut peqataapput. Ilaasa sulisitsisutik oqaluttuuppaat akissarsiassaminnik ilanngaaffigineqarlutik ujaasinermut peqaraarusullutik, ujaaseqataasulli arlallit ilanngaaffigineqarsimanngillat. Ulluni Theresap peqanngiffiani anersaakkut qatanngutitta Jonathan najorpaat. Qatanngutit angutit arnallu peqquneqanngikkaluarlutik torersaallutillu angerlarsimaffipput eqqiluitsuutippaat. Allat kajumillutik ikiuisut nerisassiuppaat oqarasuaatikkullu siarnguttut oqaloqatigisarlugit.

Theresap toquneranit sapaatip akunneri arfinillit qaangiummata nuliara Jonathanilu artornartumik suliassaqalerput, tassa Theresap pigisai immikkoortiterlugillu illu imaartussaavaat. Jonathanip, Theresalu najugarisimasartik najuinnarnissaa saperamiuk, illu tuniniarniarlugu aalajangerpoq. Theresap pigisaanik immikkoortiterineq artornaqaaq — tamarmik Theresamut eqqaanarlutillu maqaasiummersitserujussuarput. Aammattaaq tamatumani qatanngutitta ikiorpaativut. Pigisai karsinut poortorpaat allaallu illu pisiarineqarniassammat iluarsagassat iluarsaallugit.

 Pingaarnerpaavorli qatanngutit angutit arnallu ilaqutatsinnut anersaakkut misigissutsikkullu annertoqqusersuinerat. Qiimmassarniarluta sianertarlutillu pulaartarpaatigut, amerlasuunillu killinnartunik allagarsisarluta. Asannittumik annertoqqusersuineq ullualuinnarni sapaatip akunnialuinnarniluunniit pinngilaq, qaammaterpassuarnili.

Tusarnaarneqarnissamik pisariaqartitsilissagutta qatanngutit angutit arnallu saaffiginneqqusinerat qujarupparput atorluarlugulu. Ikinngutinut asasanut tatigisanullu misigissutsitsinik aniatitsisinnaaneq tuppallersaataavoq. Ussatini allassimasumut assersuutaalluarput: „Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.“ — Ussatit 17:17; 18:24.

Alianartup ilaqutariinnut kinguneri

Oqartariaqarpunga Theresap toqutaanera ilaqutannut uannullu qaangeruminaatsuusoq. Inuunerput allanngortilluinnarsimavaa. Ilaannikkut eqqanniinnginnera kamaatigisarpara. Pakkussisarnera maqaasivara.

Nuliara Theresalu imminnut ataaqatigiittupilussuugaluarput. Ulloq ataasiinnarluunniit imminnut sianerfigiqatigiinngitsoorneq ajorput. Nalunaaqutap akunnerpassuani Theresap naartunera oqaloqatigiissutigisarpaat, nuliamalu meeqqap inissaanik piareersaqatigalugu.

Vicki oqarpoq: „Maqaasinaqaaq. Kiffartoqatigiitarnerput maqaasivara. Illoqarfigiliaqatigiittarnerput maqaasivara. Tamanilli ajorneruvoq meeqqani najunnginnamiuk — atoruminaatsorujussuuvoq. Nalunngilara suli Oscar naartoralugu asasorujussuugaa. Ernertaarnissani nalunngilaa. Naalungiarsuup ulissaanut nuersakkannut qujalluni allaffigaanga:

’Asasara anaana!

Naalungiarsuup ulissaanut kusanartumut qujanarujussuaq. Tamatumunnga suliaqarnerujussuit qujamasuutigeqaara. Tapersersuininnut qiimmassaanernullu tamanut qutsavigeqqikkusuppakkit, inuuninni atukkama artornarnerpaat ilaasa anigornissanut iluaqutigeqaakka, tamannalu qujamasuutigiuarlugulu eqqaamajuassavara. Tusarsimavara anaanaasup ikinngutaanerpaajunera inersimasunngornermi aatsaat paasineqartartoq. Ullut tamaasalu Jehova qutsavigisarpara tamanna uanga paasiaarsimagakku. Asajuassavakkit.’“

Ningaatta atugarliornera takullugu artorsaatigeqaarput. Oscarip napparsimmavimmiinnerani imaannaanngitsumik isumagisassaqarpoq. Uagutsinni najugaqarallarniarluni aalajangerami hiistiusaq ukumartartoq, siniffinnguaq pinngussallu uagutsinnut assartorniarlugit, meeqqap inaanut Theresalu piareersarsimasaminnut isertariaqarpoq.

Ingerlaqqinnissatsinnut iluaqutigisagut

Asasamik taama alianartigisumik annaasaqarnermi apeqqutit misigissutsillu paatsiveerunnartut qaffakaasarput. Kristumiutut utoqqaanertatut allat apeqqutinik misigissutsinillu assigusunik atugaqartut ilaatigut tuppallertarnikuuakka. Namminerli aliasulluni eqqarsarluarnissaq misigissutsit ajornakusoortissinnaavaat.

