1. Kristumiut sutigut orpittut ittuusariaqarpat? (Aamma assiliaq takuuk).

 “ORPIK najunngarsinnaasoq anorimit napinavianngilaq.” Ussatip tamatuma ersersippaa orpiit napaannas­sappata najunngarsin­naanissaat qanoq pingaaruteqar­tigisoq. Uaguttaaq anersaakkut napaannas­sagutta naleqqus­sarsinnaasariaqarpugut. Qanoq? Inuunitsinni allanngor­toqartillugu aamma allat isumaasa aalajangius­saasalu ataqqinerisigut naleqqus­sarsinnaasariaqarpugut.

2. Pissuserisassat suut naleqqus­sarsinnaanis­satsinnut iluaqutigis­savagut, aamma allaaserisami matumani suut sammissavagut?

² Jehovap kiffaasut naleqqus­sarsinnaarusuppugut. Aamma maniguullutalu inussiar­nersoorusuppugut. Allaaserisami matumani sammissavarput kristumiut ilaasa pissuserineqartussat taakku qanoq iluaqutigisimaneraat. Aamma sammissavarput uagut qanoq iluaqutigisin­naanerigut. Siullermilli Jehova Jiisusilu naleqqus­sarsinnanermut maligas­saalluar­nerpaasut ilinniarfigeriartigit.

3. Qanoq nalunngilarput Jehova naleqqus­sarsinnaasoq?

³ Jehova aalajaal­luinnar­tuugami ‘qaarsumik’ taaneqarpoq. (Mos 5. 32:4) Taamaattorli aamma naleqqus­sarsinnaasarpoq. Pissutsit allanngoraangata neriorsuutigisani piviusun­ngortin­niarlugit Guuterput naleqqus­sarsinnaasarpoq. Jehovap imminut assililluni pinngor­tinnikuugamisigut pissutsinut allanngorartunut naleqqus­sarsinnaatip­paatigut. Inuunitsinni nalaatassagut suugaluarpataluunniit silatusaartumik aalajangiisin­naanissatsinnut  Biibilimi najoqqutas­siaqarpoq iluaqutigisin­naasatsinnik. Jehovap nammineq maligas­siuinerata uagutsinnillu najoqqutas­saqartitsinerata uppernarsarpaat Jehova ‘qaarsuugaluarluni’ naleqqus­sarsinnaasoq.

4. Jehovap naleqqus­sarsinnaaneranik assersuuteqarit. (Mosesimik 3. 5:7, 11)

⁴ Jehovap aqqutigisai naammal­luinnar­tuupput ingasaas­sisuunatillu. Aap, Jehova inunnut sukangasuujunngilaq. Assersuutigalugu naleqqus­sarsinnaanini Israalikkunnut qanoq takutikkaa eqqarsaatigiuk. Kikkunnut tamanut, pisuunut piitsunullu, pilliutissanik assigeeq­qissaanik piumasaqanngilaq. Pisut ilaanni inuit atukkatik naapertorlugit pilliummik tunissuteqarsin­naanerat akueraa. – Mosesimik 3. 5:7, 11 atuakkit.

5. Jehovap maniguut­tuuneranik nallittuisuuneranillu assersuuteqarit.

⁵ Jehova maniguullunilu nallittuisuugami naleqqus­sarsinnaasarpoq. Soodomamiut ajortut suujunnaarsin­nialeramigit qanoq maniguutsiginini ersersippaa. Inngilini oqariar­tortippai Lotsi naapertuil­luartoq qaqqanut qimaaqqullugu. Lotsilli tappavungar­nissani annilaangagigamiuk Jehova kimigiiserfigaa ilaquttanilu Soarimut, illoqarfeeqqamut suujunnaarsitaasus­saagaluartumut, qimaasin­naanerlutik. Jehovap sukannersumik oqarfigisin­naasimagaluarpaa peqqussutini maleqqis­saaqqullugit. Soarimulli qimaarusunnera akueraa illoqarfillu taanna nungutin­niarunnaarlugu. (Mos 1. 19:18-22) Ukiorpassuit tamatuma kingorna pruffiiti Juuna Niinivimiunut illoqarfik inuilu ajortut suujunnaarsitaanis­saannik oqariar­tortippaa. Niinivimiulli peqqissimimmata Jehovap nalligilerpai illoqarfimmillu suujunnaarsitsiniaraluarnini taamaatillugu. – Jon 3:1, 10; 4:10, 11.

