Ilagisartakkanit tatineqarneq qanoq akiussavara?
Inuusuttut aperipput:
Ilagisartakkanit tatineqarneq qanoq akiussavara?
„Ilagisartakkanit tatineqarneq sumi tamaani atugaavoq.“ — Jesse, 16-nik ukiulik.
„Nukappiaraallunga atuaqatinnit tatineqarnera artornarnerpaat ilagaat.“ — Johnathan, 21-nik ukiulik.
ILAGISARTAKKANIT tatineqarneq piffikkut sukkulluunniit misigisassaavoq. Qularutigissanngilalli illit tamanna akiorsinnaagit. Immaqa allaat tamanna ajunngitsumut saatitsissutigisinnaavat. Qanoq?
Siusinnerusukkut allaaserisami eqqaavarput illit iliuuserisaqaqqaartariaqassasutit, tassa ilagisartakkanit tatineqarnerup sunniuteqartorujussuunerata nassuerutiginissaa, tamannalu sunnerteqqajaaffigisinnaagit. * Illit sunik pitsaasunik iliuuseqarsinnaavit? Guutip oqaasii siunnersuutinik iluaqutigisinnaasannik imaqarput. Ussatit 24:5-mi allassimavoq: „Angut ilisimasoq pissarsuuvoq.“ Ilagisartakkannit tatineqaraangavit ilisimassutsip suup,pissaaneqarnerulersissinnaagamitit’? Apeqqut tamanna akitinnagu illit ilagisartakkanit tatineqarnermut nakkaannassutigisinnaasatit sammeqqaalaariartigit.
Imminut tatiginnginneq ajornartorsiutaavoq
Inuusuttunut Jehovap Nalunaajaasunut ilagisartakkannit tatineqarneq immikkut ilaatigut unamminiarnartuuvoq, kristumiutut inuunerat upperisaminnik allanut oqaluttuussisarnissamik imaqarmat. (Matthæusi 28:19, 20) Illit upperisat pillugu inuusuttut allat oqaluttuunnissaat ilaannikkut ajornartittarpiuk? Taamaappat kisivit taamaanngilatit. Melanie 18-nik ukiulik oqarpoq: „Jehovap Nalunaajaasuisa ilagigaannga inuusuttunut allanut oqaluttuarissallugu isumannit ajornarneruvoq.“ Nangipporlu: „Oqaluttuarinissaanut sapiillillungalu annilaangaqqilersaraanga.“ Melaniep tunuarsimaarutigisaa tassaagunarpoq ilagisartakkanit tatineqarneq.
Biibilip tuppallersarpaatigut angutit arnallu upperluaraluartut ilaatigut Guuti pillugu eqqartuinissamut tunuarsimaartarsimasut. Assersuutigalugu inuusuttoq Jeremia taamaassimavoq. Nalunngilaa Guutip peqqusineratut ammasumik Jeremia 1:6, 7.
oqaluussigaluaruni illaruaatigineqarlunilu malersorneqassalluni. Jeremia aamma imminut tatigisimanngilaq. Sooq? Guutimut oqarpoq: „Ila . . . inuusuttuuvunga, oqalunneq naluvunga.“ Inuusunnera pillugu oqalussinnaannginnera Jehovap isumaqatigaa? Naamik. Jehovap pruffiiti oqarfigaa: „Ima oqaqinak: Inuusuttuuvunga!“ Angut inuusuttoq akisussaaffimmik pingaaruteqartumik tunivaa. —Imminut tatigivallaanngikkaanni ataatsimoortunit piumaffigineqarnermut akiuunnissaq ajornakusoortorujussuuvoq. Misissuinerit arlallit tamanna takutippaat. Assersuutigalugu ilisimasassarsiortoq tusaamasaq Muzafer Sherif tusaamaneqaqisumik 1937-imi misiligaasimavoq. Inuit misiligakkani arlallit inimut taartumut isertissimavai, taavalu qaamaneeqqamik takutitsivigalugit aperalugillu qanoq qaamaneq ingerlaartiginersoq.
Qaamaneq ingerlanngivippoq, takorruuinerinnaavorli. Inuit kisimiitillugit misiligarneqartillutik misilinneqarnerminni qaamanerup ingerlaarneranik nassuiaataat tamarmik assigiinngissinnaasarput. Maannali misilillugu ataatsimoortillugit kingumut misiligarneqarput isummertinneqarlutillu. Qanoq pisoqarpa? Namminneq paasinnittaatsiminnik tatiginninnginnertik pillugu imminnut sunneqattaapput. Misiligarneqaqattaartillutik akissutaat assigiinneruleriartorput. Naggataatigut „ataatsimooqatigiit isummiussaannik“ peqalerpoq. Naak misiligarneqartut kisimiitillugit misiligarneqaqqikkaluartut „ataatsimooqatigiit isummiussaat“ suli sunniusimaarsimavoq.
