Inuusuttut aperipput:

Qinuneq qanoq iluaqutigisinnaavara?

„Qinunerup ingerlavissakkut uterteqqippaanga.“ — Brad. *

INUUSUTTORPASSUIT Guutimut qinusarput — immaqa ilimagisannit amerlanerit. Misissuineq naapertorlugu 13-niit 17-nut ukiullit akornanni USA-mi qinusartut 56 procentii nerilernermi qinusarput. Misissuinerup allap takutippaa inuusuttut 62 procentii ullut tamaasa qinusartut.

Inuusuttorpassuilli ileqqoriinnarlugu qinusarput. Taakkununnga qinuneq ileqqulersuutaannanngorsimavoq imaqanngitsoq. Inuusuttut amerlanerit ’Guutimik ilisimasaqarneq’ Biibilimi oqaatigineqartoq pigilersimanngilaat, taamaattumillu taakku inuuneranni immikkut malunnaatilimmik Guuti inissisimanngilaq. (Kulorsamiut 1:9, 10) Inuusuttuaqqat ilaat aperineqaramik pingaarutilimmik aalajangiitinnatik Guuti qinnuigisarneraat, niviarsiaq akivoq: „Annertuumik aalajangigassaqartillunga tamatigut Guutimut qinusarpunga.“ Nassuerporli: „Massakkorpiarli taamatut aalajangigassannik eqqaasaqarsinnaanngilanga.“ Inuusuttorpassuit qinuneq iluaqutaanngitsutut imaluunniit imminnut sunniuteqarnavianngitsutut isumaqarfigisarunarpaat.

Taamaattoq inuusuttut tuusindillit namminneq, Braditut siusinnerusukkut eqqaaneqartutut, misigisarsimavaat — qinuneq iluaqutaasoq. Illit aamma taamatut misigisinnaavutit. Atuagassiami uani siusinnerusukkut saqqummersumi Guutip qinnutitsinnik tusartarneranik tatiginnissinnaanerput tunngavilersorneqarpoq. * Maannali apeqqutaalerpoq: Qinuneq ilinnut qanoq iluaqutaasinnaava? Qinnutivut Guutip qanoq akisarnerai takoqqaariartigu.

Qinnutit Guutip qanoq akisarai

Biibilip allanneqarnerata nalaani, Guutimut uppertut ilaasa qinnutaat toqqaannartumik akineqartarput ilaatigullu allaat tupinnartuliornikkut. Soorlu kunngi Hizkijap paasigamiuk toqussutaasinnaasumik nappaateqarluni, ilungersungaarluni Guutimut qinuvoq ajorunnaarseqqulluni. Guutip akivaa: „Qinnutit tusarpara, qullitit takuakka, ajorunnaartissavakkillu.“ (2 Kunngit 20:1-6) Aamma akissutitut Guuti, angutit arnallu Guutimik mianerinnittut qinnutaanut akuliuttarpoq. — 1 Samueli 1:1-20; Danieli 10:2-12; Apustilit Suliaat 4:24-31; 10:1-7.

Taamanikkulli allaat toqqaannartumik Guutip akuliuttarnera qaqutigoorpoq. Guutip kiffami qinnutaat akigaangamigit tupinnartuliorneq ajorpoq. Akerlianik ’ilisimassuseqarnissaannik anersaakkullu paasisimasaqassutsimikkut naammattumik Guutip piumasaanik paasinnilernissaannik’  ikiortarpai. (Kulorsamiut 1:9, 10) Aap, Guutip anersaakkut ileqqussatigullu, ilisimassummik ilisarsinermillu tunisinermigut nakussatsittarpai taamaalillutik silatusaartumik aalajangiisinnaaniassammata. Ukiuni hundredilinni siullerni kristumiut ajornartorsioraangamik ingerlaannaq aniguisinneqartanngillat. Guutilli ’pissaanermik asseqanngitsumik’ tunisarpai misilinneqarnerminik aalajaassinnaaqqullugit. — 2 Korinthimiut 4:7; 2 Timotheusi 4:17.

Illittaaq qinuguit sakkortuumik pisoqarnissaa ilimagissanngilat. Soorluli qanga Guuti kiffaminut ikiuisimasoq, illittaaq anersaaq illernartukkut pissaanermik tunillutit inuunerup unamminiarnartortaanit aniguinissannut ikiorsinnaavaatit. (Galatiamiut 5:22, 23) Qinunerup sutigut iluaqutaasarnera erseqqissarsinnaavarput immikkoortut sisamat misissornerisigut.

