Akornutaasinnaasut piareersimaf­figikkit

“Nuunuutitaarput pillugu pujortarun­naarniarlunga aalajangerpunga. ‘Pujortarneq inerteq­qutaavoq’-mik angerlarsimaf­fitsinni allagar­taliivunga. Akunneq ataaseq qaangiutiinnartoq pujortagun­nersuup tassaarsuartut sakkortutigaluni tikippaanga, taava sikaritsimik ikitsivunga.” – Yoshimitsu, Japan.

PISIMASUP tamatuma ersersippaa pujortarun­naarniaraluarluni akornuteerarpassuit nalaanneqarsinnaasut. Misissuinerup ersersippaa pujortarun­naarusullutik nakkaan­narsimasut 90 procentiisa ileqqupalaaq tamanna qaangin­ngitsoortaraat. Qularnanngilaq illit pujortas­saarniarsariguit akornutaasinnaasut piareersimaf­figilluarukkit tamanna angusin­naanerussagit. Akornutaasinnaasut suut nalingin­naasuuppat?

Pujortagunneq: Sikaritsip kingulliup pujortar­neraniit ullut pingasut iluanni pujortagunneq sakkortunerpaaf­fimminiittarpoq, sapaatillu akunneri marluk ingerlanerini sakkukil­liartor­tarluni. Piffissami tamatumani “pujortagunneq nalliut­tarlunilu qaangiuttarpoq, ataannar­torsuuneq ajorpoq”, siornatigut pujortar­tarsimasoq taama oqaluttuarpoq. Allaat ukiut arlallit qaangiutereeraluartut pujortagunneq sakkortuumik takkuteriataarsinnaavoq. Taamaat­toqassagaluarpat pujortar­niapallaqinak. Minutsit tallimat qaangius­siikkit, taava qaangiutis­sajunnarsivoq.

Pujortagunnerup sunniutai allat: Aallaqqaammut ilai uernarsuataartarput allamul­luunniit saaqattaarlutik, aamma puallaq­qajaalersarput. Anniarsin­naapput, ungilatsitsillutik, kiammik anisillutik, quersorlutik utaqqisin­naajunnaar­nerullu kingunerisaanik isumalulerlutik, kamaqqajaalersarput immaqalu nikallorlutik. Pujortagunnerup kinguneri sapaatip akunnerisa sisamas­saaniit arfinilissaata tungaanut annikil­liartortarput.

Piffissami ilungersunartumi tamatumani iliuuserineqarsinnaasut:

● Sininnerusarneq.

● Imermik juicemil­luunniit imernerusarneq. Peqqinnartunik nerineq.

● Ilungersuuterujus­suanngik­kaluarlugu timersorneq.

● Ilummut silaannarmik najuussisarneq takorloorlugu puaat silaannarmik minguitsumik immertut.

Pujortagulersitsisinnaasut: Uani eqqarsaatigineqarput iliuuserineqartartut misigis­sutsillu. Immaqa kaffisoraangavit pujortar­tarputit. Taamaalior­tarsimaguit pujortarun­naarniar­tillutit kaffisor­niinnaqinak. Eqqissillutit kaffisorsin­naalernissannut piffissan­ngorumaarpoq.

Taamaattorli nikotini timinniik­kunnaaraluartoq qaratsannit katakkal­larnavianngilaq. Torben, siusinnerusukkut eqqaaneqartoq, nassuerpoq: “Pujortarun­naaramali ukiut 19-init qaangiutereeraluartut kaffisulaar­niartillunga pujortarusussuseq takkuteriataarsin­naasarpoq.” Eqqarsaatikkut pujortarusus­suseqarneq sungius­simasallu aalajangersimasut piffissap ingerlanerani qaangiutis­saqqaarput.

Imigassamut tunngatillugu allaaneruvoq. Pujortarun­naarniarninni imigassar­tunngil­luinnarnissat imerniar­tarfiil­luunniit ornittarun­naarnissaat pisariaqarsinnaavoq. Pujortarun­naarniartut imigassar­tortillutik nakkaan­nartartut amerlaqaat. Sooq taamaappa?

● Annikitsun­nguamil­luunniit imigassar­tornerup nikotinip sunniutai misigerusulersit­taramigit.

 ● Imigassar­talimmik katerisimaarnerit pujortarnermut attuumas­suteqak­kajuttarmata.

