Pilersuisoq kisimiittoq, puigugaanngitsorli

„Meeqqama angerlaraangata eqitaarlungalu asaneraraangannga anaanaalluni tamanna nuannernerpaajuvoq.“ — DORIS, MEEQQANUT MARLUNNUT ANAANAQ KISIMIITTOQ.

ANGAJOQQAAT kisimiittut qularnanngitsumik Biibilimi allassimasoq isumaqatigissavaat: „Meeqqat Naalakkamit pilluaqqussutaallutillu tunissutaapput.“ (Tussiaat 127:3, Contemporary English Version) Meeqqat ilaqutariinni kisimiittumik pilersuisulinni peroriartortut Guutip isaani pingaannginnerutinneqanngillat. Pinngortitsisup kissaatigaa ilaqutariit kisimiittumik pilersuisullit ingerlalluassasut. Biibilimi Guuti pillugu imatut allassimasoqarpoq: „Ikiorpai iliarsuit uillarnerillu.“ (Tussiaat 146:9) Angajoqqaat kisimiittut qularissanngilaat Guutip tamatigut tapersersorumagaatik.

Meeqqat tamarmik pissutsini nuannersuni, isumannaatsuni eqqissisimanartumilu peroriartornissaq pisinnaatitaaffigaat timikkut, misigissutsikkut anersaakkullu ineriartorfigisinnaasaminnik. Meeqqanik perorsaaneq pisussaaffiuvoq pisinnaatitaaffiullunilu angajoqqaat tamarmik Guutimit pisimasaat.

Angajoqqaarpassuit kisimiittut paasisimavaat ilaqutariillualerumagaanni akuttunngitsumik Guutimut qinusarnissaq pisariaqartoq, Biibilimi najoqqutassiat maleqqissaarlugit Jehovalu tamakkiisumik tatigalugu. Kajumissaarut Tussiaat 55:23-mut naapertuulluarpoq: „Nanertuutigisat [Jehovamut] tunniuguk, taava isumagiumaarpaatit.“

Ilaannikkut aanaakkunnit aataakkunnit, ilagiinni utoqqaanertanit utoqqarnilluunniit angajoqqaajusunik misilittagaqarluartunit ilaqutariit kisimiittumik pilersuisullit ajornartorsiutaannik ikiorneqarsinnaapput. Pilersuisunut kisimiittunut ilaqutaasut uppeqatillu iluaqutaalluarsinnaagaluartut meeqqanut akisussaaffik pingaarnerusumik angajoqqaaniippoq. *

 Qujanartumik angajoqqaarpassuit kisimiittut unamminiarnartut immikkut ittut naammattuukkatik anigorluartarpaat, meeqqatillu akisussaassusermik misigisaqarnissaannik, perorsarsimalluartuunissaannik Guutimillu mianerinnittuunissaannik ikiorsimallugit. Iteritsi!-mit angajoqqaat ilaat oqaloqatigineqarsimapput. Tamarmik ataatsimut ilisarnaataat uani eqqaaneqarput:

• Aaqqissuussinermut pikkorissut Kisimiillutik angajoqqaajulluartut suna tamaat aaqqissuulluagaatinniartarpaat ilaqutariillu sammisassaat sapinngisaminnik ataqatigiissinniartarlugit. Iluatsitsilluarnissamut silatuumik pilersaarusiornissaq aaqqissuussinerlu pisariaqartarpoq. Biibilimi allassimavoq: „Eqiasuitsup pilersaarusiai iluanaarutissarsisitsisarput.“ — Ussatit 21:5.

• Akisussaassuseqartut Ilaqutariittut inuuneq pingaarnerpaatippaat meeqqamillu pisariaqartitaat namminneq pisariaqartitaminnit pingaarnerutillugit. — 1 Timotheusi 5:8.

• Allanngoraartuunngillat Ajornartorsiut soqutiginngitsuusaarnaguluunniit ingasaanniartanngilaat, aaqqiissutissarsiortarlutilli. Ajornartorsiutit akueraat imminnullu nalliginatik kamannatilluunniit aaqqinniartarlugit.

• Oqaloqatiginnillaqqissut Pilersuisut kisimiittut pikkorissut oqaloqatigiinneq pingaartittorujussuuaat. Ilaqutariinniittut tamaasa kajumissaartarpaat eqqarsaatitik misigissutsitillu annittaqqullugit. Ataataq kisimiittoq meeqqani pillugit oqarpoq: „Oqaloqatiginissaannut periarfissat tamaasa atortarpakka. Nerisassioraangatta nuannisartarpugut. Piffissani taakkunani oqaatigerusutaminnik aniatsitsivigisarpaannga.“

• Nammineq pisariaqartitatik soqutigaat Angajoqqaat kisimiittut ulluinnarni ulapiinnartuupput, amerlanersaasalu paasisimavaat anersaakkut, misigissutsikkut timikkullu pisariaqartitamik eqqarsaatiginissaat pingaaruteqartuusoq. Ethel, meeqqanut marlunnut anaanaq kisimiittoq oqarpoq: „Imminut piffissaqarfiginiartarpunga. Ikinngutima meeqqat nipilersornermik ilinniartittarpai, tassanilu nalunaaquttap akunnera ataaseq imminut atorsinnaavara. Fjernsyni samminagu issiasarpunga.“

