Ataatama Canadami oqaluffiit ilaanni (United Church of Canada-mi) utoqqaanertaasup sapaatit tamaasa najagalu meeqqat naalagiar­nerannut peqataatit­tarpaatigut, taava aqqanerniit aamma ataata naalagiaqatigisarparput. Ualikkut anaana Nalunaajaasut ataatsimiin­nerinut ilagisarparput. Upperisarsioqatigiit taakkua marluk assigiin­ngissutaat takulluarsin­naavarput.

Anaanama upperisartaani ikinngutigil­luakkaminut, Bob aamma Marion Hutchesonikkunnut, oqaluttuaraa taakkulu aamma Nalunaajaasun­ngorput. 1958-imilu ataatsimeersuarneq ullunik arfineq-pingasunik sivisus­susilik peqataaf­figiniarlugu aappariit taakku ernerilu pingasut New Yorkiliaqatigaakka. Kingumut qiviassaguma paasivara ilaanera taakkununnga imaannaasimanavian­ngitsoq, ataatsimeersuarnerli taanna inuuninni nuanner­nerpaat ilagaat.

Inuusut­tuaraatillunga nunaateqarfimmi najugaqarpugut, tassanilu uumasunik paarsisarnera nuannaraara. Uumasut nakorsaattut ilinniagaqar­niarlunga siunniuk­kaluarpara. Tamanna anaanama ilagiinnut utoqqaanertamut eqqaavaa. Taassumalu inussiar­nersumik eqqaasippaanga “ulluni kingullerni” inuusugut aperalungalu universitetimi ukiuni arlalinni ilinniassaguma Jehovamut attaveqarninnut  qanoq sunniuteqas­sanersoq eqqarsaatigeq­qullugu. (Tim 2. 3:1) Tamatuma kinguneranik aalajangerpunga universitetimi ilinnialer­niarnanga.

Atuarnera naammas­sigukku suleris­sanerlunga suli eqqarsaatigisarpara. Sapaatip-akunnerisa naanerini oqaluus­seqataasaraluarlunga oqaluussineq nuannarin­ngilara pionerin­ngornissaralu takorloorsin­naanngivippara. Taamaalinerani ataatama akkamalu kajumis­saarpaannga piffissaq tamaat sillimmasiisarfimmi Torontomiittumi sulileq­qullunga. Akkaga tassani qaffasissumik atorfeqarpoq, taamaattumik akueraara.

Torontomi suliffinni qaangiut­toortarama Nalunaajaasuun­ngitsullu ilagisarakkit ataatsimiigian­ngitsoorlungalu oqaluus­seqataan­ngitsoor­tarpunga. Siullermik aataga Nalunaajaasuun­ngitsoq ineqatigaara, toqummalli allamik inissarsiorpunga.

Bob Marionilu, 1958-imi ataatsimeersuaqatigisakka, uannut angajoqqaatut ipput. Imminni najugaqar­nissannik neqeroorfigaannga anersaakkullu siuariar­tornissannut ikiorlunga. Taakkualu ernerat John 1960-imi imermut morsutsitaaqatigaara. John pionerin­ngormat tamatuma oqaluus­sineruler­nissannik kajungilersippaanga. Anersaakkut siuariar­tornera ilagiinni qatanngutit angutit maluginiarpaat, kingusin­nerusukkullu ataatsimiinnermik (maanna Inuuneq kiffartornerlu pillugit ataatsimiinnermik taaneqar­tartumik) nakkutil­liisutut kiffartor­tunngor­tippaannga.

1966-imi Randi Berge, pioneri aallussil­luartoq pisariaqar­titsiffiusunilu kiffartorusuttoq, katippara. Nakkutilliisup angalasartup inuttut soqutigin­ninnermik ersersitsivigaatigut kajumis­saarlutalu Orilliami ilagiinnut Ontariomiittumut ikiuiar­toqqulluta. Akuersigatta ingerlaannaq nuuppugut.

