Kisimiilluni pilersuisuunerup unamminiarnartua

„Misigissutsit assigiinngitsorpassuit misigaakka. Ilaannikkut unnuami uffarfimmi qiasarpunga. Oqitsuinnaanngilaq.“ — JANET, MEEQQANUT PINGASUNUT ANAANAQ KISIMIITTOQ.

ASSIGIINNGITSORPASSUIT pissutaallutik angajoqqaat pilersuisunngortarput kisimiittut. Ilaqutariit ikinngitsut angajoqqaat aappaannaa najortigisariaqartarpaat sorsunnerit, pinngortitami ajunaarnerit nappaatilluunniit pissutigalugit.

Ilaatigut angajoqqaat katikkumanatik kisimiinnissartik qinertarpaat. Assersuutigalugu Sverigemi meeqqat affangajaat aappariinnerup avataani inunngorsimapput. Avittarnerit aamma kingunerisarpaat ilaqutariippassuit kisimiittunik pilersuisoqalertarnerat. Misissuinerit takutippaat USA-mi meeqqat 50 procentii sinnerlugit meeraanerminni piffissap ilaani angajoqqaamik aappaannaa kisiat najugaqatigilerumaaraat.

Unamminiarnartunik paasinninneq

Anaanat uillaqqammersut immikkut ittunik ilungersunartorsiortarput. Suli aapparminik annaasaqarnertik aliasuutiginiarlugu ilaquttatik akisussaaffigilertarpaat. Qaammaterpassuusinnaapput, aap immaqa ukiorpassuit, akisussaaffigilikkaminnut nutaamut sungiussinissaminnut, aningaasaqarniarnerinnaanngitsoq aammali meeqqaminnik tuppallersaaneq isumagisussaavaat. Anaanat kisimiittut isumagisassamik saniatigut isumagisassaqarnerulernitik artornartissinnaavaat. Tamatuma kinguneqarsinnaavaa meeqqat soqutigineqarnissamik, tuppallersarneqarnissamik siunnersorneqarnissamillu massakkorpiaq atorfissaqartigaakkaminnik tunineqartarunnaanerat.

Anaanat kisimiittut meeqqat angutaannut katissimanngitsut amerlanertigut inuusuttuaraasarput misilittagakitsuullutillu, immaqalu aamma atuarnerminnik naammassininnissaminnut periarfissaqarsimanatik. Naammattumik suliffinnut piukkunnaateqaratik piitsuullutik inuulernissaat akilernerlutaasumillu suliffeqalernissaat ilimanarnerujusuuvoq. Aammalu ilaquttat, assersuutigalugu angajoqqaat ikiuinissaminnut periarfissaqanngippata, amerlanertigut anaanat inuusuttut allatut iliorlutik meeqqatik paaritittariaqartarpaat. Anaanat katinneqanngitsut ilaat misigissutsikkut assigiinngitsunik tamaviaaruteqarput, soorlu kanngusunneq kiserliornerlu. Aamma ernummatigisinnaavaat aappassarsiornerminnut meeqqatik akornutaassanersut. Meeqqallu alliartortillutik tunuliaquttatik pillugit apeqquterpassuit akineqanngitsut immaqa erloqissutigisarpaat, angajoqqaaminnit najugaqatiginngisaminnit asaneqarnermik soqutigineqarnermillu pisariaqartitsillutik.

Angajoqqaat avinniartut taamatuttaaq nanertisimangaarput. Angajoqqaat ilaasa avinneq pissutigalugu kamangaarneq misigisarpaat. Allat naleqanngitsutut narrugisaasutullu misiginermit erloqisitaasarput taamaattumillu meeqqamik misigissutsikkut pisariaqartitaannik matussusiinissaminnut nukissaaruttarlutik. Anaanat siullermeerlutik sulisariaqalersut ilaqutariinnut akisussaaffiit nutaat naammassiuminaatsissinnaavaat. Immaqa misigisipput meeqqamik pisariaqartitaannik  immikkut ittunik — amerlanertigut angajoqqaamik avinnerisa kingunerisaannik allannguutinik annertuunik sungiukkuminaatitannik, matussusernissaminnut piffissaqarnatik nukissaqarnatilluunniit.

Avissimasunut immikkut unamminiarnartut

Angajoqqaat avissimasut eqqumaffiginiartariaqarpaat meeqqatik immikkut kinaassusiliummata pisariaqartitaat allanngorartuartut. Angajoqqaamut kisimiittumut anersaakkut ittunik meeqqat ilinniartinnissaannut periarfissarsiornissaq unamminiarnartuusinnaavoq.

