1. Sooq ajunaar­nersuaqar­nissaanut piareersarneq silatusaarnerua?

 PIAREERSARNEQ annassutaasinnaavoq. Assersuutigalugu ajunaar­nersuaqar­tillugu inuit piareersarsimasut annannissaat ilimanar­nerusarpoq, taamaalil­lutillu allanik ikiuisin­naasarlutik. Europami ikiuiniaqatigiiffiup piareersarluarneq pingaaruteqarluin­narnerarpaa.

2. Sooq annikil­liornar­tussarsuarmut piareersassaagut? (Matiusi 24:44)

² Ajunaar­nersuit amerlanertigut ilimasun­ngiffitsinni pisarput. Biibilimili paasitin­neqarpugut tassangaannaq ‘annikil­liornar­toqangaarumaartoq’. (Mat 24:21) Ukiut 2.000-t missaat matuma siorna Jiisusip ilinniartitani ullormut tamatumunnga piareersaqquai. (Matiusi 24:44 atuaruk). Piareersimagutta piffissami erloqinartumi tamatumani aniguinissarput allallu aniguinis­saannik ikiuinissarput ajornan­nginnerussaaq. – Luk 21:36.

3. Pinertusaarneq, misigin­neqataaneq asanninnerlu annikil­liornar­tussarsuarmut qanoq piareersaataasin­naappat?

³ Annikil­liornar­tussarsuarmut piareersar­nitsinni pissuserineqartussat pingasut iluaqutigisin­naavagut. Eqqartuussummik oqaluus­seqquneqarutta akerlilersor­neqaruttalu qanoq qisuariassaagut? (Saqq 16:21) Jehova naalakkumallugu pinertusaar­tariaqarpugut tatigalugulu sernigiumaaraatigut. Qatanngutigut pigisatigut annaasaqarpata qanoq iliussaagut? (Hab 3:17, 18, Testamentitoqaq) Ikiorumallugit misigin­neqataasariaqarpugut. Naalagaaffinnit iligiinnit saassun­neqarutta qatanngutigut najugaqatigigal­lassagutsigit qanoq pissaagut? (Ez 38:10-12) Piffissami erloqinar­torsiorfiusumi tamatumani asangaar­tariaqarpagut.

4. Pinertusaarnermik, misigin­neqataanermik asannin­nermillu ineriar­tortitsisariaqarnerput Biibilimi qanoq erseqqis­sarneqarpa?

 ⁴ Biibilimi kajumis­saarneqarpugut pinertusaarneq, misigin­neqataaneq asanninnerlu ineriar­torteqqullugit. Lukkarsi 21:19-imi ima allassimavoq: “Pinertusaarussi inuunersi annaatis­savarsi.” Kolossimiut 3:12-imi allassimavoq: ‘Atissavarsi misigin­neqataaneq.’ Aamma Tessaluunikamiunut allakkat siulliit 4:9, 10-milu allassimavoq: “Asaqatigiin­nissamik Guutimit [ilinniar­tinneqareersimavusi] … Kimigiiserfigaassili, qatanngutit, suli annerusumik taamaalioq­qullusi.” Allassimaffiit taakku kristumiunut pinertusaarnermik, misigin­neqataanermik asannin­nermillu ersersitsereersimasunut allataapput. Pissuserineqar­tussallu taakku ineriar­tortittuar­tariaqarpaat. Aamma uagut taamaalior­tariaqarpugut. Taamaattumik kristumiut siulliit pissuserineqartussat taakku qanoq ersersis­simaneraat sammeriartigu. Kingornalu qanoq ilaarsin­naanerigut sammissavarput, taamaalillutami annikil­liornar­tussarsuarmut piareersimasin­naavugut.

