Avalluttunut neriuutissaq

„AVALLUNNEQ uummatilunnermut kræftimulluunniit naleqqiullugu inuunermik navianartorsiortitsineq ajorpoq,“ dr. Fatima Mili oqarpoq. „Inuunermulli sunniuteqangaartarpoq.“ Napparsimasup inuunera tamaat avallunnerup sunnertarpaa. Aavalluttut suut ajornartorsiutigigajuttarpaat? Ajornartorsiutit tamakku sungiunneqarsinnaappat?

Italiamiu 28-nik ukiulik Katia * oqarpoq: „20-nik ukioqarlunga avalluuteqarnera paasineqarmalli inuunera allanngorluinnarpoq. Suliffiga piffissarlu tamakkerlugu kiffartornera qimattariaqalerpakka.“ Avalluttut tamarmik anniaateqartarput. Tuluk 63-inik ukiulik Alan oqaluttuarpoq: „Annernarnera assigiittuaannanngilaq, annernartoqartuaannarporli.“ Unamminiarnartoq alla tassaavoq qasoqqasarneq. „Immaqa anniaatit pullattarnerillu sungiunneqarsinnaapput, qasoqqasarnerli  atussaanngingajappoq,“ Sara 21-nik ukiulik oqarpoq.

Misigissutsitigut artorsaatissinneqarneq

Japanimiu 61-inik ukiulik Setsuko naapertorlugu ullut tamaasa anniartuarneq aamma „misigissutsikkut eqqarsartaatsikullu qasunarluinnartuuvoq“. Aqerluusamik oqarasuaammilluunniit tigusiniarnerinnaq sapernarsinnaasarpoq. 47-nik ukiulik Kazumi aliasulluni ima oqarpoq: „Meeqqalluunniit suliarisinnaasai uanga suliarisinnaanngilakka.“ Pisunneq sapingajattoq 60-inik ukiulik Janice oqarpoq: „Siornatigutut iliorsinnaajunnaarnera nikallornaqaaq.“

Iliuutsinik killiliisut taamatut pakatsinermik ajuusaarnermillu misigilersitsisinnaapput. Tamanna pillugu Jehovap Nalunaajaasuisa ilaat 27-nik ukiulik Gaku ima oqaaseqarpoq: „Kajumissusera naapertorlugu oqaluussisinnaannginnama imaluunniit ilagiinni suliassanik naamassinnissinnaannginnama naleqanngitsutut misigisimavunga.“ Marlunnik ukioqarlunili avallunnermik nappaateqartup Francescap „isumatsassimanermut nakkaraluttuinnarnertut“ tamanna nassuiarpaa. Taama isumatsassimatigineq anersaakkut peqqiilliortitseriaannaavoq. Jehovamut Nalunaajaasoq Sydafrikameersoq Joyce ilagiit ataatsimiittarnerinut aalajangersimasumik aggissaarsimavoq. Tamanna ima tunngavilersorpaa: „Allanik peqateqarnissara sapivippara.“

Gigtertut ilarpassuisa siunissaq ernummatigisarpaat – assersuutigalugu aalassarluttungulernissaq allanillu isumalluuteqalernissaq, kisimiilluni imminut paaqutarilernissaq, orlulluni ajoqusernissaq imaluunniit ilaquttaminnik pilersuisinnaajunnaarnissaq. 52-inik ukiulik Yoko nassuerpoq: „Innarluuteqaqqaalerama ajorsigaluttuinnarnissaa annilaanngatigaara.“

Avalluttup anniarnera ullut tamaasa isigiuassallugu ilaquttanut aamma nuannertarnavianngilaq. Ilaatigut nappaat aappariinnermut ajoqutaasarpoq. Arnaq tuluk Denise oqaluttuarpoq:  „Ukiut 15-t aappareereerluta uima nalunaarfigaanga avalluuteqarnera pissutigalugu inooqatigeqqissinnaajunnaallunga, taava panippullu tallimanik ukiulik qimappaatigut.”

Takuneqarsinnaasutut avallunneq napparsimasumut ilaqutaasunullu ilungersunartaqaaq. Amerlasuulli anigorluartarpaat. Qanoq ilaasa anigorluartarneraat qimerluulaariartigu.