Aalajangiinissamut ikiuut

Karen angummik inuusuttumik anersaakkut anguniagaqarluannguatsiartumik sammisaqarpoq. „Ilagiinni utoqqaanertanngorusunnini oqaluuseriuaannarpaa,“ oqaluttuarpoq. Tusarluarnaqaaq. Kisiannili „aamma suliffiutitaani uannullu pisiarisinnaasarpassuani eqqartukulavai. Unneqqarissusia qularilerpara.” Tamanna Karenip qinnutimini eqqaavaa. „Jehova qinnuigaara isikka ammaqqullugit ikinngutigalu pillugu paaserusutannik takuteqqulluga.”

Qinunerinnaq iluaqutaasinnaavoq, unikkaallatsissinnaavaatit Jehovallu isiginnittaasianiit ajornartorsiut eqqarsaatigilersillugu. Aamma Karen siunnersuummik atoriaannaasumik pisariaqartitsivoq. Tupinnartuliornikkut akineqarnissani naatsorsuutigissavaa? Kunngi Daavip inuunerani pisimasup takutissinnaavaatigut. Daavip paasigamiuk ikinngutigilluakkani Akitofel, ernerminut pikititsiumatuumut siunnersortinngorsimasoq, qinuvoq: ’[Jehova], Akitofelip siunnersuutaa maangaannartikkiuk!’ (2 Samueli 15:31) Daavili aamma nammineq qinnutini naapertorlugu iliuuseqarpoq. Ikinngunni Husjaji suliassippaa Akitofelip siunnersuutaa maangaannarteqqullugu. (2 Samueli 15:34) Karenittaaq iliuuseqarpoq — utoqqaanertamik inersimalluartumik ikinngumminik ilisarisimannittumik oqaloqateqarpoq. Qularnera utoqqaanertamit uppernarsarneqarpoq: Ikinngutaa anersaakkut siuariartorsimanngilaq.

Karen oqaluttuarpoq: „Tamatuma qinunerup pissaaneranik qularunnaarsippaanga.” Alianaraluartumik ikinngutigisimasaa aningaasarsiornermik pingaartitsivallaarluni Guutimut kiffartorunnaarpoq. „Katissimagaluarukku, kristumiut ataatsimiinnerinut kisimiillunga orniguttassagaluarpunga,“ Karen oqarpoq. Silatusaartumik aalajangiinissaanut qinuneq iluaqutaavoq.

Misigissutsivit aqunnissaannut ikiuut

„Sianiitsup kamannini tamatigut anittarpaa,“ Ussatit 29:11-mi oqaatigineqarpoq, „ilisimasulli nunusinnaasarpaa.“ Ullumikkut amerlasuut misigissutsikkut tatineqangaarlutik inuupput, akulikitsumillu puuarrallattarlutik — ilaatigut ajorluinnartumik kinguneqartartumik. Brian oqaluttuarpoq: „Suleqatinnik ajornartorsiuteqarpunga. Ullut ilaanni savimmik siorasaarpaanga.“ Illit qanoq iliorsimassagaluarpit? Brian qinuvoq. Kingornatigullu oqaluttuaraa: „Jehovap eqqissisimanissannik ikiorpaanga, suleqatigalu eqqissisarpara. Savik igippaa ingerlallunilu.“ Brianip misigissutsini aquppai kamaammernaversaarluni. Qularnanngitsumik tamatuma inuunera annaappaa.

Illit savimmik sioorasaarneqarsimagunanngilatit, pissutsinilli assigiinngitsunik nalaataqarsinnaavutit misigissutsitit aquttariaqarlugit. Jehova qinnuigigukku, eqqissisimaniarnissat ajornannginnerussaaq.

