Ajugaasin­naavutit!

PIFFISSAN­NGORPOQ ‘sapiitsuullutit suliassap aallartin­nissaanut!’ (Nalunaarsuutit 1. 28:10) Iluatsinnissat ilimanar­neruler­niassammat qanoq aamma piareersarsinnaavit?

Unitsin­nissaanut ulluliigit. USA-mi peqqissutsimut suliniaqatigiiffik kajumis­saarivoq pujortarun­naarniarluni aalajanger­nermiit ullup pujortarun­naarfiup tungaanut sapaatit-akunnerinik marlunnik pingasunil­luunniit sivisunerus­sanngitsoq. Taamaalioruit pujortarun­naarnissannut piumassutsit attatiin­naassavat. Qaammatisiutinnut krydsiliigit, ulloq aalajangiussat ikinngutinnut oqaluttuariuk aalajangiusimaan­narlugulu, aamma atukkatit allanngoraluarpataluunniit.

Allattaaveqarit. Allattaavinni ilanngus­sinnaavatit suulluunniit pujortarun­naarnissannut kajumilersitsisut.

● Pujortarun­naarnissannut pissutiginiakkatit

● Tunniutiin­nalerusunninni normut sianerfigisin­naasatit

● Isumalluartumik eqqarsaateqalersitsisut – immaqa versit, soorlu Galaatiamiut 5:22, 23, anguniakkannut iluaqutigisin­naasatit

Allattaaviit nassatariuaruk ullormullu arlaleriarlutit takusarlugu. Aamma pujortarun­naarsimagaluarlutil­luunnit pujortaguleraluaruit allattaaviutivit imarisaanit eqqaasin­neqarsin­naavutit.

Ileqqulius­simasatit siusinaarlutit katanniarsarikkit. Pujortarnermut tunngatillugu ileqqulius­simasatit, pujortarun­naarnissannut ulluliisimanerit sioqqul­lullugu, katanniarsarikkit. Makinniutaa pujortar­tarsimaguit pujortarnissat akunnermik ataatsimik kinguar­tissinnaavat. Nerinerpit nalaani kingornaluunniit pujortartaruit, ileqqoq tamanna taamaatiguk. Allat pujortar­tarfigisartagaat orninnaveersaakkit. Kisimiik­kaangavit ima oqarnissannut nipituumik sungiusartarit: “Qujaannarpunga, pujortar­tarunnaarama.” Taamatut piareersar­tarnivit ullormik pujortar­tarunnaarfinnik eqqaasiin­narnatit, aamma pujortar­tartuusimagaluarlutit ungasin­ngitsukkut pujortar­tarunnaarsimaninnik eqqaasitsis­sutigissavat.

Piareersarit. Ulloq pujortar­tarunnaarfissat qanilliar­tortillugu oqummius­sinnaasannik eqqanaarsarit: Gulerodit amitsun­ngorlugit aggukkat, tyggegummit, qaqqortarissat assigisaallu. Pujortarun­naarniarlutit ulluliisimaninnik ikinngutitit ilaquttatillu eqqaasikkit qanorlu tapersersorsin­naaneraatit oqaluttuullugit. Pujortar­tarunnaar­nissannut ulloq ataaseq sioqqullugu arsakoorfiit, ikittaatit assigisaallu – soorlu sikaritsikut illuppit eqqaaniittut, biilinniittut, kaasarfin­niittut suliffin­niittul­luunniit eqqakkit. Qularnanngilaq amusartumit cigarettimik tigusinis­sarninngarnit ikinngutit sikaritsimik qinnuigis­sallugu imaluunniit piseqqus­sallugu sapernar­nerussasoq. Pisarnittut tapersersoq­qullutit Guuti qinnuigiuaruk, tamannalu pingaaruteqar­nerussaaq naggammit pujortar­nermiit. – Lukkarsi 11:13.

Inuppassuit kisissaan­ngitsut ikinngutigisimasaraluartik peqqusersooq ajortorsuarlu, sikaritsi, “attavigiun­naarsimavaat”. Aamma illit sapinngilat. Peqqinnerulissaatit kiffaan­ngissuseqarnerlu misigalugu.

[Uungalusaq]

Allattaaviit nassatariuaruk ullormullu arlaleriarlugu atuartarlugu