Assersuutigalugu avissimasut angajoqqaat Jehovamut Nalunaajaasuusut ilaasa meeqqaminnut angajoqqaatut akisussaaffik tigumminngilaat. Immaqa piffissami kristumiut ataatsimiiffigisartagaanni meeqqatik najortigisarniarsinnaavaat. Taamaalilluni meeqqap ilagiit kristumiut aalajangersimasumik attaveqarfigisarsinnaavai, meeqqanut avissimasunik angajoqqaalinnut iluaqutaangaarsinnaasumik.

Angajoqqaat avissimasut meeqqaminnik aalajangersimasumik najorteqarnissaminnut periarfissaqanngitsut, meeqqaminnut asanninnertik isumassuinertillu allatut takutinniartariaqarpaat. Pingaaruteqarpoq anaanaasup ataataasulluunniit meeqqat misigissutsikkut pisariaqartitaat allanngorartut eqqumaffigissallugit. Pingaartumik meeqqap inuusuttuaranngulernerani assigiinngitsunik sammisassaqarniartalerlunilu ikinngutitaartulerpat.

Ataatap anaanalluunniit paasinnittup meeqqap piginnaassusia kinaassusialu aamma eqqarsaatigissavai. (1 Mosesi 33:13) Angajoqqaat meerarlu tamarmik immikkut qanittumik tatiginnittumillu attavigeqatigiilluartarlutillu oqaloqatigiilluartarunik nuannaarutigissaqaat. Taamaalillutik meeraq inersimasorlu inuunerminni imminnut malittarissapput.

Ingasaassinianngitsuunissaq pisariaqarpoq

Avinnerup kingorna meeqqat angajoqqaatik marluutillugit aalajangersimasumik attaveqarfigisarnissaat atorfissaqartippaat. Angajoqqaat upperisaat assigiinngitsuuppata — aappaa Jehovamut Nalunaajaappat aappaalu taamaannani — akerleriinnerit pinngitsoorsimaniarlugit ammaffigeqatigiinneq aalajangersimasumillu oqaloqatigiittarneq iluaqutaasinnaapput. „Qanilaarsusersi ilisimaneqalerli,“ apustili Paulusi allappoq. (Filippimiut 4:5) Angajoqqaat marluullutik upperisarsiornissaminnut pisinnaatitaaffiisa ataqqinissaat meeqqat ilikkartariaqarpaat.

Ilaannikkut ataataasup anaanaasulluunniit Jehovamut Nalunaajaasuunngitsup meeqqat oqaluffimmini naalagiaqataanissaat ilimagisarpaa. Angajoqqaaq Jehovamut Nalunaajaasuusoq qanoq iliorsinnaava? Nammineq aamma upperisaminik meeqqani oqaluttuuttarsinnaavai. Piffissap ingerlanerani meeqqat namminneq aalajangersinnaavaat suna upperissanerlugu, soorlu Timotheusi inuusuttoq anaanaminit aanaaminillu Biibili najoqqutassiaminik ilinniartinneqarami  taamaaliorsimasoq. (2 Timotheusi 3:14, 15) Meeqqat naalagiaqataanertik iluaagigunikku immaqa taava Biibilimi inuttaasup Na’amanip qanoq iliornera eqqarsaatigisinnaavaat. Na’amani Jehovamik pallorfiginnittunngoreerluni ilumoortoq, kunngimut kiffatut atorfini naapertorlugu suliassani ingerlatiinnarpaa kunngi guutipiluup Rimmonip illuanut iseqatigisarlugu. Meeqqat immaqa oqaluttuaq taanna iluaqutigalugu Jehovap asanninneranik paasinnittuuneranillu qularunnaarsinneqassapput, naak upperisarsiornermi ileqqulersuutit sungiusimanngisatik najuuffigisariaqaraluarlugit. —  2 Kunngit 5:17-19.

Angajoqqaat isumaginnilluartut meeqqatik ajunngitsup tungaanut sunnerniarlugit misigissusiinillu paasinninniarlutik ilungersorumassapput. (5 Mosesi 6:7) Angajoqqaat katissimanatik meeqqiorsimasut inooriaaserisimasartik immaqa ittoorutigissavaat. Taamaakkaluartoq eqqaamasariaqarpaat meeqqat pinngorfigisaminnik marlunnik angajoqqaaqarmata ilisarisimarusutaminnik. Meeqqat pisariaqartippaat kissaatigisaasutut misiginissartik, ajutoornerup kinguneranik inunngorsimasutut pinnatik. Aapparisimasap inooqatigisimasalluunniit ataqqinnittumik oqaluuserineratigut, meeqqallu paasisinnaasaanik atorfissaqartitaanillu akissuteqarnikkut, angajoqqaat meeqqatik asanninnerminnik qularunnaarsissinnaavaat.

Angajoqqaat eqqaamasariaqarpaat meeqqap asanninnermik, oqartussaasinnaasutsimik pissaanermillu misigisaqaqqaarnera angajoqqaaminik atassuteqarnikkut ineriartortinneqartarmat. Ataatap anaanalluunniit kristumiup oqartussaassutsini asannittumik atoraangamiuk, meeraq Jehovamut asannittumik atassuteqalernissaanut ilagiinnilu aaqqissuussaanermut ataqqinnittuunissaanut ikiussavaa. — 1 Mosesi 18:19.

