1. Biibilimi siulittuutinik misissueq­qissaarneq qanoq nuannarilersin­naavarput?

 “BIIBILIMI siulittuutit misissor­nissaat nuannaraakka.” Qatanngut angut inuusuttoq Benimik atilik taama oqarpoq. Isumaqatigaajuk? Imaluunniit Biibilimi siulittuutit paasiuminaatsit­tarpigit? Immaqaluunniit siulittuutit misissor­nissaat pikkunaagaat. Paasigukkuli sooq Jehovap siulittuutit oqaatsiminut ilanngus­simanerai isummat allanngor­tissagunarpat.

2. Allaaserisami matumani suut sammissavagut?

² Allaaserisami matumani eqqartus­savarput sooq Biibilimi siulittuutit misissus­sagigut qanorlu taamaaliorsin­naanersugut. Aamma Danielimik allakkani siulittuutit marluk misissus­savagut paasiniarlugulu qanoq taakku iluaqutigisin­naanerlugit.

3. Biibilimi siulittuutit paasissagutsigit qanoq iliortariaqarpugut?

³ Biibilimi siulittuutit paasissagutsigit ikiorneqar­tariaqarpugut. Assersuuteqariarta. Takorlooruk sumiiffimmut nalusannut tikeraartutit, ikinngutilli angalaqatigisat sumiiffimmik ilisiman­nilluarpoq. Sumiinnerlusi aamma sumunnas­sanerlusi nalunngil­luarpaa. Ikinngutivit ilagiumammatit nuannaarutigigunarpat. Taamatuttaaq Jehovap siunissarput nalunngil­luarpaa. Taamaattumik Biibilimi siulittuutinik paasinnik­kumalluta maniguulluta Jehovamut ikioqqusariaqarpugut. – Dan 2:28; Pet 2. 1:19, 20.

4. Sooq Jehovap siulittuutit Biibilimut allatsis­simavai? (Jeremia 29:11) (Aamma asseq takuuk).

⁴ Angajoq­qaajulluartut assigalugit Jehovap qitornani nuannersumik siunissaqar­tikkusuppai. (Jeremia 29:11 atuaruk).  Angajoqqaalli iliuuserisin­naanngisaannik Jehova eqqoqqis­saartumik siulittuisinnaavoq. Siulittuutit Biibilimut allatsis­simavai siunissami pisussat pingaarutillit ilisimanias­sagatsigit. (Es 46:10) Tassa Biibilimi siulittuutit Ataatatsinnit qilammiusumit tunissutaapput erlinnartut. Qanoq qularnak upperisin­naaviuk Biibilimi siulittuutigineqartut piviusun­ngorumaartut?

5. Inuusuttut Maxip misigisaa qanoq ilinniarfigisin­naavaat?

⁵ Inuusut­tortagut Biibilimik ataqqin­ninngitsunik atuaqateqarput. Atuaqataasa oqaasii iliuusiilu inuusuttut Nalunaajaasut upperisaannik qulalersitsisin­naapput. Qatanngut angut Maximik atilik ima oqarpoq: “Inuusut­tuaraallunga angajoqqaama upperisap eqqortuuneranik Biibilillu Guutimit isumassarsiarititaaneranik ilinniar­titsissutaat qularileraluarpara.” Angajoqqaavi qanoq qisuariarpat? Ima oqarpoq: “Eqqissisimaniarsaripput, nalunngilarali ernumasut.” Maxip apeqqutai angajoq­qaavisa Biibili atorlugu akivaat. Maxili aamma nammineq iliuuseqarpoq. “Biibilimi siulittuutit nammineq misissorpakka”, oqarpoq, “inuusut­toqatikkalu ilikkakkannik oqaloqatiginiar­tarlugit.” Qanoq kinguneqarpa? Max nangippoq: “Taamaaliorama qularutigiun­naarpara Biibili Guutip oqaaserigaa.”

6. Qularuteqaruit susariaqarpit, aamma sooq?

⁶ Maxitulli Biibilimi allassimasut ilumoor­tuunerat qularileraluarukku ajuusaarutigis­sanngilat, iliuuseqar­tariaqarputilli. Qularneq mannger­tornertut ippoq. Iliuuseqapal­lanngikkuit nalilinnik aseruiar­tuaarsinnaavoq. Uppernikkut qularuteqarun­naassaguit apeqqut una eqqarsaatigisariaqarpat: ‘Biibilimi siunissaq pillugu allassimasut upperaakka?’ Qularuit Biibilimi siulittuutit maanna eqquutereersut misissor­tariaqarpatit. Qanoq taamaaliorsinnaavit?

