1. Suliffimmi atuarfim­miluunniit suna nalaassin­naavarput?

 SULEQATIT atuaqatil­luunniit upperisatit pillugit aperigaangat qanoq misigisarpit? Ernumaam­mertarpit? Tamangajatta taamaat­tarunarpugut. Taassumali apeqqutaa qanoq eqqarsar­neranik qanorlu isumaqar­neranik ersersitsisinnaavoq, tamannalu oqaluus­sinissatsinnut periarfis­satsialaasinnaavoq. Imaassin­naavorli isumaqatigin­nginniaan­narluta oqqakkumal­luniluunniit aperisoq. Tamanna tupaallaatigis­sanngilarput. Ilaammi upperisagut pillugit eqqunngitsumik paasitin­neqarsimagamik. (ApS 28:22) Aammami “ulluni kingullerni” inuugatta inuppassuit ‘saammar­titassaan­ngillat saassus­siumatuujul­lutillu’. – Tim 2. 3:1, 3.

2. Sooq saamasoorusuppugut?

² Immaqa ima eqqarsarputit: ‘Upperisakka pillugit oqqakkumasoq qanoq inussiar­nersumik periaaseril­lungalu pisinnaavara?’ Saamasuunerit iluaqutigisinnaavat. Inuk saamasoq kamassaar­neqaraangami imminut aqussin­naasarpoq qanorlu akissanerluni nalornis­sutigigaangamiuk eqqissisimaan­nartarluni. (Uss 16:32) Tamannali oqitsuinnaaneq ajorpoq. Saamasuuneq qanoq ineriar­tortissin­naaviuk? Upperisatit apeqquser­neqaraangata qanoq saamasumik akisinnaasarpit? Meeraqaruit meeqqatit upperisamik saamasumik nassuiaanis­saannik qanoq ikiorsin­naavigit? Tamakku sammeriartigit.

3. Sooq inuit saamasut sanngiitsuunatik nukittuujuppat? (Timuutiusimut 2. 2:24, 25)

³ Inuit saamasut sanngiitsuunatik nukittuujupput. Inuk ilungersunartumik nalaataqarnermi eqqissisimaan­narsinnaajumalluni qamuuna nukittusariaqarpoq. “Saamaneq” anersaap inerititaanut ilaavoq. (Gal 5:22, 23) Hiistimik nujuillisaaneq nassuiar­niarlugu grækerisut oqaaseq ‘saamasumik’ nutserneqartoq atorneqartarpoq. Hiisti nujuillisar­neqarsimasoq takorlooruk. Suli nukeqaqaaq, eqqissisimanissarli ilikkarsimavaa. Uagummi, saamaneq nukittoq­qutitut qanoq ineriar­tortissin­naavarput? Nammineerluta saperpugut. Pissuseq nuannersoq taanna ineriar­tortikkumallugu Guutimut ikioqqusariaqarpugut anersaava qinnutigalugu. Inuppassuit saamasun­ngorsimapput. Assersuutigalugu qatannguterpassuagut akerlilersuisunit kamassaar­neqaraluarlutik saamasumik akisimapput. Tamannalu pissutigalugu allat Nalunaajaasunut ajunngitsumik isiginnit­taaseqalersimapput. (Timuutiusimut 2. 2:24, 25 atuakkit). Qanoq ilillutit saamaneq pikkorif­figilersin­naaviuk?

4. Saamaneq pillugu Iisaaq qanoq ilinniarfigisin­naavarput?

⁴ Biibilimi oqaluttuarpas­suaqarpoq saamanerup pingaaruteqas­susianik ersersitsisunik. Iisaaq eqqarsaatigeriartigu. Filisterit najugaqarfiannut Gerarimut nuummat tassani najugaqartut sinngagigamikku puilasuliat Aaperaap kiffaasa assassimasaat issumik immerlugit milippaat. Akiuunnani Iisaaq inoqutinilu ungasin­nerulaartumut nuupput puilasulianillu allanik assaallutik. (Mos 1. 26:12-18) Puilasulialli taakku aamma filisterit piginerarpaat. Taamaak­kaluartoq Iisaaq eqqissisimasumik pivoq. (Mos 1. 26:19-25) Arlaleriarluni kamassaar­neqaraluarluni saamasuunis­saminut suna iluaqutigaa? Angajoqqaami maligassiaat, Aaperaap eqqissinermik nuannarisaqarnera Saarallu ‘eqqissisimajuarlunilu saamajuarnera’, maluginiarlugillu ilinniarfigil­luarsimassavai. – Pet 1. 3:4-6; Mos 1. 21:22-34.

