1. Tupinnar­tuliornikkut aalisagarpas­suarnik pisaqaramik Petrusi qanoq qisuariarpa?

 PETRUSI unnuaq naallugu aalisaraluarami pisaqan­ngitsoorpoq. Tupaallaatigisaanik Jiisusip ima oqarfigaa: “Itisuumut avalagit qassutitillu ningillugit.” (Luk 5:4) Petrusip pisaqar­nissani qularigaluarlugu peqquneqar­nermisut iliorpoq. Petrusi aalisaqatinilu ima pisaqartigaat allaat qassutaat alittor­tuinnan­ngorlutik. Paasigamikku Jiisusi tupinnar­tulioqqammersoq Petrusip ilagisaasalu tupigusuutigingaarpaat. Ima nillerpoq: “Naalagaq, angutaagama ajortilik qimannga.” (Luk 5:6-9) Petrusi Jiisusip sanianiin­nissaminut ajukkutin­nguatsiarpoq.

2. Petrusip maligas­siaanik misissuinerput qanoq iluaqutigisin­naavarput?

² Petrusi ilumoorpoq, ‘angutaavormi ajortilik’. Biibilimi oqaluttuarineqarpoq ilaannikkut peqqissimis­sutigisaminik oqarlunilu iliuuseqar­tarsimasoq. Illit aamma taamatut misigisarpit? Nuanniitsumik ileqqulius­simasannik akiugaqarpit, imaluunniit sanngiis­sutinnik sivisuumik sulissuteqarpit? Taamaappat Petrusip maligas­siaanik misissuinerit tuppallersaatigisinnaavat. Tassa qanoq? Una eqqarsaatigiuk: Petrusip kukkussutai Jehovap Biibilimut allanneqar­nissaat minissimasin­naagaluarpai. Ilinniutiginias­sagatsigilli allanneqartippai. (Tim 2. 3:16, 17) Petrusi uagutsitulli sanngiif­feqartoq misigis­suseqartorlu pillugu ilinniar­nitsigut paasissavarput Jehovap kukkujuitsuunis­satsinnik piumasaqarfigin­ngikkaatigut. Sanngiis­suteqaraluartugut tunniutiin­narnata aalajaat­tuarnissarput kissaatigaa.

3. Sooq tunniutiin­nassanngilagut?

 ³ Sooq tunniutiin­nanngin­nissarput pisariaqarpa? Oqartoqartarpoq: Sungiusartorooq pikkoris­sisarpoq. Assersuuteqariarta. Nipilersortartoq nipilersul­laqqissiumalluni ukiorpassuarni nipilersuutiminik sungiusartarpoq. Kukkusaqat­taaraluarluni sungiusar­tuartarpoq. Pikkoris­sigaluarluniluunniit suli kukkusinnaavoq. Tunniutiin­narnanili sungiusar­tuarpoq. Taamatuttaaq sanngiis­sutitta ilaat qaangersimasorigaluarlugit nakkaqqit­toorsin­naavugut. Sulissuteqar­tuarpugulli. Tamatta kingusin­nerusukkut peqqissimis­sutigisatsinnik oqartoorlutalu iliuuseqar­toorsin­naavugut. Pitsanngoriar­nissatsinnulli Jehovap ikiortuarsin­naavaatigut tunniutiin­nanngikkutta. (Pet 1. 5:10) Petrusip tunniutiin­nannginnera sammeriartigu. Kukkussuteqaraluartoq Jiisusimit nallittor­neqarnera Jehovamut kiffartor­tuarnis­satsinnut kajumis­sissutigisin­naavarput.

4. Petrusi qanoq imminut taava, Jiisusillu qanoq ikiorpaa? (Lukkarsi 5:5-10)

⁴ Biibilimi allassimanngilaq Petrusi sooq imminut ‘angutitut ajortilittut’ taasoq imaluunniit ajortuliani suut eqqarsaatiginerai. (Lukkarsi 5:5-10 atuakkit). Imaassinnaavoq ingasattumik kukkusimasoq. Jiisusip nalunngilaa Petrusi annilaangasoq immaqa imminut ajukkummat. Jiisusilli aamma nalunngilaa Petrusi aalajaat­tuarsinnaasoq. Taamaattumik asannittumik ima oqarfigaa: “Annilaangas­sanngilatit.” Jiisusip Petrusimik tatigin­ninnera sunniuteqangaarpoq. Petrusip qatanngutaatalu Andariarsip aalisarneq inuussutis­sarsiutigiun­naarlugu piffissaq tamaat Missiarsi malilerpaat. Aalajangigartillu pilluaq­quneqaatigaat. – Mak 1:16-18.