• Isumalluartuupput Angajoqqaat kisimiittut meeqqanik perorsaanerminni iluatsitsisimasut inuunermut isumalluartuupput. Ajornartorsiuteqaleraangat ajortortaarnaat isiginiarneq ajorpaat. Anaanaq kisimiittoq oqarpoq: „Paasinikuuara kisimiilluni anaanaaneq aamma ajunngitsortaqartoq.“

 Misigisalikkersaarutit nuannersut

Najoqqutassiat taakku sunniuteqarluarsimappat? Aap, tamanna angajoqqaarpassuit kisimiittut uppernarsarsinnaavaat. Gloria, Tuluit Nunaanneersoq, ilanngutassiami siullermi eqqaaneqartoq avinnikuuvoq, anaanaq suliffilik nukappiaqqanik marlunnik niviarsiaqqamillu kisimeeqateqartoq. Meeqqat pingasuullutik kingusinnerusukkut piffissaq tamaat atorlugu oqaluussisartunngorput, allanillu Biibilimik ilinniartitsinissaminnut inuunertik atorniarlugu aalajangersimallutik. Gloria aperineqarami suliaq taanna qanoq ililluni iluatsissimaneraa akivoq: „Unamminiarnartoq siulleq tassaavoq aalajangersimasumik pissanganartumillu ilaqutariittut atuaqqissaartarnissaq. Kissaatigisaraara meeqqama pilluarlutillu nalerisimaarnissaat, eqqarsaatimikkut toqqissisimanissaat nakkarfissanullu illersugaanissaat. Unnuakkut sulisarpunga aalajangiusimagakku sapinngisara tamaat meeqqat ilagisarniarlugit. Suliartunnginnanni qinoqatigiittarpugut kingorna innartittarpakka. Sulininni ajama najortarpai.“

Gloriap meeqqani eqqortunik salliutitsinissaannut qanoq ikiorpai? Nangippoq: „Anguniakkama pingaarnersarisimavaat soqutigisat anersakkut ittut salliutinnissaat. Aningaasaateqanngingajappugut, tamannalu meeqqanut isertuunneq ajorpara. Uanga imminut piumaffigisinnaanngisannik piumaffiginngissaannarpakka tamarmillu suleqataajumapput.“ Gloriap oqaluttuaraa ilaqutariit ataqatigiillualersimanerannut suna pissutaaqataasimanersoq: „Iluatsilluarsimaneranut pissutaavoq peqatigiilluta sorpassuarnik sammisaqartaratta. Iniminnut mattusimasoqarneq ajorpoq. Iganeq, eqqiaaneq, qalipaanerit tapetilersuinerillu peqatigiilluta suliarisarpavut. Oqimaaqatigiissaariniartarpugut. Eqqissisimaarnissamut aamma piffissaqarniartarpugut.“

Carolynip, ernerminik Josephimik kisimeeqateqartup perorsaanermi kinguneri nuannersut nuannaarutigai. Suna tamatumunnga isertugaataava? „Innarfissanngoraangat Biibilimik atuaqatigiittarpugut,“ oqaluttuarpoq, „taava aperisarpara suna ilikkarsimaneraa. Aamma atuagassiaatitsinni Biibililersaarutini immikkoortut aalajangersimasut oqaloqatigiissutigisarpavut oqaluuseralugulu atuakkavut nammineq qanoq atorsinnaagivut. Josephip ajornartorsiutinik nalaataqaraangami iluaqutigisarpai, assersuutigalugu atuarfimmi qinngasaarisoqaraangat.“ Carolynip miserratiginngilaa inuunera arlaannaatigulluunniit oqitsuinnaasimanngitsoq, kisimiittutulli misiginngilaq. Oqarpoq: „Suli akiorniagassaavoq, misigisimavungali ilumut Jehovap ikiorsimagaanga. Aamma kristumiut ilagiivinit qiimmassarneqartaqaanga.“

Misigisimasalikkersaarutit nuannersut angajoqqaat kisimiittut tusindilippassuit, ilaatigut Gloriap Carolynillu, misigisimasaasa takutippaat Biibilimi najoqqutassiat malinnerisigut meeqqat anersaakkut nukittunerulernissaannik ikiorneqarsinnaasut. (Ussatit 22:6) Imaappoq ilaqutariit kisimiittumik pilersuisullit unamminiarnartoq anigorsinnaavaat! Kisimi pilersuisuulluni inuuneq siumukarnissamut allanullu iluaqutaanissamut periarfissarpassuaqarpoq. Angajoqqaat kisimiittut unamminiarnartut nalaatatik tamaasa anigussagunikkit Guuti tatigilluinnartariaqarpaat qularutiginagu ikiorumaaraatik. — Tussiaat 121:1-3.  (gE 10/8 02)

[Quppernerup ataani ilanngussaq]

[Qupp. 11-mi assiliartat]

Ilaqutariittut atuaqqissaartarnerup Gloriap meerai pingasut piffissaq tamaat oqaluussisartunngornissaannut ikiorsimavai. Uani erneranit angajullermit, maanna ajoqersuiartortitaasumit, allakkat assigalu isiginnaarpaat

[Qupp. 11-mi assiliartat]

Carolyn erneralu Joseph