Biibilimi qanoq allassimava?

Guuti qanoq kamagittartigiva?

„QANOQ PISOQASSAGALUARPA GUUTIP, NAAK KAMANNINI TAKUTIKKUMAGALUARLUGU PISSAANINILU SAQQUMMERSIKKUMAGALUARLUGU, TAAMAATTOQ IMMERSAKKAT KAMAANNEQARALUARTUT ASERORTIINNAGASSANNGORALUARTULLU NIKALLUJUINGAARLUNI ASATTUUSSIMAPPAGIT.“ — ROMAMIUT 9:22-24.

GUUTIP oqaluttuarisaanerup ingerlanerani ajussuseq saqqumiinnartoq ilaginnaannarallarsimavaa. Ukiut 3000-it sinnerlugit matuma siorna Jobi kappialavoq: „Sooq iluaatsut inuuginnartarpat, allaat utoqqalinerminni nukittuujusarput peqqissuusarlutillu? Qitornaat isumakuluuteqarnatik taakkunaniittarput, kinguaatik imminerminni najortigisarpaat. Ilaqutaat isumannaallisitaasarput annilaarnartunut, Guutillu pillaammik misigitinneq ajorpai.“ (Jobi 21:7-9) Allat naapertuilluarnermik pingaartitsisut soorlu pruffiiti Jeremiap, Guutip inunnik ajortunik akuersiinnannguatsiarnera isumakuluutigalugu oqaatigaa. — Jeremia 12:1, 2.

Illilli qanoq isumaqarpit? Illit aamma Guutip ajussuseq taama ingasatsigisoq akuerimmagu tupigaajuk? Ilaannikkut eqqarsaatigisarpiuk Guutip ajortut tamaasa nungutipallaannassannginnerai? Guutip kamagittarnerminut naammagittarnerminullu killigititaminut tunuliaqutai Biibilimi qanoq oqaatigineqarnersut takoriartigu.

Guuti sooq kamagittartuua?

Aperisoqaqqaarsinnaavoq: Guuti naapertuilluarnerpaajulluni, ajussuseq sunaluunniit qanoq akuerisinnaassavaa? (5 Mosesi 32:4; Habakkuk 1:13) Isumaqarpa ajussuseq isiginngitsuusaaraa? Naamerluinnaq! Assersuut una eqqarsaatigeriaruk: Takorluulaariaruk napparsimavimmi pilattaasartup peqqinnissamut tunngasunik sianiginnilluarnissamut tunngaviusut unioqqutikkai napparsimasuutinilu anniaatissingaarlugit. Napparsimaviup pisortaanit soraarsipallanneqassannginnerluni? Pissutsilli taamaatsillugit immikkut ittumik kamagittarnissaq tunngavissaqarluarsinnaavoq. Pinartoqartillugu, soorlu sorsuffimmi, pilattaasartut pissutsini navianarsinnaasuni atortorissaaratik suliarinneriaatsit atortullu naammaginanngitsut akuerineqarsinnaanngilluinnartullu atorlugit sulinissaat akuerisariaqarsinnaavoq.

Tassunga assingusumik Guutip assigiinngitsorpassuit isimi akuerisinnaanngilluinnagai maannakkorpiaq ilaginnaannarallarpai. Ajussuseq uumigigaluarlugu akuerigallarpaa. Kamagittarnerulli naammagittarnerullu ersersinnissaannut pissutissaqarluarpoq. Siullermik Saatanip Guutimut Edenip naatsiiviani pikititsigami apeqqutinngortitai pingaarutillit tamaasa paasinartumik akineqarnissaannut piffissaliivoq. Apeqqutit pineqartut tassaapput Guutip naalagaassusia ilumut eqqortuunersoq naapertuilluartuliornerunersorlu. Aappassaanik Jehovap naammagittarnerata ajortumik iliorsimasut isumataarnissaannut piffissaqalersillugillu periarfissippai.

Guuti naakkinnittuullunilu naammagittartoq

Siuaasatta siulliit, Adam Evallu, Saatanip Guutimut pikitsitsineranut malinninnissartik qinerpaat. Ingerlaannaq Guutip nungutissimagaluarpagit tamanna pissusissamisuuginnarsimassagaluarpoq. Akerlianilli naammagittarpoq naakkinninnermillu ersersitsilluni asanninnermigut meerartaarnissaat akuerigamiuk. Meeqqalli taakkua ajortiliullutik inunngorput taamaattumillu ajorti kinguaaminnut inuiannut tamanut ingerlateqqippaat. — Romamiut 5:12; 8:20-22.

