Inuusuttut aperipput:

Qanoq ilillunga atuaqatikka nalunaajaaffigisinnaavakka?

„Nalunaajaallunga angalaartillunga nalunngisara naaperiataarpara. Annilaarnermik qerattaannarpunga, taamaattumillu angalaaqatiga sinnerlunga oqaluttariaqalerpoq.“ — Alberto.

INUUSUTTORPASSUIT misigisimanngillat upperisap oqaluuserinissaa nuannersuusoq. Kristumiulli ilumoortut akornanni inuusuttut upperisaminnik allat oqaluuttuunissaanik immikkut pisinnaatitaaffik pingaartippaat — immikkut pisinnaatitaaffik Guutimit pisimasartik. Jehovap Nalunaajaasui inuusuttut tuusintillit illumit illumut nalunaajaaqataasarput. Ilaasali atuaqatiminnik naapitsinnissaartik siooragisarpaa. Ilinniarnertuunngorniarfimmiikkunnaarnerminit ukiualuit qaangiukkaluartut Jennifer oqarpoq: „Atuaqatigisimasara nalunaajaaffigissagaangakku suli annilaangasarpunga.“

Kristumiuuguit inuusuttoq immaqa aamma ilaannikkut taamatut misigisarputit. Arlaannattaluunniit itigartitaaneq nuannarinngilaa, taamaattumik upperisaq pillugu atuaqatip oqaluunnissaanut annilaanganeq pissusissamisoorluinnarpoq. * Kisianni qununermit sapilersitaanissamut  pissutissaqanngilaq. Eqqaamasinnaaviuk angut ’Josefi Arimatæamiu’ Biibilimi eqqaaneqartoq? Jiisusimit ilinniarsimasani upperai. Taamaakkaluartoq Biibilimi allaatigineqarpoq ’Jiisusimut ajoqersugaasoq juutilli annilaangagalugit ajoqersugaanerminik isertuussisoq’. (Johannesi 19:38) Ikinngut ikinngutigiinnissinnik isertuusserusuttoq qanoq isumaqarfigissagaluarpiuk? (Lukasi 12:8, 9) Taava paasiuminarnerulinngila Guutip kissaatigimmagu kristumiut tamarmik ’upperisartik nassuerutigissagaat’? (Romamiut 10:10) Tassa imaappoq illit aamma atuaqatitit upperisat pillugu oqaloqatigisariaqaritit.

Josefip Arimatæamiup ersinini ajugaaffigaa allaat Jiisusip timaata ilinissaa qinnutigalugu. Illit ersinerit qanoq ajugaaffigisinnaaviuk?

Qanoq oqaluusserusussuseqarlertoqarsinnaava?

Apustili Paulusip upperisani pillugu allanut oqaluuserinninnissaminut tunuarsimaartuusimanngilaq. Romamiut 1:15-imi allassimavoq Biibilip tusarliussaata nalunaajaatiginissaanut pilerisoq. Suumuna taama pilerilersitsigigaa? Versi 16-imi allappoq: „Tassami iivangkiiliu kanngusuutiginngilara, tassaammat Guutip pissaanera uppertut kikkulluunniit annassutissaat.“ Illimmi? Upperninni Paulusitulli qulanngitsigivit? (Romamiut 12:2) Nammineerlutit qularutiginngiliuk Biibilip tusarliussaa tassaasoq „Guutip pissaanera annassutissaq“?

Angajoqqaat ilagalugit kristumiut ataatsimiinnerinut najuunneq naammanngilaq. Niviarsiaraq Deborahmik atilik oqarpoq: „Angajoqqaama ilaaqqusarmannga ataatsimiigiarnissaq ajornanngitsuararsuuvoq. Kisianni Biibili pillugu aperineqaraangama qanoq akissanerlunga nalusarpara.“ Niviarsiaqqap allap Mi Youngimik atillip misiutiginngilaa: „Sallusuissutaanera nammineerluta qulakkeersimasariaqarparput.“