5. Angajoqqaat meeqqatik saamanerup pingaaruteqas­susianik ilinniar­tissinnaavaat? Assersuuteqarit.

⁵ Angajoq­qaajususi, aamma ilissi meeqqasi saamanerup pingaaruteqas­susianik ilinniar­tissinnaavasi. Max b 17-inik ukiulik qanoq misigisaqartoq eqqarsaatigiuk. Atuarfimmi oqaluus­sinermilu inunnit kamaffigineqartarpoq. Angajoq­qaavisa saamasuunermik ineriar­tortitsinissaanik naammagit­tarlutik ikiorpaat. Ima oqarput: “Maxip maanna paasivaa qamuuna nukittuujusut kamannatik nakuusernatik imminulli aqussinnaasut.” Qujanartumik Maxip saamaneq ilikkarsimallugu nukittoq­qutigilerpaa.

6. Saamasuuniar­nitsinni qinuneq qanoq iluaqutigisin­naavarput?

⁶ Allanit kamassaar­neqaraangatta, soorlu Jehova Biibililuunniit pillugu nuanniitsunik oqaaseqar­toqaraangat, qanoq iliussaagut? Saamasumik pissuseqarumalluta Jehova qinnuigisariaqarparput anersaaminik ilisimas­sutsiminillu tuneqqulluta. Taavami kingusin­nerusukkut paasigutsigu pitsaanerusumik pissuseqarsin­naagaluarluta? Taava tamanna pillugu qinoqqis­sinnaavugut eqqarsaatigalugulu qanoq tullissaanut ajunngin­nerusumik pissuseqarsin­naanerluta. Imminut aqussin­naaqqulluta saamasooq­qullutalu Jehovap anersaaminik illernartumik tuniumaarpaatigut.

7. Allassimaffiit aalajangersimasut alanngaar­nissaat oqaatsitta iliuutsittalu aqunnis­saannut qanoq iluaqutigisin­naavarput? (Ussatit 15:1, 18)

⁷ Saamasumik oqalunnissamik sapernar­titsigaangatta Biibilimi allassimaffiit iluaqutigisin­naavagut. Guutip anersaavata allassimaffiit  taakkua eqqaamanis­saannut ikiorsin­naavaatigut. (Joh 14:26) Assersuutigalugu najoqqutassiat Ussatiniittut saamasuunis­satsinnut iluaqutigisin­naavagut. (Ussatit 15:1, 18 atuakkit). Aamma Ussatini erseqqis­sarneqarpoq pissutsini najummas­simanartuni imminut aqussinnaaneq qanoq iluaqutaatigisoq. – Uss 10:19; 17:27; 21:23; 25:15.

8. Sooq eqqarsaatigeq­qissaar­tariaqarpagut inuup oqaasiinut suut pissutaasin­naanersut?

⁸ Silatussuseq iluaqutigisin­naavarput. (Uss 19:11) Upperisaa apeqquser­neqaraangat inuk silatooq imminut aqussin­naasarpoq. Soorlu ilulissap annersaa immap iluaniittoq ilaannaalu takusin­naagipput, taamatuttaaq inuup apeqqutai oqaasiilu tusarnaaraangatsigit amerlanertigut nalusarparput sooq taama oqarnersoq. Taamaattumik pitsaassaaq akinngin­nitsinni oqaasiinut pissutaasinnaasut eqqarsaatigeq­qaarutsigit. – Uss 16:23.

9. Giidiuup silatusaarluni Efraimikkut qanoq saamasumik pivai?

⁹ Giidiuup Efraimikkunnut qanoq akinersoq eqqarsaatigiuk. Angutit taakkua kamallutik Giidiuut avoqqaarlerfigaat sooq Israalikkunnut akeraasunut siusinnerusukkut sorsoqataaq­quneqarsiman­nginnerlutik. Kamannerannulli tamanna pissutis­sarpiaava? Imaluunniit  pingaar­niarpal­laarpat? Pissutaasoq suugaluarpal­luunniit misigissusii Giidiuup silatusaarluni paasiniarsarai saamasumillu akillugit. ‘Taama oqaluffigimmatik noqqillapput kamakkun­naarlutillu.’ – Eqq 8:1-3.

10. Upperisarput pillugu aperineqarutta periaaseril­luarnis­satsinnut suna iluaqutigis­savarput? (Petrusimit 1. 3:15)

¹⁰ Imaassinnaavoq suleqatitta atuaqatit­taluunniit aperigaatigut sooq najoqqutassiat Biibilimeersut maleruar­tarigut. Sooq Biibilimi allassimasunik maleruaanerup pitsaanerpaajuneranik sapinngisatsinnik nassuiaan­niartarparput. Aammali aperisup isumaa ataqqivarput. (Petrusimit 1. 3:15 atuaruk). Apeqqutaa saassus­sinertut isiginagu soqutigisaanut pingaar­titaanullu ersiutaasutut isiginiar­tarparput. Apeqqutaanut sunaluunniit pissutaagaluarpat periaaserilluta inussiar­nersumik akiniar­tarpugut. Immaqalu akissuterput pissutigalugu isummani eqqarsaatigeq­qilersinnaavaa. Pissusaa soqqusaallunilu tusangiasaarerpaluk­kaluartoq tamatigut inussiar­nersumik akinissarput anguniagaris­savarput. – Rom 12:17.