5. Kristumiut siulliit misilin­neqarnerminni qanoq pinertusaarpat?

⁵ Paulusip nalaani kristumiut pinertusaar­tariaqarput. (Hebr 10:36) Ajornar­torsiutit inuit allat atortagaasa saniatigut aamma allatigut misilin­neqartarput. Amerlanersaat juutit upperisarsiornikkut siuttuinit, Romamiut oqartus­saasuinit allaallu ilaquttaminnit akerlilersor­neqarput. (Mat 10:21) Aamma tunussisut ilinniar­titsissutaasa eqqunngitsut ilagiinnik avissaar­tuutsitsin­nginnissaat qulakkeer­tariaqarpaat. (ApS 20:29, 30) Taamaattunik nalaataqaraluarlutik aalajaat­tuarput. (Saqq 2:3) Qanoq ilillutik? Biibilimi pinertusaarnikkut maligas­siuisut, soorlu Juubi, eqqarsaatigeq­qissaar­tarpaat. (Jaak 5:10, 11) Nakussatseq­qullutik qinusarput. (ApS 4:29-31) Pinertusaarunillu Jehovap akissarsisis­sagaatik puiunngilaat. – ApS 5:41.

6. Akerlilersor­neqarnermi pinertusaarnermut tunngatillugu Merita qanoq ilinniarfigaajuk?

⁶ Uagut aamma Guutip oqaasiani Biibililersaarutitsinnilu pinertusaarnikkut maligas­siuisut pillugit misissuinikkut eqqarsaatigin­neqqissaar­nikkullu pinertusaarsin­naavugut. Merita, qatanngut arnaq Albaniami najugalik, taamaaliorami ilaquttaminit sakkortuumik akerlilersor­neqarnermini pinertusaarsin­naasimavoq. Ima oqarpoq: “Juubimik oqaluttuaq killitsis­sutigeqaara. Naalliuuteqangaaraluarluni kinalu pisuusoq nalugaluarlugu ima oqarpoq: ‘Toqussara tikillugu aalajangiuk­kumavara isornaatsumik inuusimasunga.’ (Job 27:5) Paasivara ajornar­torsiutinnut sanilliullugit Juubip ajornar­torsiutai ingasan­nerusut. Uangali nalunngilara ajornar­torsiutinnut kina pisuusoq.”

7. Maanna ingasattumik ajornar­torsiuteqan­ngikkaluarut­taluunniit sunissarput ilikkar­tariaqarparput?

⁷ Jehovamut qinukulasarnikkut isumakuluutittalu taassumunnga saqqummiut­tarnerisigut pinertusaarnerput ineriar­tortissin­naavarput. (Flp 4:6; Tes 1. 5:17) Immaqa maanna ingasattumik ajornar­torsiuteqan­ngilatit. Kisianni ernumas­suteqaraangavit, misigis­sutsikkut aalater­neqaraangavit qanorlu iliussanerlutit nalugaangakku Jehovamut ikioqqusarpit? Maanna annikitsutigut ajornar­torsiuteqarninni Guutimut ikioqqusaruit annertunerusumik ajornar­torsiuteqalissaguit ingerlaannaq qinunissat nangaas­sutiginavianngilat. Taava qularis­sanngilat Jehovap nalunngil­luinnaraa qaqugu qanorlu ikiorumaaraatit. – Tuss 27:1, 3.

8. Pinertusaarnermut tunngatillugu Mirap maligassiaa qanoq ilinniarfigaarput? (Jaaku 1:2-4) (Aamma asseq takuuk).

 ⁸ Maanna ajornar­torsior­nitsinni Jehovamut aalajaat­tuarutta annikil­liornar­tussarsuarmi ajornar­torsiutit naammagalugit atorsin­naassavagut. (Rom 5:3) Sooq taama oqarsin­naavugut? Qatannguterpassuatta misigisimavaat uppernikkut misilin­neqarnermi aalajaak­kaangamik imaannaan­ngitsumik nalaassinerminni pinertusaar­nissamut iluaqutigisimallugu. Jehova ikiortigalugu ajornar­torsior­nerminni pinertusaaraangamik upperineruler­tarpaat Jehovap ikiorusukkaatik. Jehovamullu upperamik misilin­neqaataasussami pinertusaarsin­naapput. (Jaaku 1:2-4 atuakkit). Mirap, Albaniami pioneriusup, tamanna misigaa. Oqarpoq ilaannikkut misigisarluni kisimi ajornar­torsiuterpas­suaqarluni. Taavali eqqaasarpaa Jehovap ukiuni kingullerni 20-ni annertoq­qusersorsimagaani, imminullu ima oqarfigisarpoq: ‘Aalajaagit. Jehovap ikiuineratigut ukiorpassuarni akiukkatit tamaasa maangaan­narteqinagit.’ Aamma illit eqqarsaatigisinnaavat Jehovap pinertusaar­nissannut qanoq ikiorsimagaatit. Qularis­sanngilat misilinneqaat pinertusaarlutit atoraangakku maluginiartaraa akissarsisis­sagaatillu. (Mat 5:10-12) Annikil­liornar­tussarsuarlu nalliuppat pinertusaarneq ilikkarsimassavat pinertusaar­tuarnerillu aalajangiusimallugu.