Orilliamut tikikkatta Randi pionerioqatigilerpara. Aallussil­luartuunera kajumis­sissutigeqaara! Pioneritut aallussil­luartun­ngorama Biibili atorlugu oqaluus­sisarnera nuannarinerulerpara inuillu ilumoortumik paasinninnerat takusalerlugu. Orilliami aappariit asanartut allannguinis­saannik Jehovamullu kiffartor­tunngor­nissaannik ikioratsigit nuannaarutigeqaarput.

Torontomut tikeraar­tilluta Arnold MacNamara, qatanngut angut Betelimi akisussaasut ilaat, naapippara. Aperivaanga specialpionerin­ngorusun­nersugut. Ingerlaannaq akivara: “Ilaana! Quebecimiin­ngikkuni ajunngilaq.” Canadami tuluttut oqaasillit Quebecimi franskisut oqaasilinnut isiginerluinerannit sunnertis­simavunga. Taamani Quebec namminersor­tunngor­niassammat inuit naalakkersuisunut akerlius­sutsimik takutitsisarput.

Arnold akivoq: “Quebecimuinnaq specialpionerinik aallartitsisoqartarpoq.” Ingerlaannaq akuersivunga nalunnginnakku Randip tassani kiffartor­nissani soqutigisarigaa. Kingornatigut paasilerpara aalajangiinitta inuunitsinni pitsaanerpaat ilagigaat!

Sapaatip-akunnerini tallimani franskisut ilinniareerluta Randilu aappariillu allat Rimouskimut, Montrealip avannaata kangianit 540 kilometerisut ungasitsigisumiittumut, nuuppugut. Ataatsimiinnermi nalunaarutinik atuaagama suli franskisut ilinniagas­sarpassuaqarluta paasivara. Oqarniarlunga “Østrigimiut” ataatsimeersuarnermut najuukkiar­torniartut oqartoorama “qatigat­tuujusarpassuit” tikeraar­toriniarigut.

Rimouskimi qatanngutit arnat aallussil­luartut sisamat kisimiittut aappariillu Huberdeausikkut paniilu marluk kiffartoqatigilerpagut. Huberdeausikkut illorujussuaq arfineq-marlunnik sinittarfilik attartorpaat, pionerillu tassani najugallit akileeqataasarput. Illu taanna qaqortuummat qaqortunillu sukaqarluni “White House”-mik taasarparput. Aqqaneq-marluk 14-illu akornanni amerlatigaluta najugaqatigiippugut. Randilu specialpioneriugatta ullaakkut, ualikkut unnukkullu oqaluus­sisarpugut. Qujamasuutigeqaarput oqaluus­seqateqar­tuaannarsin­naagatta – allaat issittumi unnukkut.

Pionerit aalajaatsut taakku qanillingaaratsigit soorlulusooq ilaqutariilluta. Ilaannikkut ikumaar­titarput kaajallallugu issiaqatigiit­tarpugut imaluunniit ulloq aalajangersimasoq igaqatigiit­tarluta. Qatanngutitta ilaat nipilersor­tartuugami arfinin­ngornikkut unnukkut erinarsoqatigiillutalu qittattarpugut.

Rimouskimi oqaluussineq kinguneqarluarpoq. Ukiut tallimat ingerlaneranni Biibilimik ilinniartitat arlallit imermut morsutsitaapput ilagiillu 35-t missaanik oqaluus­sisartoqalerluni.

Quebecimi pitsassuarmik oqaluus­sisartutut pikkoris­sarneqarpugut. Oqaluus­sinermi pisariaqar­titatsinnillu Jehovap ikiuinera misigaarput. Inuit franskisut oqaluttut nuannaringaalerlugillu oqaasii kulturiallu sungiuppagut. Taamaattumik allanik kulturillit nuannarisalerpagut. – Kor 2. 6:13.

Ilimagin­ngisatsinnik immikkoor­tortaqarfimmiit aperineqarpugut illoqarfimmut Tracadiemut New Brunswickimiittumut nuussin­naanersugut. Tamanna eqqarsaal­lannarpoq, inissiamimmi attartugas­satsinnik atsioqqam­merpugut, aamma ullup affaani atuarfimmi ilinniar­titsisutut sulinissamik isumaqatigiis­suteqarpunga. Biibilimillu ilinniar­tittatta ilaat oqaluus­sisartun­ngoqqammerput ataatsimiit­tarfissatsinnillu sanaartulerut­torluta.