Assersuutigalugu sapaatip akunnerani ataatsimi aallaqqasussaalluta Theresap qanoq issusia eqqarsaatigalugu Jehovamut paareqqullugu qinuvunga. Nassuerutigissavara toqutaasimasoq nassaarineqarmat qinnutima tusarneqarsimannginnera aallaqaataani paasiuminaatsikkaluarakku. Nalunngikkaluarpara Jehovap tupinnartuliornikkut kiffani illersorniarlugit neriorsorsimanngikkai, nassuiaanneqarnissarali qinnutigiuarpara. Tuppallersaatigaara paasigakku Jehova innuttaminik anersaakkut illersuisartoq, attavigiuarnissaminut pisariaqartitatsinnik tunisarluta. Naassaanngitsumik inuuneqalernissamut illersorneqarneq taamattoq aalajangiisuuvoq, taamaattumillu timikkut illersorneqarnermit pingaarnerulluni. Taamaalillugu Jehovap Theresa illersorpaa, toqussanimi tikillugu aalajaattuarpoq. Nalunnginnakku Theresap siunissaa Jehovap asannittup assaaniittut tarnikkut eqqissivunga.

Allassimaffiit assiginngitsut tuppallersaatigeqaakka. Ingerlaqqinnissannut iluaqutigisimasama ilaat aajuku:

„Toqusut makikkumaartut iluartut iluaatsullu.“ (Apustilit Suliaat 24:15) Ukiorpassuarni nunarsuarmi paratiisimi  makititaanissamik neriuut upperaara, neriuulli taanna aatsaat taama uannut uppernanerulerpoq. Nalunagu siunissami Theresa eqitaaqqissinnaallugu, ulluinnarni ingerlaqqinnissannut nukissaqalertippaanga.

„[Jehova] . . . toqusut Guutiginngilaat, inuusulli Guutigaat, taassumunnga tamarmik inuummata.“ (Lukasi 20:37, 38) Tuppallernaqaaq paasillugu Jehovap toqusimasut siunissami makititaasussat ’inuusutut’ isigigai. Taassuma isaani asasarput Theresa ilumut uumavoq.

Vickip allassimaffiit iluaqutigisimasani aamma oqaalutturerusuppai:

’Guuti sallusuitsoovoq’ (Hebræerit 6:18; Titusi 1:2) Guuti sallunngisaannarmmat nalunngilara toqusunik makititsinissaminik neriorsuutini piviusunngortikkumaaraa.

’Tamanna tupigusuutigissanngilarsi; piffissarmi nalliukkumaarpoq ilivermiittut tamarmik [Jiisusip] nipaanik tusarumaarfissaat ilivernillu aniumaarfissaat’. (Johannesi 5:28, 29) Oqaatsip ’[eqqaamasat] ilivermiittut’ takutippaa, ernermi Jiisusi Kristusip Theresamik makititsinissaata tungaanut Jehovap eqqaamagaa. Jehovamit eqqaamaneqarnermit isumannaannerusumiissinnaanngilaq.

’Kissaatigisasi qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.’ (Filippimiut 4:6, 7) Pingaartumik Jehovap anersaavanik nakussatsinneqarnissara qinnutigisarpara. Aliasuleraangama Jehovamut saaffiginnittarpunga oqarlungalu: ’Anersaannit pisariaqartitsivunga’ taava suli ullup ataatsip anigoqqinnissaanut ikiortarpaanga. Ilaannikkut eqqarsaatikkaluunniit oqaatigineq sapertarpakka, ingerlaqqinnissannulli nukissaqatilertarpaanga.“

Alianartup tamatuma qaangernissaanut Jehovap ikiorluarpaatigut. Asasarput Theresa suli aliasuutigaarput, aliasunnerpullu aatsaat Jehovap silarsuassaani nutaami, eqitaaqqissinnaalerutsigu qaangiutivinnissaa ilimagaarput. Taamaattoqalersinnaguli Jehovamut aalajaalluta kiffartornissarput aatsaat taama aalajangiussimatigaarput. Jonathanip sapinngisani tamaat Oscar Jehovamik asannilernissaanut kiffartulernissaanillu ikiorniarpaa, Vicki uangalu sutigut tamatigut tapersersussavarput. Uummatitsigut iluunngarluta Guutip silarsuassaani nutaami najuunnissarput kissaatigaarput, Theresa inuunermut tikiluaqqujumallugu erneranillu pakkutinngisaannagaanik ilisaritillugu. (gE 22/7 01)

[Qupp. 15-mi assiliartaq]

Panipput Theresa, naartumi uummataata kassunneranik naalaartoq

[Qupp. 16, 17-mi assiliartat]

Eqqaaniaanermi tapersersorneqangaarneq misigaarput

[Qupp. 19-mi assiliartaq]

Theresa katimmat, nuliara Vicki uangalu.

[Qupp. 19-mi assiliartaq]

Ernutarput Oscar