Biibilip allanut oqaluussissutiginissaanut suna iliuuseqarusulersitsisinnaava? Nammineerluni atuaqqissaarneq. Nukappiaraq Seanimik atilik oqarpoq: „Nammineerluni Biibilimik atuaqqissaartaleraanni sallusuissut qularani pigiliunneqartarpoq. Imminut pilluni atuaqqissaartarluni.“ Ilumoorpoq atuarneq atuaqqissaarnerlu kikkunnit tamanit nuannarineqarneq ajortoq. „Atuarneq nuannarinngilara,“ Shevon nassuerpoq. „Taamaattumik aallaqqaammut sapernarpoq Napasuliaq Alapernaarsuiffik aamma Iteritsi! Biibililluunniit ullut tamaasa atuarnissaat. Piffissalli ingerlanerani sungiuppara.“

Taamatut peqqissaartumik atuaqqissaarneq qanoq kinguneqartarpa? Apustili Paulusi allappoq: „Upperneq tusakkanit pilersinneqartarpoq.“ (Romamiut 10:17) Uppernerpit qulannginnerpillu inerikkiartorneri peqatigalugit, qularnanngilaq nalunaajaanermut isummat allanngoriartussasoq. Brasiliamiu niviarsiaraq Elisângelamik atilik oqarpoq: „Kristumiuuneq ataqqinaataavoq — kanngusuutissaanngilaq.“ Uppernerit alliartortillugu allanut oqaluussineq akisussaaffittut isigilissavat — aamma atuaqatinnut. Paulusi allappoq: ’Upperatta, taamaattumik oqaluppugut.’ (2 Korinthimiut 4:13) Qanorlu ilillutit ’kialuunniit aavanut pisuussuteqanngissinnaavit’ ilisimassut inuunermik naassaanngitsumik kinguneqarsinnaasoq atuaqatinnut nipangiukkukku? — Apustilit suliaat 20:26, 27.

Biibilip allanut oqaluuserinissaa Jehovap Nalunaajaasuisa inuusuttortaasa ilaannut ajornakusoorsinnaavoq. ”Nalugukku qanoq oqassallutit, oqaluussiniarnissaq nuannerpallaarnavianngilaq,“ inuusuttoq Joshuamik atilik oqarpoq. Biibilimik paasinninnerulerneq ajornartorsiutip tamatuma aamma qaangernissaanut iluaqutaassaaq. (2 Timotheusi 2:15) Jehovap Nalunaajaasuisa akornanni inuusuttut ilagiiminni utoqqaanertat saaffigisinnaavaat oqaluussisartutullu pikkorinnerulernissaminnut ikioqqullutik. Matthias Tysklandimeersoq oqarpoq: „Aatsaat inuit oqaloqatigisalerakkit atuagassianillu neqeroorfigiinnarnagit, oqaluussineq nuannarileriartorpara.“

Aamma illit Guuti qinnuigisinnaavat siooranak oqalunnissannut ikioqqullutit. (Apustilit suliaat 4:29) Tassunga atatillugu Guutip ikiuinera apustili Paulusip nammineerluni misigaa. Paulusi Thessalonikamiunut allakkamini  siullerni 2:2-mi allappoq: „Guutitsinni nakimaassuseqalersitaavugut ilungersungaarluta iivangkiiliua ilissinnut tusarliussinnaanngorlugu.“ Qinerlerfissiami allassimavoq oqariaaseq „Guutip siooraneq uummatitsinnit peerpaa“-mik issuarneqarsinnaasoq. Soormi Guuti qinnuigigukku siooranerit uummatinnit peeqqullugu?

Ilisaritigit

Qinnutit malillugu qunusuitsumik iliuuseqarsinnaavutit. Niviarsiaraq tuluk Chicimik atilik imatut siunnersuuteqarpoq: „Jehovamut Nalunaajaasuullutit atuaqatitit oqaluttuutikkit.“ ’Isertortumimmi ajoqersugaanissat’ kissaatiginngilat, ilaa? Niviarsiaraq Rebeccamik atilik nassuerpoq nalunaajaanermini nalunngisaminik naapitsinissani siooragisorujussuusarsimallugu. Taavali imaattumik paasisaqarpoq: „Kristumiuulluni oqaluttuukkaanni matumiillu matumut angalaartarluni apeqqutigisinnaavaat: ’Qaqugu taava matunnut kasuttussavit?’“

Soorli angalaarninni nalaatsornikkut atuaqativit arlaata naapinnissaa utaqqiinnassaviuk? Atuartillutit upperisavit oqaluttuarinissaanut periarfissarsiortarit. Apustili Paulusip apeqqutai eqqarsaatigikkit: „Qanoq ilillutik tusarsimanngisartik upperfigissavaat? Qanoq ilillutik oqaluussisoqanngippat tusassappat?“ (Romamiut 10:14) Atuaqatitit tusartissallugit periarfissaqarluarnerpaavutit. Niviarsiaraq Iraidamik atilik oqarpoq: „Atuarfik oqaluussiffissaavoq kisitta iserfigisinnaasarput.“ Tamanna torrutiinnarlugu nalunaajaanermikkut inuusuttorpassuit atorluartarpaat.

