1. Petrusi inuunermi naangajalernerani Jehovamit sumik suliassin­neqarpa?

 APUSTILIP Petrusip ukiorpassuarni Jehova aalajaalluni kiffartorfigaa. Jiisusi oqaluus­sinerani angalaqatigaa juutiun­ngitsunullu oqaluus­seqqaartunut ilaalluni. Kingusin­nerusukkullu siulersuisoqatigiinnut ilaasor­tanngorpoq. Inuunermi naangajalernerani Jehovamit nutaamik suliassin­neqarpoq. Ukiut 62-64 missaanni Jehovamit isumassarsisin­neqarluni allakkat marluk allappai – tassa Biibilimi Petrusimit allakkat siulliit aappaallu. Petrusip neriuutigaa toqunermi kingorna kristumiut allakkat taakku iluaqutigissagaat. – Pet 2. 1:12-15.

2. Sooq Petrusimit allakkat taamani pisariaqar­tinneqarpat?

² Petrusip uppeqatini ‘assigiin­ngitsutigut misilin­neqarneranni’ allaffigai. (Pet 1. 1:6) Inuit ajortut ilagiin­niittut iliuusipalaaqar­tarlutillu ilumuun­ngitsunik ilinniar­titsisalersimapput. (Pet 2. 2:1, 2, 14) ‘Suut tamarmik naggatissaat’ – tassa Jerusalemmip guutisiorfiullu Romamiut sakkutuuinit suujunnaarsitaanissaat – qanillimmat kristumiut Jerusalemmimi najugallit misilin­neqartus­saapput. (Pet 1. 4:7) Ajornar­torsior­nerminni siunissamilu misilin­neqarnis­saminni Petrusimit allakkat aalajaat­tuarnis­saminnut iluaqutigisimassavaat. b

3. Sooq Petrusimit allakkat misissus­savagut?

³ Petrusimit allakkat kristumiunut taamani inuusunut allataagaluartut Jehovap Biibilimut ilanngutitippai. Taamaattumik  nalitsinni ilinniarfigisin­naavagut. (Rom 15:4) Uaguttaaq inuit iliuusipalaaqartartut akornanni inuugatta misilin­neqartarpugut, taamaat­tumillu Jehovamut kiffartor­niarnerput imaannaan­ngissinnaavoq. Aammami kristumiut taamani Jerusalem­mimiittut misigisaannut sanilliullugu uagut annikil­liornar­tussarsuarmi annerungaartumik misilin­neqassaagut. Petrusimit allakkani marlunni pingaarutillit eqqaaneqarput. Taakku Jehovap ulluata nalliuf­fissaata eqqarsaatigiuar­nissaanut, inunnut qunujun­naarnissamut qamanngalu pisumik asaqatigiin­nissamut iluaqutigisin­naavagut. Aamma utoqqaanertat Petrusimit allakkani pingaarutillit ilagiin­niittut nakussatsin­niarneranni iluaqutigisin­naavaat.

4. Petrusimit allakkat aappaat 3:3, 4-milu ersersin­neqartutut suut qulalis­sutigisin­naavagut?

⁴ Inuppassuit Biibilimi siulittuutit upperin­ngilaat. Ukiorpassuarni naggatissap nalliutingajalernera oqaatigisarsimagatsigu akerlilersuisunit illaruaatigineqar­tarpugut. Taakkualu ilaat oqartarput nalliun­navianngitsoq. (Petrusimit 2. 3:3, 4 atuakkit). Inuit oqaluus­siffigisar­takkagut, suleqatigut ilaquttagul­luunniit taama oqarpata qulalersin­naavugut. Petrusip eqqaasaasa ilaat iluaqutigisin­naavagut.

5. Naammagit­tarluta naggatissap utaqqinissaanut suna iluaqutigis­savarput? (Petrusimit 2. 3:8, 9)

⁵ Ilaat isumaqarput Jehovap pissutsit ajortut atuukkun­naarnis­saannik neriorsuutiminik piviusun­ngortitsiniaasaartoq. Petrusilli eqqaasip­paatigut Jehovap piffissamut isiginnittaasia inuit isiginnit­taasiannit allaanerungaartoq. (Petrusimit 2. 3:8, 9 atuakkit). Jehovamummi ukiut tuusintit ullortut ataatsitut ipput. Jehovap kialuunniit suujunnaarsitaanissaa kissaatigin­nginnamiuk inuit naammagit­tarfigai. Kisianni ullussaa nalliuk­kumaarpoq. Tamanna utaqqitillugu sumiikkaluarut­taluunniit kikkunnut tamanut oqaluus­sisinnaanerput nuannaarutigeqaarput.