● Imigassar­tornerup naliliisin­naassuseq sunnertarpaa inuillu qanorluunniit iliorsin­naalersit­tarlugit. Biibilimi eqqoqqis­saartumik allassimavoq: ‘Viinni ajunngitsumik siunertaqarun­naarsitsisarpoq.’ – Hosea 4:11, New World Translation.

Ilagisar­takkatit: Pujortartartut imaluunniit pujortaq­qusisut pisariaqan­ngitsumik ilaginaveersaakkit. Aamma pujortar­tarunnaarusullutit ilungersorninnik tapersersuin­ngitsut quiassuaasul­luunniit akornan­neeqinak.

Misigis­sutsitit: Misissuineq naapertorlugu pujortar­taqqilersut pingajorar­tingajaat pujortar­taqqilin­ngitsiar­nerminni stresserlutil­luunniit kamassaqarsimapput. Pujortaguum­mersitsisumik nalaataqaruit allamut saasapallagit – imermik imerit, tyggegum­mitorit pisuttuarlutil­luunniit. Isumalluar­nartunik eqqarsaateqarit, immaqa Guutimut qinunikkut saaffigin­nillutit Biibilimiluunniit kapitalit marlulluunniit atuarlugit. – Tussiaat 19:14.

Utoqqatsis­sutissarsioqinak

● Ataasiaan­narlunga millussiin­nassaanga.

Piviusoq: Ataasiaan­narluni millussineq, nikotinip akuisa 50 procentii akunnerni pingasuni, qaratsanni suunniuteqar­titsisin­naapput.

● Pujortaraangama stresserpal­laarunnaartarama

Piviusoq: Misissuinerup ersersippaa nikotinip hormonit stressernermik pilersitsisartut amerlinerulersittarai. Stresserpal­laarunnaarsimagaanni pujortagut­tarnerup sunniutaasa annikil­lisimanerannut ersiutaasinnaavoq.

● Ukiorpassuit pujortar­tareernikuugama taamaatis­sinnaajun­naareerpunga.

Piviusoq: Iluatsis­sinnaan­ngitsutut eqqarsarneq piumassuseerutsitsisarpoq. Biibilimi ima allassimavoq: “Ullormi annikil­liorfiusumi sapiissuseerukkuit taava nukitit annikil­lissapput.” (Ussatit 24:10) Tunniutiin­nariaan­naasutut isiginnit­taaseqar­naveersaarit. Kinaluunniit pujortar­tarunnaarusulluni kissaateqartoq najoqqutas­sianillu atorluarsin­naasunik allaaserisami matumani eqqaaneqartunik maleruaajumasoq iluatsitsil­luarsinnaavoq.

● Pujortaguttarneq sakkortoqaaq.

Piviusoq: Ilumoorpoq pujortagunneq sakkortusinnaasoq, sapaatilli akunnialunngui qaangiuppata sakkukil­lissaaq. Taamaattumik tamanna eqqumaf­figisassaavoq! Pujortarun­naarninniit qaammatit ukiulluunniit arlallit qaangiutereersut pujortaguum­meraluaruit immaqa minutsialuinnarni misigissavat – sikaritsimik ikitsin­ngikkuit.

● Tarnikkut napparsimavunga.

Piviusoq: Tarnikkut nappaammut nakorsar­tikkuit, assersuutigalugu isumatsaq­qarujus­suarnermut skizofreniimul­luunniit, taava nakorsannut pujortarun­naarniarninni ikioqqugit. Tapersersorusungaas­savaatit, immaqalu qanoq ingerlaninnik aammalu pujortarun­naarniarninni nakorsaatitit qanoq sunniuteqarnersut malinnaaf­figeqqis­saarlugit.

● Pujortarun­naarniarninni nakkaannaruma atorsin­naanngitsutut imminut isigilissaanga.

Piviusoq: Sikaritsi ataaseq pujortarlugu “nakkaannaruit” – soorlu pujortarun­naarniartut amerlasuut taamaattartut – ikiortariaarun­navianngilatit. Misileeqqigit. Nakkartoorneq qaqeqqis­sinnaajun­naarnermik isumaqanngilaq, aatsaalli qaqeqqik­kumanngikkuit. Naggataatigut iluatsissaaq!

Romualdo, ukiuni 26-ni putartar­tuusimasoq ukiulli 30-t matuma siornatigut taamaatis­simasoq ima allappoq: “Naggataatigut qassinik nakkarsimanerlunga kiisa kisissaarpakka. Tamatigut ajorsuataar­tarpunga; iluatsis­sinnaan­ngitsutut misigivunga. Jehovamulli attaveqarlualer­niarlunga aalajangerama qasseeriarlungalu qinunikkut ikioqqullunga saaffigisar­neratigut aatsaat iluatsippara.”

