Guutip aqqata inuunera allanngortippaa!

OQALUTTUARTOQ SANDY YAZZIE TSOSIE-MIT

QATANNGUTIGIILLUTA illakuluppugut immitsinnullu sakattaalluta siniffiup ataanut toqqorniaatigaluta. Mormonit matukkut kasuttorput. * Kiisami matu ammarakku soqqusaappunga oqarlungalu navajoindianeriulluta qaqortumillu amillit upperisaat pillugu oqaloqatiginissaat kissaatiginagu.

Angajoqqaavut pisiniarlutik niueriartortarfimmukarsimapput. Taarsiarsaalernerani uternissaat aatsaat naatsorsuutigaarput. Angerlamut apuummata mormoninut soqqusaassimanera tusarpaat, oqarfigaanngalu kimulluunniit taama ataqqinnippalunngitsigisumik ilioqqinngisaannassasunga. Allanut ataqqinninnissamik inussiarnisaarnissamillu ilinniartippaatigut. Eqqaamavara ilimaginngisatsinnik ullut ilaanni pulaartoqariataarluta. Anaanaga ataatagalu silatitsinni nerisassanik piareersaasimapput. Inoroorsaarlutik pulaartoq siulliullugu nerisippaat, kingornalu uagut.

Najukkatsinni immikkoortumi inuuneq

Howell Mesami Arizonamiittumi USA-p kujataata kitaani najugaqarpugut, hopiindianerit najugaqarfiata immikkoortuanit avannaata kitaanut 15 kilometerinit ungasitsigisumit. Illoqarfinnit inuttoqisunit ungaseqaaq. Manna inoqajuitsuuvoq sioqqanik aappalaartunik alutornarluinnartunik ilusilersukkanik siammarsimasunik, toqqinillu portoqisunik sivingasunik innaarsuttalinnik mesa’-nik taasartakkatsinnik ujaralik. Toqqiniit 8 kilometerisut ungasitsigisumi savaativut ivigartortut takusarpavut. Immikkoortumi najukkatsinni inuuneq eqqissisimanartoq nuannareqaara.

Ilinniarnertuunngorniarfimmi atuartillunga illooqakka Amerikami indianerit peqatigiiffiannik AIM-mik tapersersuisut qanimut attaveqarfigilerpakka. * Indianeriunera tulluusimaarutigisaqaara qaqortunillu amillit naapikkaangakkit ukiorpassuarni naqisimanninneq pillugu isumaga annittarpara, isumaqarama Indianerinut tunngassunut allaffeqarfiup, BIA-p tamanna pisuussutigigaa. Illooqqattulli qinngarsuinera takutinneq ajorpara, uummatinnulli toqqortarpara. Qaqortunik amilinnut uumiginninnerma Biibilimik pigisalinnut tamanut qinngarinnilersippaanga.

Isumaqarpunga qaqortumik amillit Biibilimit piginnaassusilerneqarsimasut nunatsinnik, pisinnaatitaaffitsinnik uagullu nammineq ileqqulersuutitsinnik illernartuusunik atuinissatsinnut kiffaanngissusermik arsaaqqulluta. Atuarnitta nalaani naalagiartarnissatsinnut pingitsaalineqartaratta, naaggaartut katuullillu ileqqulersuutaannut peqataarusunnanga ataatama atsiortarnera allaat ilaarpara. Inooriaatsiminnik atuilernissatsinnik indianerisullu kingornutatta puuiornissaanut atuarfiit sunneeqataaniartussaapput. Oqaatsivulluunniit atorneqaqqusaanngillat.

Indianerisut pinngortitamut avatangiisitsinnullu ataqqinningaartuuvugut.  Ullaat tamaasa kangianut saalluta qinusarpugut majsillu pujoralai illernartut siaruaallugit qujasarluta. * Tassa tunngaviusumik taamatut ilinniartinneqarpunga, upperisaralu tulluusimaarutigisara tamaviaaruttupilussuuara. Kristumiuunerartut qilaliarnissatsinnik ajoqersuutaat kajumiginngilara anniarfeqarneralu upperinnagu. Nunami inoorusunneruvunga.

Atuanngiffeqartilluta angerlarsimagaangama ilaqutariinni ataqatigiilluarnerput iluarisimaartaqaara. Ullut tamaasa navajomiutut illuaraatitsinni eqqiaasarpunga, ikaartiterisarpunga savaativullu paarisarlugit — navajosugut ukiuni hundredelinni savaatiliusimavugut. Illuaqqatsinni eqqiaagaangama (asseq ataaniittoq takuuk), maluginiartarpara atuagaq aappalaartoq Tussiaatit-nik imalik atuakkallu arlallit „Testamentitaaq“-meersut. Allamut illikartuaannarpara sunali imarineraa eqqarsaatiginngisaannarlugu. Iginngisaannarparali.

