Inuusuttut aperipput:

Akiniaaneq sooq ajortuua?

„Ajuallatsippaanga.“ — Conneel, 15-inik ukiulik, inuarsimalluni parnaarussaasoq.

Andrew, 14-inik ukiulik, atuarfimmi festernermi ilinniartitsisumik toqutsisoq, ilinniartitsisunik angajoqqaaminillu uumiginninnerarpoq niviarsiaqqallu kamaannerarlugit itigartittarmanni.

ATUAGASSIAP Time-p „ileqquuleriartortoq toqussutaasoq“-mik taavaa. Inuusuttuaqqap kamattup isertorluni sakku atuarfiminut eqquppaa atuaqatiminullu ilinniartitsisuminullu eqqalerluni. Pisut alianartut taamaattut USA-mi ima nalinginnaatigilersimapput TV-qarfiit ilaannit „nakuusernermik qaartoorneq“-tut oqaatigineqarlutik.

Qujanartumik atuarfinni eqqartarneq suli qaqutiguinnaavoq. Kisiannili kamaqaluni pinerluttuliornerit qanittukkut pisut ersersippaat inuusuttut ilaat qanoq kamatsigisut. Iliuutsinut taamaattunut suut pissutaaqataappat? Inuusuttut ilaasa pissaanermik atornerluinermik eqqorneqarnertik naapertuilluanngitsumilluunniit pineqarnertik kamaatigingaartarunarpaat. Allat kamapput kammalaatitik uumisaariuaannarmata. Nukappiaraq 12-inik ukiulik atuaqatiminik aallaannittoq kingornalu imminut aallaasoq oqimaappallaarnerminik uumisaarneqartarpoq.

Soorunami inuusuttut ikinnerit taama ingasatsigisumik peqqarniiserniarsinnaapput. Taamaakkaluartorli ammip qalipaataa tunngavigalugu immikkoortitaatilluni, innimiilliorfigineqartilluni peqqarniitsumilluunniit uumisaarneqartilluni anniaateqarnerup isumakuluuteqarnerullu akiorniarnerat ajornaatsuinnaanngilaq. Ben atuartuugallarami pisimasut pillugit oqaluttuarpoq: „Peqatikka amerlanerit uannit anginerujuaannarput. Qaperneqartaramalu meeqqat allat uumisaartuarpaannga niaqukkullu patittuaannarlunga. Tamanna kamassutigisaqaara. Ajornerulersitsisoq tassa inersimasunik ikiortissarsioraluaraangama sumiginnarneqaannartarnera. Taava kamanneruliinnartarpunga.“ Ben nangippoq: „Aallaasissaqannginnera pissutigiinnarlugu tamaasa aallaanngilakka.“

Inuusuttut imminnut ajortumik pinnissimasunik ajoquseeriaraluartut qanoq isigineqartariaqarpat? Illillu qanoq iliortariaqarpit ajortumik pineqassaguit? Atagu Guutip oqaasia misissoriartigu.

Imminut naalakkersinnaaneq — pissaaneqassutsimut ersiut

Ajortumik pineqarneq naapertuilluanngissuserlu takornartaanngillat. Biibilimik allaqataasoq ima siunnersuilluarpoq: „Kamannaveersaarniarit uumitsattarunnaarlutillu, narrutsannaveerit tamanna ajunaarutaaginnartussaammat.“ (Tussiaat 37:8) Kamangaarneq imminut naalakkersinnaajunnaartitsigajuppoq kingunissaalu puiorluinnartikkajullugit. Narrutsatsinneqaraanni kamangaarluni puuttoqarsinnaavoq. Tamannalu qanoq kinguneqarsinnaava?

 Kainimik Abelimillu assersuut Biibilimi eqqartorneqartoq eqqarsaatigilaaruk. Kainip nukki Abeli narrutsaappaa. Qanoq kinguneqarpa? Biibilimi oqaluttuarineqarpoq: „Ilaannilu silamiitillutik saassuppaa toqullugulu.“ (1 Mosesi 4:5, 8) Aqussinnaanngisaminik kamattoq alla tassa kunngi Sauli. Inuusuttup Daavip sorsunnermi angusarisaanut sinngagami qalugiusanik naakkiartarpoq — Daavimuinnaanngitsoq aammattaarli ernerminut Jonatanimut! — 1 Samueli 18:11; 19:10; 20:30-34.