Meeqqat suleqataanissaat pisariaqarpoq

Ilaqutariit kisimiittunik pilersuisullit meerartaasa aamma paasisariaqarpaat ilaqutariit ingerlalluassappata suleqatigiinneq pingaaruteqartuusoq. (Efesosimiut 6:1-3) Meeqqat ataataminnut anaanaminnulluunniit najugaqatigisaminnut naalakkaangamik takutittarpaat angajoqqaatik asallugit, aammalu ajunngitsumik toqqissisimasumillu atugaqarnissaminnut ilungersornerulersimanerat ataqqigitsik. Oqaloqatigiinneq marluunneqartariaqarmat, ilaqutariinni kisimiittumik pilersuisulinni meeqqat angajoqqaajusoq, ilaqutariinni attaveqatigiilluartoqarnissaanik  ilungersortoq, tapersersussallugu piumassuseqartariaqarput. — Ussatit 1:8; 4:1-4.

Meeqqat taamaattut amerlanertigut meeqqanit angajoqqaaminnik illugiinnik najugaqateqartunit siusinnerusukkut akisussaaffimmik tigusisariaqartarput. Asannittumik utaqqisinnaassuseqartumillu ajoqersorneqarnermikkut imminnut tatiginerulersinnaapput, pillaqqissiartornertillu ilutigalugu suli inuusuttunnguullutik naleqarnerulersutut misigilerlutik. Meeqqat immaqa aamma angerlarsimaffiup kusanartuutinnissaanut torersuutinnissaanullu ikiortiserineqarsinnaapput.

Isumaqanngilarli angajoqqaat kisimiittut meeqqatik inersimasuaranngortissagaat namminersortut siulersorneqarnissaminnik pisariaqartitsinngitsut. Meeqqap nammineertiinnarnissaa sianiitsuliornerujussuuvoq.

Angajoqqaat ilaat kukkusumik isumaqartarput meeqqatik peqatigisamittut ikinngutiginiarsaralugit. Meeqqanut qanittumik attaveqarnissaq pingaaruteqarpoq, kisianni angajoqqaat kisimiittut eqqaamasariaqarpaat meeqqat inersimasumik atorfissaqartitsimmata, ataataminnut anaanaminnulluunniit tatigisamittut ikinngutaanissaminnut misigissutsikkut naammattumik inerissimanngimmata. Meeqqat atorfissaqartippaat inersimasup angajoqqaatut akisussaassuseqarnissaa.

Angajoqqaat kisimiittut meeqqallu asaqatigiillutik suleqatigiittut ilaqutariinnik pilluartunik pilersitseqatigiisinnaapput. Meeqqat ilaqutariinni kisimiittunik pilersuisulinni peroriartortut amerliartuinnartillugit, angajoqqaat kisimiittut meeraasalu unamminiarnartut immikkut ittut akiortariaqagaat tamatta eqqumaffiginiartariaqarpavut, asannittumik tapersersorlugillu qiimmassarnissaannut piareersimalluta.

[Qupp. 9-mi ungalusaq/​assiliartaq]

Meeqqat qanoq eqqugaasut

Nalinginnaasumik angajoqqaanut marluusunut naleqqiullugu angajoqqaaq kisimiittoq meeqqaminut ataasiakkaanut piffissakinnerusarpoq. Ilumoorpoq angajoqqaat kisimiittut ilaat ilaatigut najugaqateqartartut. Kisianni allagartaqarani inooqatigiinneq inatsisit naapertorlugit katissimalluni inooqatigiinnermit tutsuiginannginneruvoq, meeqqallu ilaqutariinni kisimiittumik pilersuisulinniittut peroriartornerminni inersimasunik assigiinngitsunik qassiinik najugaqateqarajuttarput.

Misissuinerit ilaat naapertorlugit „ilimanarluinnarpoq meeqqat ilaqutariinni kisimiittumik pilersuisulinneersut meeqqanit ataataqarlutik anaanaqarlutillu peroriartortunit inuunerat ajornerussasoq“. Kisianni misissuinerit taamaattut misissoqqissaarneranni paasinarsivoq aningaasassaaleqineq „ilaqutariissutsini assigiinngitsuni meeqqat akornanni assigiinngissuteqarneq pissutaanerpaasoq“. Soorunami ima isumaqanngilaq ilaqutariit kisimiittumik pilersuisulinni meeqqat inuunerat iluatsinngitsoortussatut aalajangerneqareersimasoq. Eqqortumik ajoqersorneqarnikkut ilinniartinneqarnikkullu naak peroriartornerminni atugarlioraluarlutik iluatsilluarsinnaapput.