Isumakulunnermi ikiuut

Barbarap ukiualuit matuma siornatigut erloqinini eqqaamavaa. Oqaluttuarpoq: „Suna tamarmi ingerlanerliorpoq, suliffiga, ilaquttakka ikinngutikkalu. Qanoq iliussallunga nalulluinnarpara. Guutimut ikioqqulluni qinunissani kissaatigigaluarpaa, akornuteqarporli. Oqarpoq: „Jehova sumik qinnuigissanerlugu nalornissutigaara. Naggataatigut isummakkulluunniit eqqissinissaannara qinnutigaara. Unnuit tamaasa, tamanik isumakuluutilersunnginnissannik ikioqqullunga qinusarpunga.“

Qinusarnini qanoq iluaqutigaa? Oqaluttuarpoq: „Ullualuit qaangiummata ajornartorsiutikka qaangiutinngikkaluartut, eqqarsaatigivallaarunnaarlugillu  isumakuluutigivallaarunnaarsimallugit malugaara.“ Biibili imaattumik neriorsuuteqarpoq: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi Jiisusimi.” — Filippimiut 4:6, 7.

Guutimut qanillinissamut ikiuut

Eqqarsaatigeriassagittaaq Paulip oqaluttuaa qanoq ilinniarfigisinnaanerlugu: „Ilaquttama ilaannut nooqqammerpunga, unnuillu ilaanni nikallugasorujussuuvunga. Atuarunnaaqqammerpunga ikinngutikkalu tamaasa maqaaseqaakka. Unnuk taanna nuannisaaqatigiittarsimanivut eqqarsaatigilerakkit qullilivunga.“ Pauli qanoq iliussava? Siullermeerluni Guutimut qamannga pisumik qinuvoq. Oqaluttuarpoq: „Jehovamit nakussatsinneqarnissara isumakkullu eqqissinissara qamannga pisumik qinnutigaara.”

Qanoq pisoqarpa? „Aqaguani iterama aatsaat taama oqiliallassimatigalunga misigaanga. Isumatsassimajunnaarpunga eqqissinerli ’Guutimit pisoq siuneqassusernit tamanit annerungaartoq malugalugu’.“ Pauli nikallungajunnaarami pissutsit qanoq issusiat takulluarsinnaanerulerpaa. Sivitsunngitsoq paasilerpaa ’qanga ullut nuannersuusorisani’ pitsaavallaarsimanngitsut. (Oqaluussisartup oqaasii 7:10) „Ikinngutimi“ maqaasingaakkami pitsaasumik sunnersimanngilaa.

Pingaarnerpaavoq Paulip Jehovap imminut isumassuinera malugilluaramiuk. Jaakup allagaani 4:8-mi allassimasoq ilumoortuusoq misigaa: „Guuti qaninniarsiuk, taava taanna ilissinnut qanillissaaq.“ Tamanna Paulip inuuneranik allannguisuuvoq. Jehova tamanit pingaartinnerulerlugu tunniulluinnarpoq.

Guuti oqaloqatigisaruk!

Pisimasut eqqaaneqartut takutippaat illittaaq qinuneq iluaqutigisinnaagit. Soorunami aatsaat taamattoqarsinnaavoq Guuti pimoorullugu ilikkarusukkukku ikinngutigilerniarsaralugulu. Ajoraluartumilli inuusuttorpassuit kinguarsartarput. Carissa kristumiunik angajoqqaaqarluni peroriartortoq oqaluttuarpoq: „Isumaqarpunga aatsaat ukiuni kingullerni Jehovamut attaveqarneq nalissaqanngitsoq, qanoq pingaaruteqartigisoq paasilluarsimallugu.“ Brad, siusinnerusukkut eqqaaneqartoq kristumiunittaaq peroriartorpoq, namminerli isummani maliinnarlugu ukiualunni inuusimavoq. Oqaluttuarpoq: „Suna annaasimanerlugu aatsaat paasilerakku Jehova ujalerpara. Maannakkut paasilerpara Guutimut attaveqarluarnani inuuneq qanoq nillertigalunilu imaqanngitsigisinnaasoq.“

Guutimut palligunniarninni ajornartorsiuteqalernissat utaqqeqinagu. Maannakkumiit oqaloqatigisaleruk. Taamaaliukulagillu! (Lukasi 11:9-13) „Uummammiugisatit tassunga saqqummiutikkit.“ (Tussiaatit 62:9) Pilertortumik paasilissavat qinuneq ilumut iluaqutigisinnaagit. (gE 22/7 01)

[Quppernerup ataani ilanngussat]

[Qupp. 14-mi ungalusaq/​assiliartat]

Qinnutip ikiorsinnaavaatit

● Silatusaartumik aalajagiinissannut

● Tatineqarninni eqqissisimanissannut

● Isumaaluppallaannginnissannut

● Guutimut qaninnerulernissannut