OQAATSIT taakku Jiisusimit oqaatigineqartut pissutigalugit uppertut amerlasuut ajornartorsiutiminnik isumakuluutiminnillu Guutimut qinunikkut saaffiginnittarput tatigingaarlugu asagaatsik isumagissagaatsillu. Ilaalli qinnutitik tusarneqarsorineq ajoramikkik pakatsisarput. Illimmi? Qinnutitit sunniuteqartarsorinngiligit? Qinnutitit Guutimit tusarneqartarnerpat?

Qinnutivut akineqarsorisanngikkaluarivut isumaqanngilaq Guutimit tusarneqanngitsut. Biibilimimi allassimavoq: „[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ (1 Petrusi 3:12) Jehova Guutip naapertuilluartut qinnutaat tusartarpai, nipituumik uummatikkulluunniit qinnutaagaluaraangata. (Jeremia 17:10) Aammattaaq Jehovap misissortarpai qinnutini tamani eqqarsaatit misigissutsillu tunuliaqutaasut, immaqalu qinusumit paasiuminaatsinneqarsinnaasut allaalluunniit sianigineqarluanngitsut. — Romamiut 8:26, 27.

Guutilli qinnutivut iluarissappagit piumasaqaateqarpoq. Pingaarnerpaamik Guutimut toqqaannartariaqarput, Jiisusimuunngitsoq, iluartuutitamuunngitsoq guutiliamuunngitsorluunniit. (2 Mosesi 20:4, 5) Qinnutit qinnutigineqartut aamma Guutip ernerata Jiisusi Kristusip aqqani qinnutigineqartariaqarput. (Johannesi 14:6) Imaappa qinnutivut Jiisusimit tusarneqaqqaassasut taassumalu tamatuma kingorna tusarliussassaq Guutimut ingerlateqqissagaa? Naamik, Jiisusilli aqqani Jehovamut qinunikkut Jiisusip ajoqersugaatut Guutimut saaffiginnittarpugut, akueraarpullu Jiisusip pilliutaa kisiat tunngavigalugu Guutimut qinunikkut qanillisinnaasugut. — Hebræerit 4:14-16.

Qinnutit uppernikkut qinnutigineqartariaqarputtaaq. Apustili Paulusi taamaanneraavoq: „Uppersuseqarnanili  Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.“ (Hebræerit 11:6) Taamaattumilli uppissuseqarnerluni qanoq paasineqarsinnaava? Biibilimik allaqataasup Jaakup imatut akivaa: „Uppernera suliakkut ilinnut takutissavara.“ (Jaaku 2:18) Aap, upperneq suliatigut takutinneqartariaqarpoq, suliatigullu taakkunatigut Guuti asagipput sapinngisatsinnillu taassumannga iluarisaarusuttugut takutissavarput.

Guutimik pallorfiginnittut qinunikkut qasusuittariaqarputtaaq. Tamanna Jiisusip oqaasiini allaaserisap aallaqqaataani issuarneqartuni Iivangkiiliu Lukasip allagaani 11:9, 10-mi erseqqissarneqarpoq. Ataasiaannarluta aalajangersimasoq qinnutigigutsigu, paasinarsissaaq pimoorutinngikkipput.

Qanorluunniit qinukulatigalutalu peqqusersuitsigigaluarutta ’ulluni atugarliungaarfinni’ inuuvugut. (2 Timotheusi 3:1) Jiisusi oqaraluartoq ajoqersukkani pilluarlutik inuussasut, oqanngilaq ajornartorsiuteqarnavianngitsut. (Matthæusi 5:3-11) Ilumoortumilli oqarpoq ajoqersukkani pilluassasut naak aliasuttoqaraluartoq, kaannersuaqaraluartoq, qilalersoqaraluartoq malersuisoqaraluartorlu.

Pilluarnermi Jiisusip eqqartugaani pissutsini naammalluinnartuni inuunissarput pineqanngilaq. Guutimut kiffartornerput pissutaaneruvoq qamuuna nalerisimaarnitsinnut. Taamaakkutta pillualersinnaavugut naak pissutsini erloqinarluinnartuni. — 2 Korinthimiut 12:7-10.

