Eqquiniaanermit pisaritinniaqinak

„Eqquiniaasarnera peqqissutsinnut ajoqutaalinngilaq, aammalu eqquiniaanermut qanoq aningaasanik atuitiginera nakkutigiuannarpara. Eqquiniaagaangamalu kisitsisit iluanaarnartutut isigisakka qinertuaannarpakka.“ — Linda.

EQQUINIAASARTORPASSUIT upperileriartortarpaat kisitsiseqartoq imaluunniit allanik peqartoq iluanaarnartunik. Immaqa namminneq isumaqartaraluarput upperisapalaanik pimoorussinatik, taamaattorli upperinninnertik katakkuminaallisittarpaat.

Allaat ilaat Guutimut qinusarput eqquinissaminnut ikioqqullutik. Taamaattorli Guutip assuarai imminut Guutisiorfiginninneraraluarlutik ‘[iluanaarnerup Guutianut] nerrivimmik piareersaasut’. (Esaja 65:11) Guutip maajugai ileqqut iluanaarnissamik upperisapalaanut tatiginninnermik siuarsaasut. Aningaasanoorluni eqquiniaaneq immini siuarsaasarpoq  „iluanaarnerup arnaanut Fortuna“-mut tatiginninnermut.

Aamma eqquiniaaneq kanngunaannartumik aningaaseritunermut siuarsaasarpoq. Ullutsinni inuiaqatigiinni upperisarsiornermik soqutiginnikkunnaariartorfiusumi aningaasat guutiusanngorsimapput, eqquiniaanerlu tassaalersimalluni guutiusamik taassuminnga pallorfiginneriaaseq nuannarisaasoq. Eqquiniaasarfiit kasinot tassaalersimapput ullutsinni oqaluffissaarsuit, ullutsinnilu ajoqersuut tunngaviusoq tassaalersimavoq piumatussuseq ajunngitsuusoq. Ilisimatuut paasisimavaat kasinonukartartut amerlanerpaartaat aliikkusiarlutik imaluunniit nuannisaariartorlutik aggerneq ajortut, kisiannili „aningaasarparujussuarnik“ eqquiniariartorlutik. Biibilimili  imaattumik mianersoqqussuteqarpoq: „Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.“ – 1 Timotheusi 6:10.

Biibilimi Korinthimiunut allakkani siullerni 6:9, 10-mi toqqaannartumik ima allassimasoqarpoq: „Tammaqinasi! . . . guutipilussiortulluunniit . . . piumatuulluunniit . . . Guutip naalagaaffia kingornussarsiarissanngilaat.“ Piumatussuseq tassaaginnanngilaq inuiaqatigiinni nappaat, aammali tassaalluni anersaakkut nappaat navianarluinnartoq. Nappaalli tamanna katsorsarneqarsinnaavoq.

Allannguinissaminnut nukissaqalersut

„Eqquiniaasarnera arlaleriaqalunga unitsinniartaraluarpara,“ allaaserisami siullermi taaneqartoq Kazushige oqaluttuarpoq. „Paasivara ikinngutikka ilagalugit hestinik sukkanniutsitsisarfimmi eqquiniaasarnera ilaquttannut ajoqutaasoq. Aningaasanik eqquigaluaraangama annaajuaannarpakka. Allaammi aningaasat nuliama aappassaanik ernertaarnissatsinnut katersugarisimasai eqquiniutigalugit nunguppakka, naggataatigullu suliffiutitta aningaasaatai atorlugit eqquiniartalerpunga. Tamatuma kingunerisaanik imminut tatigiunnaarluinnarpunga. Akuttunngitsumik nuliama qianngarmi qinnuigisaraluarpaanga eqquiniartarunnaaqqullunga, unitsissinnaanngivipparali.“

Taava Kazushige Biibilimik atuaqqissaartalerpoq Jehovap Nalunaajaasui peqatigalugit. Oqaluttuarpoq: „Biibilimik atuarnerujartortillunga qularunnaariartuinnarpunga Guuteqartoq, taannalu tusarnaarukku iluaqutigissagiga. Isumaqalerpunga nukissaq Guutimit pisara atorlugu eqquiniaasarunnaarsinnaassasunga. Uissuummivungalu aningaasanoorneq unitsiinnarnagu aammattaaq uumigilerakku. Uummatikkullu annertarpunga eqqarsaatigileraangakku eqquiniaasarnikkut ilaquttakka qanoq artorsaatissarsisittarsimatigalugit. Jehova qujamasuffigeqaara eqquiniarusunnersuannit aniguiniarninni ikiormanga taamalu isumalimmik inuulersillunga!“ – Hebræerit 4:12.