Misiligaaneq una pingaarutilimmik oqariartuuteqarpoq: Nalornigaanni imminulluunniit tatiginngikkaanni ilagisartakkanit tatisiniartunut akuersiinnaqqajaanarnerusarpoq. Eqqarsarnaq, ilaa? Ilagisartakkanit tatineqarneq apeqqutinut pingaaruteqartunut sunniisinnaavoq, soorlu inuit atoqatigiinnermut isiginneriaasiinut ikiaroornartunullu atornerluinermut — ataatsimoortunit piumaffigineqarneq allaat inuunermi anguniakkanut sunniisinnaavoq. „Ataatsimooqatigiit isummiussaat“ apeqqutinut taamaattunut najoqqutassaatilerutsigit siunissatsinni akornutigerujussuarsinnaavarput. (2 Mosesi 23:2) Ilagisartakkanit tatineqarnerup nanertisimatittariaqanngilaatigut.
Misiligarneqarnermi qaamanerup ingerlannginnera qularinagu ilisimareersimagaluarukku misilitsinnerimmita qanoq ingerlasimassagaluarpa? Qularnanngitsumik ataatsimoortunit sunnertissimanavianngikkaluarputit. Tamatuma takutippaa imminut tatiginissamik pisariaqartitsisugut nalunngikkaangatsigu ilumoortoqartoq. Tamannali naammanngilaq.
Jehovamut tatiginnilerit
Imminut tatiginerulernissamik oqaluttorpassuit immaqa tusarnikuuatit. Qanorli imminut tatigilertoqarnissaanik — qanorlu pisariaqartinneqartigineranik — assigiinngitsunik isumaqartoqarpoq. Biibilimi imaattumik patajaatsumik ilitsersuuteqarpoq: „Tamassi immikkut ima oqarfiginiarpassi: Immissinnik pingaarteqinasi pisariaqartumit annerusumik, silaqassusersili sianisuumik atorsiuk.“ (Romamiut 12:3) Nutsigaq alla ima oqaasertaqarpoq: „Tamassi immikkut oqarfiginiarpassi imminik qanorpiaq ittuuneq sinnerlugu pingaarnerutittoqassanngimmat, kisianni imminut nalilertariaqartoq ingasattajaanngitsumik.“ — Charles B. Williams.
„Qanorpiaq ittuuneq“ malillugu ’imminut ingasattajaanngitsumik nalilersinnaagaanni’, imminut pingaartinnissaraluaminut, tatigivallaarnissaraluaminut imminullu angisuutinnissaraluaminut illersuutigissavaa. Kisianni tamatuma nassatarissavaa imminut oqimaaqatigiissumik isiginnittaaseqarneq, nammineq eqqarsarsinnaassutsiminut, tunngavilimmik eqqarsarsinnaassutsiminut isumatuumillu aalajangersinnaassutsiminut tatigineq. Pinngortitsisutta sianissusermik atortulersimavaatigut, tamannalu tunissut annikigisassaanngilaq. (Romamiut 12:1) Tamanna eqqarsaatinniitittarukku allanit aalajangiissunneqarnissaagaluannut illersuutigissavat. Ataatsimilli tatigilluinnarsinnaasannik peqarpoq. Taassuma ikiorlutillu illersorsinnaavaatit.
Kunngi Daavi imaattumik allatsinneqarsimavoq: „Illimmi neriuffigaakkit, [Jehova], inuusunninniilli qimarnguffigisarpakkit.“ (Tussiaat 71:5) Aap, Daavi inuusukkallaramili Ataatani qilammiu tatigilluinnarsimavaa. Daavi „inuusussimaqaaq“ — immaqa inuusuttuaraasimassaaq — filisterersuaq Goliat Israelikkut sakkutuuannut ataatsimut unammillermat. Sakkutuut ersiorsimaqaat. (1 Samueli 17:11, 33) Immaqa akunnerminni ataatsimoorlutik ajortumik tatisisoqalersimavoq. Qularnanngitsumik Goliatip angissusaa nukittunerujussua sapiissuserujussualu qularsaarinerminnik eqqartorsimassavaat oqarlutillu kinaluunniit taassumunnga unammillersoq silaqarsimanavianngitsoq. Oqaluttunut tamakkununnga Daavi sunnertissinnaasimanngilaq. Sooq?