Killissat ilisimasariaqarput

Avalluttoq qasuersaarluartariaqarpoq, taamaaliorneq qasoqqavallaarunnaatitsisarmat. Imaanngilarli inuunermut isiginnaartuuginnartunngussasut. Tamatumunnga atatillugu Timothy ima oqarpoq: „Avallunneq kisiat eqqarsaatigiumanagu aalajuaannartoqartariaqarpoq, taamaanngippammi anniaatit aalajangiisuuallaalertarput.“ USA-mi Mayo Clinic-imeersoq reumatologi William Ginsburg ima maluginiagaqarsimavoq: „Aalavallaarneq uninngavallaanerlu oqimaqatigiisaaqqissaaneqartariaqarput. Ilaatigut nappaat eqqarssaatigalugu unikaallannissamik eqqaasinneqartarnissaq pisariaqartarpoq.“

Pisinnaasanut isiginnittaatsip allanngortinnissaa pisariaqarsinnaavoq. Daphne Afrika Kujallermeersoq oqaluttuarpoq: „Imminut pinngitsaalillunga piviusorsiortumik qangatut iliuuseqapallassinnaajunnaarnera akuerisariaqarsimavara. Ernumanangalu ugguanngilanga. Pisinnaasakka naapertorlugit iliuuseqartarpunga.“

Aamma ikiorsiissutaasinnaasunik qanoq ittunik peqarnersoq paasiniassallugu pitsaassaaq. Immaqa nakorsaq tagiartuisartorluunniit ikiortigineqarsinnaapput. Keiko oqaluttuarpoq: „Tummeqqatigut majuartaammik ikkussinikuuvugut. Matup tigummivii ammalortut atoraangakkit passikka annernalertarmata tigummiviit taarsersorpavut. Maanna matut niaqqunnik ajaannarlugit ammarsinnaalerpakka. Illutsinni erngup kuuffii tamaasa attuallaannarlugit kuuttartunngorlugit taarsersorpavut, taamaalillunga illumi suliassanik ilaannaannilluunniit sulisarsinnaaniassagama.“ Gail oqaluttuarpoq: „Biilinut illumullu matuersaatit qiperiaannaasumik tigummivilertippakka. Illaagutikka børstikkalu takisuunik ipoqarput taamaalillutik sammivinnut assigiinngitsunut sangutinneqarsinnaallutik.“

Ilaquttat tapersersuinerat — „Napasuliaq qajannaatsoq“

Carla Brasiliameersoq ima oqarpoq: „Uima tapersersuinera nalissaqanngilaq. Nakorsiartunga ilagigaangaminga sapiissuseqalersittarpaanga. Nappaatip timinnut qanoq sunniisarnera, malunniutai, qanorlu katsorsartariaqarnera marluulluta paasisarpavut. Qanoq atugaqartariaqarnera paasigaa nalunnginnakku ilorrisimaarnerulersutut misigaanga.“ Aap, aappaaasut avalluttup piginnaasaasa killeqarnerinik paasinnittut, nappaatillu sunik nassataqarnerinik kajumillutik paasiniaasut napparsimasoq tapersersorlugulu pissatsisinnaavaat.

Bette assersuutissaalluarpoq. Uini avallunnermik nappaateqalerluni sanasutut sulinikinnerulertariaqarmat eqqiaasutut sulisalerpoq. Kazumip uiata nulii paaqqutariliinnanngilaa aamma illumi suliassat suliarisinnaanngisai suliarisarpai. Tamatuma saniatigut meeqqatik illumi suliassanut ikiuunnissaannik ilinniartippai. Kazumi oqarpoq: „Napasuliatut qajannaatsutut uiga ippoq. Ikiorsimanngikkaluarpanga ajornerusunik atugaqarsimassagaluarpunga.“

Carol Australiameersoq mianersoqquserpaluttumik nipeqarluni ima oqarpoq: „Sammisassaqarpallaartitsinaveersaarit. Ilaquttakka peqatigisinnaanngikkaangakkit imminut annikigilertarpunga.“ Ilaquttat tapersersuinerat avalluttunut iluaqutaangaarsinnaavoq paasinnillutik qajassuussillutillu ikiuiniaraangata.

Anersaakkut ikiorneqarneq

Katia oqaluttuarpoq: „Uattut nappateqarluni eqqarsarnartarpoq qanoq atugaqarneq kialuunniit paasisinnaanngikkaa. Taamaattumik Jehova Guutimut saaffiginninnissaq pingaaruteqarpoq, nalunagu taassuma timikkut eqqarsartaatsikkullu qanoq innerput paasilluinnarsinnaagaa. (Tussiaat 31:8) Jehova Guutimut attaveqarluarnerma qamuuna ima eqqissisimatitsigaanga allaat aliasuutigivallarnagu  nappaat akueralugu inuusinnaalersimallunga.“ Jehova Guuti ’Ataatamik nallittuisumik Guutimillu tuppallersaajuartumik annikilliuuteqarnitsinnilu tamani uatsinnik tuppallersaasartumik’ Biibilimi taaneqarmat tulluartuuvoq. — 2 Korinthimiut 1:3,4.