7. Siulittuutinik misissueq­qissaarnermi Daaniali qanoq maligas­saalluarpa? (Danieli 12:10) (Aamma asseq takuuk).

⁷ Siulittuutinik misissueq­qissaarnermi Daaniali maligas­saalluarpoq. Ilumoortoq paaserusukkamiuk eqqortumik pissutiginiagaqarluni siulittuutit misissorpai. Maniguut­tuugami nalunngilaa Jehova qanittuaruniuk naalakkuniullu siulittuutinik paasinnin­nissaminut ikiorneqas­salluni. (Dan 2:27, 28; Danieli 12:10 atuaruk). Maniguut­tuunini ersersippaa Jehovamit ikiorneqarumaar­nerminik tatigin­ninnikkut. (Dan 2:18) Aamma peqqissaartumik misissueq­qissaarpoq. Allakkat Illernartut taamani piusut misissoq­qissaartarpai. (Jer 25:11, 12; Dan 9:2) Daaniali qanoq ilaarsin­naaviuk?

8. Sooq ilaasa Biibilimi siulittuutit misissor­niartarpaat, uagulli susariaqarpugut?

⁸ Pissutiginiakkat eqqarsaatigiuk. Ilumoortoq paaserusungaarlugu Biibilimi siulittuutit misissor­niarpigit? Taamaappat Jehovap ikiussavaatit. (Joh 4:23, 24; 14:16, 17) Inuilli ilaasa allanik pissutiginiagaqarlutik siulittuutit misissor­niartarpaat. Suup eqqortuunera suullu eqqunngitsuunera namminneq aalajangersin­naanias­sagamikku inooriaasertillu illersorsin­naanias­sagamikku uppernarsar­niartarpaat Biibili  Guutip oqaaserin­ngikkaa. Uagulli eqqortumik pissutiginiagaqar­tariaqarpugut. Biibilimi siulittuutit paasisin­naajumallugit pissuserisassaq pingaarutilik pisariaqarpoq.

9. Biibilimi siulittuutit paasissagutsigit qanoq pissuseqar­tariaqarpugut? Nassuiaagit.

⁹ Maniguuttuugit. Maniguuttut ikiorniarlugit Jehova neriorsuivoq. (Jaak 4:6) Taamaattumik Biibilimi siulittuutit paasiumallugit ikioqqulluta qinusariaqarpugut. Aamma maniguukkutta inussiamit aalajaatsumit, piffissaq eqqorlugu anersaakkut inuussutissanik tunnius­sisartumit, ikiorneqar­tarnerput akueris­savarput. (Luk 12:42) Guuti Jehova aaqqissuus­sisuugami pissusis­samisoorpoq ataasiinnaq aqqutigalugu ilumoortut Biibilimeersut paasinis­saannut ikiussagaatigut. – Kor 1. 14:33; Ef 4:4-6.

10. Estherip misigisaanit suna ilikkarpiuk?

¹⁰ Peqqissaartumik misissuigit. Siulittuut soqutiginartitat aallarniutigalugu misissoruk. Qatanngut arnaq Estherimik atilik taama iliorsimavoq. Missiarsip tikiunnissaanik siulittuutit soqutigisarivai. Ima oqarpoq: “15-inik ukioqarlunga siulittuutit, Jiisusi suli nunarsualian­ngitsoq allanneqarsimasut, uppernarsiumallugit misissor­talerpakka.” Allakkat imusat Immap Uumaatsup eqqaani nassaat pillugit atuarnermini qularun­naarsin­neqarpoq. Ima nangippoq: “Taakkua ilaat Kristusi sioqqullugu allanneqarsimapput, taamaattumik siulittuutit imarisai Guutimeersuusimassapput.” Esther nassuerpoq: “Atuakkakka paasiumallugit arlaleriarlunga uteqqit­tariaqar­tarpakka.” Nuannaarutigaali misissuinermini ilungersorsimagami. Peqqissaarluni Biibilimi siulittuutinik arlalinnik misissuereernermi kingorna oqarpoq: “Nammineq uppernarsivara Biibili ilumut ilumoortuusoq!”

11. Biibilip ilumoor­tuuneranik paasinninnerput qanoq iluaqutigis­savarput?

¹¹ Biibilimi siulittuutit ilaat eqquutereersimasut takusin­naagutsigit Jehova taassumalu siulersuinera tatigiuas­savagut. Taava qanorluunniit misilin­neqaraluarutta siunissaq pillugu isumalluartumik isiginnit­taaseqar­nissatsinnut Biibilimi siulittuutit iluaqutigiuarsin­naavagut. Danielimik allakkani siulittuutit marluk eqquutereersimasut maanna misissoriartigit. Taakkuninnga paasinninnerput silatuumik aalajangiinis­satsinnut iluaqutigisin­naavarput.