6. Jiisusip Jehovatut naleqqus­sarsinnaaneranik assersuuteqarit.

⁶ Jiisusi Jehovatut naleqqus­sarsinnaas­suseqarpoq. “Savat tammarsimasut inuiaqatigiinnut Israalikkunnut ilaasut” oqaluus­siffigiar­toqqullugit nunarsuarmut aallartitaavoq. Inunnulli oqaluus­sinermini naleqqus­sarsinnaanini takutippaa. Ilaanni arnap Israalik­kuunngitsup qinnuigaa panini ‘anersaapiloqarluni assut naalliuttoq’ ajorunnaarseq­qullugu. Jiisusip nalligalugu pania ajorunnaarsippaa. (Mat 15:21-28) Pisimasoq alla eqqarsaatigeriaruk. Petrusip pingasoriarluni miserratigimmani Jiisusi qanoq iliorpa? Ima oqarnikuuvoq: “Nalunerarlunga oqartoq uangattaaq … nalunerassavara.” (Mat 10:33) Jiisusilli Petrusi nalunerarpaa? Naamik. Jiisusimmi nalunngilaa Petrusip iliuutsini peqqissimis­sutigigaa upperluar­tuusorlu. Jiisusip makititaanermi kingorna Petrusi uppernarsaavigaa isumakkeerfigisimallugu asanerarlugulu. – Luk 24:33, 34.

7. Filippimiut 4:5 naapertorlugu qanoq ilisimaneqarusuppugut?

⁷ Paasivarput Jehova Guuti aamma Jiisusi  Kristusi naleqqus­sarsinnaas­suseqartut. Uagummi? Jehovap kissaatigaa naleqqus­sarsinnaas­sasugut. (Filippimiut 4:5 atuaruk, aamma quppernerup ataani ilanngussaq takuuk). Nutsikkat ilaanni versi imaappoq: “Iliuutsikkut naleqqusarsin­naassusersi ersersissiuk.” Imminut ima aperisin­naavutit: ‘Naleqqus­sarsinnaasutut allallu isumaannik ataqqin­nittutut ilisimaneqarpunga? Imaluunniit ingasaas­siniartutut uteriitsutullu isigineqar­tarpunga? Allat isumaga maleqqis­saarlugu iliuuseqar­nissaat uteriif­figisarpara? Allanul­luunniit tusarnaar­tarpunga, ajornan­ngikkaangallu kissaatigisaat naapertorlugit iliuuseqar­niartarpunga?’ Naleqqus­saraangatta ersersit­tarparput Jehova Jiisusilu ilaarlutigit. Inuunitsinni atukkagut allanngoraangata aamma allat uagutsinnit allaanerusumik isumaqaraangata qanoq naleqqus­sarsinnaanersugut sammeriartigu.

8. Pissutsinik allanngor­toqartillugu suut iluaqutigisin­naavagut? (Aamma quppernerup ataani ilanngussaq takuuk).

⁸ Pissutsit allanngoraangata naleqqus­sarsinnaasariaqarpugut. Ilimagin­ngisatsinnik ajornar­torsiuleriataarsin­naavugut, assersuutigalugu perulun­nartumik nappaateqaleriataarluta. Imaluunniit inuunitsinni nanertuutaalersunik aningaasaqar­niarnikkut politik­kikkulluunniit allanngor­toqariataarsinnaavoq. (Oqal 9:11; Kor 1. 7:31) Allaat Jehovap peqatigiis­sortaani uagutsinnut sunniuteqartumik allannguineq inuttut misilin­neqaataasinnaavoq. Qanorluunniit ajornar­torsioraluarutta uku sisamat maleruarutsigit naleqqus­sariaan­naassaagut: (1) Pissutsit nutaat akuerikkit, (2) qaangiutereersut eqqarsaatigiin­naqinagit, (3) isumalluartumik eqqarsaateqarit, aamma (4) allat ikiortakkit. b Uppeqatitta ilaasa siunnersuutit sisamat taakku qanoq iluaqutigisimaneraat sammeriartigu.

