Inuusuttut aperipput:

Sooq ataatama asanngilaanga?

„Angajoqqaakka avinngikkallarmata, sissamukartarpugut, filmeriartarluta biilerujoortarlutaluunniit. Kisianni avikkamik ataataga allanngorpoq. Soorluli uanga aamma avikkaanga.“ — Karen. *

INUUSUTTORPASSUIT assinganik naalliuuteqarput. Karenitulli misigipput angajoqqaaminnit asaneqarunnaarsimallutik — asaneqanngivissimallutilluunniit. Uani angajoqqaat meeqqallu saqitsaatillatsiarneranni misigissutsit nuanninngitsut takkuttartut pinngilavut. Angajoqqaalluunniit meeqqaminnik perorsaatissiigaangata eqqunngitsuliorfigineqartutut misigisarnerat pinngilarput. Angajoqqaat ilaatigut sumiginnaanermut pisuusarput meeqqaminnut naammattumik soqutiginninnginnermikkut pisariaqavissumilluunniit siunnersuinnginnermikkut. Ilaatigulli meeqqanut kusanaatsumik pissusilersorneq pineqarsinnaavoq, immaqa naveerserujussuarnikkut imaluunniit allaat annersaanikkut.

Angajoqqaanit soqutigineqannginnertut annernartigisoqanngilaq. „Kissaatigineqanngitsutut sumiginnagaasutullu misigitippaannga,“ Karen oqarpoq. Taamatut misiginikuuguit, misigissutsinnik qanoq aqutsisinnaanissannut aajukua siunnersuutit. Qularutigissanngilat naak angajoqqaannit tapersersorneqanngikkaluarlutit ajunngitsumik inuuneqalersinnaagavit!

Angajoqqaatit paasiniarsarikkit

Ilumoorpoq angajoqqaavit asassagaatsit naatsorsuutigigakku. Angajoqqaanit asaneqarneq seqerngup nuisarneratulli pissusissamisoortigisariaqaraluarlunilu aalajangersimatigisariaqaraluarpoq. Guutip angajoqqaat asanninnermik taamaattumik takutitsisarnissaat naatsorsuutigaa. (Kolossemiut 3:21; Titusi 2:4) Soormiuna angajoqqaat ilaanni meeqqatik sumiginnarlugillu soqutigineq ajoraat? Aamma sooq ajortumik pisarpaat?

Namminneq inuunerminni misigisimasaat pisooqataasinnaapput. Imminut apereriarit: ’Angajoqqaakka sumi meeqqanik perorsaanissamut ilinniarpat?’ Amerlanertigut namminneq angajoqqaamik iliuuserisimasaannit misilittagarisarpaat. Silarsuarmilu naakkittaaffiusumi inuppassuarnik ’asanniuitsunik’ avatangiiseqartilluta, perorsaariaaseq taamaattoq amigaateqakkajuttarpoq. (2 Timotheusi 3:1-5) Taamaattumik ilaatigut angajoqqaat angajoqqaaminnit perorsarneqarsimanermittut meeqqaminnut iliuuseqartarput.

Angajoqqaat aamma assigiinngitsorpassuarnik pissuteqarlutik aliasuuteqangaarsinnaapput. Ilaat pissutsinit piviusunit qimaaniarlutik suleruloortarput imigassaq eqqissisaatilluunniit qimaaffigisarlugit. Assersuutigalugu Williamip Joanillu ataatartik imerajuttoq peroriartorfigisimavaat. „Ataatama uagutsinnut nersualaarinissani ajornakusoortittarpaa,“ Joan oqarpoq. „Ajornerpaasarporli imertilluni kamalillaraangat. Unnussuaq naallugu anaanaga nilliaffigalugulu akerartortarpaa. Annilaangasaqaanga.“ Naak angajoqqaat sukannersuunngikkaluartut inooriaasiata nukisaarutsissinnaavai, taamaalilluni meeqqat asanninneq soqutigineqarnerlu pisariaqartitaat pinngitsoortinneqartarpoq.

William isumaqarpoq ataatami naatsorsuutigineqarsinnaanngitsumik pissuseqarneranut pissutaasoq  nalunagu. „Ataataga sorsunnersuup aappaata nalaani Berlinimi peroriartorpoq,“ nassuiaavoq. „Meeraalluni amiilaarnartorpassuit inuppassuillu toqutaasut misigai. Inuussutissaqarumalluni, ullut tamaasa tamaviaartariaqartarsimavoq. Isumaqarpunga misigisimasani ataatama ajoquserneqaatigisimagai.“ Biibilimi allassimavoq inuit tatineqangaartut sianiilliorsinnaasut. — Oqaluussisartup oqaasii 7:7.

