ATUAQQISSAAGASSAQ 31
‘Aalajaalluinnaritsi’
‘Qatanngutikka asasakka, aalajaalluinnaritsi.’ – KOR 1. 15:58.
ERINARSUUT 126 Eqqumasa
QILANAARTUUT a
1-2. Kristumiu qanoq illorsuarmut assersuunneqarsinnaava? (Korintimiunut 1. 15:58)
1978-IMI Tokyomi Japanimiittumi illorsuaq 60-inik quleriilik sananeqarpoq. Inuit isumaliutigaat tassani nuna akulikitsumik sajuttarmat illorsuaq taanna qanoq ililluni napaannarsinnaanersoq. Ingeniørit illorsuaq qajannaallisarlugu nunallu sajunnerani orraalaarsinnaanngorlugu ilusilersorsimavaat. Kristumiut illorsuartut taassumatut ipput. Tassa qanoq?
2 Kristumiu ilaatigut aalajaalluinnartariaqarpoq allatigulli naleqqussarsinnaasariaqarluni. Jehovap inatsisaasa najoqqutassiaasalu maleruarnissaannut aalajaattuartariaqarpoq. (Korintimiunut 1. 15:58 atuaruk). Pinaasernani ‘naalakkumasarpoq’. Pisariaqaraangalli uteriitsuunani naleqqusarsinnaasariaqarpoq. (Jaak 3:17) Kristumiu taamatut nalimmassartartoq sukannerpallaanngilaq, aammali akuersaaginnartuunani. Qanoq aalajaalluinnarsinnaasugut allaaserisami matumani sammissavarput. Aamma Saatanip aalajaakkunnaarsinniarluta atortagai tallimat eqqartussavagut taakkulu qanoq akiorsinnaanerigut paasiniarlugu.
QANOQ AALAJAALLUINNARSINNAAVUGUT?
3. Inatsisiliortup qutsinnerpaap inatsisai suut Apustilit Suliaat 15:28, 29-milu atuarsinnaavagut?
3 Jehova inatsisiliortuuvoq qutsinnerpaaq innuttaminullu paasiuminartunik inatsisiliortarluni. (Es 33:22) Assersuutigalugu kristumiut siulliit nalaanni siulersuisoqatigiit eqqaavaat kristumiut aalajangiusimasariaqagaat uku pingasut: (1) Kristumiut guutipilussiorneq itigartillugu Jehova kisiat guutisiorfigissagaat, (2) aap illernartuunera ataqqissagaat, aamma (3) atoqatigiinnikkut eqqunngitsuliorneq ingalassimassagaat. (Apustilit Suliaat 15:28, 29 atuakkit). Taakku pingasut kristumiut nalitsinni qanoq aalajangiusimasinnaavaat?
4. Jehova kisiat guutisiorfigalugu qanoq ersersittarparput? (Saqqummersitat 4:11)
4 Guutipilussiorneq itigartillugu Jehova kisiat guutisiorfigaarput. Jehovap Israalikkut peqquai tunniulluinnarsimallutik guutsiorfigissagaanni. (Mos 5. 5:6-10) Saatanillu usserniarmani Jiisusi ersarissumik oqarpoq Jehova kisiat guutisiorfigissagipput. (Mat 4:8-10) Taamaattumik guutiliat guutisiorfigineq ajorpagut. Aamma inuinnaat – assersuutigalugu upperisarsiornermi siuttut, politikerit, timersortartut, isiginnaartitsisartut nipilersortartullu tusaamasat – guutisiorfigineq ajorpagut. Jehova ‘sunik tamanik pinngortitsisoq’ kiserluinnaat guutisiorfigaarput. – Saqqummersitat 4:11 atuaruk.
5. Sooq inuunerup aallu illernartuunerat pillugu Jehovap inatsisaa maleruartarparput?
5 Inuunerup aallu illernartuunerat pillugu Jehovap inatsisaa maleruarparput. Sooq? Jehova oqarmat aak inuunertulli naleqartigisoq, inuunerlu Jehovamit tunissutaavoq erlinnartoq. (Mos 3. 17:14) Jehovap inuit neqitorsinnaaleqqugamigit piumaffigai aak nerissanngikkaat. (Mos 1. 9:4) Moorsisip inatsisai Israalikkunnut tunniukkamigit inatsit taanna uteqqippaa. (Mos 3. 17:10) Kristumiut siulliit nalaanni siulersuisoqatigiit anersaap illernartup sunniineratigut peqqusipput kristumiut tamarmik ‘aak itigartissagaat’. (ApS 15:28, 29) Nakorsartinnermut tunngatillugu peqqussut tamanna naalalluinnartarparput. b