9. Aappariit ilimagin­ngisaminnik nalaataqartut suut iluaqutigaat?

⁹ Pissutsit nutaat akuerikkit. Emanuele Francescalu oqaluus­sisartutut nunamut allamut aallartitaapput. Tassanili oqaatsinik ilinnialerut­torlutik qatanngutillu ilisarisimalerut­torlugit COVID-19-imik nappaalanersuaqalerpoq mattuttariaqalerlutillu. Taava Francescap arnaa tassangaannaq toquvoq. Ilaquttani ornikkusuk­kaluarlugit nappaalanersuaq pissutigalugu Francesca aallarsin­naanngilaq. Tamakkorpas­suarnik nalaataqar­tilluni suut iluaqutigai? Siullertut, Emanuele Francescalu ullut ataasiak­kaaqqullugit ilisimas­susermik tuneqqullutik qinoqatigiittarput. Jehovap peqatigiis­sortani aqqutigalugit piffissaq eqqorlugu qinnutaat akisarpai. Assersuutigalugu qatanngutip angutip videumi oqaatigisai uku qiimmaal­laatigaat: “Pissutsit nutaat akueripal­lattarutsigit nuannaaq­qilernissarput ajornan­nginnerussaaq. Taava atukkagut nutaat atorluarsin­naavagut.” c Aappaattut, aappariit taakku aalajangerput oqarasuaatikkut oqaluussineq pikkorif­figineruler­niarlugu, allaallu Biibilimik ilinniar­titaqalerput. Pingajuattut, qatanngutiminnit asannittumik tuppallersar­neqarnertik qujamasuutigaat. Qatanngut arnaq ukioq naallugu ullut tamaasa allassimaffimmik taakkununnga nassius­sisarpoq. Uaguttaaq pissutsit nutaat akuerigutsigit iliuuserisin­naasagut nuannaarutigisin­naassavagut.

10. Allanngor­toqarmat qatanngut arnaq qanoq naleqqussarpa?

 ¹⁰ Qaangiutereersut eqqarsaatigiin­naqinagit isumalluartumik eqqarsaateqarit. Christina, qatanngut arnaq Romaniameersoq Japanimi najugalik, ilagiit tuluttut oqaasillit ilaaffigisar­takkani matuneqarmat pakatsigaluarpoq. Pisimasorli ugguarluni eqqarsaatigiuaan­nanngilaa. Aalajangerpoq ilagiinni Japanimiusut oqaasilinni sapinngisaminik iliuuseqar­niarluni Japanimiusullu oqaluus­seqataasaler­niarluni. Suleqatigisimasani arnaq aperaa Japanimiusut oqallorin­neruler­nissaminut ikiorsin­naaneraani. Arnap Biibili quppersagarlu Naassaan­ngitsumik pilluarsin­naavutit! atorlugit Japanimiusut ilinniar­tikkumavaa. Christina Japanimiusut oqallorissivoq, pingaar­nerusumilli ilinniar­titsisua Biibili pillugu itinerusumik paasisaqar­nerusulerpoq. Qaangiutereersut eqqarsaatigiuaan­nanngik­kutsigit isumalluar­tuuguttalu allanngoriataarnerit naatsorsuutigin­ngisatsinnik kinguneqarluar­titsisin­naapput.

11. Aappariit aningaasaqar­niarnikkut ajornar­torsiortut qanoq aalajangerpat?

¹¹ Allat ikiortakkit. Aappariit nunami suliatsinnik inerteq­quteqarfiusumi akiliisin­naajunnaar­nermillu eqqugaasumi najugallit aningaasatigut ajornar­torsiulerput. Qanoq naleqqussarpat? Siullermik aningaarsar­tuutitik annikil­lisarpaat. Taava namminneq ajornar­torsiutitik isiginiaan­narnagit oqaluus­sinikkut sapinngisamik allanik ikiuiniarlutik aalajangerput. (ApS 20:35) Uiusoq oqarpoq: “Oqaluus­sinermik ulapputeqar­tilluta Guutillu piumasaatut suliaqar­tilluta nikallor­nartunik eqqarsaateqaq­qajaanngin­nerusarpugut.” Atukkatsinnik allanngor­toqartillugu eqqaamas­savarput allanik, pingaartumik oqaluus­sinikkut, ikiuiniarneq qanoq pingaaruteqar­tigisoq.