Daavi Goliatimut oqaasii malugeriassagitit: „Illit ornipparma panaqarlutit qalugiusaqarlutillu qatiingasumik. Uangali ornippakkit Katersaarsuit [Jehovaata] Israelip sakkutuuisa Guutiata mitallerfigisavit aqqani.“ (1 Samueli 17:45) Daavi Goliatip angissusaa, nukittussusaa sakkuilu suusut nalunngilai. Qularutiginngilluinnarpaali Jehovap nukii Goliatip nukiinit annerungaartut. Jehovap Daavi illersorpagu, taava sooq Daavip Goliat qunugissavaa? Guutimut tatiginninnini illersuutitut misigaa. Ilagisartakkanit tatineqarneq angigaluaqisoq tamatuma tusialersinngilaa.
Illit aamma taama angitigisumik Jehovamut tatiginnissuseqartigaat? Daavip nalaanili allanngornikuunngilaq. (Malaki 3:6; Jaaku 1:17) Jehova pillugu ilinniarnerit anneruleriartortillugu oqaatsiminik eqquutsitsiuaannarnera qulariunnaariartussavat. (Johannesi 17:17) Taakkunani maleruagassat inuuninnik aqqutissiuisussat ilagisartakkanit tatineqarnermut akiuussutissat allanngujaatsut tatiginartullu nassaarissavatit. Jehovamulli tatiginninnerup saniatigut allamik iliuuseqarsinnaavutit.
Eqqortunik siunnersortissarsiorit
Guutip oqaasiisa takutippaat ilitsersuutit eqqortunit pissarsiassaanerat pisariaqartinneqartoq. Ussatit 1:5-mi allassimavoq: „Inuk silassorissoq pissarsissaaq inuunermi ilisimasassanik.“ Angajoqqaannit pitsaasunik siunnersorneqarsinnaavutit ajunnginnerpaamimmi kissaakkamitsit. Indirap tamanna misigisimavaa. Ima oqaluttuarpoq: „Sallusuissut uannut pigiliutissimammassuk angajoqqaakka qujaffissaraakka. Biibili tunngavigalugu nassuiaattuartarsimavaannga Jehovalu piviusutut isigilersissimallugu.“ Inuusuttorpassuit tamanna aamma misigisimavaat.
Jehovap Nalunaajaasuisa ilagiivisa ilaanniikkuit ilagiit nakkutilliisuiniit kristumiullu inersimalluartunit ikiorluarneqarsinnaavutit. Nadia 20-nik ukiulik oqarpoq: „Ilagiinni utoqqaanertat ataqqeqaakka. Ilanngussat ilaat ilagiit nakkutilliisuaniit saqqummiunneqartoq eqqaamalluarpara. Taanna inuusuttunut immikkut tulluartorujussuuvoq. Ataatsimeereeratta ikinngutigalu nuannaarutigeqaarput, tassami ajornartorsiutivut saqqummiussamini eqqorluarmagit.“
Ilagisartakkanit ajortumut tatineqarnermut aamma ilagisartakkanit ajunngitsumik tatineqarneq sakkuusinnaavoq. Ikinngutitit ilisimassuseqarlutit qinertarukkit, siunniussannut malinniakkannullu aalajangiussisimaninnut ikiortigisinnaavatit. Qanoq eqqortunik qinersisoqarsinnaagami? Siunnersuut pitsaasoq aana: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ (Ussatit 13:20) Nadia atuarfimmi ikinngutigisinnaasaminik qinersinissamini mianersorsimavoq. Uppeqatimi peqatigilluarnissaat qinersimavaa, ileqqussatigummi maleruagassat imminermisulli maleruagassarimmassuk. Oqaluttuarpoq: „Atuarfimmi nukappiaqqat oqaluunniakujukkaangamisigut tapersersoqatigiittarpugut.“ Ikinngutigilluakkat ajunngitsut ilutsinniittut saqqummersissinnaavaat. Ikinngutigilluakkanik nassaarnissaq unamminiarnartuuvoq, akilersinnaavorli!
Jehova tatigilerukku, siunnersuisinnaasunut eqqortunut saaffiginnittaruit ikinngutitillu siuneqassuseqarluarlutit qinertarukkit qularnanngivissumik ilagisartakkanit tatineqarnernut akiuussinnaassaatit. Illit namminerluunniit allaat ikinngutinnut ajunngitsumik tatiseqataasinnaavutit ikiorsinnaallugillu inuunerup aqqutaatigooqatigalugit. (gE 12/22 02)
[Quppernerup ataani ilanngussaq]
^ imm. 6 Allaaserisaq takuuk „Unge spørger: Gruppepres — er det virkelig et problem for mig?“ Vågn op! 22. november 2002-moortoq.
[Qupp. 16-mi issuagaq]
Ikinngutinik ilittulli Guutimut maleruaqqusaanullu asannittunik ujarlerit
[Qupp. 16-mi assiliartat]
„Ikinngutipalaaqarneq ileqqorikkaluartunut aseruutissiisarpoq.“ — 1 Korinthimiut 15:33
„Ilisimasunik peqateqartoq ilisimassuseqalersarpoq.“ — Ussatit 13:20