Soorunami ilaannikkut kamanneq pissutissaqarluartarpoq. Taamaattoqaraangalli kamanneq eqqortumilluunniit pissuteqaraluartoq aqunneqanngikkuni ajortumik kinguneqarsinnaasarpoq. Assersuutigalugu Simmiuut Levilu Sikemimut kamannissaminnut pissutissaqarluarput paasigamikku qatanngutertik Dina pinngitsaalisimagaa. Tatitusaaginnarnissaminnulli taarsiullugu kamassarput, soorlu kingusinnerusukkut oqaasiannit paasinarsisoq: „Qatannguterput arnatut atortittartutut iliorfigimmagu ilaginnaannassanerparput?“ (1 Mosesi 34:31) Kamannerallu ima sakkortutigilerpoq, marluullutik ’panatik tigullugit, akornuserneqaratillu illoqarfimmut iserlutik angutit [Sikemip illoqarfianiittut] tamaasa toqorarlugit’. Kamangaarnerat tuniluuppoq — ’Jaakup erneri’ allattaaq toqussutaasumik saassussinermi peqataapput. (1 Mosesi 34:25-27) Allaat ukiorpassuit tamatuma kingorna Simmiuup Levillu kamannerat aqunneqanngitsoq ataataata assuaraa. — 1 Mosesi 49:5-7.

Pingaarutilimmik ilinniartippaatigut: Aqussinnaanngisamik kamanneq pissaaneqassutsimut ersiutaanngilaq, sanngiissutsimulli. Ussatit 16:32-mi nutsikkami 1989-meersumi allassimavoq: „Silatusaarneq iluaqusiinerusarpoq sorsullaqqissuunermit; imminut naalakkersinnaaneq pingaarneruvoq illoqarfimmik tiguaanermit.“

Akiniaanerup sianiilliornerunera

Taamaattumik Biibilimi ima siunnersorneqarpugut: „Ajortoq akileqinasiuk ajortoqataanik. . . . Nammineerlusi akiniaaqinasi.“ (Romamiut 12:17, 19) Akisineq — nakuusernikkuugaluarpat oqaatsitsigulluunniit peqqarniitsuugaluarpat — Guutip najoqqutassiaanut akerliuvoq. Akiniaaneq aamma iluaqutaanngilaq sianiilliornerullunilu. Nakuuserneq nakuusernerunermik kinguneqaannartarpoq. (Matthæusi 26:52) Amerlanertigullu oqaatsit peqqarniitsut peqqarniinnerusunik kinguneqaannartarput. Eqqaamajuttaaq kamanneq amerlanertigut eqqunngitsuusartoq. Assersuutigalugu ajuallatsinneqaruit ima qularinngitsigaajuk nuannarinnginnamitit taamaaliortoq? Imaassinnaava eqqarsaatigilluarnagu taamaaliortoq inussiarniiginnartorluunniit? Allaallu ajortumik isumaqarluni taamaaliorpat akiniaasinnaatitaavit?

Biibilimi Oqaluussisartup oqaasii 7:21, 22-mi allassimasoq eqqarsaatigilaaruk: „Inuit oqaluuserisaat soqutiginiarpallaartaqinagit inussiaativit perloqqugaatit tusaaratarsinnaagakku. Qamuuna nalunngilat nammineq qasseeriaqalutit inoqatitit perloqqusarakkit.“ Aap, oqaatiginerlunneqartilluni nuanniippoq, Biibilimili miserratigineqanngilaq tamanna inuunermi piviusut ilagigaat. Ilumuussaguillu illittaaq allat pillugit oqaatigisariaqanngisannik oqartoorsimannginnerpit? Taamaattumik inussiarniiffigineqaruit taava sooq ingasattajaassavit? Amerlanertigut uumisaarinernik pakkersimaarinnissutissaq pitsaanerpaaq tassa soqutiginninngilluinnarneq.