William Joanilu isumaqarpat ataatamik misigisimasai imminerminnut iliorfiginneriaasianut utoqqatsissutissaasut? „Naamik,“ William oqarpoq. „Misigisimasai imertarneranut pissusilunneranulluunniit utoqqatsissutissaanngillat, ataatagali qanoq atugaqarsimanersoq nalunnginnakku, sooq taamaannera paasissallugu iluaqutigaara.“

Angajoqqaavit qanoq atugaqarsimanerat ilisimagukku naamalluinnanngitsuunerallu akuerigukku, taakkuninnga paasinninnissannut iluaqutaangaarsinnaassaaq. Ussatit 19:11-mi allassimavoq: „Inuk silatussusiata kamajaatsunngortittarpaa.“

Misigissutsivit paasinnissaat akiornissaallu ilinniaruk

Angerlarsimaffimmi pissutsit pissutigalugit misigissutsinik nuanniitsunik allanik nuanniilliuuteqartoqarsinnaavoq. Assersuutigalugu Patricia, angajoqqaaminit soqutiginninnermik takutitsiffigineqarsimanngilaq, tamatumalu „atorfissaqanngitsutut naleqanngitsutullu“ misigitippaa. Lailap arfineq-pingasuinnarnik ukioqarami ataatami angerlarsimaffitik qimannikuummagu, angutit tatigiuminaatsippai. Aamma Sarap atassuteqarfigisani tamangajaasa malugeqqusaarfigisarpai anaanani maqaasiunnaarniarlugu, naak „ikiaroornartumik pinngitsuuisinnaajunnaarsimagaluartoq“.

Kamattarneq sinngasarnerlu aamma ajornartorsiutaasinnaapput. Karenip ataatani kateqqissimasoq ilaqutartaaminik asanninnera maqaasisimasani takugamiuk, „sinngasorujussuanngoraluarpoq“. Niviarsiaraq alla, Lilian, ilaatigut misigisarpoq angajoqqaani uumigalugit. „Assortuuteqatigiuaannaavippakka,“ oqarpoq.

Misigissutsit taamaattut tamarmik paasinarput avatangiisit inuuffigisaat nalunngikkaanni. Misigissutsilli nuanniitsut taamaattut qanoq ajunngitsumik akiorneqarsinnaappat? Siunnersuutit makku eqqarsaatigeriakkit.

• Guutimut qanittumik attaveqalerit. (Jaaku 4:8) Ullut tamaasa Biibilimik atuartarnikkut innuttaanillu aalajangersimasumik peqateqartarnikkut Guutimut qanittumik attaveqalersinnaavutit. Jehovap siornatigut ullumikkullu uagutsinnut isumassuinera takusinnaalerukku, paasissavat ilumoorfiginnittuusoq. Tatigisinnaavat. Jehovap israelikkut aperai: „Arnap puigortarnerpaa qitornani milutsitani? Anaanap puigortarnerpaa erniarisani?“ Nangillunilu: „Taakkuami puigussagaluarpataluunniit uanga illit puigussanngilakkit.“ (Esaja 49:15) Taamaattumik aalajangersimasumik Guutimut qinusarit. Oqaasissavit eqqorluinnartumik oqaatiginissaat isumakuluutigisariaqanngilat. Jehovap paasissavaatit. (Romamiut 8:26) Jehovamit asaneqarnerit naatsorsuutigilluinnarsinnaavat — allaat allanit asaneqarpasinngikkaluarlutit. — Tussiaat 27:10.

• Inersimasoq tatigisat oqaluttuuguk. Inersimasut anersaakkut inersimalluartut ikinngutigikkit. Misigissutsitit isumakuluutitillu taakkununnga ammasumik oqaatigisakkit. Jehovap Nalunaajaasuini ilagiinni kristumiuni anersaakkut anaanaqalerlutillu ataataqalersinnaavutit. (Markusi 10:29, 30) Imaassinnaavorli siulliullutit iliuuseqartariaqartutit, qanoq eqqarsarnerlutit misiginerlutillu ammasumik oqaluttuullugit. Allat oqaluttuutinngikkukkit, qanoq misiginersutit nalussavaat. Nanertuutigisatit aniatikkukkit, uummatikkut oqiliallanngaassaatit. — 1 Samueli 1:12-18.

