Biibili Qanoq Oqarpa?

Inngiliuneq Mikael kinaava?

BIIBILI naapertorlugu qilammi anersaat silarsuaanni millionilikkuutaanik inngileqarpoq. (Danieli 7:9, 10; Saqqummersitat 5:11) Aallaqqaataaniit naggataanut, hundredelikkuutaanik, inngilit Guutimut aalajaattuartut Biibilimi eqqartorneqarput. Pinngortitanilli anersaajusunit taakkunannga marluinnaat Biibilimi atiisigut eqqaaneqarput. Aappaa tassaavoq Gabriel, ukiut 600-t ingerlaneranni oqariartuutinik Guutimeersunik nammineerluni inunnut assigiinngitsunut pingasunut aatsisimasoq. (Danieli 9:20-22; Lukasi 1:8-19, 26-28) Aappaa tassaavoq inngili Mikael.

Nalunanngitsumik Mikael inngiliuvoq nuimasoq. Assersuutigalugu Danielip allagaani Guutip innuttaasa iluaqutissaannut anersaapilunnik akiuisutut oqaatigineqarpoq. (Danieli 10:13; 12:1) Judasip allagaani isumassarsiarititaasuni ’Mikaelip Mosesip timaa toqungasoq pillugu Diaavulu saqitsaakkaa’ allaaserineqarpoq. (Judasi 9) Saqqummersitani oqaluttuarineqarpoq Mikael Satanimut inngilipiluinullu sorsuttoq qilammiillu igikkai. (Saqqummersitat 12:7-9) Biibilimi oqaatigineqartumik allamik inngileqanngilaq Guutip akeraanut taama pissaaneqartigalunilu oqartussaassuseqartigisumik. Taamaattumik tupaallannanngilaq Mikael Biibilimi „inngiliuneq“-tut oqaatigineqarmat „-neq“ isumaqartoq „akimanerpaaq“.

Mikaelip kinaassusia pillugu isumaqatigiinnginneq

Juutit, islamit, kristumiuuneraqatigiillu inngilit pillugit imminnut assortuuttunik paasinnittaaseqarput. Nassuiaanerisa ilaat paasiuminaatsuupput. Assersuutigalugu The Anchor Bible Dictionary- mi allassimavoq: „Ataasiinnarmik qullersaasumik inngileqarunartoq imaluunniit ikittunnguanik inngiliuneqartoq (sisamanik arfineq-marlunnilluunniit).“ The Imperial Bible-Dictionary naapertorlugu Mikael „inunnit piginnaaneqarnerusumut ateritinneqarpoq, taannalu pillugu marlunnik imminnut assortuuttunik paasinnittaaseqartoqarpoq; Naalagaq Jiisusi Kristusiunngikkuni, Guutip ernera, inngiliunerit arfineq-marlunnik taaneqartut ilagissavaat“.

Juutit kinguaariinnit oqaluttuarsiaat naapertorlugit inngiliunerit arfineq-marluk tassaapput Gabriel, Mikael, Rafael, Raguel, Remiel, Sarakael Urielilu. Islamit upperisaanni inngiliunerit sisamaapput,  tassaasut Djibrîl (Gabriel), Mikhail (Mikael), Azrâ’îl Israfîlilu. Katuuliussuseq aamma sisamanik inngiliuneqarpoq: Gabriel, Mikael, Rafael Urielilu. Biibilimili qanoq allassimasoqarpa? Arlalinnik inngiliuneqarpa?

Biibilip akissutaa

Inngiliunernik allanik Mikaelip saniatigut Biibilimi eqqartuisoqanngilaq. Taaguulluunniit „inngiliuneq“ qasseersiutinngorlugu eqqartorneqarani. Mikael inngiliuneq-tut Biibilimi eqqaaneqarpoq erseqqissarneqarlunilu taanna kisimi taamatut taaguuteqartoq. Taamaattumik tunngavissaqarluarpoq isummissalluni Jehova Guutip inngiliminit allanit tamanit ataaseq, ataasiinnaq, pinngortitaminit qilammiusunit tamakkiisumik oqartussaasuseqartikka.

Pinngortitsisoq eqqaassanngikkaanni Biibilimi eqqaaneqarpoq inuk aalajaatsoq ataasiinnaq inngilinik naalatsigititaqartoq — tassalu Jiisusi Kristusi. (Mattæusi 13:41; 16:27; 24:31) Apustili Paulusip immikkut ima eqqaavaa ’Naalagaq Jiisusi inngilini pissaasut ilagalugit qilammit saqqummersitaasoq’. (2 Thessalonikamiut 1:7) Petrusillu Jiisusi makititaasimasoq ima oqaatigaa: „Taanna qilaliarpoq Guutillu talerpiata tungaani issialluni, inngilit oqartussaatitaasullu pissaanerillu imminut naalatsigititaareermata.“ — 1 Petrusi 3:22.

Biibilimi aalajangersimasumik oqaatigineqanngilaq inngiliuneq Mikael tassaasoq Jiisusi, ataatsimilli allassimaffeqarpoq inngiliunerup oqartussaaneranik Jiisusimut atassusiisumik. Paulusip thessalonikamiunut allakkamini siullerni ima siulittuutigaa: „Peqquserpalunneq inngiliunerullu nipaa Guutillu qarlortaassuata qarlortarpalunnera tutsiuppata Naalagaq nammineq qilammit aqqarumaarpoq.“ (1 Thessalonikamiut 4:16) Allassimaffimmi tassani Jiisusi Guutip messiarsitut kunnginngortitaatut oqartussaassuseqalereersimasutut oqaatigineqarpoq, „inngiliunertulli nipeqarluni“ oqaluppoq. Malugiuttaaq toqusunik makititsinissaminut pissaaneqartoq.

Jiisusi inuttut nunamiitilluni arlalinnik toqusunit makititsisarpoq. Aamma tamatumunnga tunngatillugu peqquserpalunneq atorpaa. Assersuutigalugu uillarnerup ernera illoqarfimmi Nainimi makitikkamiuk ima oqarpoq: „Inuusuttoq uumaa, oqarfigaakkit: Makigit!“ (Lukasi 7:14, 15) Kingusinnerusukkut, Jiisusip ikinngunni Lazarusi makitikkamiuk ’nipituumik torlulavoq: „Lazarusi, maanga anigit!“’. (Johannesi 11:43) Pisimasunili taakkunani inuup naammalluinnartup nipaa pineqarpoq.

Makitaanermi kingorna qilammi pinngortitatut anersaatut qutsisisinneqarluni ’akitsinngaartitaavoq’. (Filippimiut 2:9) Maannakkulli inuttut inuujunnaarami inngiliunertut nipeqarlerpoq. Guutilli qarlortaasua qaaqqusimmat ’Kristusimiillutik toqusut’ qilammut makitinneqarput, tamatumuunalu „inngiliunerup nipaanik“ nipeqarluni Jiisusimit „peqquserpalunneq“ tutsiuppoq. Tunngavissaqarluarpoq isummissalluni inngiliuneq kisimi suaarsinnaasoq „inngiliunerup nipaanik“ nipeqarluni.

Ilumoorpoq allanik nuimasunik inngileqartoq, soorlu serafit kerubillu. (1 Mosesi 3:24; Esaja 6:2) Biibilimili tikkuarneqarpoq Jiisusi Kristusi makissimasoq inngilinit allanit tamanit annerusoq — inngiliuneq Mikael. (gE 02/08 02)