ATUAQQISSAAGASSAQ 30
Asanninnerit ineriartortittuaruk
“Ineriartorniassagatta … asannittuliorta.” – EF 4:15.
ERINARSUUT 2 Jehova ateraat
QILANAARTUUT a
1. Biibilimik misissuisaleravit suut ilikkarpigit?
BIIBILIMIK misissuisaleravit eqqaamaviuk? Immaqa tupaallaatigivat paasigakku Guuti ateqartoq. Immaqalu Guuti anniarfimmi ikualasumi inunnik naalliutitsisanngitsoq paasigakku toqqissiallapputit. Asasavillu toqusimasut nunarsuarmi paratiisissami takoqqinnissaannik neriuuteqaleravit nuannaarutigingaarpat.
2. Biibilimi ilumoortut ilinniarnerisa saniatigut qanoq allatigut siuariartorpit? (Efesossimiut 5:1, 2)
2 Guutip oqaasia atuaqqissaakulanerulerakku qularnanngitsumik Jehova asaneruleraluttuinnarpat. Asanninnerillu kajumississutigalugu ilikkakkatit maleruartalerpatit. Najoqqutassiat Biibilimeersut tunngavigalugit silatusaarlutit aalajangiisalerputit. Guutimit iluarisaarusukkavit isiginnittaatsit inooriaatsillu allanngortippatit. Soorlu meeqqap angajoqqaaq asannittoq ilaartaraa, illit Ataatat qilammiusoq ilaartalerpat. – Efesossimiut 5:1, 2 atuakkit.
3. Suut imminut apeqqutigisinnaavigit?
3 Imminut ima aperisinnaavugut: ‘Kristumiunngoqqaarninniilli Jehova maanna asanerulersimavara? Imermut morsutsitaagamali uppeqatinnut asannittuliornikkut eqqarsaatikkut iliuutsikkullu Jehova assiginerulersimavara?’ “Aallaqqaammulli asannissimanittut” asannikkunnaarsimaguit nikalloqinak. Kristumiunut siullernut assingusumik pisoqarsimavoq. Jiisusilli taakku imminiiginnanngilai, aamma illit imminiiginnarnavianngilaatit. (Saqq 2:4, 7) Nalunngilaa ilumoortut Biibilimeersut pillugit ilinnialeqqaarnitsitut asannileqqissinnaasugut.
4. Allaaserisami matumani suut sammissavagut?
4 Allaaserisami matumani Jehova allallu qanoq asanerulersinnaanerlugit sammissavarput. Taava asanninnerput ineriartortikkutsigu uagutsinnut allanullu qanoq kinguneqarluartartoq eqqartussavarput.
JEHOVAMIK ASANNINNERIT INERIARTORTIGUK
5-6. Paulusi qanoq imaannaanngitsorsiortarpa, sunali kajumississutigalugu Jehovamut kiffartortuarpa?
5 Apustili Paulusi imaannaanngitsorsiortaraluarluni pilluarluni Jehovamut kiffartorpoq. Ungasissumut angalakulasarpoq, taamanili angalaniarneq ilungersunartuuvoq. Angalanermi ilaanni Paulusi ‘ulorianartorsiortarpoq kuussuarni aamma piiaasut akornganni’. Ilaannikkullu akerlilersortiminit naalliutsinneqartarpoq. (Kor 2. 11:23-27) Paulusillu ikiuiumatunera kristumioqataasa ilaannikkuinnaq pingaartittarpaat. – Kor 2. 10:10; Flp 4:15.
6 Paulusip Jehovamut kiffartortuarnissaminut suna iluaqutigaa? Paulusi Biibili aqqutigalugu namminerlu misigisaminit Jehovap qanoq ittuuneranik ilikkagaqarluarpoq. Taamaalilluni Jehovap Guutip asagaani upperilluinnalerpaa. (Rom 8:38, 39; Ef 2:4, 5) Jehovalu asangaalerpaa. Paulusip ‘illernartunik kiffartuussinermigut kiffartuussiuarnermigullu’ Jehovamut asanninnini ersersippaa. – Hebr 6:10.