6. Jehovap najoqqutassiai qutsissut maleruarumallugit qanoq iliortarpugut?
6 Atoqatigiinnikkut eqqunngitsuliorneq itigartilluinnarparput. (Hebr 13:4) Apustili Paulusi oqarpoq ‘avatitta iliuusereqqajaasartagaat toqutissagigut’, tassa pilerissusipiluit akiorniassagigut. Atoqatigiinnikkut eqqunngitsuliornermut pilerissuseqalersitsisinnaasut suulluunniit isiginnaarnagillu iliuuserinaveersaartarpagut. (Kol 3:5; Job 31:1) Ussernartorsiuleraangatta eqqarsaatit iliuutsillu Guutimut ikinngutaanitsinnik aseruutaasinnaasut ingerlaannaq nangartartarpagut.
7. Suna aalajangiusimassavarput, aamma sooq?
7 Jehovap piumasaraa qamannga pisumik naalalluinnartuussasugut. (Rom 6:17) Jehovap peqqussutai uagutsinnut iluaqutaajuaannarput, inatsisaalu allanngortinneqarsinnaanngillat. (Es 48:17, 18; Kor 1. 6:9, 10) Sapinngisatsinnik Jehova nuannaartinniartarparput tussiaasiortutullu ima oqartutut isiginnittaaseqarniarluta: “Uummatiga saatsippara inatsisinnut, taakku maleruarluinnarumallugit naassaanngitsumik.” (Tuss 119:112) Saatanilli aalajaakkunnaarsinniartarpaatigut. Qanoq iliorluni?
SAATANIP QANOQ AALAJAAKKUNNAARSINNIARTARAATIGUT
8. Saatanip ilaatigut qanoq aalajaakkunnaarsinniartarpaatigut?
8 Malersuineq. Diaavulup aalajaakkunnaarsinniartarpaatigut timikkut misigissutsikkullu saassuttarluta. ‘Iiniarsaraluta’ Jehovamut ikinngutaanerput aserorniarsarisarpaa. (Pet 1. 5:8) Kristumiut siulliit aalajaanniarlutik aalajangiusimagamikku sioorasaarneqartarput, unatarneqartarput toqutaasarlutillu. (ApS 5:27, 28, 40; 7:54-60) Nalitsinni Saatanip malersuineq suli sakkugisarpaa. Qatanngutitta Ruslandimiittut nunanilu allaniittut peqqarniitsumik pineqartarnerisigut aamma inuttut ataasiakkaatut assigiinngitsutigut akerlilersuisunit saassuneqartarnitsigut tamanna erserpoq.
9. Peqqusersusaartumik tatisinerup eqqumaffiginissaanik assersuuteqarit.
9 Peqqusersusaartumik tatisineq. Malersuinerup saniatigut Saatani ‘peqqusersusaarluni nakkartitsiniaasarpoq’. (Ef 6:11) Qatanngummut Bobimut pilatsingaatsiartussamut qanoq pisoqartoq eqqarsaatigiuk. Nakorsat ilisimatippai aalersortinngilluinnassalluni. Pilattaasartoq aalajangiussaa ataqqillugu akuersivoq. Pilatsinnissaa ullormik ataatsimik sioqqullugu unnukkut ilaqutai pulaareerlutik animmata nakorsap allap iserfigaa. Bobimut oqarpoq aalersortinnissaa pisariaqassagunanngitsoq, nalunartulli pillugit piareersimatitaqassasut. Nakorsaq eqqarsarunarpoq Bobip ilaqutai najuutinngimmata isummani allanngortissagaa. Bobilli nakorsaq erseqqissaavigaa aalersortinngilluinnassalluni.