5. Ajukkuk­kaluarluni Jiisusip qaaqqusinera akuerigamiuk Petrusi qanoq pilluaq­quneqarpa?

⁵ Petrusi Kristusimik malinnit­tuugami nuannersorpas­suarnik misigisaqarpoq. Takuaa Jiisusi napparsimasunik ajorunnaarsitsisoq, anersaapilunnik anisitsisoq allaallu toqusunik makititsisoq. b (Mat 8:14-17; Mak 5:37, 41, 42) Petrusip aamma takorruuisin­neqarluni takuaa Jiisusi Guutip kunngeqarfiani kunngitut naalakkersuilersoq, takusanilu puiunngisaannarpaa. (Mak 9:1-8; Pet 2. 1:16-18) Aap, Jiisusimik malinnit­tunngorsiman­ngikkaluaruni takusani takusimanavian­ngikkaluarpai. Qanoq nuannaar­tigisimassava imminut pilluni misigissutsit nuannin­ngitsut aqutsisuutin­nginnamigit. Taamaaliorsimagaluaruni  nuannersorpassuit tamakku misigisimanavian­ngikkaluarpai.

6. Petrusip sanngiissutini qaangipallappai? Nassuiaruk.

⁶ Petrusi nuannersunik takusaqaraluarluni tusagaqaraluarlunilu suli sanngiis­sutsiminik akiugaqar­tuarpoq. Ilaat eqqarsaatigeriakkit. Jiisusip Biibilimi siulittuutigineqartutut naalliulluni toqutaanissani nassuiarmagu Petrusip avoqqaaraa. (Mak 8:31-33) Aamma arlaleriarlutik Petrusip apustileqatinilu kina annerunersoq assortuus­sutigisarpaat. (Mak 9:33, 34) Jiisusip toqunissaa aqaguttoq Petrusip angut panarlugu siutaarpaa. (Joh 18:10) Unnuaq taanna Petrusi inunnut ersilerami pingasoriarluni ikinngutini Jiisusi nalunerarpaa. (Mak 14:66-72) Tamatuma kingunerisaanik aliasunnermik qissaserpoq. – Mat 26:75.

7. Jiisusip makititaanermi kingorna Petrusi qanoq periarfissippaa?

⁷ Jiisusip apustilini aliasungaartoq imminiigin­nanngilaa. Jiisusip makititaareernermi kingorna Petrusi periarfissippaa uppernarsaq­qullugu suli asagaani. Oqarfigaa savaaraatiminik paarsisooq­qullugu. (Joh 21:15-17) Petrusilu akuersivoq. Ullormi piinsimi Jerusalem­mimiippoq, anersaamillu illernartumik taninneqartut siulliit ilagaat.

8. Petrusi Antiokiami qanoq kukkorujussuarpa?

⁸ Allaat kristumiutut tanitaareernermi kingorna Petrusi sanngiis­sutsiminik suli akiugaqarpoq. Ukiumi 36-mi Guutip Petrusi Korniiliusimut juutiun­ngitsumut aallartippaa. Guutip Korniiliusi anersaamik illernartumik tanimmagu erserpoq “kikkut tamaasa assigiimmik pisarai” juutiun­ngitsullu ilagiinnut kristumiunut ilaasin­naalersut. (ApS 10:34, 44, 45) Tamatuma kingornatigut Petrusip juutiun­ngitsut nereqatigisalerpai, uffa siornatigut taamaaliorun­narnani. (Gal 2:12) Kristumiulli juutiusut ilaat isumaqarput juutit juutiun­ngitsullu nereqatigiit­tassanngitsut. Taama isumallit Antiokiamut tikimmata Petrusip uppeqatini juutiun­ngitsut nereqatigiumajun­naarpai. Uppeqatini juutiusut ajuallatsik­kusunnagit taamaaliorunarpoq. Apustilip Paulusip tamanna takugamiuk allat tusaatillugit Petrusi avoqqaaraa. (Gal 2:13, 14) Taama kukkussuteqaraluarluni Petrusi tunniutiin­nanngilaq. Suna iluaqutigigamiuk?

9. Johannesi 6:68, 69-milu allassimasutut Petrusip ilumoorfigin­ninnini qanoq ersersippaa?

⁹ Petrusi ilumoorfigin­nikkami Jiisusimik malinnin­nissaminut sumilluunniit akornuser­neqarusunngilaq. Assersuutigalugu ilinniar­titaasa paasisin­naanngisaannik Jiisusi oqaaseqarmat Petrusip ersersippaa ilumoorfigin­nittuulluni. (Johannesi 6:68, 69 atuakkit). Jiisusi nassuiaanissaanut periarfis­sinngivillugu ilinniar­titaasa amerlasuut qimappaat, Petrusiun­ngitsulli. Oqarpoq Jiisusip oqaasii kisimik ‘naassaan­ngitsumik inuussutaasut’.

