Biibilimi qanoq oqarpa?

Pisuusutut misigineq ajortuujuaannarpa?

A MERLASUUT ullumikkut pisuusutut misigineq ajortutut isigisarpaat. Tyskeq ilisimaqqissaarniaq Friedrich Nietzsche isumaqatigaat, pisuusutut misigineq taassuma „nappaatitut manna tikillugu inunnit peruluutaasut ajornersaattut“ taavaa.

Paasisimasaqartulli ilaat allamik isumaqarput. „Pisuusutut misigineq inuup malussarissup akisussaassuseqarluartup ilagaa pingaarutilik“. Susan Forward, katsorsaanermik isumaginnittoq nunani tamani nersugaasoq atuakkiortorlu oqarpoq. „Misigissutsip taassuma saqqummersinnissaa nalunngeqatiginnissutsip suliassaasa ilagaat.“ Pisuusutulli misigineq ajortuujuaannarpa? Imaluunniit pisuusutut misigineq pisut ilaanni iluaqutaasinnaava?

Pisuusutut misigineq sunaava?

Misigissusiuvoq ikinngut ajuallatsissimallugu paasigutsigu nanertuutigisinnaasarput, imaluunniit misigisimalluta najoqqutassat naalattariaqarlugit arlaatigut unioqqutissimagutsigit. Qinerlerfissiami allassimavoq pisuusutut misigineq akiitsoqarluni misiginermut attuumassuteqartoq, „kukkusimalluni, unioqqutitsisimalluni, pinerlussimalluni ajortuliorsimanerluunniit pissutigalugu pillarneqartariaqartutut.“

Hebræerisut Allakkani pisuusutut misigineq Guutip inatsisaanik unioqqutitsinermut atassuteqarpoq — pingaartumik Mosesip allagaasa pingajuanni sisamaannilu oqaaseq „pisuuneq“ akulikitsunik nassaassaavoq. Aamma Kristumiut Allagaataanni Grækerisuuni pisuuneq Guutimut annertuumik unioqqutitsinertut tikkuarneqarpoq. — Markusi 3:29; 1 Korinthimiut 11:27.

Pisuusutut aamma misigisoqarsinnaavoq pisuussuteqanngikkaluarluni. Assersuutigalugu kukkuneqanngiivissumik pissuseqartuaanartuugaanni naammasisinnaanngisanik piviusorsiunngitsunik piumaffigaluni ingasattumik pisuusutut misigisoqarsinnaavoq. (Oqaluussisartup oqaasii 7:16) Aammattaarlu kukkuneq eqqunngitsuliorsimanerluunniit pillugu patsisissaqarluartumik ilerasuuteqangaarneq kanngutsaanninngorluni alliartorsinnaavoq taamaalillunilu pisariaqanngitsumik imminut pillarluni. Kisiannimi pisuusutut misigineq ajunngitsumik kinguneqarsinnaava?

Pisuusutut misigineq ajunngitsuusinnaavoq

Pisuusutut misigineq minnerpaamik ajunngitsunik pingasunik kinguneqarsinnaavoq. Siullermik pisuusutut misiginermi nalunaajaataavoq najoqqutassiat akuerisaasut arajutsisimanagit. Sulilluartumik nalunngeqatiginnissuteqarnermut takussutissaavoq.  (Romamiut 2:15) Atuakkami American Psychiatric Association-imit saqqummersinneqartumi allaatigineqarpoq pisuusutut misiginermik amigaateqarneq innuttaaqatigiinni ileqquusoq navianartoq. Inuit „minguttuumik” killissaanngitsunilluunniit nalunngeqatiginnissusillit ajunngitsup ajortullu immikkoortinnissaat sapingajattarpaat, tamannalu ulorianarsinnaavoq. — Titusi 1:15, 16.

Aappassaanik ilerasunnerup iliuutsit kissaatiginanngitsut ingalassimanissaannut ikiorsinnaavaatit. Soorlu timikkut anniaateqarneq peqqiilliornermik eqqaasitsissutaasartoq, pisuussuteqartutut misiginerup nassatarisaanik anniangaarneq ileqqorissutsikkut anersaakkulluunniit ajornartorsiuteqarnerup sunniutigisimassavaa eqqumaffigisariaqagarput. Sanngiissuseq eqqumaffigileraanni aatsaat kukkunerit imminut, nuannarisanut allanulluunniit tussimasut siunissami pinngitsoortinnissaat ilimanarneruvoq. — Matthæusi 7:12.

