Inuusuttut aperipput

Anersaarsiorneq pinnguarilaaginnarlugu ajorami?

INUUSUTTUT anersaarsiorneq soqutigaat? Tamanna misissueqqissaartartut paasiniarsimavaat atuartut ilaat atuarfinni 150-ni apersorlugit. Misissuinerup kisitsisit makkua ersersippai: Apersorneqartut affai sinnerlugit (54 procentii) oqarsimapput anersaarsiornermut tupinnartunullu soqutiginnillutik, sisamararterutaasa missai (26 procentii) „soqutiginnittorujuullutik“ oqarsimapput.

University of Alaska Anchorage-imi misissueqqissaartartut allapput: „Aviisit- atuagassiallu Satanisiorneq soqutigineqaleraluttuinnartoq pillugu allaaserinnittartut. . . ukiuni kingullerni amerliartupiloorsimapput.“ Immikkut paasisimasallit oqarput inuusuttut akornanni satanisiornerup soqutigineqarneranik uppernarsaatit takussutissaasut ikittuinnaasut. Taamaakkaluartorli qularutissaanngilaq inuusuttorpassuit arlaatigut satanisiornermik anersaarsiornermillu soqutigisaqartut, soqutiginninneralluunniit annikitsuinnaagaluarpat.

’Anersaarsiorneq pinnguaralugu ajorami?’ inuusuttut ilaat immaqa aperiumassapput. Apeqqut akitinnagu, takussavarput inuusuttut qanoq ilillutik anersaarsiorneq attavigigajuttaaraat.

Anersaarsiornermut aqqutit

Ilanngutassiami U.S.News & World Report-imi allassimavoq „Ukiut 20-it matuma siornagut takorloorneqarsimanngitsumik ullumikkut meeqqat inuusuttullu assiliarpassuarnik paasissutissarpassuarnillu paatsiveerussaataasunik — ilaatigut ernumanartumik — pissarseriaannaapput“. Inuusuttut alapernaannermikkut anersaarsiorneq pillugu paasissutissanik atuakkat, atuagassiat, videofilmit internettiluunniit aqqutigalugit paasiniaasarput.

BBC News Online naapertorlugu tv-kkut isiginnaagassiat nuannarineqartut ilisiinneq pillugu aammillu milluaasartunik aallakaatitsisarnerisa, „angakkuarnittarneq pillugu meeqqat soqutiginnilersittaraat. Aamma nipilersukkat heavy metal-imeersut nakuusernermut anersaapilussiornermullu tunngassuteqarput. Aviisimi aaqqissuisoq Tom Harpur Torontop avisianut The Sunday Star-imut allappoq: „Sakkortunerpaamik [nipilersornerup iluani] pisartut mianersoqqussutigissavakka. . . . Taama taqassinartigisumik nalaataqanngisaannarpunga. Erinarsuutit silaarunnernik, tiguaarnernik, anersaapilunnik, aammik kuiserusunnermik, oqaasipilunnik, nakuusernernik assigiinngitsunik, allaat pinngitsaaliinernik, imminut aqqunartiternernik, toqutsinernik aamma imminornernik imaqarput. Toqu aamma aserorterineq, naggatissami siulittuutit, sunut tamanut amiilaarnartunut ajortunullu taarsiullugu ajunngitsunik tamanik miserratiginninneq — qulequtaat taakkuugajunnerupput.“

Nipilersuutinik tamakkuninnga tusarnaarluni ilumut pissusipalaaqalersitsisinnaagami?  Tamanna nukappiaqqami 14-nik ukiulimmi USA-minngaannersumit erserpoq anaanani kapillugu toqukkamiuk imminorlunilu. Sinittarfiata iigai assiliarsuarnik nipilersortartunik heavy metalikkunnik ulikkaarput. Kingornatigut ataataa ilungersorluni ima kajumissaarivoq: „Angajoqqaat oqarfigisigit nipilersuutit meeqqamik tusarnaartagaat sissuissagaat.“ Oqaluttuarpoq anaanani toqunngitsiarlugu sapaatip akunnera sioqqullugu erni „aak anaanamillu toqutsinissaq“ pillugit erinarsoqattaartarsimasoq.