Weekendersuaq tamaat nuunnissarput pillugu Jehovamut qinuvugut Tracadiemullu tikeraarluta. Illoqarfik Rimouskimiit allaanerul­luinnarpoq, isummerpugulli Jehovap kissaatigigaa tassunga nuussasugut. Jehova misilipparput, takuarpullu akornutaasinnaasut tamaasa peerai. (Mal 3:10) Pisarnermisut Randi anersaakkut nukittuvoq namminisarsiornanilu quiasaariumatugamilu nuunnissarput oqinnerujus­suanngortippaa.

 Ilagiinni najuuffigilik­katsinni Robert Ross kisimiilluni utoqqaanertaavoq. Nulianilu Linda pioneriusimapput, meerartaaramillu aalajangersimapput tassaniigin­narniarlutik. Ernertik isumagiitigalugu Randi uangalu imminnut tikilluaq­qujuaan­narpaatigut, oqaluus­sinermilu aallussil­luartuugamik uagutsinnut kajumis­saataaqaat.

Tracadiemi ukiuni marlunni pionerisut kiffartoreerluta ilimagin­ngisatsinnik tupaallatsin­neqaqqippugut aperineqaratta nakkutil­liisutut angalasartutut kiffartorsin­naanersugut. Ilageeqatigiinni tuluttut oqaluttuni ukiuni arfineq-marlunni kiffartorpugut, kingornalu Quebecimi franskisut oqaluttuni kiffartor­tunngor­tinneqarpugut. Quebecimi ilageeqatigiinnik arlalinnik nakkutilliisup, Léonce Crépeaultip, oqalugiaatikka pillugit nersualaar­tarpaanga. Kingornatigulli aperiuaan­narpaanga: “Qanoq atoriaan­naanerusumik oqalugiarsinnaavit?” a Taamatut aperisarmanga aalajangersimanerusumik paasiuminar­nerusumillu ilinniar­titsisalerpunga.

1978-imi Montrealimi ataatsimeersuarnermi nunanit tamalaanit peqataaf­figineqartumi “Upperneq ajugaasoq”-mik qulequtalimmi suliassin­neqarnera puigunaan­nerpaat ilagaat. Ataatsimeersuaqataasut nerisas­saannik isumagin­nittutut suleqataavunga. Naatsorsuutigaarput inuit 80.000-t missaan­niissasut, pisarnitsinniilli allaanerusumik nerisitsiniar­tussaavugut. Atortut, nerisassat piareersaanerlu – suna tamarmi nutaajuvoq. Nillataar­titsiviit angisuut 20-t missaan­niipput ilaannikkullu ajortarlutik. Ataatsimeersuarnissaq aqagumut aallartit­tussaasoq unammisoqarnera pissutigalugu ataatsimeersuarfissarput aatsaat unnuaqeqqanut iserfigaarput piareersar­nialerlutalu. Ullaaror­tinnagu ullaakkorsiutissanik piareersaaniarluta kissarsuutit ikeqqaar­tussaavagut! Qasoqaagut, kajumis­sutsimilli suleqatima ulapporinnerat, inersimal­luarnerat quiasaarumatunerallu ilinniarfigeqaakka. Tamanna ulloq manna tikillugu ikinngutigiil­lualernermik kinguneqarpoq. Quebecimi 1940-ikkunni 1950-ikkunnilu qatanngutit assut malersugaasimapput. Maannali tamaani ataatsimeersuarneq pingaarutilik peqataaf­figisin­naagatsigu nuannaarutigeqaarput!

Montrealimi ataatsimeersuarnerni nakkutil­liisoqatikka ilinniarfigeqaakka. Ukiut ilaanni David Splane, maanna Siulersuisoqatigiinnut  ilaasortaasoq, ataatsimeersuarnermik nakkutil­liisuuvoq. Kingusin­nerusukkut ataatsimeersuarnermi allami nakkutil­liisunngoq­quneqarama Davidip tapersersorluin­narpaanga.

