Anaanaq paniilu qulit

OQALUTTUARTOQ ESTHER LOZANO

ANAANA ataatalu illoqarfimmi Bitlisimi Tyrkiamiittumi inuunngorput Armeniamiut angajoqqaaralugit. Ukiuni 1900-kkut aallartinneranni Armeniamiunik toqoraanersuaqarmat ataatarput Tyrkia qimallugu Amerikamut pivoq. Taamani 25-t missaanik ukioqarpoq. Anaanarput, Sophia, kingusinnerusukkut aallarpoq — 12-inik ukioqarluni.

Ilaqutariinni marlunni angajoqqaat isumaqatigiissimagunarput anaanarput Amerikaliassasoq ataatarput, Aram Vartanian, katikkiartorlugu. Sophia Fresnomut Californiamiittumut tikikkami katinnissaminut inuusuppallaarami inersimasunngornissami tungaanut sakissaminiippoq.

Angajoqqaatta angajulliliaat nukappiaraavoq, Antranigimillu atserpaat. Kingusinnerusukkut ateq taanna nammineq Barneymut allanngortippaa. 1914-imi aggustip arfernanni inunngorpoq. Qitornaat tulleriit quliusut tamarmik niviarsiaraapput. Shield Toutjian 1924-mi Fresnomut tikeraarluni Armeniamiut tassaniittut oqalugiarfigimmagit ataatarput Biibilimik Atuaqqissaartartunngorpoq, soorlu taamanikkut Jehovap Nalunaajaasui taamatut ilisimaneqartut. Taamanili ilaqutariit tamarmik kristumiut ataatsimiinnerannut najuuttalerput.

1931-mi Oaklandimut Californiamiittumut nuuppugut ilagiillu tassaniittut ilagisalerlugit. Barney 1941-mi toqunissi tikillugu Napami, aamma Californiamiittumi, aalajaalluni Jehovamut  kiffartorpoq. Niviarsiaqqat Barneyp kingorna inunngortut pingajoraannga, 1935-milu kuisippunga. Qatannguterput Agnes ukiut 75-t missaanni ataatsimiigiartareerluni qanittukkut kuisippoq. Qatanngutigiiusugut tamatta najuuppugut nuannaangaarluta kuisimanngitsortarput kuisimmat.

Ajoraluartumik anaana najuutinngilaq. Ukiup siuliani toquvoq ukiunik 100-nik ullunillu marlunnik ukioqarluni. Toqunera Californiami aviisimi Hayward News-imi 14. maaji 1996-imoortumi allaaserineqarpoq. Aviisimi oqaluttuarineqarpoq „Jehovamut nalunaajaasutut ukiuni 54-ni nammineq kajumissutsiminik inuiaqatigiinni kiffartorsimasoq inuit Biibilimik soqutiginnittut . . . ajoqersorlugit“. Allaaserisami aamma qatanngutitta Elizabethip oqaasii issuarneqarput: „Angerlarsimaffia ammajuaannarpoq nerrivimmilu inissaqartuaannarluni . . . Oqartarpoq, ’iserlutit cowboy-kaffisorniarit’, ullorlu taanna tusaamasaassutiminik baklava-kaagiliorsimappat iluanaassaqaatit.“

Angajullersarput, Gladys, 85-inik ukioqarpoq, nukarlersarpullu 66-inik ukioqarluni. Tamatta Jehovap nalunaajaasuisut aallussilluartuuvugut. Qatanngutigiinnit pingasuulluta Napasuliaq Alapernaarsuiffiup Biibilimik Atuarfiani Gileadimeereerluta ajoqersuiartortitatut aallartinneqarpugut. Elizabeth, maanna Newport Beachimi Californiamiittumi najugaqartoq, klassit 13-ianniippoq Callaomullu Perumiittumut aallartinneqarluni, tassanilu ukiuni tallimani kiffartorpoq. Ruth klassit 35-ianniippoq. Uinilu, Alvin Stauffer, ukiuni tallimani Australiami ajoqersuiartortitatut kiffartorput. Uanga Gileadimi klassit sisamassaanniippunga 1947-milu Mexicomut aallartinneqarlunga. Tassani 1955-mi Rodolfo Lozano katippara. * Taamanili marluulluta Mexicomi ajoqersuiartortitatut kiffartorpugut.

Qatanngutigiit quliulluta peqqissuserput qujamasuutigeqaarput. Tamanna pissutigalugu maanna Jehova Guutimut kiffartortuarsinnaavugut uummatikkut iluunngarluta, isumakkut iluunngarluta nukivullu tamakkerlugit — neriuutigalugulu silarsuassami nutaami taassumunnga naassaanngitsumik kiffartornissarput. (gE 10/22 01)

[Quppernerup ataani ilanngussaq]

[Qupp. 20-mi assiliartaq]

Agnes 1997-imi kuisimmat

[Qupp. 20, 21-mi assiliartaq]

Elizabeth 1949-mi Gileadimi atuarnini naammassigamiuk

[Qupp. 21-mi assiliartaq]

Esther (talerperleq) 1950-mi Mexicomi immikkoortortaqarfimmi

[Qupp. 21-mi assiliartaq]

Ruth Alvinilu Stauffer 1987-mi Mexicomi immikkoortortaqarfimmi sulitillutik