Nattorallip isaa

SPANIAMI ITERITSI!-P ILANNGUTASSIORTUANIT

ANGUT tappissuuppat spaniamiut oqartarput nattoralittut takunnissinnaasoq (vista de águila). Tyskit assingusumik oqaaseqarput (Adlerauge). Tappissut qallunaatut oqaatigineqartarput nattoralittut tappitsigisut. Nattorallip tappissusiata assersuutigineqartarnera tunngaveqarpoq. Ukiut pingasunik tusindillit matuma siornatigut Jobimik allakkani nattoralik pillugu atuarneqarsinnaavoq: „Ungasissorsuarmut allaat takunnissinnaasarpoq.“ — Jobi 39:27, 29.

Nattoralik qanoq ungasitsigisumut takunnissinnaava? „Isikkivigilluinnartillugu nattoralissuup (Aquila chrysaetos) ukallip aalarialaarnera [2 kilometeri] sinnerlugu ungasitsigisumiittoq takusinnaavaa,“ The Guinness Book of Animal Records nalunaarpoq. Ilaat isumaqarput nattoralik suli ungasinnerusumut takunnissinnaasoq!

Nattorallip tappissusianut suna pissutaava? Siullermik nattoralissuaq niaqumini initoqisunik marlunnik angisuunik iseqarpoq. Isai „anginerpaaffissaminniipput, oqimaassusaat timmisinnaassusianik ajoqusiinatik“, Book of British Birds allappoq.

Aammattaaq nattorallip isai uagut isitsinniit tallimariaammik amerlanerusut missaanik tapcelleqarput (qaamanermut misikkarissut), tassa kvadratmillimeterimut 1.000.000 missaaniipput uagut 200.000-sut. Malussaatai tamangajammik sianiutinut atapput. Tamanna isumaqarpoq nattorallip takunnissinnaaneranut sianiutit, isimit qaratsamut nassiussuisut, inuup isaata ipiutaanit marloriaammik amerlanerusut. Uumasut taakku qalipaatinik takunnissinnaanerisa pitsaasuunerat tupinnanngilaq! Naggataatigut taaneqarsinnaavoq timmissat tigutsisillit isaat, timmissatulli allatut sakkortuunik igalaasartaqarmata centimeterialunnik ungasitsigisumiittunit isigisaminniit isigisamut allamut ungasissorujussuarmut nooriataarsinnaasunik. Aamma tamatumuunakkut isaat isitsinnit pitsaanerupput.

Nattoralik ulluutillugu takunnilluarsinnaanerusarpoq, unnuaaneranili uppiit tappinnerupput. Tigutsisillit taakku unnuarsiortuunerusut iseqarput amerlasuunik stavcellelinnik (sianiutit qaamanermut misikkarissut allaanerusut), igalaasartaasa qaavi angisuujullutik. Taamaammat unnuami takunnissinnaanerat takunnissinnaanitsinnit 100-riaammik pitsaaneruvoq. Qaqutigoortuugaluamik unnuami taggaritsillugu uppiit piniagassaminnik ujarlernerminni siussarinnertik pisariaqartilluinnartarpaat.

Kia timmissat taakku taamaattunik piginnaassusilersimavai? Guutip Jobi aperaa: „Illit tassaavit nattoralimmik peqqusisoq qutsissumukaqqullugu?“ (NV) Soorunami inuup kialuunniit ataqqinaatigisinnaanngilaa pinngortitanik taamaattunik alutornangaartunik peqarnera. Jobi maniguulluni nassuertariaqarsimavoq: „Paasivara [Jehova] tamanik sapigaqanngitsutit.“ (Jobi 39:27; 42:1, 2) Nattorallip isaa suli nalunaajaataavoq Pinngortitsisup ilisimassusianut. (gE 12/22 02)

[Qupp. 24-mi assiliartaq]

Nattoralissuaq

[Qupp. 24-mi assiliartaq]

Uppik issittormiu