Qungujunneq qanoq sunniuteqarsinnaasoq

SIVIKITSUINNAAVOQ, inuunerulli sinnerani immaqa eqqaamaneqassaaq. Naleqangaarpoq, kinaluunniilli ima piitsuutiginngilaq allat taamaattumik tunisinnaanagit, imaluunniit ima pisuujutigaaq allaat atorfissaqartinnagu. Sunaana pigipput? Qungujunneq.

Qungujunneq pilersarpoq nukiit sukannerisigut isit nuannaarpalulersillugit qarluillu qummut noqiimilaannguarlugit. Meeraq inoorlaaq sapaatit-akunneri arlaqanngitsut qaangiukkaangata qungujuttalertarpoq, angajoqqaallu tulluusimaartut tamanna soorunami nuannaarutigisarpaat. Meeqqap taama qungujujaartigineranut qungujuttaatip qisuariarneranik pissuteqarpoq. Ilisimatuut nassuiaapput qungujunneq taamaattoq meeqqap sinnattornerani pisartoq, tamannalu meeqqap qamuuna misigissusiinut aamma qitiusumik timip sianiutaanut attuumassuteqarunartoq. Allaat inersimasutut piumassuserinngisatsinnik qungujoriataarsinnaasarpugut. Tamanna nerereernerup kingorna nipilersuummilluunniit tusarnaartilluta pisinnaavoq.

Inoorlaaq sapaatit-akunneri arfinillit missaani utoqqaassuseqaleraangami kiinnamik takugaangami imaluunniit nipimik tusaagaangami qungujuttarpoq. ’Tamanut qungujunnerup’ — piumassutsimik qungujuffissakkullu qungujunnerup — nuannaalersittarpaatigut, meeraaraagaluarutta inersimasuugaluaruttaluunniit. Ilaat isumaqarput qungujunneq taamaattoq peqqissusitsinnut sunniuteqarluartuusoq. Oqalunnermut pædagogit Mirtha Manno aamma Rubén Delauro pikkorissaavimmik ’Smilet og Helbredet’-mik (Qungujunneq Peqqissuserlu-mik) ingerlatsisut naapertorlugit qarlut qummut noqiinnaraanni qaratsap attataanut sunniuteqartarpoq. Qinersiup endorfinerit, qaratsami sananeqaatit kemiskiusut uagutsinnik iluarusunnermik misigilersitsisartut, pilersittarpai.

Qungujunnissamut pissutaasoq alla tassa allanut ajunngitsumik sunniuteqartarami. Ajunngitsumik isumaqarluni qungujunneq, ilassinnilluta, misiginneqataalluta qiimmassaaniarlutaluunniit oqaatsit atunngikkaluarlugit qanoq misiginersugut takutitsivoq. Meeqqap assinga qungujulasoq takuunnarlugu ilaatigut qungujutsissinnaavaatigut.

Kissalaartumik qungujuffigineqarutta, eqqissisimanerulersissinnaavaatigut pakatsinartut unamminiarnartullu atornissaat oqinneerarsuanngortillugit. Biibili ima ilaliivoq: „Ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit.“ (Ussatit 3:27) Aap, uagutsinnut allanullu iluaqutaassaaq inussiarnersumik kiinnertarutta. Taamaattumik tunissummik naleqangaartumik taassuminnga — qungujunnermik kissalaartumik — allanut tunisinissatsinnik ilungersorta. (gE 1/22 03)