Aappariinneq — ilimagisat pakatsinerillu

Atuarfimmiit anigama, fagskolemi Albuquerquemiittumi, New Mexicomiitumi atualernissara pilersaarutigigaluarpara. Uissarali naapippara navajollu nunaqarfiannut uterpunga katikkiartorlunga. Angajoqqaakka ukiorpassuarni aappariipput, uangalu maligassiaat malikkusuppara. Angerlarsimaannartuunera iluarisimaaqaara ilaqutariinnerpullu nuannaarutigeqalugu, ingammik ernerput, Lionel inunngormat. Aalassannartumik tusarnissama tungaanut uigalu pilluaqaagut.

Sunaaffa uiga allamik arnaatilik. Allasiorsimanera pissutaalluni aappariinnerput aserorpoq. Aliasoqaanga tassungalu ajorinnilerlunga. Akiniaarusulerpunga. Avinniarnermi erloqinartumi angajoqqaatut oqartussaassuseq aningaasatigullu pisartagassanik isumaqatigiissuteqarniarneq, nikallornermik atorsinnaanngitsutullu misiginermik neriuutaarulluinnarnermillu uannut kinguneqarpoq. Ungasissumut arpattarpunga misigissutsikka ajortut anninniarlugit. Akuttunngitsumik qiarujussuartarpunga nererusussuseeruttarlungalu. Kisimiilluinnartutut misigaanga.

Kingusinnerusukkut assingusunik ajornartorsiutilimmik aappartaarpunga. Marluulluta misigissutsitsigut ikilerneqarsimavugut. Misiginneqatigaanga misigissutsikkullu pisariaqartitannik tunillunga. Eqqarsaatinnik misigissutsinnillu oqaluttuarfigaara. Tusarnaarpoq, paasivaralu nuannarigaanga, katinnissarpullu eqqarsaatigaarput.

Aammali taanna allasiortartoq paasivara. Naak artornaraluartoq aalajangerpunga aappariinnerput kipitinniarlugu. Narrugisaasutut misigivunga isumatsangaarlungalu. Narrutsassimaaqaanga kamallungalu akiniaajumatuungorpunga imminornissaralu eqqarsaatigilerlugu. Marloriarlunga imminoriaraluarpunga — toqunissara kisiat kissaatigigaluarakku.

 Siullerpaamik Guutimut ilumoortumut saatsiarneq

Guutimut nalusannut qinutillunga qiasaqaanga. Upperaara qutsinnerusoqartoq silarsuarmik ataqqinangaartumik pinngortitsisumik. Seqerngup tarrinneri kusanartut alutorisaqaakka, eqqarsaatigisarparalu tupinnartulianik tamakkuninnga uagutsinnut nuannaarutissiisup alutornangaassusersua. Nalusara taanna nuannarilerpara, oqarfigisalerlugulu: „Guuti, ilumut piuguit ikiunnga, aqqutissiuutinnga nuannaalerseqqillungalu.“

Ilaquttakka isumaalupput, ingammik ataataga. Ajorunnaarsinniarlunga angajoqqaama angakkoq qaaqquaat. Ataataga oqarpoq angakkup pitsaalluinnartup allanut ilinniartitsissutini maleruartarai, akiliisitsinngisaannarlunilu. Angajoqqaakka nuannaartinniarlugit arlaleriarlunga navajotut ileqqulersuutit immikkut ittut naammassivakka.

Ullorpassuarni allat nigorlugit illuaqqamiippunga pigisatuaralugu radio siniffimma sanianiittoq. Uumigeqisannik aallakaatitassiami palasi, inuit uattut ittut Jiisusimik ilassinnikkumanngitsut avoqqaaralugit oqaluttoq tusarnaarpara. Naammagiunnaarpara. Qaqortumik amillit upperisaat uangalu nammineq upperisara qatsulluinnarpakka. Aalajangerpunga nammineerlunga Guuti nassaariniarniarlugu.

Illuaqqami mattusimatillunga atuagaq aappaluttoq mikisoq maluginiaqqilerpara. Paasivara Biibilip ilarigaa. Tussiaatit atuartillugit Daavip aliasunnera anniarneralu ilikkagaqarfigaakka, tuppallersaatigalugillu. (Tussiaat 38:2-23; 51:3-21) Pingaarniartuugamali atuarsimasakka eqqarsaatigiunnaapallappakka. Qaqortumik amillit upperisaat susassarerusunngilara.