• Allanut iliuuseqarit. Imminut naakkiginaveersaarit. Pissutsit atukkatit nuanniitsut eqqarsaatigivallaaqinagit. Periarfissavit qujamasuutiginissaat  ilinniaannaruk. Allanut iliuuseqarnissannut periarfissatit atukkit ’nammineq iluaqutissat pinnagu inoqativittaaq iluaqutissaasa isumaginerisigut’. (Filippimiut 2:4) Anersaakkut anguniagaqarit, anguniarnerinilu eqiasuigit isumalluartuullutillu. Imminuinnaq piunnaarluni allanik soqutiginnilerniaraanni, iliuuserisinnaasaq pitsaanerpaaq tassaavoq kristumiutut oqaluussinermik aallussineq.

• Angajoqqaatit ataqqiuaannakkit. Biibilimi najoqqutassiat maligassiallu aalajangiussimajuakkit. Ataatamik anaanamillu ataqqinninnissaq najoqqutassiat ilagivaat. (Efesosimiut 6:1, 2) Taamaalioruit akiniaajumatuujunnginnissannut uumissuisuunnginnissannullu iluaqutigissavat. Angajoqqaavit kukkussutigisimagunagaasa nammineq ajortuliornerit naapertuilluartunngortinnavianngilaa. Taamaattumik tamanna Jehovamut isumagitiguk. (Romamiut 12:17-21) „Eqqortoq iluaraa“, meeqqat isumagisarpai illersortarlugit pisariaqartitaannillu eqqumaffiginnittuulluni. (Tussiaat 37:28; 2 Mosesi 22:22-24) Angajoqqaatit ataqqiuaannakkit anersaallu ineritaanik ineriartortitsiniarlutit, tamanit annerusumik asanninnermik. — Galatiamiut 5:22, 23.

Iluatsitsisinnaavutit

Angajoqqaanit asaneqannginnerup annernarnera qularutissaanngilaq. Angajoqqaavilli kukkussuteqarnerat inuuninnut aalajangiisuusariaqanngilaq. Biibilimi najoqqutassiat eqqaaneqareersut malikkukkit, pilluarlutit nalerisimaarlutillu inuulersinnaavutit.

William, eqqaaneqareersoq, Jehovap Nalunaajaasuisa immikkoortortaqarfiisa ilaanni sulisuuvoq. Oqarpoq: „Atukkavut alianartut nammassinnaanngorlugit Jehovap assigiinngitsorpassuartigut ikiorpaatigut. Taama isumassuitigisumik asannitsigisumillu qilammiusumik Ataataqarsinnaaneq immikkut pisinnaatitaafferujussuuvoq.“ Najaa, Joan, piffissaq tamaat oqaluussisartuusoq, oqaluussisartunik pisariaqartitsiffiungaartumi kiffartorpoq. „Peroriartornitsinni takuarput ’Guutimik kiffartuussisup kiffartuussisuunngitsullu’ assigiinngissutaat erseqqeqisut,“ oqarpoq. (Malaki 3:18) „Misigisatta sallusuissutip assoroorutiginissaanut namminerlu pigiliunnissaanut aalajangiussisimalluinnartippaatigut.“

Illit aamma taama misigisinnaavutit. Biibilimi allassimavoq: „Qianngarmik siaruarterisut katersuiumaarput qiimmattarlutik“. (Tussiaat 126:5) Qanoq paasisariaqarpa? Aap, atugarliortilluni najoqqutassiat eqqortut malinniarsarigaanni, naggataatigut Guutip pilluaqqussutai misigigaanni, qulliit nuannaarninngussapput.

Taamaattumik Jehova Guutimut qanittumik attaveqalernissat sulissutigiuaruk. (Hebræerit 6:10; 11:6) Naak ukiorpassuit isumakulunneq, paatsiveerusimaarneq imminullu pisuutinneq akiorsimagaluarlugit, piffissap ingerlanerani taamatut misigiunnaariartuaartoqarsinnaavoq, misigissutsillu taakku ’eqqissinermit Guutimit pisumit siuneqassusernit tamanit annerungaartumit’ taarserneqassapput. — Filippimiut 4:6, 7.  (gE 9/22 02)

[Quppernerup ataani ilanngussaq]

[Qupp. 29-mi ungalusaq]

Misigivit . . .

• naleqanngitsutut?

• allanik tatiginninneq sianiilliornerusoq nalorninartuusorluunniit?

• allanit nuannarineqarnivit uppernarsartuarnissaa pisariaqartillugu?

• kamannerit sinnganerilluunniit aqussinnaanagu?

Apeqqutit uku angerukkit, tunuarsimaaqinak, tatigisannilli oqaloqateqarit, soorlu ataatat anaanalluunniit, utoqqaanertaq imaluunniit ikinngut anersaakkut inersimalluartoq.

[Qupp. 30-mi assiliartat]

Misigissutsitit aqussinnaajumallugit iliuuseqarit