Assingusumik ajortumik pineqarsorigaanni ingasattajaarnissaq sianiilliorneruvortaaq. Inuusuttuaqqap Davidimik atillip oqaluttuaraa ilaanni uppeqatini ilagalugit basketballerami qanoq pisoqarnersoq. „Unammisatsinneersup arsamik milorpaanga,“ oqarpoq. David erngerluni eqqarsarpoq taanna isumapiloqarluni taamaaliortoq, akillugulu arsamik miloriarpaa. „Kamaqaanga,“ David nassuerpoq. Pissutsilli ajorsitinnagit David Jehovamut qinuvoq. Eqqarsarpoq: ’Qanoruna iliortunga? Anersaakkut qatanngutiga ilumut kamaanniarpara?’ Kingusinnerusukkut imminnut utoqqatserfigipput.

Taamatut pisoqartillugu Jiisusip maligassiaata eqqaamanera iluaqutaavoq. „Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq.“ (1 Petrusi 2:23) Tatineqaraangatta kissaammernissatsinnut taarsiullugu Guutimut qinusarsinnaavugut imminut naalakkersinnaajuarnissatsinnut ikioqqulluta. Tukkorluni taassuma „imminut qinusut Anersaamik Illernartumik tuniumaarai“. (Lukasi 11:13) Ajuallatsinneqaruit akiniaanissamut  taarsiullugu immaqa pitsaanerpaassaaq ajuallatsitsisumukaruit oqaloqatigiissutiginiarlugu. (Matthæusi 5:23, 24) Imaluunniit innimiilliorfigineqakulaguit, immaqa atuarfimmiittumit, sapinngisannik saqitsaanninnguunnaveersaartittariaqarpat. Imminullu illersorniarlutit iliuuseqartariaqarputit. *

Inuusuttoq kamannerminik aqutsinissaminik ilikkartoq

Inuusuttorpassuit najoqqutassat Biibilimeersut tamakku kinguneqarluartumik malittarpaat. Catrina, mikisunnguulluni meeravissianngortinneqartoq, assersuutigisinnaavarput. Oqarpoq: „Kamannermik ajornartorsiuteqarnikuuvunga paasisinnaannginnakku sooq anaanavimma qimasimaneraanga. Kamanneralu arnarsiannut tutsittarpara. Sianiilliorlunga isumassarsivunga arnarsiama nuanniilliortinneratigut anaanaviga akiniarsinnaallugu. Suut tamaasa atortarpakka — oqaatsikkut naalliutsitsisarpunga, nateq tukkartarpara, suaartartarpunga nilliasarlungalu. Matunik matorluttaarineq sakkunnaaraara. Oqarfigikulavaralu uumigalugu — tamakku tamaasa iliuuseraakka kamangaarama. Eqqarsaatigigaangakku paasisinnaanngivippara taama pissusilersortarsimagama.“

Kamannermi nununissaanut Catrinap suna iluaqutigaa? Akivoq: „Biibili atuarlugu! Tamanna pingaartorujussuuvoq Jehovap qanoq misiginersugut nalunngimmagu.“ Catrina aamma tuppallerpoq ilaqutaasalu allaaserisat Iteritsi!-meersut ajornartorsiutiminorpiaq tunngasut atuaramikkit. * „Pissutsit tamatta oqaloqatigiissutigisinnaalerpavut misigissutsikkullu paaseqatigiilerluta,“ oqaluttuarpoq.

Illittaaq kamannerpit aqunnisaa ilinniarsinnaavat. Uumisaarneqassaguit, innimiilliorfigineqassaguit allatigulluunniit ajortumik pineqassaguit oqaatsit Tussiaat 4:5-imiittut eqqaamakkit: „Kamassimariannguaritsi, kisiannili ajortuliornasi!“ Kamannermut ajoqusiisumut nakkaannannginnissannut oqaatsit tamakku iluaqutigisinnaavatit. (gE 10/22 01)

[Quppernerup ataani ilanngussat]

[Qupp. 15-mi assiliartaq]

Amerlanertigut uumisaarinernik pakkersimaarinnissutissaq pitsaanerpaaq tassa soqutiginninngilluinnarneq