Taavalu aamma isiginnaagassiani, peqataasut angakkuusaartinneqarlutik allanilluunniit anersaarsiornermut tunngasunut inuttaasuusaartinneqartarput. Isiginnaagassiarpassuit taamaattut peqqarniittartupilorujussuupput. *

Taamaakkaluartoq Ilisimatuutut misissuinermi peqatigiiffik Mediascope oqarpoq: „Misissuinerit takutippaat inuusuttut heavy metalinut nuannarinninnerat imigassamik ikiaroornartumillu atornerluinernut, tarnikkut naalliuutinut, imminoriartarnernut . . . ulorianartumik pissusilersornernut takornartatulluunniit misigilersitsinernut pissutaasinnaasoq, taamatulli pissusilersornermut nipilersuut pissuunngilaq. Patsisaasorineqarpoq inuusuttut taamaattunik ajornartorsiutillit heavy metal ornigisaraat, nammineq misigissutsitik paatsiveerussimasut erinarsuutit oqaasertaasa ersersittarmatigit.“

Misissueqqissaartartut tamarmiunngitsut nipilersuutinut peqqarniitsunut tusarnaarnerup navianaateqarnera isumaqatigiinngilaat, videofilmilli amerliartuinnartut, nipilersuutit pinnguaatillunniit nakuusernernik ersersitsisut imminullu aserorsaasut qanoq ilillutik ajoqutaasinnaassanngillat? Anersaarsiornermik pinngualaaginnarniarneq kristumiunut navianaateqarnerujussuuvoq.

Guutip anersaarsiorneq pillugu isiginnittaasia

Apustili Paulusip Korinthimiunut allagaani siullerni 10:20-mi kristumiut ima mianersoqquai: „Ilissilu anersaapilunnut peqatigiissuteqaqqunngilassi.“ Anersaapiluit suuppat, aamma sooq atassuteqarfiginissaat taama ulorianartigaa? Naatsumik oqaatigalugu anersaapiluit inngiliusimagaluarput Satan Diaavulu malissallugu aalajangersimasut. Satan isumaqarpoq „assortuisoq“, aamma Diaavulu isumaqarpoq „mamarliisoq“. Biibilimi oqaatigineqarpoq taanna Guutip ernerigaluaraa anersaajusoq Guutimut pikititsinermigut imminut assortuisunngortissimasoq mamarliisunngortissimallunilu. Piffissap ingerlanerani  Satanip inngilit allat pikititseqasiuppai. Ililiuttut taakku taamaalillutik anersaapilunngorput. — 1 Mosesi 3:1-15; 6:1-4; Judasi 6.

Jiisusip Satani ’silarsuup matuma naalagaanik’ taavaa. (Johannesi 12:31) Satan anersaapiluilu ungasingitsukkut peersitaasussaangamik ’kamattorsuupput’. (Saqqummersitat 12:9-12) Taamaattumik tupinnanngilaq inuit anersaapilunnik sammisaqartartut qanoq ajorsinnaatiginerat paasilertarmassuk. Surinamimi arnap ilaqutariinni anersaarsiornermik aallutaqartuni peroriartorsimasup nammineq isiminik takusimavaa anersaapiluit „piumasaannik iliorumanngitsunik naalliutsillutik nuannarisaraat.“ * Ulorianarluinnarpoq anersaapiluit naakkittaatsut qanorluunniit atassuteqarfigilersimagaanni sammissarissallugit.

Taamaattumik qanga Guutip innuttani, israelikkut, peqqusimavai anersaarsiornermut tunngasut suulluunniit ingalassimaqqullugit. „Taamaaliortut kikkulluunniit [Jehovap] maajugai“ Mosesip allagaasa tallimaani 18:10-12-mi allassimavoq. Kristumiut aamma ilisimatinneqarput Guutip ’angakkuartartut’ suujunnaarsissagai. (Saqqummersitat 21:8) Allaat anersaarsionermik pinngualaaginnarniarneq Guutimik assuarineqarpoq. ’Mingunnartumik attueqinasi,’ Biibilimi allassimavoq. — 2 Korinthimiut 6:17.

