Inuusuttut aperipput:

Qanoq kajungernarnerulersinnaavunga?

„Niviarsiaqqanik oqaloqatoqanissaq nuannerpallaartanngilaq ajornaatsuinnaasarnanilu. Qanoq eqqarsarnersut misiginersullu imaluunniit pissutsinut qanoq isiginnittaaseqarnersut nalusarakku.“ — Tyler.

NIVIARSIAQQAT suna nukappiaqqani isiginiarnerusarpaat? „Imminut tatigineq,“ niviarsiaraq Emilymik atilik oqarpoq. Arnap inuusuttuaqqap allap, Robynip, nukappiaqqat quianartuunersut maluginiarnerusarpaa. Niviarsiaqqanimiuna suna nukappiaqqat kajungernartittaraat? Misissuinerup tupinnanngitsumik takutippaa isikkorinnerat maluginiartaraat. Soqutigisaqatigiinneq ileqqussallu tungaatigut pingaartitaqatigiinneq arfinilissaraat.

Nukappiaqqat niviarsiaqqallu akornanni pissutsinut tunngasut allaaserisat misissuillunilu apersuinerit inuusuttunut atuagassiani soqutigineqartorujussuupput. Nalunanngitsumik inuusuttorpassuit eqqarsaatigisorujussuusarpaat, allaalluunniit ernumatigisarlugu — nukappiaraagunik niviarsiaqqanit niviarsiaraagunillu nukappiaqqanit — qanoq isigineqarnerlutik. Immaqa aamma illit tamanna ilaannikkut ernumatigisarpat? Imaanngitsoq massakkut katinnissat piareersimaffigigakku. Kinaluunniilli kajungernartoorusullunilu nuannarisaarusuppoq. Tylerip maluginiarpaa: „Inuusuttuaraatilluni tamanut kajungernartoorusunnartarpoq. Ikinngutinit, niviarsiaqqanit nukappiaqqanillu akuerisaarusunnartarpoq.“ Taamaallutit katikkusuummersinnaavutit. Taamanikkussamut soorunami aappassannit kajungerineqarnissat kissaatigaat.

Kristumiutut inuusuttutut immaqa niviarsiaqqat nukappiaqqalluunniit tungaatigut misilittagaqarpallaanngilatit. Aamma imaassinnaavoq ikinngutinnit isikkuminnik pingaartitsisunit tatineqartutut misigisutit. Assilitittartut pinnersut nukittoorsuillu isiginnaagassiatigoorlutillu atuagassianiikulasarmata, tupinnassanngilaq nalornillutillu imminut naammaginngitsutut misigiguit. Ajunngitsumik kinguneqarluartumillu allanik kajungerineqarumagaanni nukappiaraagaanni niviarsiaqqanit niviarsiaraagaannilu nukappiaqqanit — qanoq iliortoqartariaqarpa?

„Naammalluinnartumik“ timeqalerniarneq asuliinnaavoq

William S. Pollack, tarnip pissusiinik ilisimatuup, maluginiarsimavaa inuusuttuararpassuit aliikkutassianit sunnerneqarlutik „timiginnerulerumallutik sanigorsernermut, nukittorsarnermut, aerobic-ernermullu piffissarujussuaq atortaraat.“ Allaat ilaat ingasattajaarlutik imminnut perlertingajattarput „naammalluinnartumik“ timeqalerumallutik. Inuiaqatigiinni pissutsinik misissuisarfimmiit oqaaseqartoqarpoq: „Silarsuarmi arnat 5 procentiinnaat ullumikkut tusagassiuutit pinnernerpaatitaattut pinnertigipput — tassanilu oqimaassuseq angissuserlu kisimik pineqarput. Iluseq naammalluinnartoq, kiinaq naammalluinnartoq ilaalu ilanngullugit pineqarpata, taakkunannga 1 procentiinnaat anngussinnaapput.“

Biibilimi Romamiunut allakkani 12:2-mi siunnersuutigineqartoq ajunngitsuuvoq atoriaannaallunilu. Ima allassimavoq: „Silarsuarmut matumunnga naleqqussarniaqinasi.“ Soorunami ima isumaqanngilaq qanoq isikkoqarnerit soqutigissanngikkit. Ingasaassinianngitsumik timigissarluni nerisanillu allanngorartitsilluni timimik paarsineq silatusaarneruvoq. (Romamiut 12:1; 1 Timotheusi 4:8) Qasuerluarsimaneq  sinilluarsimanerlu aamma isikkorinnerulersitsisinnaavoq peqqinnerulersitsisinnaallunilu. Puigortariaqanngilarputtaaq peqqissaarnerup isikkorissaarnerullu pingaaruteqassusiat. Inuusuttoq tuluk Daavimik atilik oqarpoq: „Niviarsiaqqamik kajungernartorujussuarmik nalunngisaqarpunga, kisianni tipittarpoq. Taamaattumik inuit nigorsimaniartarpaat.“ Taamaattumik uffakulanissaq silatusaarneruvoq. Assaat, kukiit nutsallu ipiitsut isikkorinnerulersitseqataasinnaapput.