6. Jehovap ullussaa qanoq ‘eqqarsaatigiuarsin­naavarput’? (Petrusimit 2. 3:11, 12)

⁶ Petrusip kajumis­saarpaatigut ‘Jehovap ulluata nalliuffissaa eqqarsaatigiuaq­qullugu’. (Petrusimit 2. 3:11, 12 atuakkit). Qanoq taamaaliorsin­naavugut? Ullut tamaasa paratiisissami pissutsit nuannersut takorloor­tarsinnaavagut. Assersuutigalugu takorlooruk silaannaq minguitsoq peqqinnar­tunillu nerillutit. Aamma takorlooruk asasatit toqusunit makitin­neqartut eqitaarlugit inuillu qanga inuusimasut Biibilimi siulittuutit qanoq eqquussimanerat pillugu ilinniar­tillugit. Taama takorluuisaruit qilanaar­tuarnissannut naggatissallu nalliutingajalernerata upperiuar­nissaanut iluaqutigissavat. Siunissaq pillugu ‘taama ilisimatin­neqareeratta’ eqqunngitsumik ilinniar­titsisunit ‘tammartin­neqarnavian­ngilagut’. – Pet 2. 3:17.

7. Inunnut qunusarutta susoorsin­naavugut?

⁷ Jehovap ullussaa nalliutingajalersoq nalunngin­natsigu nutaarsiassat nuannersut allanut oqaluus­sissutigerusut­tarpagut. Ilaannikkulli inunnut qunusin­naagatta oqaluus­sinissamut sapiler­tarpugut. Petrusip tamanna misigaa. Unnuakkut Jiisusi eqqartuun­neqarmat Petrusip taassumannga ilinniar­titaanini oqaatiginngilaa arlaleriarlunilu Jiisusi nalunerarlugu. (Mat 26:69-75) Kingusin­nerusukkulli ima allappoq: “Qunugisaat qunugis­sanngilasi, aamma aarleris­sanngilasi.” (Pet 1. 3:14) Petrusip oqaasiinit erserpoq inunnut qununeq qaangersin­naagipput.

8. Inunnut qununngin­nissamut suna iluaqutigisin­naavarput? (Petrusimit 1. 3:15)

 ⁸ Inunnut qununngin­nissamut suna iluaqutigisin­naavarput? Petrusi ima allappoq: “[Kristusi] Naalakkatut qamannga pisumik ataqqisiuk.” (Petrusimit 1. 3:15 atuaruk). Ilaatigut taamaaliorsin­naavugut Jiisusip Kristusip kunngiunerata pissaaneqar­neratalu eqqarsaatiginerisigut. Nutaarsiassanik nuannersunik oqaluus­sinissannut periarfis­saqarninni pissangaleruit qunuleruil­luunniit kunngerput eqqarsaatigiuk. Jiisusi inngilerpassuillu qilammiittut takorluukkit. Eqqaamajuk ‘qilammi nunarsuarmilu oqartus­saassuseq tamaat’ pigimmagu aamma ‘naggatissap nalaata tungaanut ullut tamaasa najussagaatigut’. (Mat 28:18-20) Petrusip kajumis­saarpaatigut upperisarput pillugu eqqartuinissamut ‘piareersimajuaq­qulluta’. Illit suleqatinnut, atuaqatinnut allanul­luunniit oqaluus­serusuppit? Qaqugu taamaaliorsin­naanerlutit eqqarsaatigiuk qanorlu oqassanerlutit piareersarlugu. Sapiissuseq Jehovamut qinnutigiuk upperalugulu inunnut qununngin­nissannut Jehovap ikiussagaatit. – ApS 4:29.

9. Petrusi qanoq asanninnermik ersersitsin­ngitsoorpa? (Aamma assiliaq takuuk).

⁹ Petrusip qamannga pisumik asannin­nissani sulissutigiuar­tariaqarpaa. Jiisusip oqaasii uku tusaavai: “Nutaamik inappassi: Asaqatigiissaasi.  Uanga ilissinnik asanninnittut asaqatigiissaasi.” (Joh 13:34) Taamaak­kaluartoq kingusin­nerusukkut Petrusip inunnut qunulluni uppeqatini juutiun­ngitsut nereqatigiumajun­naarpai. Taamaaliormat apustilip Paulusip ‘ilumoor­tuusaar­tuunerarpaa’. (Gal 2:11-14) Petrusi taamatut naqqinneqarami allannguivoq. Allakkamini marlunni erseqqissarpaa qatanngutitsinnut asanninnerput ersersit­tassagipput.