Guutip siunertarisimagaluarpaa sulilu siunertaralugu alianartumit tassannga aniguisinnissaat. (1 Mosesi 3:15) Nalliutinngikkallarneranili  naammagittangaarnermik naakkinnissusermillu ersersitsivigai, naammalluinnanngissutsimit Adamimit kingornussimasatsinnit qanoq sunnersimaneqartugut nalunngilluinnaramiuk. (Tussiaat 51:7; 103:13) Jehovap ‘ilumoorsusia angeqaaq’ ‘isumakkeerfiginnittuarnissaminullu’ piareersimavoq. — Tussiaat 86:5, 15; Esaja 55:6, 7.

Guutip kamagittarallarnera killeqarpoq

Kisianni Guutimit asanninngitsumik naapertuilluanngitsumillu iliornerussaaq naassaanngitsussamut ajussutseqartuarnissaa akueriguniuk. Ataatap asannittup kialuunnit qitornami ilaata ajussutsimini ilaqutariit sinneri piaaraluni amerlasuunik killeqanngitsumik anniaatissippagit ilaginnaannarnavianngilaa. Naammagittarneq Guutip ajortimut ilaginnaannarallaramiuk ersersitaa, piginnaassusiinik allanik oqimaaqatigiissinneqartuassaaq, soorlu asanninneq, silatussuseq naapertuilluarnerlu. (2 Mosesi 34:6, 7) Guutip kamaginnissusianut siunertaanut pissutaasoq piviusunngorpat, ajussutsimik qajassuussiunnaassaaq. — Romamiut 9:22.

Taamaannera Paulusip oqaasiini apustilit suliaat 14:16-imi erseqqissumik saqqummiunneqarpoq: „Siornatigut Guutip inuit Guutimik nalusut tamaasa namminneq ingerlavigiumasaatigut ingerlatissimavai.“ Piffissami allami Paulusip allaaseraa Guutip qanoq inunnut inatsisiminik najoqqutassiaminillu sumiginnaasunut ‘ullut imminik ilisimanninngiffiusut ilaginnaaginnarfigisimagai’. „Maannali“ Paulusi nangippoq, „inuit peqqusiffigai tamarmik sumiluunniit ittut allamik isumataassasut.“ Suna pissutigalugu? Pissutigalugu ‘aalajangersimagamiuk ulloq silarsuarmik tamarmik naapertuilluartumik eqqartuussiffissani’. — Apustilit Suliaat 17:30, 31.

Guutip kamagittarallarnera iluaqutigiuk

Taamaattumik kinaluunniit isumaqartariaqanngilaq Guutip inatsisai sumiginnarsinnaallugit kingornalu iliuutsimi kinguneri pinngitsoorniarlugit soqutigittaalluni Guuti qinnuigalugu isumakkeerfigeqqusinnaassalluni. (Josva 24:19) Israelitoqqami amerlasuut taamatut pissusilersorsinnaasorisimapput. Isumataarumanngillat. Guutip kamagittarnerata naammagittarneratalu siunertaa atunngitsoorpaat. Guutip ajussusiat naassaanngitsumik ilaginnaannanngilaa. — Esaja 1:16-20.

Biibilimi takutinneqarpoq Guutip inaarutaasumik eqqartuussinera pinngitsoorniarlugu ‘isumataarnissaq’ pisariaqartoq. Taamaaliorniaraanni peqqissimisariaqarpoq naammalluinnanngitsuuneq ajortiliunerlu Guutimut nassuerutigalugu ajortumillu iliortarunnaarluni. (Apustilit Suliaat 3:19-21) Tamatuma kingorna Jehova Guutip Kristusip pilliutaatigut utertitsissutaasukkut ajortitsinnik isumakkerfigisinnaavaatigut. (Apustilit Suliaat 2:38; Efesosimiut 1:6, 7) Guutip piffissaa nalliuppat Adamip ajortuliaata kinguneri alianartut tamaasa iluarsisissavai. „Qilak nutaaq nunalu nutaaq“ pilersinneqassapput, tassani Guutip inunnik piagaasussanik kamagittarfiginninnissaa pisariaarutissaaq. (Saqqummersitat 21:1-5; Romamiut 9:22) Guutip kamagittarnerata killisissaanngitsup nuanningaassusia, killeqanngitsuunngilarli. (gE 10/8 01)

[Qupp. 23-mi assiliartaq]

Guutip Adamip Evallu qitornartaarnissaat akueraa