Isumatsangaarsimanera ernerma paarilluarnissaanut akornutaanngilaq, qiimmassaatigaarali. Upperisarsiornikkut aallakaatitassiat qinnussinissamik neqeroorutitallit Fjernsynikkut isiginnaartalerpakka. Isumatsassimangaarlunga ikiorneqarumallunga normumut akeqanngitsumik sianerpunga. Dollarit 50-it 100-llu missaannik akileeqquneqarama oqarasuaat ilipiloorpara.

Avinniarnitsinni isumaqatigiinniarnerit nikalluutigaakka, ingammik uiga naggueqatigiit eqqartuussisuanut eqqortumik oqalunngimmat. Marluulluta ernitsinnut angajoqqaatut oqartussaassuseq sorsuutigaarput, taamaattumik isumaqatigiinniarnerup naammassinissaa sivisungaatsiarpoq. Ajugaavungali. Taamaattoqarnerani oqaaseqanngikkaluarluni ataatama asannittumik uannut tapersersuinini ersersittuarpaa. Ajuallarujussuarsimasunga takusinnaavaa.

Jehovap Nalunaajaasui siullerpaamik naapippakka

Aalajangerpunga ullormiit ullormut inuuniarlunga. Maluginialerpara ilaqutariit navajot eqqaamiukka oqaloqatigigaat. Alapernaasinngitsoorsinnaanngilakka. Matumiit matumut angalaarlutik suligunarput, illuikkannullu aamma aggerput. Sandra navajosoq Jehovap Nalunaajaasuisut ilisaritippoq. Ateq Jehova allanit maluginiarneruara aperalungulu: „Jehova kinaagami? Upperisarsiorneq nutaajusimassaaq. Sooq oqaluffimmi Guutip aqqa tusarsimanngilara?“

Inussiarnisaarluni Biibilimini Tussiaat 83:19 qupperpaa, allassimasoq: „Paasitserlugu illit kisivit — aqqit tassaasoq [Jehova] — Qutsinnerussaartuusutit nunarsuarmi tamarmi.“ Nassuiaappaanga Guutip aqqa tassaasoq Jehova, erneratalu Jiisusi Kristusip nalunaajaatigigaa. Neqeroorfigaanga Jehova Jiisusilu pillugit ilinniartikkumallunga, atuagarlu sagdlusuíssut inûnigssamut nâgssáungitsumut sangmissoĸ * tunniullugu. Nuannaarlunga akivara: „Aap, upperisaq una nutaaq periarfissikkusuppara!“

Aqaguani atuagaq tamaat atuareerpara. Tassani saqqummiunneqartut nutaajupput allaanerullutillu. Atuakkap nassuiarpaa inuuneq siunertaqartoq, inoorusussuseqaqqilernissannut pisariaqartilluinnagara. Biibili atuaqqissaartalerpara, nuannaarutigeqisannillu apeqquterpassuakka akissutissarsivakka. Ilikkakkakka upperaakka. Tunngaveqarluarpaluppoq, sallusuissutaasimassaaq.

Lionel arfinilinnik ukiulik Biibilip oqariartuutaanik ajoqersulerpara. Qinoqatigiittarpugut, qiimmassarneqarnissarpullu pisariaqartikkaangatsigu immitsinnut eqqaasittarpugut Jehovap  isumagigaatigut tatigisariaqarippullu. Ilaatigut tunniutiinnarusunnerusaraluarpunga. Nukissaqaqqilertarpungali Lionelip taleeqqaminik eqillunga tatiginnippaluttumik tuppallersaraangaminga oqarluni: „Anaana qianak, Jehovap paariumaarpaatigut.“ Tuppallersaatigaara Biibilimillu atuartuaannarnissannik aalajangiussisimaninnut iluaqutigalugu. Jehovamit siulersorneqarnissara qinnutigiuarpara.