10. ‘Ilumoor­tuusaarnata qatanngutigiittut asaqatigiin­nissatsinnut’ suna iluaqutigisarparput? (Petrusimit 1. 1:22)

¹⁰ “Guutip kikkut tamaasa assigiimmik [pisarpai].” (ApS 10:34, 35) Biibilimi ilumoortut tamanna ilagaat. Taamaattumik Biibilimi ‘ilumoortumut naalakkutta’ Petrusip allaatigisaatut ilumoor­tuusaarnata qatanngutigiittut asaqatigiissaagut. (Petrusimit 1. 1:22 atuaruk). Ilagiinni ilaannaat asannit­tuliorfigigutsigit Jiisusip asaqatigiin­nissamik peqqussutaa maleruan­ngitsuus­savarput. Soorunami ilaat ikinngutigil­luarnerusarpagut, soorlu Jiisusi qaninnerusumik ikinnguteqartoq. (Joh 13:23; 20:2) Petrusilli eqqaasip­paatigut uppeqatigut tamaasa anersaakkut ilaqutarigatsigit asassagigut. – Pet 1. 2:17.

11. ‘Ilumoorluni qamannga pisumik asaqatigiinneq’ qanoq isumaqarpa?

¹¹ Petrusi allappoq ‘ilumoorluta qamannga pisumik asaqatigiis­sasugut’. Isumaqarpoq uppeqatitta ilaata asanissaa ilungersor­naraluarpal­luunniit taanna asassagipput. Qatanngummit ajuallatsin­neqarsimagutta immaqa asannit­tuliorfiginissaa sapernar­tissinnaavarput, aallaqqaamummi akillugu ajuallatsik­kusussin­naagatsigu. Petrusili Jiisusimit ilinniar­tinneqarpoq akiniaaneq Guutip iluarin­ngikkaa. (Joh 18:10, 11) Imalu allappoq: “Ajortumik iliortoq ajortumik asissuisorlu asissuinermik akissan­ngilarsi. Ajunngitsumilli akissavarsi.” (Pet 1. 3:9) Qamannga pisumik asanninneq kajumis­sissutigalugu allaat ilinnik ajuallatsitsisimasut inussiar­nisaarfigalugillu ajunngitsuliorfigerusus­savatit.

12. (a) Qamannga pisumik asaqatigiinnerput aamma sunissatsinnut kajumis­sissutigis­savarput? (b) Videumi Beskyt vores værdifulde enhed takutin­neqartutut sunissat sulissutigerusuppiuk?

¹² Qamannga pisumik asaqatigiinneq isumakkeerfigeqatigiin­nissamut iluaqutigis­savarput. Petrusimi allakkamini siullerni allappoq ‘asanninnerup ajortuliarpassuit matoortarai’. (Pet 1. 4:8) Immaqa isumakkeerfiginninneq pillugu Jiisusimit ilikkakkani eqqarsaatigalugu taama allappoq. Siornatigut Petrusi oqarami qatanngutini ‘arfineq-marloriarluni’ isumakkeerfigisin­naallugu isumaqarunarpoq asanningaar­tuulluni. Jiisusilli oqarfigaa ‘77-eriarluni’ – tassa killeqan­ngitsumik – isumakkeerfigissagaa. (Mat 18:21, 22) Tamanna aamma uagutsinnut ilinniagas­saalluarpoq. Jiisusip oqaasii taakku maleruaruminaatsis­simagukkit nikalloqinak. Jehovammi kiffaasa tamarmik ilaannikkut isumakkeerfigin­ninnissartik sapernar­tissinnaasarpaat. Uppeqatilli isumakkeerfigalugulu eqqisseqatigiumallugu sapinngisannik iliuuseqarnerit pingaaruteqarpoq. c

13. Sooq utoqqaanertat misigisin­naappat qatanngutiminnik paarsisuunissartik piffissaqarfigil­luarnagu?

¹³ Jiisusip makititaanermi kingorna oqaasii uku Petrusip eqqaamajuarsimassavai: “Savaaraatinnik paarsisuugit.” (Joh 21:16) Petrusi  taama oqarfigineqaraluartoq utoqqaanertat nalunngilaat oqaatsit taakku maleruas­sallugit. Ilaannikkulli utoqqaanertat misigisin­naapput suliassaq pingaarutilik tamanna piffissaqarfigil­luarnagu. Ilaquttatik timikkut, misigis­sutsikkut anersaakkullu isumassoq­qaartariaqarpaat. Aamma oqaluus­sinermi aallussil­luartuul­lutillu ataatsimiinnerni ataatsimeersuar­nernilu oqalugiar­nissaminnut piareersaasarput. Ilaat Napparsim­mavinnut Attaveqartitani sanaartor­nermiluunniit suliaqartarput. Utoqqaanertat eqiasuingaaramik!