9. Ilagiit Antiokiami Syriamiittumi qanoq ersersippaat misigin­neqataallutik?

⁹ Kristumiut siulliit nalaanni Judiiami sualuttumik kaannersuaqarpoq. Ilagiit Antiokiami Syriamiittumi kaannersuaq pillugu tusagaqaramik uppeqatitik Judiiamiittut misigin­neqatigaat. Taamaattumik ikiorniarlugit iliuuseqarput. “Aalajangerput qanoq akissaateqarnertik naapertorlugu ikiuiniarnermi atugassanik Judiiami qatanngutinut nassius­siniarlutik.” (ApS 11:27-30) Kristumiut Antiokiamiittut qatanngutitik eqqugaasut ungasis­sumiikkaluartut ikiorusungaarpaat. – Joh 1. 3:17, 18.

10. Qatanngutigut ajunaar­nersuarmit eqqugaasut qanoq misigin­neqataanermik ersersitsivigisin­naavagut? (Aamma asseq takuuk).

¹⁰ Uaguttaaq uppeqatitta ajunaar­nersuarmit allamil­luunniit eqqugaanerat tusaraangatsigu misigin­neqataanerput ersersis­sinnaavarput. Ingerlaannaq iliuuseqar­niartarpugut. Immaqa utoqqaanertat aperisin­naavagut ikiuiniarnermi qanoq peqataasin­naanersugut, b nunarsuaq tamakkerlugu suliamut tunissuteqarsin­naavugut eqqugaasullu qinnuttarlugit. (Uss 17:17) COVID-19 pissutigalugu ikiortariallit isumassor­niarlugit 2020-mi ajunaar­nersuaqar­tillugu ikiuiniarnermut ataatsimiititaliat nunarsuaq tamakkerlugu 950-t sinnerlugit pilersin­neqarput. Qatanngutit ikiueqataasut qutsavigingaarpagut. Qatanngutitik misigin­neqatigigamikkit pigisatigut anersaakkullu ikiuiniarsimapput. Ilaatigullu angerlarsimaffiit ataatsimiit­tarfiillu iluarsar­tuullugil­luunniit sanaqqis­simavaat. – Aamma takukkit Korintimiunut 2. 8:1-4.

11. Misigin­neqataalluta iliuutsigut Jehovamut qanoq ataqqinaataappat?

¹¹ Ajunaar­nersuaqar­tillugu misigin­neqataalluta ilungersornigut allanit maluginiar­neqartarput. Assersuutigalugu 2019-imi Bahamasimi ulussaarsuaq Dorian pitoraammat ataatsimiittarfik aserorneqarpoq. Qatanngutitta sanaartugassanik suliassin­neqartartoq Nalunaajaasuun­ngitsoq aperivaat suliassat ilaat suliaris­sappagit qanoq akeqassanersoq.  Ima oqarfigai: “Atortut, sulisut sanaassallu akilerusuppakka. Asaqatigiinnersi killitsis­sutigigakku peqatigiiffissi tapersersorusuppara.” Inuit amerlanerit Jehova ilisiman­ngilaat. Ilarpas­suisali Jehovap Nalunaajaasuisa iliuusii arajutsineq ajorpaat. Misigin­neqataalluta iliuutsigut allat Jehovamut nallittuingaar­tuusumut qanillis­sutigisin­naammatigit nuannaarutigaarput! – Ef 2:4.