Anersaarsiornermi tiguartissimanermit qanoq aniguisoqarsinnaasoq

Isumaatsuliornikkut anersaarsiorneq misilissimaviuk? Taava illoqarfimmi Efesosimi ukiuni hundredelinni siullerni pisimasoq eqqarsaatigiuk. Illoqarfimmi tassani amerlasuut ’angakkuarniartarsimapput’, apustili Paulusilli anersaaq illernartoq ikiortigalugu tupinnartuliai imaannaanngitsut ilaasa killitsissutigaat. Suna kinguneraa? „Angakkuarniartarsimasut ilaasa atuagaatitik nassarpaat tamarmillu takkuanni ikuallallugit. Naatsorsuutigineqarpoq tamakkua tamarmik aningaasanik sølviusunik 50.000-nik naleqartut. Taamaalilluni oqaaseq [Jehovap] pissaaneragut siammariartortuarpoq sunniuteqarnerujartuinnarlunilu.“ — Apustilit suliaat 19:11-20.

Anersaapilunnik tiguartissimanermit aniguiumagaanni, satanisiornermut atorsimasat tamaasa aserortertariaqarput! Atuakkat, atuagassiat, assiliarsuit, quppersagaaqqat titartakkat, videofilmit, arnussat (”illersuutissatut” nassatarisakkat) aammalu anersaarsiornermut atortut internettimeersut pineqarput. (5 Mosesi 7:25, 26) Siulittuiniarnermut atortut soorlu krystalkuglit, paakornermut salliligaq pigiunnaartariaqarput, nipilersuutit videofilmilluunniit satanisiornermut tunngassuteqartut eqqarlugit.

Alloriarnissamut taamaattumut sapiissuseq aalajangersimalluinnarnissarlu pisariaqarput, akilersinnaavorli. Arnaq kristumiu Jeanimik * atilik qarasaasiamut pinnguaatinik ajoqutaasorinnanngitsunik pisisimavoq. Pinnguaatimili immikkoortut assigiinngitsut pereerlugit paasilersimavaa ilaat anersaarsiornermut tunngassuteqartut. Sivitsunngitsoq sinnattupiluttalerpoq. „Unnuit ilaanni makippunga pinnguaallu aserorterlugu,“ Jean oqaluttuarpoq. Suna kinguneraa? „Kingorna ajornartorsioqqinngilanga.“

Piumalluinnaruit anersaarsiornermit aniguisinnaavutit. Jiisusi Diaavulup imminut pallorfigeqqulluni misilikkaluaramiuk Jiisusip qanoq aalajangersimatiginera eqqaamajuk. „Taava Jiisusip oqarfigaa: ’Nigorit, Saatani! Allassimavormi: „[Jehova] Guutit pallorfigissavat taannalu kisiat kiffartuullugu.“’ Taava Diaavulup Jiisusi qimappaa.“ — Matthæusi 4:8-11.

Ikiortissarsiorit

Apustili Paulusip eqqaasippaatigut kristumiut tamarmik „ajussutsip anersaavinut pissaasunut qilaap ataaniittunut“ sorsuuttuusut. (Efesosimiut 6:12) Kisimiillutilli Satani anersaapiluilu akiorniarsareqinagit. Angajoqqaannik guutimik mianerinnittunit utoqqaanertanillu ilagiinniittunit ikiortigit. Immaqa anersaarsiornermik attaveqartalersimaninnik allat oqaluttuutissallugit peqqusiileqigivat, kisianni oqaloqatiginnikkuit ikiorneqarnissamik pisariaqarteqisannik ikiorneqarniarnerussaatit. — Jaaku 5:14, 15.

Eqqaamajuk Biibilimi allassimasoqarmat: „Diaavululu akerartorsiuk, taava ilissinnit qimaassaaq. Guuti qaninniarsiuk, taava taanna ilissinnut qanillissaaq.“ (Jaaku 4:7, 8) Aap, Jehova Guutip tapersersussavaatit anersaarsiornerullu napiaaniutaanit aniguisillutit. (gE 01/22 02)

[Quppernerup ataani ilanngussat]

[Qupp. 14-mi assiliartaq]

Atortut satanisiornermut atorneqartartut tamaasa pigiunnaakkit

[Qupp. 14-mi assiliartaq]

Internetimi quppernerit anersaarsiornermik siuarsaasut mianersuutikkit