14. Utoqqaanertat ilagiinnik paarsisuunis­saminnut suna kajumis­sissutigisin­naavaat? (Petrusimit 1. 5:1-4)

¹⁴ Petrusip utoqqaaner­taqatini ima kajumis­saarpai: “Guutip savaatai ... paarisigit.” (Petrusimit 1. 5:1-4 atuakkit). Utoqqaaner­taasutit, nalunngilarput uppeqatinnik asannil­lutillu paarsisoorusuttutit. Ilaannikkulli ulapinnermik qasunermil­luunniit misigisin­naavutit paarsisuul­luarsinnaanak. Taava sussavit? Isumakuluutitit Jehovamut oqaluttuarikkit. Petrusi ima allappoq: “Kiffartuussisoq nukimmik Guutip tunniut­tagaanik isumalluuteqartutut kiffartorli.” (Pet 1. 4:11) Imaassinnaavoq qatanngutitit maanna aaqqinneqarsin­naanngitsunik ajornar­torsiuteqartut. Kisianni puioqinagu ‘savanik paarsisuunerup’, Jiisusip Kristusip, illit iliuuserisin­naasatit akimorlugit maanna paratiisissamilu ikiorluar­nerusinnaagai. Jehovap utoqqaanertat piumaffigiinnarpai uppeqatiminnik asannit­tuussasut, paarsisuussasut ‘savanullu maligas­siuissasut’.

15. William qanoq paarsisuul­luartuua? (Aamma asseq takuuk).

¹⁵ Williamip, ukiorpassuarni utoqqaanertatut kiffartorsimasup, paasilluarpaa paarsisuunissap pingaaruteqassusia. COVID-19 atuutilermat utoqqaaner­taqatinilu aalajangerput oqaluus­sisartoqatigiin­niittut immikkut tamaasa sapaatit-akunneri tamaasa attaviginiarlugit. Sooq taamaalior­nerlutik ima nassuiarpaa: “Qatanngutitta ilarpassui kisimiillutik angerlarsimaan­nartuugamik nikallor­nartunik eqqarsaateqariaan­naasarput.” Williamip uppeqatini ajornar­torsiortut tusarnaaq­qissaartarpai paasiniarlugu qanoq ikiorsin­naanerlugit. Taava nittartak­katsinni videut allallu iluaqutigisin­naasaat ujartarpai. Oqarpoq: “Ilagiinnik paarsisuuneq aatsaat  taama pingaaruteqartigaaq. Inuit nalusagut Jehova pillugu ilinniar­tikkumallugit ilungersor­tarpugut. Aamma ilagiinnik paarsisuujumalluta taama ilungersor­tigisariaqarpugut, taamaalillutami Jehovap savaatai aalajaat­tuarnis­saannut ikiussavagut.”

16. Petrusimit allakkani ilikkakkagut qanoq atorluarsin­naavagut?

¹⁶ Petrusimit allakkani marlunni ilinniarsin­naasatta ilaannaat eqqartorpagut. Immaqa sulissutigerusutannik maluginiagaqarsimavutit. Assersuutigalugu: Paratiisissami pissutsit nuannersut eqqarsaatigisar­nerorusuppigit? Imaluunniit suleqatinnut, atuaqatinnut allanul­luunniit oqaluus­sinissat anguniagarisin­naaviuk? Uppeqativit qamannga pisumik asannit­tuliorfiginissaat eqqumaf­figinerusin­naaviuk? Utoqqaaner­taasusi, Jehovap savaataanik kajumillusi paarsisuul­luarnissarsi aalajangiusimavisiuk? Apeqqutit taakku eqqarsaatigil­luarukkit imaassinnaavoq sanngiif­feqarlutit paasigit, nikalloqinalli. ‘Naalagarmi [Jiisusi] ajunngitsuuvoq’, taassumalu ikiorumaarpaatit. (Pet 1. 2:3) Petrusip ima neriorsorpaatigut: “Guutip ... ilinniar­tinneqarnersi naammas­sissavaa. Aalajaal­lisillusilu nakussatsillusilu patajaal­lisissavaasi.” – Pet 1. 5:10.

17. Aalajaat­tuarutta Jehovamillu ilinniar­tinneqar­tuarluta sumik kinguneqassava?

¹⁷ Jiisusi ilagissallugu Petrusi ajukkus­simavoq. (Luk 5:8) Kisianni Jehova Jiisusilu ikiortigalugit Jiisusimik malinnittutut aalajaat­tuarpoq. Taamaattumik “Naalakkatta Aniguisitsisittalu Jiisusip Kristusip kunngeqarfianut atajuar­tussamut” isertitaavoq. (Pet 2. 1:11) Akissarsiaa nuanningaarami! Illittaaq Petrusitut aalajaat­tuaruit Jehovamillu ilinniar­tinneqar­tuarlutit inuunermik naassaan­ngitsumik akissarsisin­neqarumaarputit. ‘Upperavit aniguisitaassaatit.’ – Pet 1. 1:9.