10. Jiisusip qanoq ersersippaa Petrusi tatigalugu? (Aamma assiliaq takuuk).

¹⁰ Jiisusip Petrusi alanngilaa. Toqunissi aqaguttoq unnukkuutaani nalunngilaa Petrusip apustileqataasalu qimassagaanni. Taamaak­kaluartorli Jiisusip Petrusi oqarfigaa qularinagu imminut uterumaartoq aalajaat­tuarumaartorlu. (Luk 22:31, 32) Jiisusip nalunngilaa ‘siunertarineqartoq ajunngitsuusoq, timili sanngiitsoq’. (Mak 14:38) Taamaattumik Petrusip naluneraraluaraani Jiisusip tatigiun­naanngilaa. Makititaareernermi kingorna Jiisusi Petrusimut, immaqa kisimiitsillugu, takutippoq. (Mak 16:7; Luk 24:34; Kor 1. 15:5) Petrusimut iliuuserisimasaminik aliasuutigin­nittumut tamanna qiimmaal­laataasimassaaq!

11. Jiisusip Petrusi qanoq qularun­naarsippaa Jehovamit isumagineqarumaartoq?

 ¹¹ Jiisusip Petrusi qularun­naarsippaa Jehovap pisariaqar­titaanik isumagiumaaraa. Jiisusip makititaasimasup tupinnar­tulioqqin­nermigut Petrusi apustileqataalu aalisakkanik pisaqartippai. (Joh 21:4-6) Qularnan­ngitsumik tupinnartuliaq tamanna pissutigalugu Petrusi qularun­naarpoq ajornaquteqan­ngitsumik pisariaqar­titaminik Jehovamit isumagineqarsin­naalluni. Immaqa Petrusip Jiisusip oqaasii eqqaavai Guutip kunngeqarfianik salliutitsiuartut isumagiumaarai. (Mat 6:33) Taamaattumik Petrusip oqaluussineq aalisar­tuunermin­ngarnit pingaar­nerutilerpaa. Ukiumi 33-mi ullormi piinsimi Petrusi sapiilluni oqaluussimmat inuit tuusintillit uppertun­ngorput. (ApS 2:14, 37-41) Tamatuma kingorna Samaariamiut juutiun­ngitsullu Jiisusimik upperin­nilernis­saannik ikiorpai. (ApS 8:14-17; 10:44-48) Taamaalilluni Jehovap Petrusi aqqutigalugu inuppassuit assigiin­ngitsunik tunuliaqutallit ilagiinnut ilanngutitippai.

12. Sanngiis­sutitsinnik sivisuumik akiugaqarsimagutta Petrusip maligassiaa qanoq iluaqutigisin­naavarput?

¹² Jehovap tunniutiin­nanngin­nissamut ikiorsin­naavaatigut. Aalajaat­tuarneq oqitsuinnaaneq ajorpoq, pingaartumik sivisuumik akiugaqarsimagaanni. Ilaannikkut sanngiis­sutigut Petrusip sanngiis­sutaanut naleqqiullugit unamminiar­narnerorpasis­sinnaapput. Jehovalli nakussatsis­sinnaavaatigut. (Tuss 94:17-19) Assersuutitut eqqaasin­naavarput qatanngut angut Nalunaajaasun­ngunngik­kallarami ukiorpassuarni anguteqatiminoor­tartuusimasoq. Biibilimi najoqqutassianik maleruaalerluni inooriaatsiminik allannguerujus­suarpoq. Ilaatigulli suli pileris­susipiloqartarpoq. Tunniutiin­nanngin­nissaminut suna iluaqutigisimallugu ima nassuiaavoq: “Jehova nakussatsitsisoraara. Jehovap anersaava ikiortigalugu ilikkarpara kissaatigisaatut inooriaaseqar­tuaannarsin­naalluta. Jehovap atorsin­naasimavaanga, kukkussuteqar­taraluar­tungalu nakussatsit­tuarpaanga.”