Allaaserisami siullermi aamma taaneqartoq John taamattaaq Biibilimik misissuisalerpoq. Oqaluttuarpoq: „Biibilimik atuaqqissaartalernerma inuuninnik eqqarsaatiginneqqinnissamut ikiorpaanga. Paasileqaara eqquiniaasarnera qanoq ilaquttannut uannullu ajoqutaatigisimasoq. Paasivara aningaasanoorneq namminissarsiornermik piumatussutsimillu ineriartortitsisartoq – pissutsinik Jehovap uumigisaanik. Atuaqqissaartarnera ingerlatiinnariarakku Jehovamut asanninnerma nukissaqalersippaanga eqquniaasarninnit aniguinissannut. Inuuninni atugarissaarnerulerusullunga eqquiniaasalersimavunga. Maannalu eqquiniaasarunnaarama Jehovamullu nuannaarlunga kiffartulerlunga, sinnattora taanna piviusunngorpoq.“

Johnip nulia Linda aamma aalajangerpoq eqquiniaasarunnaarniarluni. „Tamanna ajornaatsuinnaanngilaq,“ Linda oqarpoq. „Kisianni uigalu Jehovap Nalunaajaasui peqatigalugit Biibilimik misissuileratta inuunermi pingaarnerusunik sammisaqarnissaq ilinnialerpara. Ilinniarpara Guutip nuannarisaanik nuannarisaqarnissaq aammalu Guutip uumigisaanik uumigisaqarnissaq, soorlu piumatussutsimut tunngasunik assigiinngitsunik. Isumaqarnerusumik inuulerpunga, tamannaannaanngitsorli, aamma aningaasanik nammineq atugassannik peqarnerulerpunga.“ – Tussiaat 97:10.

Jehova Guutimut attaveqarluarniarnikkut nukissaqalersinnaavutit ilisimassuseqalerlutillu eqquiniaanermut nakkarnaveersaarnissannut. Taamaaliorlutit aningaasaqarnikkut, misigissutsikkut anersaakkullu atugarissaarnissat illersorsinnaavat, aammalu nuannaarutigisinnaavat Ussatini 10:22-mi allassimasup ilumuussusia nammineq misigigakku: „[Jehovap] pilluaqqusinera pisuunngortitsisarpoq.“ (gE 07/22 02)

[Qupp. 11-mi issuagaq]

Piumatussuseq tassaaginnanngilaq inuiaqatigiinni nappaat, aammali tassaalluni anersaakkut nappaat navianarluinnartoq.

[Qupp. 9-mi ungalusaq/​assiliartat]

Eqquiniaasarneq tupinnartorsiornerlu

Duke University-mi ilisimatuut National Gambling Impact Study Commission-imut nalunaarusiaminni innersuussutigaat aningaasanoorluni eqquiniaanissamut ussassaareriaatsip aammalu tupinnartunik upperisaqarnerup imminnut atassuteqarnerat. Nalunaarusiami ima allassimavoq: „[Eqquiniaanissamut] ussassaarutit ilarpassui kanngunaannartumik pigisaleritunermut tunngassuteqarput . . . Pigisaleritussuserli taanna inunnik eqiasuitsunngortitsisinnaananilu nikallujaatsunngortitsisinnaanngilaq, kisiannili sunik tupinnartuusinnaasunik upperinnilersitsilluni, neriuutinik upperisapalaanillu tunngaveqartunik. Eqquiniaasitsinermilu pisortap kialuunniit nalunngilaa inuit eqquiniutinik pisiniarluarnerpaasartut iliuutsitik upperisapalaanik, astrologiimik, siulittuisartut siulittuutaannik aammalu normunik inuit aqqinut, ullunut aalajangersimasunut sinnattunullu tunngatitanik tunngaveqartittaraat. Normut tamarmik makinneqarnissaannut periarfissat assigiinnerat erseqqissarnagu, aammalu normunik inuit amerlasuut taannarisaannik eqquiniuteqarnerup ilaatigut iluanaarutaasinnaasunik ikilisaaginnartarnera erseqqissarnagu, eqquiniaasartut kajumissaarneqartarput normut namminneq pingaartitatik toqqartaqqullugit (atuinnaqqullugillu).“

[Qupp. 10-mi assiliartat]

„Jehovamut asanninnerma nukissaqalersippaanga aningaasanoorluni eqquiniaanermit aniguinissannut.“ — John

„Isumaqarnerusumik inuulerpunga, tamannaannaanngitsorli, aamma aningaasanik nammineq atugassannik peqarnerulerpunga.“ — Linda

[Qupp. 10-mi assiliartat]

„Uissuummivunga aningaasanoorneq unitsiinnarnagu aammattaaq uumigilerakku.“ — Kazushige