Kristumiutut ataatsimiinnerit sunniutai

Tuba Citymi Jehovap nalunaajaasuisa ataatsimiinnerinut najuukkumalluta Jehovamut qujamasunnerput ersersinniarlugu 240 kilometerit siumut utimullu biilertarpugut. Aasakkut sapaatip-akunneranut marloriarluta ataatsimiittarpugut, ukiuuneranili silap ajortarnera pissutaalluni ataatsimiinnerit kattunneqartarput, taamaattumik sapaatikkut ulloq naallugu angerlarsimaneq ajorpugut. Ullut ilaanni biilerput aserorami kullorsorluta naalagaaffilersaarfiliarpugut. Sivisuumik biilerneq qasunartaqaaq. Lioneli ilaanni akinikuuvoq ajuitsinnanni ataatsimiigianngitsoortoqartariaqanngitsoq. Tamatuma paasinarsisippaa Jehovap anersaakkut ajoqersuutaasa sumiginnannginnissaat qanoq pingaaruteqartigisoq.

Ataatsimiinnerni naalagaaffimmik erinarsuutitsinnik erinarsoraangatta, ullumikkutut ajornartorsiuteqarfiunngitsumik naassaanngitsumik inuunissaq erinarsoraangatsigu killitsiasaqaanga. Jehovap Nalunaajaasuini tuppallersarneqarneq qiimmassarneqarnerlu misigivakka. Inoroorsaartuupput — neriartoqqusarpaatigut ilaqutariittullu Biibilimik atuaqqissaaraangamik ilaatittarluta. Soqutiginninnermik takutitsivigaatigut tusarnaartarlutalu. Misiginneqataasarnermikkut Jehovamillu soqutigineqarnitsinnik nakussatsinniarluta utoqqaanertat immikkut pingaaruteqarsimapput. Ilumoortunik ikinngutitaarnera nuannaarutigaara. Nakussatsippaannga, misigigaangamalu sapilerlunga qiaqatigisarlunga. — Matthæusi 11:28-30.

Aalajangernerit angisuut marluk

Jehovap isumassuinera nuannaarutigileruttoriga, angutaatiga uteqqippoq pereersunik aaqqeeqqikkumalluni. Suli asagakku naaggaarsinnaanngilara. Katinnissarput pilersaarutigaarput. Eqqarsarpunga sallusuissutip allanngortikkumaaraa. Tamanna inuuninni kukkussutiginerpaavara! Nuannaanngilanga, nalunngeqatigiinnissutimma erloqisimmanga. Pakatsissutigeqisannik sallusuissummut soqutiginninngilaq.

Utoqqaanertat ilaannut anngiarpunga. Biibilimiit tunngaviusunik oqaloqatigaanga Jehovallu ikiuineratigut eqqortumik aalajangiisinnaaqqullunga qinoqatigalunga. Paasivara Jehovap ajuallatsinnavianngikkaanga innarlernaviarnangalu akerlianilli inuit naammalluinnanngitsut qanorluunniit asatigigaluaraanni ajuallatsitsinngitsoorsinnaangitsut. Paasilerpara allagartaqanngitsumik inuuneq sumulluunniit qulakkeerutaanngitsoq. Taamaattumik aalajangerpunga: Ajornakusooraluartoq annernaraluartorlu, qimappara. Aningaasatigut ajornartorsiussaanga, kisianni Jehova tatigilluinnartariaqarpara.

Jehova asavara aalajangiussimallugulu kiffartuunniarlugu. 19. maaji 1984-imi Jehovamut tunniulluinnarnera kuisinnikkut ersersippara. Ernera Lionel aamma Jehovamut nalunaajaasuuvoq. Ilaquttatsinnit uikunnillu akerlilersorneqaqaagut sunaluunniilli Jehovap assaanut tunniuttuaannarparput. Pakatsisinneqanngilagut. Ukiut aqqanillit qangiutillartullu ilaquttakka qasukkarnerupput inooriaaserpullu nutaaq akuersaalerlugu.

Ilaqutakka asaqaakka, kissaatiginerpaavaralu Jehova periarfissikkumaaraat taakkua aamma pillualeqqullugit. Ataatama, isumatsangaarsimanera imminorusuttarnikkalu pissutigalugit annaasimallunga isumaqarsimagaluartup, illersorluartarpaanga. Pilluaqqilernera nuannaarutigaa. Takusinnaavara misigissutsikkut siumukarniaraanni Jehovamut qinuneq, Jehovallu Nalunaajaasuisa ataatsimiinnerinut najuunneq Guutillu oqaasianik malinninneq aalajangiisuusut.