2011-mi ukiuni 36-ni angalasartutut kiffartoreerluta Ilagiinni Utoqqaanertanut Ilinniarfimmi ilinniar­titsisutut suliassin­neqarpunga. Randilu ukiut marluk ingerlaneranni siniffiit assigiin­ngitsut 75-t siniffigisimavagut. Peqqissimis­sutissaqan­ngilagulli. Sapaatip-akunnerisa naaneri tamaasa utoqqaanertat Siulersuisoqatigiinnit anersaakkut isumagineqarluarnertik qujamasuutigisaqaat.

Kingusin­nerusukkut Kristumiunut Oqaluus­sisartunut Ilinniarfimmi ilinniar­titsisun­ngorpunga. Ilinniartut ulapputis­saqarnermik qasusaqaat. Ullormut nalunaaquttap-akunnerini arfineq-marlunni ilinniar­tinneqartarput, unnuillu tamaasa nalunaaquttap-akunnerini pingasuni ilinniak­kerisarput sapaatillu-akunneranut sisamanik tallimanil­luunniit saqqummius­sassanik suliassin­neqartarlutik. Ilinniar­titsisoqatigalu nassuiaat­tarpagut Jehovap ikiuineratiguinnaq aatsaat taamaat­toqarsinnaasoq. Puiunngisaan­narpara ilinniartut Jehovap tatigineratigut takorloorsin­naanngisaminnik naammas­sissaqangaarsin­naanertik tupaallaatigisaraat.

Anaanama allanik inuttut soqutigin­ninnera iluaqutigalugu Biibilimik ilinniartitai anersaakkut siuariartorput allaat ataatama ilumoortoq ajunngitsumik isumaqarfigilerlugu. Anaanaga toqummat ullut pingasut qaangiummata ataataga tamanut oqalugiaammut tusarnaariarluni takkummat tupaqaagut. Ukiunilu tulliuttuni 26-ni ataatsimiinnerit najuuffigisarsimavai. Ataataga imermut morsutsitaan­ngikkaluarluni ataatsimiinnernut siullerpaajulluni takkuttarsimasoq utoqqaanertat oqaluttuup­paannga.

Anaanaga uannut najannullu maligas­siuilluarpoq. Najakka pingasut uiilu Jehovamut aalajaallutik kiffartorput. Najakka marluk immikkoor­tortaqarfimmi kiffartorput, aappaa Portugalimi aappaalu Haitimi.

Maanna Randilu Hamiltonimi Ontariomiittumi specialpioneritut kiffartorpugut. Angalasartutut kiffartoral­laratta allat atuaqqis­saaqatigisar­tagaannut pulaaqqit­tagaannullu ilaasarnerput nuannaarutigisarparput. Maannali nammineq ilinniar­titatta Jehovamut ikinngutaalernerat takullugu nuannaarutigisaqaarput. Ilagiinnilu najuuffigilik­katsinni qatanngutit qaninneruleratsigit piffissani ilungersunartuni ajunngitsunilu Jehovap taakkuninnga tapersersuisarnera nuannaarutigisaqaarput.

Kingumut qiviassagutta allat soqutigaluta ikiuisarsimanerat qujamasuutigeqaarput. Uaguttaaq allat qiimmas­sarniarlugit iliuuseqar­tarpugut, kajumis­saartarpagut Jehovamut kiffartor­nerminni sapinngisamik iliuuseqar­taqqullugit. (Kor 2. 7:6, 7) Assersuutigalugu ilaqutariinni ataatsini nuliaasoq, erniusoq paniusorlu piffissaq tamaat kiffartor­tuupput. Uiusoq aperaara pionerin­ngornissani eqqarsaatigisimaneraa. Akivorlu pionerit pingasut tapersersorlugit. Aperaaralu: “Jehovamiit tapersersuil­luarnerusin­naagavit?” Kajumis­saarpara ilaquttami nuannarisaat nammineq misileq­qullugu. Ukiup affaa qaangiummat pionerin­ngorpoq.

Randilu “kingulis­satsinnut” Jehovap suliai nuanningaartut oqaluttuariuas­savagut. Neriuppugullu uagutsitulli Jehovamut kiffartornertik nuannaarutigingaassagaat. – Tuss 71:17, 18.