Assersuutigalugu anniaateqartuaannartunut qinuneq tuppallersaataasupilussuusinnaavoq. Kazumi oqaluttuarpoq: „Unnuakkut anniarnermik sinissinnaajunnaaraangama qiaatigalunga Jehovamut eqqarsaatikka aniatittarpakka qinnuvigalugulu aalajaattuaannarnissannut nukissaqarteqqullunga, ajornartorsiutimalu anigorsinnaanissaanut ilisimassummik tuneqqullunga. Ilumullumi Jehovap qinnutikka akisimavai.“ Aamma Francescap Guutip asannittumik tapersersuinera misigisimavaa, imalu oqaatigaa: „Oqaatsit Filippimiunut allakkani 4:13-imiittut uku eqquunneri misigisimavakka: ’Tamaasa pissatsitsisikkut atussallugit sapinngilakka.’“

Amerlanertigut ilagiit aqqutigalugit Jehova ikiuisarpoq. Tamatumunnga Gail assersuutissaavoq. Oqaluttuaraa qanoq Jehovap Nalunaajaasuisa akornanni anersaakkut qatanngutimi ikiuinerat iluaqutigisimallugu: „Asanninnerata isumatsannissaraluara pinngitsoortippaat.“ Keiko ima aperineqarami aamma assingusunik akivoq: „Inuuninni pisuunnguallaatigisannik naammattuugaqarsimavit?“ akivorlu: „Aap, ilagiit uannik asanninnerat misiginneqataanerallu pisuunnguallaatigaakka!“

Jehovap Nalunaajaasuisa ilagiivini nakkutilliisut ikiuiniarnermi siuttuupput. Tassunga atatillugu Setsuko ima oqarpoq: „Utoqqaanertat napparsimasumik tusarnaarlutillu tuppallersaasarnerat qanoq iluaqutaasartigisoq oqaasiinnaat atorlugit oqaatigisinnaanngilara.“ Avallutut ilaata Danielip erseqqissarpaa „anersaakkut qatanngutit periarfissikkutsigit aatsaat ikiorsinnaagaatigut“. Taamaattumik napparsimasut uppeqatiminnut attaveqartuaannarnissaat ilagiillu ataatsimiinnerinut sapinngisamik najuuttarnissaat pingaartuuvoq. (Hebræerit 10:24, 25) Tassani aalajaaginnarnissaminnut anersaakkut qiimmassarneqarsinnaapput tuppallersarneqarlutillu.

Anniartoqartarunnaassaaq

Nakorsaatitigut ilisimatusarnermi maannamut siuariaataasimasut avalluutillit qujamasuutigeqaat. Katsorsaariaatsilli pitsaanerpaalluunniit avallukkunnaartitsisinnaanngillat. Piffissaq ungasinnerusoq isigalugu Guutip silarsuassamik nutaamik neriorsuutaa tuppallersaataanerpaavoq. * (Esaja 33:24; Saqqummersitat 21:3, 4) Silarsuassami tassani ’tusiattoq tuttorsuartut pissigarumaarpoq’. (Esaja 35:6) Taamanikkussamut avallunnerinnaanngitsoq aammali nappaatit tamarmik qanganngoreersimassapput. Bekhterevip nappaataanik nappaatilik Peter ima oqarpoq: „Sullorsuup taartup aqqutigisama isuani qaamaneq takusinnaavara.“ Arnaq kristumiu Giuliana isumaqataalluni oqarpoq: „Ullut ingerlareersut tamaviisa ajugaanertut isigaakka. Naggatissap takkutinnginnerani ullut anigugassakka ullormik ataatsimik ikilipput!“ Aap, ulloq qanillivoq avallunnerinnaanngitsup aammali anniaatit allat tamarmik peerneqarfissaat. (gE 12/08 01)

[Quppernerup ataani ilanngussat]

[Qupp. 10-mi assiliartaq]

Avalluttut allatulli inuunissaannik periarfissiisunik ikiorsiissutissarpassuaqarpoq.

[Qupp. 12-mi assiliartaq]

Kristumiut ataatsimiinnerini asannittumik isumassuineq misigineqartarpoq