Taava imaappa qinunermi imminut tunngasut taaneqarsinnaanngitsut? Assersuutigalugu aappassamik tulluartumik, ilaqutariinni attaveqatigiilluarnissamik, peqqinnissamik suliffimmulluunniit atatillugu siunnersorneqarnissamik Guutimut qinuneq iluaqutaanavianngitsoq? Naamik, Guuti neriorsuinngikkaluarpoq inuunermi atukkatsinnut tupinnartuliornikkut akuliunniarluni, pitsaanerusumik atorsinnaaqqullugit ilisimassut pisariaqartoq uagutsinnut tunniukkumavaa. Jaaku allappoq: „Ilisimassutsimigulli inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.“ (Jaaku 1:5) Jehovap anersaani illernartoq aqqutigalugu siunnersorumavaatigut ilinniarsinnaaqqullugu aalajangigassaqartilluta qanoq ililluta Biibilimi najoqqutassiat atorsinnaassanerivut.

Soorunami anersaaq illernartup aalajangigassatsinnik aalajangiissunneq ajorpaatigut. Naamik, nammineerluta iliuuseqartariaqarpugut. Assersuutigalugu ajornartorsiuteqaraangatta, tamanna pillugu misissuisarpugut pisoq iserfigilluarlugu sammivinnillu assigiinngitsunit isiginiarlugu? Iliuuseqarnerussaaq ’suliaassalluniluunniit’ Guutimut takutitsisoq uppertuunitsinnik. (Jaaku 2:18) Qasusuippugut ajornartorsiutitta aaqqinniarnerani Guutip siulersuinissaanik qinujuarnitsigut? (Matthæusi 7:7, 8) Ajornartorsiumut atatillugu Biibilimi najoqqutassiat misissorluaqqissaartarpavut? Guutip oqaasiata ’piginnaaneqarlualersissinnaavaatigut ajunngitsuliornernut tamanut piareersarluagaalersilluta’.— 2 Timotheusi 3:16, 17, NV.

Ilumoorpoq Guuti qaqugukkulluunniit inuit inuunerannut akuliussinnaasoq tamanillu ajornartorsiutaarutillugit. Aammali namminneq aalajangiisinnaatippai; ajoraluartumillu amerlasuut namminneq aalajangiisinnaanertik allanut ajoqutaasumik atortarpaat. Tamanna pissutigalugu ajornartorsiutit ilaat qinnutitsinni eqqaasakkavut aatsaat Guutip silarsuassaani nutaami aaqqinneqassapput. (Apustilit Suliaat 17:30, 31) Imaassinnaavoq najugaqarfitsinni pisimasuusoq, soorlu pinerluttuliorneq allaalluunniit sorsunneq; imaassinnaavorluunniit akerlilersorneqarnermit naalliutsitaaneq. (1 Petrusi 4:4) Nassuerutigisariaqarparput silarsuarmi guutiitsuuffiusumi maani pissutsit ilaat pitsaanerulernavianngitsut.

Qanorluunniit ikkaluarpat Guutip pallorfiginnitsini asavai ikiorusullugillu. Naalagaaffia kiserluinnarmi nunamut aqutsilerpat ajornartorsiutit amiilaarnangaartut silarsuarmi matumani naalliuutigineqartut peerluinnarneqassapput. (Saqqummersitat 21:3, 4) Taamanikkussap tungaanut ulluinnarni ajornartorsiutit nalaattakkatta qaangerniarnissaannut Guutimut ikioqqulluta qinujuartariaqarpugut. Taamaaliorutta qularutiginngilluinnarsinnaavarput Jehovap neriorsuutini Esaja 41:10-miittoq piviusunngortikkumaaraa: „Siooraqinak ilagigakkit, erseqinak, uangaagama illit Guutit. Nakussatsippakkit ikiorlutillu, assannik ajugaasartumik najummivakkit.“