Biibilimi atisanik pingaartitsivallaarnissaq inassutigineqanngikkaluartoq, kristumiut kajumissaarneqarput „isornaatsunik perroorniutaanngitsunillu atisaqassasut“. (1 Timotheusi 2:9) Isikkorinnerulersitsisunik atisaqarneq ajunngilaq, ingasattajaarnatillu torersuuppata. * Piffissaq atortariaqartoq isikkorissarnermut atoraanni imminut tatiginerulersitsissaaq. Nukappiaqqap Paulip imatut oqaatigaa: „Immaqa pinnernerpaanut ilaanngikkaluarluni isikkoq iliuuseqarfigineqarsinnaavoq.“

Inuuseq ilorleq

Kiinaq pinnersoq iluserlu kusanartoq takujuminaqutaasinnaagaluarput, ilumoortumilli oqaassagaanni ’pinnissuseq puaasaavoq’. (Ussatit 31:30, Byington) Isikorittuaannartoqarsinnaanngilaq, aamma isikkup inuup pissusii kajungernartut taarsersinnaanngilai. (Ussatit 11:22) Eqqaamajuttaaq ’inuit . . . isiminnut saqqumisuinnaat isigisaraat, [Jehovalli] inuup uummataa isigisarpaa’. (1 Samueli 16:7) Taamaattumik timivit nukivillu isiginiarnissaannut taarsiullugu ’pinnersutsit uummammi inummi isertugaasumiittoq, anersaap piuaatsup qanilaartullu kusanassusiani aserortussaanngitsumiittoq, Guutip isaani erlinnaqisumiittoq’ sulissutigiuk. (1 Petrusi 3:3, 4; Efesosimiut 4:24) Ilumoorpoq ullumikkut inuusuttorpassuit inuttut piginnaassutsinik soqutigisaqarpianngitsummata — ingammik anersaakkut ittunik. * Guutilli najoqqutassiaanik maleruaasut pingaartitsipput nuannarinnillutillu.

Inuusuttunit anersaakkut ittunik pingaartitsisunit kajungerineqarumaguit illit nammineq anersaakkut ittunik pingaartitsisariaqarputit. Anersaakkut peqqissuunissat qinuneq aqqutigalugu, nammineq Biibilimik atuaqqissaartarnikkut kristumiullu ataatsimiinnerinut najuuttarnikkut sulissutigisinnaavat. (Tussiaat 1:1-3) Allanimmi aamma piginnaassussutsinik iluaqutaasunik pissutsinillu ineriartortissinnaasannik peqarpoq. Piginnaassutsit taamaattut ineriartortinniarlugit aappassiaqartariaqanngilatit asannilersooqqasariaqarnalluunniit. Ulluinnarni allanik peqateqartarnitsigut sungiusarneqarsinnaapput.

Nukappiaraaguit niviarsiaqqat niviarsiaraaguilluunniit nukappiaqqat akornaniikkaangavit pikkorluttutut ittoortutullu misigisarpit? Inuusuttoq Paulimik atilik oqarpoq: „Ilaanneeriarlunga niviarsiaqqat akornaniinnera nuannarivallaarneq ajorpara — niviarsiaraammata, niviarsiaqqammi nukappaqqanit paasiuminaannerutittarpakka. Kukkusumimmi iliuuseqarusunngilanga.“ Imminut tatigineq oqimaaqatigiissaarinerlu najuutillutit allanut eqqisisimanarsinnaasoq qanoq ineriartortilersinnaaviuk? Ilaatigut taamaaliorsinnaavutit ilagiinni kristumiuni assigiinngitsorpassuarnik oqaloqateqarsinnaanerit atorluarlugu. Ataatsimiinnerni inuttut soqutiginninnerit allanut takutittaruk — niviarsiaraaguit nukappiaqqanuinnaanngitsoq nukappiaraaguillu niviarsiaqqanuinnaanngitsoq, aammali meeqqanut, inersimasunut utoqqarnullu. (Filippimiut 2:4) Inuit assigiinngitsorpassuit peqatigillualersinnaagukkit imminut tatiginerulissaatit.