Pujortar­tartuusimasutut nuannaaleq­qinnissannut iluaqutigisin­naasatit, sammeriikkatta saniatigut, siunnersuutit atoriaannaasut allaaserisap matuma naggataani sammissavagut.

[Uungalusaq/assiliartaq]

TOQUSSUTAASARTUT

Tupa assigiin­ngitsuliarineqarluni atorneqartarpoq. Nunat ilaanni tupa allaat peqqinnar­tuerniarfinni tuniniar­neqartarpoq. Nunarsuaq tamakkerlugu peqqinnissamik suliniaqatigiiffik naapertorlugu taakku tamarmik toqussutaasin­naapput. Tupap piliaanik toqussutaasin­naasunik assigiin­ngitsunik nappaateqaler­toqartarpoq, soorlu kræftimik aamma uummatip taqaatigut nappaateqalernermik. Naartusup pujortar­tarnermigut qitornani innarlersinnaavaa. Tupaliat sorliit atorneqar­nerpaajusarpat?

Biiderit: Assammik imusat mikisunnguit Asiami pujortar­neqarnerusarput. Biiderit sikaritsinit nalingin­naasunit usserummik, nikotinimik kuliltemillu aniatsitsinerusarput.

Sikaat: Sikaat tupap avalequtaanik imaluunniit pappiaqqamik sanaamik sukangasuumik imuneqartarput. Sikaami tupa, sikaritsip tupartaanut seernar­nerusunut naleqqiullugu nikotinitaa millukkuminar­nerusarpoq ikumanngik­kaluaraangal­luunniit.

Kretekit (nellikecigarettit): Taakkua 60 procentii tupamik, 40 procentiilu nellikenik akoqarput. Sikaritsinit nalingin­naasunit usserummik, nikotinimik kuliltemillu aniatitsinerusarput.

Pujortaammik pujortarneq: Sikaritsinut taarsiullugu pujortaatitor­taraanni ulorianaatai annikin­nerunngillat, taakkumi marluullutik kræfteqalernermut allanillu nappaateqalernermut pissutaasin­naapput.

Tupa pujoqan­ngitsoq: Tassaasin­naapput tupa tamuasariaq, sunoorsi tupalu tipigissunik akuugaq (gutkha) Asiap kujataani tamuaneqartartoq. Nikotini qanikkut taqqanut ingerlasarpoq. Tupa pujoqan­ngitsoq ulorianar­nermigut tupat allat assigai.

Pujortaat imertalik: Atortoris­saarummi tamatumani tupap pujua najuutin­nginnerani imeq aqqusaaq­qaartarpaa. Taamaatut pujortarnerup toqunartut annikin­nerulersit­tanngilai, akuisa ilagaat puannut kræfteqalis­sutaasartoq.

 [Uungalusaq/assiliartaq]

ALLAT PUJORTARUN­NAARNIS­SAANNIK QANOQ IKIORSIN­NAAGITIT

● Isumalluarit. Nersualaarinninneq akissarsisitsilaar­nerluunniit ajunngin­nerusarpoq uparuaanermit naqqiinermiillu. Ima oqarneq “misileeq­qikkuit iluatsis­sajunnarsivat” sunniuteqar­nerussaaq ima oqarnermiit “aasinaasiit nakkaqqipputit!”

● Isumakkeerfigin­neriaannaagit. Pujortarun­naarniartup kamalluni pakatsillunilu ilinnut tutsitsinera sapinngisannik isinngitsuusaakkit. Inussiar­nersumik oqaaseqarit soorlu imaattumik: “Nalunngilara sapernartuusoq, misiliinerilli tulluus­simaarutigaara.” Ima oqanngisaannarit: “Pujortar­tarallaravit nuannarinerugaluarpakkit!”

● Ikinngutaalluarit. Biibilimi allassimavoq: “Ikinngutaasup asannissutsi tamatigut takutittarpaa, qatanngutaasorlu erniusimavoq annikil­liornermi ikiortis­saalluni.” (Ussatit 17:17) Aap, pujortarun­naarniartoq tamatigut naammagit­tarfigalugulu inussiar­nisaarfigisaruk – piffissani qanoq ilisukkul­luunniit aamma isumaa qanoq ikkaluarpat.