Aammali atuarfimmi suliassat Biibilip oqaluuserinissaanut periarfissiisinnaapput. Jaimie Tuluit Nunaanneersoq oqarpoq: „Ilaanni atuaqatigiiulluta pinngoriartorsimaneq oqaluuserigatsigu, suna upperinerlugu oqaluttuaraara. Nukappiaqqat ilaata mitaatigivaanga oqarlunilu Jehovap Nalunaajaasui inuusut nikanarnerusut atuartitaasariaqanngitsullu. Erniinnarli atuaqatima ilaasa illersulerpaannga.“ Matumani erseqqilluarpoq kristumiuulluartutut tusaamaneqarnini iluaqutigigaa. Jamie nangilluni oqarpoq: „Kingunerisaanik periarfissarsivunga niviarsiaraqatima atuakkamik Findes der en Skaber som interesserer sig for os?-mik tuninissaanut“ *

Micu, niviarsiaraq 14-inik ukiulik Rumæniamiu assingusumik misigisaqarsimavoq: „Ilinniartitsisora oqarpoq atuaqatigiiulluta imigassaq, tupa ikiaroornartullu oqaloqatigiissutigissagivut. Taamaammat Iteritsi! 2000-imi Apriili-juuni-meersoq atuarfimmut nassarpara tassani ’Qanoq ilillutit pujortarunnaarsinnaasutit’ sammineqarmat. Atuaqatima atuagassiamik takunnittup tiguaa uannullu tunniuteqqikkumanagu. Atuareeramiuk oqarpoq pujortarunnaarniarluni aalajangersimalluni.“

Ilimananngilaq taama ajunngitsigisumik qisuariartunik naammattuugaqartuaannassasutit. Oqaluussisartup oqaasii 11:6-imili ima kajumissaarneqarpugut: „Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq.“ Taamaattoqanngikkaluarpalli atuaqatinnut upperisannik oqaluttuarnerit, illumit illumut nalunaajaallutit atuaqatinnik naapitaqassagaluaruit nuannernerusumik oqaloqatigiinnissassinnut tunngaviliisuusinnaavoq. Jessica Tuluit nunaaneersoq oqarpoq: „Nalunngisarereeraanni atuaqatinut nalunaajaanissaq ilumut ajornannginneruvoq.“ Ilimanarpoq tupigusuutigissagit atuaqativit ilaasa upperisat pillugu qanoq alapernaatsiginerat.

Naatsorsuutigissanngilat tamarmik ajunngitsumik pissagaatsit, atorluarsinnaasumilli Jiisusi imaattumik siunnersuuteqarpoq: „Ilassiumanngippasili oqaatsisilu tusaajumanagit, taava illu taanna . . . qimassiuk, isikkasilu pujoralaajarsigit.“ (Matthæusi 10:14) Allatut oqaatigalugu itigartinneqaruit kinaassusersiornertut tigussanngilat, eqqissillutilli ingerlaqqiinnassaatit allamillu tusaarusunnerusumik ujarlerlutit. Qaquguluunniit sallusuissummik qiisasunik tusaarusuttunillu naapitaqarumaarputit. Nuannissagaluaqaaq atuaqativit ilagippassuk ilaa? Taava nuannaassaqaatit atuaqativit nalunaajaaffiginissaannut siooranerit ajugaaffigisimagakku, ilaa? (gE 03/22 02)

[Quppernerup ataani ilanngussat]

[Qupp. 16-mi assiliartaq]

Jehovap nalunaajaasuatut ilisaritinnissat sioorageqinagu

[Qupp. 16-mi assiliartaq]

Atuarfimmi suliassat Biibilip oqaluuserinissaanut periarfissiikulasarput