13. Petrusip maligassiaa qanoq ilaarsin­naavarput? (Apustilit Suliaat 4:13, 29, 31) (Aamma assiliaq takuuk).

¹³ Soorlu sammereeripput, Petrusi inunnut ersilluni ataasiaannarani kukkusarsimavoq. Sapiissuseqalerseq­qullunili qinugami nakussatsin­neqarpoq. (Apustilit Suliaat 4:13, 29, 31 atuakkit). Uaguttaaq ersigaluarluta sapiissuseqalersin­naavugut. Qatanngut  angut Horstimik atilik sorsunnersuup kingulliup nalaani Tysklandimi meeraasimasoq eqqarsaatigeriaruk. Ataasiaannarani atuarfimmi inunnut qunulluni “Heil Hitler”-imik oqartoor­tarsimavoq. Angajoq­qaavisa naveernagu sapiissuseqaq­qullugu Jehovamut qinoqatigaat. Angajoq­qaaminit ikiorneqarluni Jehovalu tatigalugu Horst aalajaat­tuarnis­saminut nakussatseqqippoq. Kingusin­nerusukkut oqarpoq: “Jehovap imminiigin­nanngisaan­narpaanga.” c

14. Utoqqaanertat asannittut nikallungasunik qanoq ikiuisin­naappat?

¹⁴ Jehovap Jiisusillu imminiigin­narnavian­ngilaatigut. Petrusip Jiisusi nalunerareerlugu pingaarutilimmik aalajangigas­saqalerpoq. Tunniutiin­nassava imaluunniit Kristusimut malinnit­tuassava? Petrusi upperun­naaqqunagu Jiisusip qamannga pisumik qinnussimallugu oqaluttuuppaa. Oqarfigaalu qularinagu kingusin­nerusukkut qatanngutini nakussatsik­kumaarai. (Luk 22:31, 32) Petrusip taama oqarfigineqarnini eqqarsaatigigaangamiuk tunniutiin­nanngin­nissaminut nakussatsis­sutigisarsimassavaa! Inuunitsinni pingaarutilinnik aalajangigas­saqartilluta Jehovap utoqqaanertat asannittut aqqutigalugit aalajaaq­qulluta ikiorsin­naavaatigut. (Ef 4:8, 11) Ukiorpassuarni utoqqaaner­taasimasup Paulimik atillip uppeqatini taamatut nakussatsin­niartarpai. Nikallungallutik tunniutiin­naqqajaasut eqqaasittarpai eqqarsaatigeq­qullugu Jehovap qanoq imminut qanillisis­simagaatik. Taava oqarfigisarpai Jehovap asajuaramigit imminiigin­narnavian­ngikkai. Oqarpoq: “Jehova ikiortigalugu tunniutiin­narsiman­ngitsorpassuit nalunngilakka.”

15. Petrusip Horstillu misigisimasaannit qanoq erserpa Matiusi 6:33-mi allassimasut ilumoortuusut?

 ¹⁵ Soorlu Petrusip apustilillu allat pisariaqartitaat Jehovap matussusersimagai, uaguttaaq kiffartornerput salliuk­kutsigu Jehovap pisariaqar­titatsinnik isumagiumaarpaatigut. (Mat 6:33) Sorsunnersuup kingulliup kingorna Horstip, siuliani eqqaaneqartup, eqqarsaatigaa pionerin­ngorsin­naanerluni. Piitsuungaarporli, isumakuluutigaalu piffissaq tamaat kiffartuleruni imminut pilersorsin­naassanerluni. Qanoq iliorpa? Aalajangerpoq Jehova misilin­niarlugu. Nakkutilliisup angalasartup tikeraarnerani sapaatip-akunnera naallugu oqaluus­seqataavoq. Sapaatip-akunnera naammat nakkutilliisup angalasartup allakkat puussaanik aningaasanik imalimmik tunimmani tupaallappoq. Naluaa aningaasat sumingaan­neernersut, qaammatinili arlalinni pioneriunissaanut naammapput. Taama tunineqarami Horstip qulariun­naarpaa Jehovap isumagis­sagaani. Inuunini tamaat Guutip kunngeqarfia salliut­tuarpaa. – Mal 3:10.

16. Sooq Petrusip maligassiaa allagaalu soqutigis­savagut?

¹⁶ Naak Petrusi oqarnikuugaluarluni Jiisusi imminit qimagutissasoq nuannaangaarsimassaaq qimanngimmani! Kristusip Petrusi apustilitut aalajaat­tuarsin­naaqqullugu kristumiunullu maligas­saalluaq­qullugu ilinniar­tittuarpaa. Ilinniar­titsissutaalu uagut ilinniarfigil­luarpagut. Ilinniar­titsissutit taakkua ilaat allallu isumassarsisitaalluni Petrusip allappai allakkallu marluk taakku ilagiinnut kristumiunut siullernut nassiullugit. Petrusimit allakkani marlunni ilinniagassat ilaat qanoq maleruarsin­naanerlutigit allaaserisap tulliani sammissavarput.