12. Maanna misigin­neqataanermik ineriar­tortitsineq annikil­liornar­tussarsuarmut qanoq piareersaatigaarput? (Saqqummersitat 13:16, 17)

¹² Sooq annikil­liornar­tussarsuup nalaani misigin­neqataanerput pisariaqar­tinneqassava? Biibili naapertorlugu nunarsuarmi naalakkersuisunik tapersersuerusun­ngitsut maanna aamma annikil­liornar­tussarsuarmi ajornar­torsiussapput. (Saqqummersitat 13:16, 17 atuakkit). Immaqa qatanngutigut inuugin­narnissamut pisariaqar­titaannik ikiorneqar­tariaqassapput. Kunngerput, Kristusi Jiisusi, eqqartuus­siartorluni tikiukkuni qatanngutiminik ikiuisut oqarfigissavai: ‘Qaagitsi, Kunngeqarfik kingornussiuk.’ Taamaattumik maanna misigin­neqataarusuppugut. – Mat 25:34-40.

13. Romamiut 15:7 naapertorlugu kristumiut siulliit qanoq asaqatigiippat?

¹³ Kristumiut siulliit asaqatigiinnerat kikkunnit tamanit ilisimaneqarpoq. Asannit­tuliornis­sartilli ilaannikkut sapernar­tittarpaat? Romami ilagiin­niittut qanoq assigiin­ngitsigisut eqqarsaatigiuk. Ilaat juutiupput Moorsisip inatsisaasa maleruar­nissaannik ilinniar­tinneqarsimasut ilaallu juutiunatik allaanerul­luinnartumik tunuliaqutallit. Kristumiut ilaat inussiaapput ilaallu inussiaanatik, allaallu ilaat inussiaateqarput. Kristumiut taakku assigiin­ngitsuugaluarlutik qanoq asaqatigiit­tuarsin­naappat? Apustilip Paulusip kajumis­saarpai ‘imminnut tikilluaq­qusassasut’. (Romamiut 15:7 atuaruk, aamma quppernerup ataani ilanngussaq takuuk). Oqaatsimi ‘tikilluaq­qusinermik’ nutserneqartumi pineqarpoq angerlarsimaf­fimminnut imaluunniit ikinngutimisut asannittumik tikilluaq­qusineq. Assersuutigalugu Paulusip Fiilimuut peqquaa inussiaq qimaasimasoq Oniisimusi ‘asannittumik tikilluaq­qoqqullugu’. (Flm 17) Aamma Priskiilap Akviilallu Apulusi kristumius­susermik ilisimasaqalaaginnartoq tikilluaq­qullugu “ilaliuppaat”. (ApS 18:26) Kristumiut taakkua assigiin­ngissutitik avissaar­tuussutiginagit imminnut akueripput.

14. Anna uinilu qanoq asannit­tuliorpat?

¹⁴ Uaguttaaq qatanngutigut ikinngutitut tikilluaq­qullugit asannit­tuliorfigisin­naavagut. Amerlanertigut taakkua akilluta asannit­tuliorfigis­savaatigut. (Kor 2. 6:11-13) Annap uiatalu oqaluus­sisartutut aallartitat misigisaat una eqqarsaatigiuk. Afrikap kitaani sumiiffimmut allamut nooqqam­mernerata nalaani COVID-19-imik nappaalanersuaq atuutilerpoq. Tikeqqam­meramik ilagiin­niittut naapissin­naanngilaat. Taava qanoq asannit­tuliorsin­naasimappat? Internetikkut video atorlugu imminnut isigalutik qatanngutit attaveqatigisin­naavaat ilisarisimal­lualernissaallu qilanaaralugu oqaluttuullugit. Ilaqutariit ilagiin­niittut asannit­tuliorfigineqarnertik qujamasuutigalugu aappariit sianerfigalugillu sms-erfigisalerpaat. Sooq aappariit oqaluus­sisartutut aallartitat ilagiin­niittut ikinngutitut ilisarisimal­luarniar­nerulerpaat? Anna ima oqarpoq: “Pisuni ajunngitsuni ajortunilu qatanngutit uannut ilaquttannullu asannit­tuliortarnerat puiunngisaan­nassavara. Taakkua asannit­tuliortarnerat asannit­tuliornissannut kajumis­sissutigaara.”