7. Jehovamut asanninnerput ilaatigut qanoq nakussatsissinnaavarput?
7 Biibili eqiasuilluta atuaqqissaartarutsigu Guutimut asanninnerput alliartortuarsinnaavoq. Atuarnerani atuakkatit Jehova pillugu qanoq ersersitsinersut paasiniartaruk. Apeqqutit uku eqqarsaatigikkit: ‘Oqaluttuami qanoq erserpa Jehovap asagaanga? Jehovap asanissaanut sumik tunngavissaqarpunga?’
8. Qinusarnikkut Guuti qanoq asanerulersinnaavarput?
8 Jehovamut asanninnerput aamma alliartorsinnaavoq akuttoqatigiimmik uummammiugut Jehovamut aniatittarutsigit. (Tuss 25:4, 5) Jehovallu qinnutigut akiumaarpai. (Joh 1. 3:21, 22) Khanh, qatanngut arnaq Asiami najugalik, ima oqarpoq: “Ilisimasakka tunngavigalugit Jehova asaleqqaarpara, qinnutikkali akisarmagit asanerulerpara. Taava iluarisaatut iliuuseqarnissara kissaatigilerpara.” b
ALLANUT ASANNINNERIT INERIARTORTIGUK
9. Timuutiusip asanninnini ineriartortikkini qanoq ersersippaa?
9 Paulusi kristumiunngoreerluni inuusuttunnguaq Timuutiusimik atilik naapippaa. Timuutiusip Jehova inuillu asavai. Paulusi Filippimiunut ima allappoq: “Timuutiusitummi isiginnittaaseritsigisumik, pisariaqartitassinnik ilumoorluni isumassuerusuttumik, allamik aallartitassaqanngilanga.” (Flp 2:20) Timuutiusip aaqqissuillaqqittuunera imaluunniit oqaluussillaqqittuunera Paulusip eqqaanngilaa, Timuutiusilli uppeqatiminut asannittuunera maluginiarpaa. Tupinnanngitsumik ilagiit Timuutiusimit tikeraartoqarnissartik qilanaaraat. – Kor 1. 4:17.
10. Annap uiatalu uppeqatiminnut asanninnertik qanoq ersersippaat?
10 Uaguttaaq kristumioqatitsinnik ikiuiniarluta periarfissarsiorniartarpugut. (Hebr 13:16) Annap, allaaserisap siuliani eqqaaneqartup, misigisaa eqqarsaatigiuk. Anorersuareersoq uinilu Nalunaajaasoqatitik ilaqutariit alakkarpaat, paasivaallu ilaqutariit illuata qalia nakkaassimasoq. Tamatuma kingunerisaanik atisaat tamarmik errugassanngorsimapput. Anna oqarpoq: “Atisaat tigoriarlugit erroriartorpagut, manissareeratsigit pertereerlugillu ilaqutariinnut utertippagut. Uagutsinnut suliap annikikkaluassusia, taamaaliorattali taamanili ikinngutinnaariilerpugut.” Annap uiatalu uppeqatiminnut asanninnertik iliuuseqarnissaminnut killinneqaatigaat. – Joh 1. 3:17, 18.
11. (a) Asannittuliornerput allanut qanoq sunniuteqartarpa? (b) Asannittuliorutta Ussatit 19:17 naapertorlugu Jehova qanoq iliussava?