10. Sooq inuit eqqarsartaasiat navianartuua? (Korintimiunut 1. 3:19, 20)
10 Inuit eqqarsartaasiat. Inuit Jehovap inatsisaanik pingaartitsinngitsut eqqarsartaasiattut eqqarsartalerutta Jehovamit taassumalu inatsisaanit qimagukkiartulersinnaavugut. (Korintimiunut 1. 3:19, 20 atuakkit). “Inuit ilisimassusiat” Guutimut naalakkumajunnaarsitsisarpoq. Pergamonnimi Tyatiiramilu kristumiut ilaat inunnit inuunerluttunit guutipilussiortunillu sunnerneqarsimapput. Jiisusip ilagiit tassaniittut atoqatigiinnikkut eqqunngitsuliornermik akuersaartut oqaaqqissaarpai. (Saqq 2:14, 20) Taamatuttaaq ullumikkut inuit avatangiisitsinniittut eqqunngitsunik isumaqalersinniarluta tatisarpaatigut. Imaassinnaavoq ilaquttat ilisarisimasallu isumaqalersinniarsarigaatigut Jehovap inatsisai ingasappallaartut unioqqutissagigullu. Assersuutigalugu oqarsinnaapput ileqqussatigut minguitsuuneq pingaaruteqanngitsuusoq atoqatigiinnermullu tunngatillugu inatsisit Biibilimeersut itsangavallaartut.
11. Qanoq iliornaveersaartariaqarpugut?
11 Immaqa eqqarsalersinnaavugut Jehovap ilitsersuussutai naammaginanngitsuusut. Allaat allassimasut saniatigut maleruagassarsiulersinnaavugut. (Kor 1. 4:6) Jiisusip nalaani upperisarsiornikkut siuttut Moorsisip inatsisai ilaartorlugit maleruagassiorput inoqatitillu oqimaatsunik nammagassillugit. (Mat 23:4) Jehovap oqaatsimigut peqatigiissortamigullu ersarissumik maleruagassittarpaatigut. Maleruagassiaalu ilaartussallugit pissutissaqanngilagut. (Uss 3:5-7) Taamaattumik Biibilimi allassimasut kisiisa maleruartarpagut uppeqatitsinnullu Biibilimi peqqussutigineqanngitsunik maleruagassiortarnata.
12. Saatanip tammartitsiniutit qanoq atortarpai?
12 Salloqittaatit. Saatanip ‘tammartitsiniutit’ ‘inuillu ileqqutoqaannik tunngavillit’ atorlugit inuit salloqittaaralugillu avissaartuutitinniartarpai. (Kol 2:8) Paulusip nalaani tammartitsiniutit ilagaat isumaliutersuutit inuit isumaannik aallaavillit, juutit ilinniartitsissutigisaat Biibilimi allassimanngitsut aamma kristumiut Moorsisip inatsisaanik maleruaasariaqarnerannik ilinniartitsissut. Inuit salloqqittaatit tamakku upperisaramikkit Jehovamit, ilisimassuseqartitsisumit, qimagukkiartorput. Ullutsinni Saatanip tusagassiuutitigut inuillu attaveqatigiittarfii aqqutigalugit tusatsiakkat uppernarsaatissaqanngitsut nutaarsiassallu eqqunngitsut politikkikkut siuttuneersut siaruartertarpai. COVID-19-imik nappaalanersuaqarnerani eqqunngitsorpassuarnik saqqummiisoqartarpoq. c Jehovap Nalunaajaasuisa peqatigiiffiata siunnersuutaanik malinnittuusut paasissutissanut eqqunngitsunut naalaartartunut sanilliullugit ernumassuteqarsimanngillat. – Mat 24:45.
13. Sooq allamut saasaataasut mianersorfigisariaqarpagut?
13 Allamut saasaataasinnaasut. “Suut pingaarnerpaanersut” eqqumaffigiuartariaqarpagut. (Flp 1:9, 10) Allamut saasartikkutta piffissarput nukigullu atulussinnarsinnaavagut. Ulluinnarsiutit – soorlu nerineq, imerneq, sukisaarsarneq sulisarnerlu – inuunitsinni pingaarnerpaatikkutsigit allamut saasaatigisinnaavagut. (Luk 21:34, 35) Aamma ullut tamaasa nutaarsiassani akerliussutsimik takutitsisunik politikkikkullu oqallittunik tusartarlutalu takusaqartarpugut. Mianersunngikkutta oqallinnerit taamaattut piffissaajaatigilersinnaavagut aamma illuatungeriit arlaannut eqqarsaatikkut uummatikkullu tapersersuisuulersinnaalluta. Eqqortuliornissamik aalajangiussisimanerput sanngiillisinniarlugu Saatanip periutsit eqqaaneqartut tamaasa atortarpai. Aalajaalluinnarumalluta iliuusii qanoq akiorsinnaanerlugit sammeriartigu.