15. Qatanngutitsinnut tamanut asannin­nissamut tunngatillugu Vanessa qanoq ilinniarfigaajuk? (Aamma asseq takuuk).

 ¹⁵ Ilagiinni qatanngutigut assigiin­ngitsunik tunuliaqutaqarput inuttullu assigiinnatik. Pissusiisa nuannersut isiginiar­nerunerisigut taakkununnga asanninnerput nakussatsis­sinnaavarput. Qatanngutip Vanessamik atillip, New Zealandimi kiffartortup, ilagiinni uppeqatimi ilaanut attaveqarluar­nissani sapernar­tissimavaa. Aalajangerporli paamitsaas­sutigisaminik pissusillit alarnagit ilagineruniarlugit. Taamaaliorami takusin­naalerpaa sooq Jehovap asagai. Ima oqarpoq: “Uiga ilagiinnik nakkutil­liisunngormalli qatannguterpassuit assigiin­ngilluin­nartunik pissusillit ilagisarpagut, maannalu attaveqarfigil­luarnissaat ajornan­nginnerutippara. Assigiin­nginnerallu nuannaarutigeqaara. Jehovap aamma tamanna nuannaarutigingaarsimassavaa, inuimmi qanillisitani assigiin­ngitsoorujus­suummata.” Taakku Jehovap isumaqarfigin­ninneratut isiginiarsarigutsigit uppernarsas­savarput asallugit. – Kor 2. 8:24.

16. Sooq asanninneq annikil­liornar­tussarsuarmi pingaaruteqassava? (Aamma asseq takuuk).

¹⁶ Annikil­liornar­tussarsuarmi asanninneq pingaaruteqar­torujus­suussaaq. Annikil­liornar­tussarsuaq aallartippat Jehovap qanoq illersus­savaatigut? Itsaq Babylonni saassun­neqarmat Jehovap innuttani ima ilioqquai: “Innuttakka, ininnguassinnut toqqoritsi matuilu matullugit; toqqorsimalaar­niarallaritsi Naalakkap kamannera qaangiutserlugu.” (Es 26:20) Immaqa uaguttaaq annikil­liornar­tussarsuarmi ilitsersuutit taakku maleruar­tussaavagut. ‘Ininnguit’ tassaasin­naapput ilagiit. Jehovap neriorsorpaatigut annikil­liornar­tussarsuarmi qatanngutigut ilagalugit kiffartorfigiuarutsinni illersorumaarluta. Taamaattumik qatanngutigut qamannga pisumik asaniarlugit maannangaaq iliuuseqar­nissarput pingaaruteqarpoq. Tamanna aniguinis­satsinnut aalajangiisuusinnaavoq.

17. Maanna piareersarutta annikil­liornar­tussarsuarmi susinnaassaagut?

¹⁷ Jehovap “ullussarsua” inunnut tamanut ajornakusoor­titsiumaarpoq. (Sef 1:14, 15) Aamma Jehovap innuttai atugarliussapput. Maannali piareersarutta eqqissisimalluta allanik ikiuisin­naassaagut. Qanorluunniit ajornar­torsioraluarutta pinertusaarsin­naavugut. Uppeqatigut naalliuk­kaangata misigin­neqatigigatsigit sapinngisatsinnik tuppallersar­niartarpagut pisariaqar­titaannillu ikiorlugit. Maannalu asanissaat ilinniareerutsigu siunissami asannit­tuliorfiginissaat ajornan­nginnerutis­savarput. Taava Jehovap inuunermik naassaan­ngitsumik akissarsisis­savaatigut, aamma ajunaar­nersuit naalliuutillu eqqaamaneerutissapput. – Es 65:17.