12. Isikkat ‘saviminermik marrarmillu akusaasut’ qanoq isumaqarpa? (Danieli 2:41-43)

¹² Danieli 2:41-43 atuakkit. Inuusaliarujussuup isigai ‘saviminermik marrarmillu akusaasut’ kunngip Nebukadnesarip sinnattumini takusai Daanialip nassuiarpai. Danielimik allakkat Saqqummersitallu naleqqiun­nerisigut isummersin­naavugut isikkat USA aamma Tuluit Nunaat iligiillutik ullumikkut nunarsuarmi pissaaneqar­nerpaanut assersuutaasut. Pissaanilis­suarmut tassunga atatillugu Daaniali oqarpoq “ilaatigut qajannaatsuussasoq ilaatigullu qajannar­tuussalluni”. Sooq ilaatigut qajannar­tuussava? Inuinnaat marrarmut assersuutaasut  naalagaaffiup saviminertut mannger­tigisutut iliuuseqar­nissaralua unitsit­tarmassuk. b

13. Siulittuummi tassani ilumoortut pingaarutillit suut paasivagut?

¹³ Daanialip inuusaliarujus­suarmik, pingaartumik isigaanik, nassuiaanera ilumoortunik pingaarutilinnik ilinniarfigaarput. Siullertut, USA aamma Tuluit Nunaat pissaanertik assigiin­ngitsutigut ersersit­tarsimavaat. Assersuutigalugu sorsunnersuarmi siullermi aappaanilu nunanut assigiin­ngitsunut ajugaasuupput. Taamaattorli pissaanerat qajannarsivoq sulilu qajannar­nerulerumaarluni inuiaqatigiit akunnerminni akerleriis­suteqar­tarmata. Aappaattut, Guutip kunngeqarfiata inuit oqartus­saaneranik suujunnaarsitsin­ngitsiarnerani USA Tuluillu Nunaat nunarsuarmi pissaanillit kingullersarissavaat. Nunat allat USA Tuluillu Nunaat pissaanerannut akerliugaluarpataluunniit kialluunniit taarser­navianngilaat. Tamanna nalunngilarput inuusaliap isigai, USA-mut Tuluillu Nunaannut assersuutaasut, ‘ujaqqamit’ Guutip kunngeqarfianut assersuutaasumit aserorneqar­tussaammata. – Dan 2:34, 35, 44, 45.

14. Isikkat saviminermik marrarmillu akusaasut pillugit siulittuutinik paasinninnerput silatusaartumik aalajangiinis­satsinnut qanoq iluaqutigis­savarput?

¹⁴ Isikkat saviminermik marrarmillu akusaasut Danielimik allakkani siulittuutit ilumoornerat upperaajuk? Tamanna upperigukku inuuninni sunniuteqar­tissavat. Taamaattumik inuuninnik isumannaariniarlutit aningaasat pigisal­luunniit piujunnaartussat ujartor­navianngilatit. (Luk 12:16-21; Joh 1. 2:15-17) Siulittuutinik taakkuninnga paasinninneq oqaluus­sinissap Biibilimillu ilinniar­titsinissap pingaaruteqassusiat paasissavat. (Mat 6:33; 28:18-20) Siulittuutit taakku misissoq­qissaareerlugit apeqqut una eqqarsaatigisinnaavat: ‘Aalajangiininnit erserpa inuiaat naalakkersuinerat ungasin­ngitsukkut Guutip suujunnaarsik­kumaarai qularutigin­ngikkiga?’

15. ‘Avannarliup kunngia kujalliullu kunngia’ ullumikkut kikkuuppat? (Danieli 11:40)

¹⁵ Danieli 11:40 atuaruk. Kunngit imaluunniit politikkikkut pissaanillit marluk pissaaneqar­niullutik imminnut akiuuttut Danieli kapitali 11-mi eqqartor­neqarput. Taakku Biibilimi siulittuutinut allanut naleqqiuk­kutsigit paasisin­naavarput “avannarliup kunngia” tassaasoq Ruslandi taassumalu ilii aamma “kujalliup kunngia” tassaasoq nunarsuarmi pissaanilissuaq USA Tuluillu Nunaat. c

16. Guutip innuttai ‘avannarliup kunngiata’ naalakkersuinerani inuusut qanoq atugaqarpat?

¹⁶ Guutip innuttai “avannarliup kunngiata” naalakkersuinerani inuusut kunngimit malersor­neqarput. Nalunaajaasut ilaat upperisartik pissutigalugu persuttagaal­lutillu parnaarun­neqartarput. Taamaak­kaluartoq qatanngutigut ‘avannarliup kunngianit’ saassun­neqarnermit qunulersin­neqaratik uppernertik nakussatsis­simavaat. Sooq? Qatanngutitta nalunngin­namikku Guutip innuttaanik malersuinerup Danielimik allakkani siulittuut eqquunnerigaa. d (Dan 11:41) Tamanna ilisimagatsigu neriuuterput nakussatsillugulu Jehovamut aalajaat­tuarsin­naavugut.