12. Oqaluus­sinitsinni naleqqus­sarsinnaanissamut Paulusi qanoq ilinniarfigisin­naavarput?

¹² Oqaluus­sinitsinni naleqqus­sarsinnaasariaqarpugut. Inuit Guuti pillugu assigiin­ngitsunik isumallit aamma assigiin­ngitsunik kulturillit naapittarpagut. Apustili Paulusi naleqqus­sariaan­naasartoq ilinniarfigisin­naavarput. Jiisusip Paulusi ‘allamiunut apustilin­ngortippaa’. (Rom 11:13) Paulusi apustilitut juutinut, grækerinut, ilinniagaqarsimasunut, nunaannarmiunut, oqartus­saassusilinnut kunnginullu oqaluus­sisarpoq. ‘Inuit qanorluunniit ittut ikiorumallugit sapinngisaminik iliuuseqartarpoq.’ (Kor 1. 9:19-23) Tusarnaartimi kulturii, tunuliaqutaat upperisaallu maluginiartarpai. Taamaalior­nermigut inuit Guutimut qanillisin­niarlugit oqaluussinini inunnut tamanut tulluarsarsin­naasarpaa.

13. Allat isumaannik ataqqin­nikkutta suut pinngitsoor­tissinnaavagut? (Korintimiunut 1. 8:9)

¹³ Allat isumaasa ataqqinerisigut ersersit­tarparput uteriinnata naleqqus­sarsinnaalluta. Assersuutigalugu qatanngutit arnat ilaat pinnersarnermik nuannarisaqar­tuupput, allalli naamik. Kristumiut ilaat ingasaas­sinngitsumik imigassar­tortarput, allalli aalajangersimapput imigassar­tunngil­luinnar­niarlutik. Kristumiut tamarmik peqqissoorusupput, katsorsaariaatsilli assigiin­ngitsut toqqartarpaat. Isumaqarutta uagut toqqakkagut pitsaanerusut qatanngutillu uagutsitulli iliuuseqaq­qusarutsigit allanut naakkius­sutaalersin­naavugut avissaar­tuutitsilerlutalu. Tamannalu kissaatigin­ngilluin­narparput! (Korintimiunut 1. 8:9 atuaruk; Kor 1. 10:23, 24) Biibilimi najoqqutassianik maleruaaneq nalimmasarsin­naanermut eqqisseqatigiit­tuarnis­samullu iluaqutigisin­naavarput. Assersuusiarineqartut marluk sammeriartigit.

14. Biibilimi najoqqutassiat suut atisalersoriaatsitsinnut nujalereriaatsitsinnullu aalajangiisuutis­savagut?

 ¹⁴ Atisalersoriaaseq nujalereriaaserlu. Suut atisaris­sanerigut Jehovap naalakkin­ngilaatigut, najoqqutas­sianilli maleruagas­sippaatigut. Guutimut ataqqinaataasumik, ‘anneruniajuitsuunermik isumakkullu peqqissuunermik ersersitsisumik’ atisalersoriaaseqassaagut. (Tim 1. 2:9, 10; Pet 1. 3:3) Taamaattumik atisalersoriaatsitsigut inunnut malugeq­qussaar­nianngilagut. Utoqqaanertat atisalersoriaaseq nujalereriaaserlu pillugit allanut maleruagas­siunngin­nissaminnut Biibilimi najoqqutassiat iluaqutigisarpaat. Assersuutigalugu ilagiit ilaanni qatanngutit angutit inuusuttut nujalereriaaseq mutiusoq malillugu naatsunik tukattunillu nujalerisarput. Siunnersor­niarlugit utoqqaanertat qanoq maleruagas­siornaveersaarsin­naappat? Ilagiinnik nakkutilliisup utoqqaanertat kajumis­saarpai qatanngutit angutit inuusuttut ima oqarfigeq­qullugit: “Oqaluttarfim­miikkaangavit qanoq isikkoqarnerit oqaatsinnit maluginiar­neqarneruppat taava atisalersoriaatsinni nujalereriaatsinnilu ippinnar­toqarsimassaaq.” Utoqqaanertat maleruagas­siunngik­kaluartut nassuiaat paasiuminartoq taanna inuusuttut paasivaat. d