Jiisusi oqarnikuuvoq: „Tullit ilittut asassavat.“ (Matthæusi 19:19) Imminut tatigiguit, allat akornanni pikkorluppallaarnallu ittuussanngilatit. * Mianersorilli! Naak imminut tatiginissaq pisariaqarsinnaasaraluartoq ingasaannaveersaartariaqarpoq. ’Ima oqarfiginiarpassi: Immissinnik pingaarteqinasi pisariaqartumit annerusumik,’ Paulusi oqarpoq. — Romamiut 12:3.

Aamma allanik peqateqarnermi qanoq pissusilersorneq maluginiassallugu pitsaassaaq. Niviarsiaraq Tuluit Nunaanneersoq Lydiamik atilik oqarpoq: „Atuarfinni nukappiaraqarpoq niviarsiararpassuarnit nuannarineqartumik. Ilisarisimaneruleraangamikkuli nuannarinavallaarunnaartarpaat sorraatsuummat pissusiluttuullunilu.“ Inuit kajungerinerusarpaat inuit inussiarnersut oqalunnermikkullu pissuserissut, allanullu soqutiginninnermik takutitsisut. (Efesosimiut 4:29, 32; 5:3, 4) „Pissuserissaarneq pas-imut assersuunneqarsinnaavoq. Inunnut allanut akuerineqarnissamik aammaassisuuvoq,“ dr. T.B. Brazelton oqarpoq. „Inunnit allanit akuerineqarusukkaanni pissuserissaarneq pingaarutilerujussuuvoq“.

Silarsuarmi ileqqut assigiinngitsuupput. Taamaattumik kristumiut inersimalluartut angutit arnallu imminnut qanoq pissusilersorfiginerat maluginiassallugu  pitsaassaaq. Assersuutigiinnarlugu, illit najugaqarfigisanni angutip arnamut matumik ammaassisarnera ileqquua? Taamaappat taamaaliortarnissat ilinniarukku tusaamaneqarninnut iluaqutaassaaq; ataqqinnittutut perorsarluarsimasutullu isigineqassaatit.

Minnerunngitsumik quiasaarsinnaaneq iluaqutigisinnaavat. Biibilimi allassimavoq „illarfissaqarpoq“, quiasaarsinnaasorlu ajornannginnerusumik ikinngutisarsikkajunnerusarpoq. — Oqaluussisartup oqaasii 3:1,4.

Inussiarnisaarneq qaninniarnerluunniit?

Angutit arnallu akornanni paaseqatigiinnissaq pillugu atuakkami siunnersuutigineqarpoq, angutaagaanni arnamit arnaagaannilu angummit kajungerineqarumagaanni qaninniartariaqartoq. Atuartut kajumissaarneqarput qungujulassasut isimikkullu isiginiarsarissasut ’qiimmannartunillu’ oqaaseqartassasut. Siunnersuutit taamaattut Paulusip Timotheusimut angutaagaanni arnamik arnaagaannilu angummik ’tamatigut minguitsumik’ peqateqarnissamik siunnersuutaanut akerliupput. — 1 Timotheusi 5:2.

Imaalluarsinnaavoq qaninniaraanni imminuinnaq eqqarsaatigineq pissatsinneqarsinnaasoq, taamaaliornerli pisuusaarnerullunilu ilumuunngitsuliorneruvoq. Niviarsiaraq oqaloqateqarniarluni qaninniartariaqanngilaq ittoortuusaartariaqarnaniluunniit. Aamma niviarsiaraagaanni nukappiaqqat nukappiaraagaanniluunniit niviarsiaqqat eqqarsaataat misigissussaallu paaserusukkaanni kiinaannguusaarnartunik tulluanngitsunilluunnit aperisariaqanngilaq. „Suut iluartut, suut minguitsut suullu asanartut“ kisiisa oqaluuserisigit. (Filippimiut 4:8) Taamaaliornikkut anersaakkut inersimalluartunngoriartornerit takutissavat. Najoqqutassianut Guutimeersunit naalannerpit kajungernarnerulersissavaatit, nukappiaraaguit niviarsiaqqat, niviarsiaraaguillu nukappiaqqat isaanniinnaanngitsoq, aammali Guutip isaani. * — Ussatit 1:7-9.  (gE 07/22 02)

[Quppernerup ataani ilanngussat]

[Qupp. 31-mi assiliartat]

Isikkut eqqarsaatigivallaarnagu piginnaassutsit anersaakkut ittut ineriartortinnissaat samminerusinnaavat

[Qupp. 31-mi assiliartaq]

Inunnik assigiinngitsunik peqateqartarnissat ilinniaruk, inussuttunik utoqqarnillu