Honning nakorsaat tungusunnitsoq

NAKORSAATITIGUT ilisimatusartut ilaasa honinngip tunillaanaveersaataalluinnarsinnaanera aseruuttoornaveersaataasinnaaneralu tupigusuutigaat. Canadamiut aviisianni The Globe and Mail-mi allassimavoq: „Antibiotikatut assigiinngitsorpassuartut nutaanertut supermikrobinut nakorsaatinut akiuussinnaalersimasunut sunniuteqarsinnaanngitsutut innani honningi ikinik aseruuttoortoqartillugu taakkua ilaannik akiuisinnaavoq.“

Honningip akui suut ikinut mamisaataasinnaappat? Tamanna ingutsaap sulisartup naasut sikkernerisa isserannit katersugaani akissutissaqarpoq. Ingutsaap qisia iltimik akoqarpoq, enzymi pingaarutilik sukkumik naasup isseraniittumik nungutitsisartoq. Sukkumik nungutitsinermi, brintoverilti, nalinginnaasumik ikinut saligutitut tunillaannartuiaatitullu atorneqartartoq, pinngortarpoq. Iki brintoveriltimik salinneqarpat, sivikitsuaqqamik sunniusimasarpoq, honningili atorlugu allaaneruvoq. „Iki honningimik taninneqarpat, timip imerpalasuanit honningi imerpallissaaq taamaalillunilu syre-kinnerulerluni,“ aviisimi allassimavoq. Enzymi seernannginerusumiit sulilluni aallartittarpoq. Honningip sukkuerukkiartornera arriitsumik pisarpoq. Taamatut sukkuerukkiartornerani, ikip eqqaaniittut ipiutaasat peqqissut ajoqusernagit, brintoverilti ikip bakteriaanik toqoraataasinnaasoq naammattoq pilersinneqartarpoq.

Aviisi naapertorlugu ikimik mamisitsisinnaasunik arlalinnik honningi akoqarpoq. „Ameq honningimik immannguaq tanillugu panerpallaarnaveersaartittarpaa ikilu manngertumik qallinininngitsoortittarlugu. Honningip taqaaqqat uummarissartarpai nutaaliulersittarlugillu, cellillu amermik nutaaliortillugit.“ Aamma honningip akua aseruuttoornaveersaataasoq ikimut aseruuttoornannginnera „pullakkunnaarsitsisarpoq, aap ingerlaarneranik pitsaanerulersitsisarluni ikillu seerinissaralua pinngitsoortittarlugu“.

„Honningili tamanut pitsaasuunngilaq,“ allaaserisami mianersoqqussutigineqarpoq. Honningip 5 procentia tikillugu Botulismebakteerianik (pølseforgiftningimik aamma taaneqartartoq) akoqarnera missingerneqartarpoq. Canadap peqqinnissamut pisortaqarfiata ilinniarfiani botulisme pillugu misissuillutillu paasititsiniaasartut meeqqallu napaataat pillugit peqatigiiffiit, meeqqaanut ataaseq inorlugu ukiulinnut honningitortitsinissaq mianersoqqussutigaat „meeraaqqat inalugaasa uumasuaraat, bakterianut taamaattunut illersuutaasoq, suli naammattumik inerissimanngimmat“. (gE 03/08 02)