Kajumis­suseqar­neruler­niarsarigit

“Pujortar­tarnikut iluatsittumik pujortar­tarunnaarsimasut ilisarnaatigik­kajuttarpaat aalajangersimal­luinnarnertik.” – Atuagaq “Stop Smoking Now!”

NAATSUMIK oqaatigalugu pujortar­tarunnaarusukkuit kajumis­suseqar­neruler­tariaqarputit. Qanoq piumassuseqar­nerulersinnaavit? Assersuutigalugu pujortar­tarunnaarnerup iluaqutis­sarpassui eqqarsaatigisin­naavatit.

Aningaasanik sipaarsin­naavutit. Ullormut poortat pujortar­tarukkit ukiumut koruunit 1000-ilikkaat sipaarsin­naavatit. “Eqqarsaatiginikuun­ngilaraluunniit aningaasat qanoq amerlatigisut tupamut atorsimanerlugit.” – Gyanu, Nepali.

Inuunerni nuannaar­nerulissaatit. “Pujortar­tarunnaarama soorlu inuunera aatsaat aallartittoq.” (Regina, Sydafrika) Inuit pujortar­tarunnaaraangamik naamasaataat mamassutsinullu malussarissusaat pitsaanerulertarput, aamma nukissaqar­nerulerlutillu isikkoris­sisarput.

Peqqinnerulersin­naavutit. “Pujortar­tarunnaarnerup sunniutai angutit arnallu qassinil­luunniit ukioqaraluarunik peqqissutsimikkut ingerlaannaq malugisin­naavaat.” – USA-mi peqqissutsimut suliniaqatigiiffik.

Imminut tatiginerulissaatit. “Uanga timiga nammineq naalagaaf­figerusukkakku pujortar­tarunnaarpunga. Timiga tupap naalagarsior­tissappagu akuerisin­naanngilara. – Henning, Danmarki.

Ilaquttannut ikinngutinnullu iluaqutaassaaq. “Pujortartarneq … eqqanniittut peqqissusaannut ajoqutaavoq. … Misissuinerup ersersippaa putsumik najuussisarneq pissutaalluni ukiut tamaasa inuit tuusintillit puakkut kræfteqalerlutik uummatik­kulluunniit nappaateqarlerlutik toqusartut.” – USA-mi kræfti pillugu suliniaqatigiiffik.

Pinngor­titsisit nuannaar­tissavat. “Timitsinnik isumatsinnillu mingutsitsisartut suulluunniit piiarlugit minguiarniarta.” (Korintimiunut 2. 7:1) ‘Kimigiiserfigaassi timisi illernartutut Guutimillu akuerisaasutut sassaateq­qullugit.’ – Romamiut 12:1.

“Paasigakku Guutip timitsinnut mingutsitsisut suulluunniit ajorigai pujortar­tarunnaarpunga.” – Sylvia, Spania.

Kajumis­suseqar­neruliinnarneq tamatigut naammanneq ajorpoq. Allanit ikiorneqar­tariaqarpugut, ilaatigut ilaquttanit ikinngutinillu. Qanoq iliorsin­naappat?