Siunissami neriuutiga

Piffissami, naalliutit, naammalluinnanngissuseq, sallu qinngarsuinerillu suujunnaarsitaalluinnarnissaat qilanaaraara. Takorloortarpara navajot nunaat naasoqarlunilu naggorissuusoq ferskenit abrikosillu orpinnit naaqqilersimasut. Nuannaarneq naggueqatigiit assigiinngitsut misigiumaagaat takorloorsinnaavara, nunaat  naggorluttoq sualuit kuussuillu iluaqutigalugit kusanangaartumik paradisinngortinneqarumaartoq. Takorloortarpara sanilivut, hopiindianerit naggueqatigiillu allat, nunanik ingiarniukkunnaarluta, soorlu ulluni makkunani taamaattoqartartoq, avitseqatigigivut. Takusinnaalerpara Guutip oqaasiata naggueqatigiit qanoq ataasiussuseqalersikkai. Siunissami takusinnaalissavara ilaqutariit ikinngutillu, makititaaneq ikiortigalugu toqukkut annaasimasatik ataasioqatigileqqikkaat. Inuit pilluangaassapput naassaanngitsumillu inuunissamik neriuuteqarlutik. Siunissamut taama nuannerunartigisumut kialuunniit tusaajumanani naaggaarnissaa takorloorsinnaanngilara.

Teokratiikkut navajot nunaanni amerliartorneq

Tuba Citymi Naalagaaffilersaarfiliortut takullugit aammalu navajot hopillu immikkoortortaanni ilagiinni sisamani, * Chinlemi, Kayentami, Tuba Citymi Keams Canyonimilu ineriartorneq malinnaaffigalugu nuanneqaaq. 1983-imi Teokratiimik Atuarfimmut ilanngukkama qaquguluunniit navajot oqaasii atorlugit ingerlanneqartalernissaa neriuutigeqaara. Maanna neriuutiga piviusunngorsimavoq. 1998-imili navajot oqaasii atorlugit atuarfik ingerlanneqartalerpoq.

Guuti ateqarneranik allat oqaluttuulluugit pilluaqqussutissanik angingaartunik malitseqarsimavoq. Oqaatsitsinnik atuagassiaateqalerluni nuannaarnangaarmat qanoq oqassanerluni nalunarpoq. Atuagassiaaqqat Nuname inûneĸ nâgssáungitsumik nuánârutigiuk! (Nihookáá’gi Hooláágóó liná Bahózhoóodoo!), Guutip sumik piumaffigaatigut? (Ha’át’fíísh éí God Nihá yee Hool’a’?) aamma maannakkut Guutimut ikinngutaalersinnaavutit! (Ni Éí God Bik’is Dííleelgo Át’é!) navajot oqaasiini nassaassaasut uppernitsinnut nakussatsinnangaartut oqaluussissutigalugillu atuarsinnaavavut. Qujamasuutigeqaara kiffaq ilumoortoq silatoorlu Biibilimik ilinniartitsinermi siuuttuummat tammaalilluni inuiaqatigiit nagguveqatigiillu inuiaallu immikkut oqaasillit tamarmik iluaqutigisinnaammassuk, aamma navajoindianerit. — Matthæusi 24:45-47.

Uannut pilersorniarlunga piffissaq tamaat sulisarpunga, kisianni nuannaarutigisannik akuttunngitsumik ikiorti-pioneritut kiffartorsinnaasarpunga. Katisimanani inuuneq nuannaarutigaara allamummi saasarneqarnaga Jehova kiffartuukkusuppara. Nuannaarutigingaartarpara nalerisimaarutigisarlugulu inuiaqatikka allalu — ingammik isumatsasimasut — oqaluttuussinnaagakkit ’[Jehovap] qanikkai sequmissimasumik uummatillit, annaattarai aserortersimasumik anersaallit’. — Tussiaat 34:19.

Misigiunnaarpunga Biibili qaqortumik amillip upperisarigaa. Guutip oqaasia, Biibili, tassaavoq ilikkagaqarusuttunut maleruaarusuttunullu tamanut atuagaq. Tulliani Jehovap Nalunaajaasui aggerpata periarfissikkit, qanoq ilillutit pilluarneq piviusoq angusinnaanerit takutinniassammassuk. Tusarliussamik nuannersumik oqaluttuusinnaavaatsit Guuti ateqartoq, Jehova — ateq inuuninnik allannguisuusoq. „Aoo,’ Diyin God bízhi’ Jiihóvah wolyé.“ („Aap, Guutip aqqa tassaavoq Jehova.“) (gE 8/7 01)

[Quppernerup ataani ilanngussat]

[Qupp. 21-mi assiliartaq]

Navajot illuaraat nalinginnaasoq

[Qupp. 21-mi assiliartaq]

Ernera Lionel uangalu

[Qupp. 24-mi assiliartaq]

Kayentap ilagiivini Arizonamiittumi anersaakkut ilaquttakka ilagalugit