QANOQ AALAJAATTUARSINNAAVUGUT?
Aalajaattuarsinnaajumallutit Jehovamut tunniulluinnarlutillu imermut morsutsitaasimaninnut pissutaasut eqqarsaatigikkit, Guutip oqaasia atuaqqissaaruk eqqarsaatigeqqissaarlugulu, uummatit nakimanaveerli, aamma Jehova tatigiuk (Immikkoortut 14-18 takukkit)
14. Jehovamut aalajaattuarnissatsinnut suna iluaqutigisinnaavarput?
14 Jehovamut tunniulluinnarlutillu imermut morsutsitaasimaninnut pissutaasut eqqarsaatigikkit. Jehovamit aqunneqarusukkavit taamaaliorputit. Sallusuissut nassaarigakku suut qularunnaassutigisimanerlugit eqqarsaatigiuk. Jehova ilisarisimagakku Ataatatut qilammiusutut ataqqilerpat asalerlugulu. Upperneq ineriartortippat allamillu isumataarlutit. Jehovap uumigisai taamaatippatit iluarisaatullu inooriaaseqalerlutit. Guutimit isumakkeerfigineqarlutit paasigakku toqqissiallapputit. (Tuss 32:1, 2) Ataatsimiigiartarlutillu ilikkakkatit nuannersut allanut oqaluuserisalerpatit. Maanna tunniulluinnarsimasutut imermullu morsutsitaasimasutut inuunermut aqqut ingerlaarfigaat qimanniarnagulu aalajangiusimalluinnarlugu. – Mat 7:13, 14.
15. Sooq atuaqqissaarneq eqqarsaatiginneqqissaarnerlu iluaqutaava?
15 Guutip oqaasianik atuaqqissaarit eqqarsaatiginneqqissaarlutillu. Soorlu orpik sorlaqarluartoq napalluarsinnaasartoq, taamatuttaaq uagut Guutimut upperluarutta aalajaalluinnarsinnaavugut. Naajartornermini orpik itisuumut siammasissunillu sorlanikkiartortarpoq. Biibilimik atuaqqissaaraangatta eqqarsaatiginneqqissaarlutalu uppernikkut nakussatsittarpugut Guutillu iliuusereqqusaasa pitsaanerunerat upperinerulertarlugu. (Kol 2:6, 7) Itsaq Jehovamut kiffartortut taassuma ilitsersuinera, siulersuinera illersuineralu qanoq iluaqutigisimagaat eqqarsaatigiuk. Assersuutigalugu Ezekielip takorruisinneqarluni inngili guutisiorfimmik peqqissaarluni uuttuisoq malinnaaffigeqqissaarpaa. Ezekielip takusani nakussatsissutigai, uagullu tamanna misissorutsigu Jehovap guutisiornermut minguitsumut najoqqutassiai qutsissut qanoq maleruarsinnaanerlugit ilinniarfigisinnaavarput. d (Ez 40:1-4; 43:10-12) Uaguttaaq Guutip oqaasiani itisuut atuaqqissaartarutsigit eqqarsaatigeqqissaarlugillu iluaqutigissavarput.
16. Bobip nakimaatsumik uummateqarnini qanoq illersuutigaa? (Tussiaat 112:7)
16 Uummatit nakimanaveerli. Kunngip Daavip Jehova asajunnaanngisaannassallugu uppernarsaalluni ima erinarsorpoq: “Uummatiga nakimanaveerpoq, Guuti.” (Tuss 57:8) Uaguttaaq Jehova tatigilluinnarutsigu uummaterput nakimaatsuusinnaavoq. (Tussiaat 112:7 atuaruk). Bobip, siuliani eqqaaneqartup, nakimaatsumik uummateqarnini iluaqutigaa. Nalunartut pillugit aammik piareersimatitaqarniarlutik oqarfigineqarami nangaanani oqarpoq annikitsunnguamilluunniit aalersorniarpanni napparsimmavik erngerluni qimassallugu. Kingusinnerusukkut Bob oqaluttuarpoq: “Nalornissuteqanngilluinnarpunga annilaangalernangalu.”
