„Immaqa taamaalioqqissanngilaq“

ROXANA * arnaavoq qiimasoq nuannersorlu sisamanik meeralik Amerika Kujallermilu tusaamasaalluartumik pilattaasartumik uilik. „Uiga arnanit ilakkuminartinneqarpoq angutinillu nuannarineqarluni,“ oqaluttuarpoq. Pissuseqarporli ikinngutiginerpaasaasaluunniit nalusaannik. Roxana oqarpoq: „Angerlarsimatilluni inupiluusarpoq. Sangiannikkaarujussuuvoq.“

Roxana oqaluttuartilluni annilaangarpasippoq. „Katinnitta kingorna sapaatip-akunnialuinnaat qaangiuttut ajornartorsiut aallartippoq. Aqqalussakka anaanagalu pulaartillugit nuannisaaqaagut illartarlutalu. Animmatali uima kamaqaluni sofamut naloriuppaanga. Susoqarnersoq paasinngilluinnarpara.“

Ajoraluartumilli Roxanap atugarliuutaanut aallaqqaataannaavoq, ukiummi ingerlanerini arlaleriarluni unatarneqartarpoq. Naalliutsitaaneq assigiiartuugunarpoq. Unatariarlugu utoqqatseqattaartarpoq taamaalioqqinngisaannassallunilu neriorsuisarluni. Sivisuumik pissuserittarpoq annikilliuutilli aallarteqqittarput. Roxana oqarpoq: „Eqqarsartuaannarpunga: ’Immaqa taamaalioqqissanngilaq.’ Qimakkaluaraangakkuluunniit uteqqittuaannarpunga.“

Roxanap annilaangassutigaa uimi nakuusertarnerata ingasatsikkiartulernissaa. „Meeqqallu toqunniarluta imminorniarlunilu siorasaarinikuuvoq,“ oqarpoq. „Ataatsimik qiuutinik toqqusassivaanga. Ulloq alla illuinnarsuummik siutikkut umeriarlunga nusuttaataa nusuppaa. Qujanartumik imaqanngilaq, annilaanganermilli sussaajunnaaqqavunga.“

Malugineqarani naalliunneq

Silarsuaq tamakkerlugu arnat millionillit Roxanatut uiminnik nakuuserfigineqartarput. * Ilarpassuisa tamanna allanut oqaatigineq ajorpaat. Isumaqarput saassunneqartarnitik unnerluutigigaluarunikkit iluaqutaanavianngitsoq. Taamaattoq anguterpassuit nakuusertarnerarneqarnertik  suusupagisarpaat oqarlutik: „Nuliaraana ajuallajavallaartoq“, imaluunniit: „Ingattarseqqajaasartoq-una“.

Alianarpoq arnarpassuit toqqissisimaffiginerpaaffissaraluaminni, tassa namminneq angerlarsimaffimminni, saassunneqarnissartik annilaangassutigiuarlugu inuusariaqarmata. Ajoraluartumik pinerluttuliortoq pinerluttuliorfigineqartuminngarnit illersorneqarnerugajuppoq. Ilaasa upperiuminaatsippaat angutip pitsaarpasissup nuliaminik unataasinnaanera. Arnaq Anitamik atilik isertuarani uiminit ataqqisaasumit naalliutsinneqartarnini allanut oqaluttuaraa. „Nalunngisatta oqarfigaanga: ’Qanoq ilillutit angut taama pitsaatigisoq unnerluutigisinnaaviuk?’ Alla oqarpoq uanga kamassaarsimassagiga. Allaat uiga paasisaareeraluartoq ikinngutitta ilaasa ilaginaveersaartalerpaannga. Isumaqarput akueriinnartariaqaraluariga, oqarpummi: ’Angutit taamaapput.’“

Anitap misigisaata ersersippaa nuliamik nakuuserfiginnittarnerup qanoq ajornartorsiutaatiginera inuppassuit paasiuminaatsikkaat. Angut arnamut asanerakkaminut suup taama naakkittaatsigisumik iliortippaa? Arnat nakuuserfigineqartartut qanoq ikiorneqarsinnaappat?

[Quppernerup ataani ilanngussat]

[Qupp. 4-mi ungalusaq/​assiliartaq]

Arnanut nakuuserfiginneriaatsit

FN-ip arnanut nakuusertarunnaarnissaq pillugu nalunaarutaa naapertorlugu „arnanut nakuusernerit“ tassaasinnaapput „timikkut, kinguaassiuutitigut eqqarsartaatsikkulluunniit arnamik ajoqusiisumik ajoqutaasinnaasumilluunniit arnanulluunniit naalliuutaasumik naalliuutaasinnaasumilluunniit arnaanera pillugu nakuuserfiginninneq, ilaapputtaaq nakuuserniarluni sioorasaarineq, tamanut saqqumisumik angerlasimaffimmiluunniit pinngitsaalillugu nalaatsornikkulluunniit kiffaanngissusiiaaneq“. Nakuusernermut tamatumunnga ilaatigut ilaapput „ilaqutariinni inuiaqatigiinniluunniit timikkut, kinguaassiuutitigut eqqarsartaatsikkullu naalliutsitsinerit, ilaatigut niviarsiaqqanik kinguaassiuutitigut atornerluineq, arnap katinnermini nassatai pillugit nakuuserneq, aapparmik pinngitsaaliilluni arnerineq, arnat kipineqartarnerat kulturikkullu ileqqulersuutit allat arnanut ajoqutaasut“.