11 Allanut asannittulioraangatta maluginiarneqartarpoq Jehova ilaarniaripput. Imaassinnaavoq asannittuliorfigisatta ajunngisaarnerput nalusatsinnik qujamasuutigingaartaraat. Khanhip, eqqaariikkatta, ikiorneqarsimanini nuannaarutigalugu eqqaamasarpaa ima oqarluni: “Qatanngutit arnat oqaluusseqatigiartortarmannga qujamasoqaanga. Aasarpaannga, neriartoqqusarpaannga angerlarnissaralu isumagisarlugu. Taamaaliortarneralli imaannaanngitsuusoq paasilerpara. Ikiuisarnertilli nuannaarutigisaqaat.” Soorunami ikiukkatta ilaannaat qujasarput. Khanh imminut ikiuisarsimasut pillugit ima oqarpoq: “Neriukkaluarpunga ikiuisimasorpassuit akillugit ajunngisaarfigisinnaassallugit, ullumikkulli sumi najugaqarnersut naluara. Kisianni Jehovap nalunngilaa, aamma qinusarpunga uanga sinnerlunga ajunngisaarfigeqqullugit.” Khanh ilumoorpoq. Jehovap allanut ikiuiniarnigut tamaasa, qanorluunniit annikitsigigaluarpata, maluginiaqqissaartarpai. Pilliutitut nalilittut aamma akiligassatut nammineq taarsigassamisut isigisarpai. – Ussatit 19:17 atuaruk.
Anersaakkut siuariartortoq ikiuerusussuseqarnerulersarpoq (Immikkoortoq 12 takuuk)
12. Qatanngutit angutit ilagiinniittunut asanninnertik qanoq ersersissinnaavaat? (Aamma assit takukkit).
12 Qatanngutaaguit angut qanoq asannittuliorlutillu ikiuisinnaavit? Qatanngutip angutip inuusuttup Jordanimik atillip utoqqaanertaq aperaa ilagiinni qanoq iliuuseqarnerusinnaanerluni. Utoqqaanertap siuariarsimaneranik nersualaarpaa qanorlu iliuuseqarnerusinnaaneranik siunnersorlugu. Assersuutigalugu siusinaarluni ataatsimiigiartarnissaanik ataatsimiigianillu ilassinnittarnissaanik, ataatsimiinnerni akisarnissaanik, oqaluussisartoqatigiit ilaaffigisani oqaluusseqatigisarnissaannik allanillu ikiuuttarnissaanik siunnersorpaa. Jordan taamaaliortalerami nutaanik ilikkagaqaannarnani aamma qatanngutit asanerulerpai. Jordanip ilikkarpaa qatanngutit angutit ilagiinni kiffartortunngoraangamik ikiuisarnertik attatiinnartaraat imaanngitsoq aatsaat allanik ikiuisalersut. – Tim 1. 3:8-10, 13.
13. Qatanngutip angutip asanninnini qanoq kajumississutigaa?
13 Siornatigummi ilagiinni kiffartortuusimaguit imaluunniit utoqqaanertaasimaguit? Asanninnerit tunngavigalugu tamaviaarlutit suliarisimasatit Jehovap eqqaamavai. (Kor 1. 15:58) Aamma asanninneq ersersittuakkat maluginiartarpaa. Christian utoqqaanertaajunnaarsitaagami pakatsivoq. Ima oqarpoq: “Aalajangerpungali utoqqaanertaaguma utoqqaanertaanngikkaluarumaluunniit sapinngisannik Jehova kiffartorfiginiarlugu.” Piffissallu ingerlanerani utoqqaanertanngoqqippoq. Christian ima oqaluttuarpoq: “Utoqqaanertatut kiffartoqqilerama pissangalaarpunga. Isummerpungali Jehovap kissaatigippagu utoqqaanertatut kiffartoqqissasunga Jehova uppeqatikkalu asagakkit taamaaliorniarlunga.”
14. Qatanngut Georgiamiu qanoq ilinniarfigaajuk?
14 Aamma Jehovap kiffaasa inoqatitik asannittuliorfigisarpaat. (Mat 22:37-39) Assersuutigalugu Elena, qatanngut arnaq Georgiami najugalik, ima oqarpoq: “Aallaqqaammut Jehovamut asanninnera tunngavigalugu oqaluussiniartarpunga. Ataatagali qilammiusoq asanerujartortillugu aamma inoqatikka asanerulerpakka. Suut ajornartorsiutigigaat suullu oqaloqatigiissutigiumassagaat takorloortarpara. Taamatut eqqarsaatigigaangakkit ikiorusunnerulertarpakka.” – Rom 10:13-15.