Naggataatigullu, pisuussuteqarluni nassuerneq pisuusumut eqqugaasumullu iluaqutaasinnaavoq. Soorlu kunngi Daavip pisuusutut misiginera anniaateqangaarnermik malitseqarpoq. „Nipangiinnarama timiga taroriartorpoq anersaarulunninni ulloq tamaat.“ allappoq. Kisianni naggataatigut ajortuliani Guutimut nassuerutigigamiuk, nuannaarluni erinarsorpoq: „Annaanneqarnera qiimmattaatigitippat eqqanni.“ (Tussiaat 32:3, 7) Unioqqutitsisup pisuunerminik nassuernerani pinerlerfigisaq nuannaarnerulersinnaavoq unioqqutitsisup takutimmagu nuannarigaani anniartitsisimanini peqqissimissutigalugu. — 2 Samueli 11:2-15.

Pisuusutut misiginermut oqimaaqatigiissumik isiginnittaaseqarneq

Pisuusutut misiginermut oqimaaqatigiissumik isiginnittaaseqarniaraanni Jiisusip farisiiarillu ajortuliortunut ajortimullu isiginnittaasiisa qanoq assigiinngitsiginerat maluginiagassaalluarpoq. Lukasi 7:36-miit 50-mut oqaluttuarineqarpoq arnaq inuunerluttoq farisiiarip illuanut Jiisusip neriartorfigisaanut isertoq. Jiisusi ornippaa, isigai qulliminik tagiartorpai uuliamillu akisuumik tanillugit.

Farisiiari upperluartup arnaq taanna ammut isigaa isumaqarlunilu inussiarnisaarfigiguniuk imminut nikanarsaataassasoq. Isumaliorpoq: „Angutip taassuma [Jiisusip] pruffiiitiugaluaruni ilisimassagaluarpaa arnap qanoq ittup — tassa inuunerluttup — attuuagaani.“ (Lukasi 7:39) Jiisusip eqqarsartariaasia pillugu appisaluuppaa: „Illit niaqora tarnummik taninngilat, uumali isikkakka uuliamik tanippai. Taamaattumik oqarfigaakkit: Ajortuliaminik amerlasuunik isumakkeerfigineqarpoq, asanninngaarsimagami.“ Qularnanngitsumik oqaatsit taakkua arnamut qiimmassaataapput uummammigullu oqiliallaatigalugit. — Lukasi 7:46, 47.

Tamanna isumaqanngilaq inooriaaseq qanoq ittorluunniit Jiisusip akuersaaginnaraa. Akerlianilli farisiiari makitasooq ilinniartippaa pingaarnerpaamik Guuti asanninnikkut kiffartorfigisariaqartoq. (Matthæusi 22:36-40) Soorunami arnap iloqqorluttumik inuunerisimasani pissutigalugu aliasungaarnera pissusissamisuuginnarpoq. Erseqqissumik takutippaa allamik isumataarsimalluni, qiavormi inuunerisimasanilu illersorniarsarinagu. Paarlattuanik Jiisusi ataqqiniarlugu kikkut tamarmik takkuanni iliuuseqarpoq. Jiisusip tamanna takugamiuk, oqarfigaa: „Uppernerpit annaappaatit. Eqqissillutit qimagunniarit!“ — Lukasi 7:50.

Akerlianik farisiiarip ajortuliortutut ammut isigiinnarpaa. Immaqa neriuppoq ’Guutimut mianerinnilersissinnaallugu’ kanngusutsillugulu. Kisianni asannittuliornerunngilaq allat pisuusutut misigilersinniassallugit nammineq piumasarisatut tamatigut iliuuseqartanngimmata, ungasinnerusorlu isigalugu kingunerlussinnaavoq. (2 Korinthimiut 9:7) Jiisusimik malinninneq ajunnginnerpaamik kinguneqarsinnaavoq — maligassaalluarnikkut, ilumoorluni allanik nersualaarinninnikkut tatiginninnermillu ersersitsivigalugit, naak ilaannikkut avoqqaarineqarneq siunnersorneqarnissarlu pisariaqarsinnaasaraluartut. — Matthæusi 11:28-30; Romamiut 12:10; Efesosimiut 4:29.

Pisuusutut misigineq aamma ajunngitsuusinnaavoq, allaallu ajortumik iliorsimagaanni pisariaqarluni. Ussatit 14:9-mi ima allassimavoq: „Sianiitsut pisuutitaaneq suutinngilaat.“ Ilerasuuteqarneq ajortuliamik nassuertsitsisinnaavoq, nassuertittariaqarlugulu, piumasarineqartullu iliuuseralugit. Jehovamut kiffartornitsinnut tunngaviusumik pissutaasoq tamatigut tassaasariaqarpoq asanninneq, pisuusutut misiginerunngitsoq (Jobi 1:9-11; 2:4, 5) Biibilimi ilisimatinneqarpugut inuit ajunngitsut tamanna eqqarsaatigalugu qiimmassarneqarlutillu nakussatsinneqarunik sapingisartik naapertorlugu iliussasut. Sulilu pingaarnerusumik, nuannaarlutik taamaaliussapput. (gE 03/08 02)