Uppernerput ineriartortilluarsimagutsigu misilinneqarnitsinni aalajaalluinnarsinnaavugut (Immikkoortoq 17 takuuk)
17. Bob qanoq ilinniarfigisinnaavarput? (Aamma asseq takuuk).
17 Bobip suli napparsimmavimmut unitsinnani aalajaalluinnarnissani aalajangiusimareeramiuk aalajaassinnaavoq. Siullertut, Jehova nuannaartikkusuppaa. Aappaattut, inuunerup aallu illernartuunerat pillugu Biibilimi Biibililersaarutinilu qanoq allassimasoqarnersoq misissoqqissaarpaa. Pingajuattut, upperilluinnarpaa Jehovap siulersuineranik malinninneq naassaanngitsumik iluaqutigissagini. Uaguttaaq inuunitsinni qanorluunniit pisoqassagaluarpat uummatitsigut aalajaalluinnarsinnaavugut.
Baarakki angutitanilu sapiillutik Siserap sakkutuuinik saassussisut (Immikkoortoq 18 takuuk)
18. Jehovamik tatiginninnissatsinnut Baarakki qanoq ilinniarfigaarput? (Saqqaani assiliaq takuuk).
18 Jehova tatigiuk. Baarakki Jehovap siulersuineranik tatiginnikkami iluatsitsilluartoq eqqarsaatigiuk. Taamani Israalikkut sakkussiaateqanngillat sorsoriaannaanatillu. Jehovalli Baarakki peqquaa Kanaanikkut sakkutuuisa naalagaanertaat Sisera sakkutuuilu sakkulisartut sorsugiaqqullugit. (Eqq 5:8) Pruffiitip Deborap Baarakki oqarfigaa narsaamanertamut ateqqullugu Sisera qamutaataalu sorsuutit 900-t sorsugiaqqullugit. Narsaamanertami toqqissumi Israalikkut qamutinut sukkalisaaqisunut akiuunnissaat ajornakusoorsinnaasoq nalunngikkaluarlugu Baarakki naalalluni aterpoq. Sakkutuut qaqqamit Taborimit atertillugit Jehova sialussuartitsilerpoq. Siserap sakkutuuisalu qamutai marullummut marrikaapput, Jehovallu Baarakki ajugaatippaa. (Eqq 4:1-7, 10, 13-16) Taamatuttaaq, uagut Jehova peqatigiissortanilu aqqutigalugu siulersuinera tatigigutsigu ajugaatissinnaavaatigut. – Mos 5. 31:6.
AALAJAATTUARIT
19. Sooq aalajaattuarusuppit?
19 Pissutsit ajortut atuutsillugit aalajaattuarnissarput tamaviaarutigiuartussaavarput. (Tim 1. 6:11, 12; Pet 2. 3:17) Qanortoq malersuineq, peqqusersusaartumik tatisineq, inuit eqqarsartaasiat, salloqittaatit allamullu saasaarutit aalajaakkunnaassutigeqinatigit. (Ef 4:14) Aap, aalajaalluinnarluta Jehovamut tunniulluinnarsimanerput peqqussutaanullu naalannissarput aalajangiusimajuartigu. Aappaatigulli naleqqussarsinnaasariaqarpugut. Tamatumunnga tunngatillugu Jehovap Jiisusillu maligassaalluarnerat allaaserisami tulliuttumi sammissavarput.
ERINARSUUT 129 Pinertusaartuarta
a Adamip Evallu nalaanniilli Saatanip inuit isumaqalersinniarsarai suna ajunngitsuusoq sunalu ajortuusoq namminneq aalajangersinnaagaat. Aamma kissaatigaa Jehovap inatsisai ilitsersuutaalu peqatigiiffiup uagutsinnut tunniuttagai soqutigissanngikkigut. Saatanip malinnittai assiginagit Jehovap inatsisaasa naalannissaannut aalajangiusimanninnissatsinnullu allaaserisaq una iluaqutigissavarput.
b Guutip aammut isiginnittaasia pillugu paasisaqarnerujumallutit takuuk atuagaq Naassaanngitsumik pilluarsinnaavutit!, ilinniagassaq 39.
c Video “Paasissutissanit eqqunngitsunit imminut illersorit” jw.org-imiittoq isiginnaaruk.
d Paasisaqarnerujumallutit atuakkami Den rene tilbedelse af Jehova – endelig genindført!-imi kapitalit 13 aamma 14 takukkit.