ASANNITTULIORNERUP PILLUAQQUSSUTISSARTAI
Asannittuliorneq allanut aamma iluaqutaasarpoq (Immikkoortut 15-16 takukkit)
15-16. Assini takutinneqartutut asannittuliorneq qanoq kinguneqartarpa?
15 Uppeqatitsinnut asannittulioraangatta taakkua kisimik iluaqutigineq ajorpaat. COVID-19-imik nappaalanersuaqalermat Paolop nuliatalu uppeqatitik arnat utoqqaat atortorissaarutit elektroniskiusut oqaluussinermi qanoq atortarnissaannik ikiorpaat. Qatanngutip arnap ajornakusoortikkaluarlugu naggataatigut ilikkarpaa. Ilaquttaminillu eqqaaniaanermut qaaqqusinermini atorpaa. Tamatumalu kingunerisaanik taakkua ilaat 60-t isiginnaarutikkut najuupput! Qatanngutip arnap taassuma ilaqutaasalu tamarmik Paolop nuliatalu ikiuinerat iluaqutigaat. Kingornatigut arnap Paolo ima allaffigaa: “Qujanaq utoqqaasugut ilinniartikkatsigut. Jehovap isumaginninnera qasusuillusilu ikiuinisi puiunngisaannassavakka.”
16 Misigisat taamaattut Paolop pingaarutilimmik ilinniarfigai. Eqqaasinneqarpoq asanninneq ilisimasaqarnermit imaluunniit piginnaasaqarnermit pingaarnerusoq. Ima oqaluttuarpoq: “Nakkutilliisutut angalasartuunikuuvunga. Nalunngilara oqaluussisartut oqalugiaatikka puiorsimassagaat ikiuisarnikkali eqqaamagaat.”
17. Asannittuliornigut nammineq qanoq iluaqutigisinnaavagut?
17 Allanut asannittulioraangatta uaguttaaq ilimaginngisatsinnik iluaqutigisarparput. Jonathanip, New Zealandimi najugaqartup, tamanna misigaa. Arfininngornikkut ualikkut kiaqisoq pioneri angut kisimiilluni oqaluussisoq takugamiuk aalajangerpoq arfininngornikkut ualikkut oqaluusseqatigisalerniarlugu. Ajunngitsuliornini qanoq imminut iluaqutaatigissasoq aallaqqaammut nalugaluarpaa. Ima oqarpoq: “Taamani oqaluussineq nuannarivallaanngikkaluarpara. Pionerilli taassuma ilinniartitseriaasia oqaluussinermilu angusaqarluartarnera malinnaaffigigakkit oqaluussineq nuannarinerulerpara. Ikinngutitaarpunga anersaakkut ineriartornissannut, oqaluussinermik nuannarinnilernissannut Jehovamullu qanillinissannut ikiortigilluakkannik.”
18. Jehovap suna kissaatigaa?
18 Jehovap kissaatigaa imminut allanullu asanninnerujartussasugut. Ilikkarsimasatsitut Jehova asanerulersinnaavarput oqaasianik atuartarnikkut, eqqarsaatiginneqqissaartarnikkut aalajangersimasumillu qinusarnikkut. Qatanngutigut asanerulersinnaavagut assigiinngitsutigut ikiortarnerisigut. Asanninnerput alliartortillugu Jehovamut anersaakkullu ilaquttatsinnut qaninnerulertarpugut. Taakkulu naassaanngitsumik ikinngutigiuaannarsinnaavagut!
ERINARSUUT 107 Guutip asanninnermik najoqqutassiaa
a Ukiorpassuarni Jehovamut kiffartortuusimagaluarutta kiffartulerlaajugaluaruttaluunniit tamatta anersaakkut siuariartorsinnaavugut. Allaaserisami matumani Jehovap allallu asanerulernerisigut qanoq siuariartortuarsinnaasugut sammissavarput. Allaaserisaq nammineq sammitillugu maannamut killiffiit aamma qanoq siuariartoqqissinnaanersutit eqqarsaatigikkit.
b Atit ilaat allanngortitaapput.