17. Kujalliup kunngia naalakkersuitillugu Guutip innuttai qanoq unamminiagaqarsin­naappat?

 ¹⁷ Itsaq aamma ‘kujalliup kunngiata’ Jehovap innuttai saassutarisimavai. Assersuutigalugu sorsunnersuup siulliup kingulliullu nalaanni qatannguterpassuit politikkimut akuliuk­kusunnginnertik pissutigalugu parnaarus­saasarput, taamatuttaaq Nalunaajaasut meeraat atuarfim­minngaanniit anisitaasimapput. Ukiuni makkunani ‘kujalliup kunngiata’ naalakkersuinerani Jehovap kiffaasa Guutip kunngeqarfianik ilumoorfigin­ninnerat assigiin­ngitsutigut misilin­neqarpoq. Soorlu qinersisoqar­tillugu kristumiu politik­kerinut imaluunniit qinigas­sanngor­tittunut tapersersuiniarluni ussernar­torsiorsinnaavoq. Qinersinissaa ilimanan­ngikkaluartoq neriussinnaavoq qinigas­sanngortittoq aalajangersimasoq ajugaassasoq. Iliuutsikkut eqqarsaatikkullu politikkikkut akuliun­naveersaar­nissarput pingaaruteqangaarami! – Joh 15:18, 19; 18:36.

18. ‘Avannarliup kunngiata kujalliullu kunngiata’ akersuun­nerannut qanoq qisuariassaagut? (Aamma assiliaq takuuk).

 ¹⁸ “Kujalliup kunngia” aamma “avannarliup kunngia” aporaatilerpata Biibilimi siulittuutinik upperin­ninngitsut ernumangaalissapput. (Dan 11:40) Nunarsuup inui tamakkerlugit nungutis­sinnaasaannit kunngit taakku sakkortuunik sakkussiaateqarput. Uagulli nalunngilarput Jehovap taamatut pisoqar­tinnavian­ngikkaa. (Es 45:18) Siunissaq pillugu isumakuluutigilernagu ‘avannarliup kunngiata kujalliullu kunngiata’ akerariinnerisa uppernerput nakussatsippaat. Tamatuma uppernarsarpaa naggatissaq qallisoq.

19. Biibilimi siulittuutit pillugit suna nalunngilarput?

¹⁹ Biibilimi siulittuutit ilaat qanorpiaq eqquutis­sanersut naluarput. Allaat Daanialip siulittuutit allatami isumaat tamakkerlugit paasinngilai. (Dan 12:8, 9) Siulittuutit qanoq eqquuteq­qissaas­sanersut paasinngik­kaluarlutigu imaanngilaq eqquutis­sanngitsut. Qularutis­saanngilaq Jehova tatigigutsigu ilisimasariaqakkagut piffissaq eqqorlugu oqaatigiumaarai, soorlu itsaq taamaat­tarsimasoq. – Am 3:7.

20. Biibilimi siulittuutit pissanganartut suut eqquunnerat qanittukkut pissava, uagullu qanoq iliortuar­tariaqarpugut?

²⁰ ‘Eqqissinermik isumannaas­susermillu’ nalunaar­toqarumaarpoq. (Tes 1. 5:3) Ungasin­ngitsukkut nunarsuarmi naalakkersuisut upperisarsioqatigiit eqqunngitsut saassutissavaat suujunnaarsil­lugillu. (Saqq 17:16, 17) Kinguninngua Guutip innuttai saassun­neqassapput. (Ez 38:18, 19) Taavalu sorsunneq Harmagedonni aallartissaaq. (Saqq 16:14, 16) Ilimagisin­naavarput tamakku ungasin­ngitsumi piumaartut. Tamanna qanilliar­tortillugu Biibilimi siulittuutit eqqumaf­figinerisigut allallu taamaalior­nissaannik ikiortar­nerisigut Ataatatsinnut qilammiusumut asannittumut qujamasunnerput ersersit­tuartigu.