15. Biibilimi inatsisit najoqqutassiallu suut katsorsaariaatsit pillugit aalajangigas­satsinnut aalajangiisuutis­savagut? (Romamiut 14:5)

¹⁵ Katsorsaariaatsit. Kristumiut tamarmik immikkut peqqissusertik qanoq paarissanerlugu namminneq aalajangigassaraat. (Gal 6:5) Nakorsaariaatsimik toqqaaniar­nerminni aap anersaarsior­nerullu ingalas­simanissaat pillugit Guutip inatsisai naalattus­saavaat. (ApS 15:20; Gal 5:19, 20) Allatigulli nakorsaariaatsit suut atussanerlugit namminneq aalajangigassaraat.  Ilaasa nakorsat katsorsaariaasiat kisiat toqqartarpaat, allalli katsorsaariaatsit allaanerusut toqqartarpaat. Katsorsaariaatsip aalajangersimasup iluaqutaanera ajoqutaaneraluunniit aalajangiusimasin­naavarput, uppeqatittali allaanerusumik toqqaasin­naatitaanerat ataqqisariaqarparput. Tamatumunngali tunngatillugu uku sisamat eqqaamas­savagut: (1) Guutip kunngeqarfia kisimi ajorunnaarsitsil­luinnarsinnaavoq. (Es 33:24) (2) Peqqissutsiminut tunngatillugu aalajangiiniaraangami Kristumiup suna imminut pitsaanerusoq ‘qularin­ngilluin­nartariaqarpaa’. (Romamiut 14:5 atuaruk). (3) Allat aalajangigaannik isornar­torsiuinatalu naakkius­sutaasin­naasumik iliuuseqar­tanngilagut. (Rom 14:13) (4) Kristumiup ilagiit ataasius­suseqarnerat nammineq isummaminit pingaar­nerutikkamiuk asanninnini ersersittarpaa. (Rom 14:15, 19, 20) Taakku sisamat eqqaamagutsigit qatanngutitsinnut attaveqarluarlutalu ilagiinni eqqisseqatigiis­sitsissaagut.

16. Utoqqaanertap utoqqaaner­taqatini qanoq suleqatigil­luarsinnaavai? (Aamma assit takukkit).

¹⁶ Utoqqaanertat uteriitsuun­nginnermikkut maligas­saalluar­tariaqarput. (Tim 1. 3:2, 3) Assersuutigalugu utoqqaanertap utoqqaaner­taqatiminit utoqqaanerunini imaluunniit misilit­tagaqar­nerunini pissutigiin­narlugu isummami akuerineqar­tuaannar­nissaat naatsorsuutigis­sanngilaa. Nalunngilaa Jehovap anersaavata sunniineratigut utoqqaaner­taqatigiinni kinaluunniit silatusaartumik aalajangiil­luarnissamut kinguneqartumik oqaaseqarsin­naammat. Utoqqaanertap uteriitsuun­ngitsup allatut isumaqaraluaruniluunniit utoqqaanertat amerlanerus­suteqartut Biibilip najoqqutas­siaanut akerliun­ngitsumik isumaqatigiillutik aalajangigaat tapersersussavaa.

17. Naleqqus­sarsinnaas­suserput qanoq iluaqutigisarparput?

¹⁷ Uteriinnata naleqqus­sarsinnaas­suseqarnerput assigiin­ngitsorpas­suartigut iluaqutigisarparput. Uppeqatitsinnut attaveqarluar­nerulerlutalu ilagiinni eqqisseqatigiis­sitsisarpugut. Inuttut kulturikkullu assigiin­ngitsuunerput nuannaarutigisarparput. Tamattalu assigiin­ngitsuugaluarluta ilaqutariis­suartut Jehova kiffartorfigigatsigu nuanner­nerusoqanngilaq. Pingaar­nertullu, Jehova Guuterput ilaarparput.