11-12. (a) Apeqqutip akiuminaatsup akinnginnerani suut eqqarsaatigisin­naavagut? (Aamma asseq takuuk). (b) Ammasumik oqaloqatigiit­toqalersin­naaneranik assersuuteqarit.

¹¹ Suleqammit aperineqarutta sooq inuuissiorneq ajortugut uku eqqarsaatigisin­naavagut: Nuannisaaq­qusaanngin­nersugut eqqarsaatiginerpaa? Imaluunniit allaanerunerput suleqatigiil­luarnermut akornutaas­sanersoq isumakuluutiginerpaa? Suleqatiminik soqutigin­ninnera pillugu nersualaarsin­naavarput qularun­naarsillugulu suleqatigiil­luarnissarput pingaar­tikkipput. Taamaalilluta isumakuluutaanik qasukkar­titsisin­naavugut immaqalu inuuissiorneq pillugu isummatsinnik Biibili tunngavigalugu oqaluttuullugu.

¹² Akerleriis­sutigineqar­tartunik allanik aperineqarutta assingusumik periaaseqarsin­naavugut. Imaassinnaavoq atuaqaterput oqartoq Jehovap Nalunaajaasuisa arnaqatinik anguteqatinil­luunniit atoqateqarnermut isiginnit­taasiat allanngor­tissagaat. Paasilluarsiman­nginnerpaa Jehovap Nalunaajaasuisa tamatumunnga tunngatillugu suna upperineraat? Imaluunniit anguteqatimin­noortumik ikinnguteqarnerpa ilaqutaqarluniluunniit? Isumaqarpa taama inooriaasillit uumissorigut? Immaqa qularun­naarsit­tariaqarparput inuit tamaasa soqutigigigut inuillu tamarmik namminneq aalajangiisin­naatitaanerat ataqqillugu. c (Pet 1. 2:17) Taava immaqa Biibilimi najoqqutassiat inuunitsinni qanoq iluaqutaatiginerannik oqaluttuus­sinnaavarput.

13. Guutimik upperin­ninnermik sianiitsulior­neraasoq qanoq ikiorsin­naaviuk?

¹³ Isumaqataan­ngilluin­nartoqarpat isummipal­lassanngilagut suna upperineraa ilisimallutigu. (Tit 3:2) Assersuutigalugu atuaqatit oqarpat Guutimik upperinninneq sianiitsulior­nerusoq qanoq iliussavit? Isummissavit pinngoriar­tuaarsimaneq upperil­luinnaraa tamannalu pillugu ilisimasaqarluartoq? Naamik, imaassin­naavormi tusakkani uteqqiinnaraa. Pinngoriar­tuaarsimaneq pillugu oqalliseqatiginagu atuaqativit eqqarsaatigilersin­naasaanik oqarsin­naavutit. Immaqa jw.org-imi pinngor­titsineq pillugu paasissutissanik innersuus­sisinnaavutit. Taava imaassinnaavoq allaaserisaq videuluunniit nittartak­katsinneersoq pillugu oqaloqatigerusukkaatit. Taamaalillutit ataqqin­nittumik periaaseqaruit imaassinnaavoq Biibili pillugu paasisaqar­nerorusuttoq.

14. Nickip nittartagarput qanoq atorluarsimavaa?

¹⁴ Inuusuttup Nickimik atillip inuit Jehovap Nalunaajaasui pillugit oqaatigisar­tagaasa eqqunngitsuunerannik uppernarsaaniarluni  nittartagarput atortarpaa. Ima oqarpoq: “Atuaqatima ilaata oqarfigisarpaanga ilisimatusarneq upperin­ngikkiga atuagaq oqaluttualiaannarnik imalik upperigakku, uppernarsaatit piviusut pinnagit.” Nickip upperisani pillugu nassuiaanissaanik atuaqataa tusarusun­ngimmat jw.org-imi sammisaq “Ilisimatusarneq Biibililu” innersuus­sutigaa. Kingusin­nerusukkut Nickip paasivaa atuaqataata paasissutissat atuarsimagai, taamaalilluni inuuneq qanoq aallartif­feqarsimanersoq oqaloqatigisin­naasimavaa. Immaqa aamma illit assingusumik misigisaqarsin­naavutit.

15. Angajoqqaat meeqqatik saamallutik upperisaminnik nassuiaanis­saannik qanoq ilinniar­tissinnaavaat?

¹⁵ Angajoqqaat meeqqatik isornar­torsiuisunut qanoq saamallutik upperisaminnik nassuiaanis­saannik ilinniar­tissinnaavaat. (Jaak 3:13) Angajoqqaat ilaat ilaqutariittut Biibilimik misissueqatigiinnermi meeqqatillu sungiusaqatigiittarput. Atuarfimmi nalaassin­naasaat pillugit eqqartuisarput qanorlu akisinnaanerannik sungiusarlutik. Meeqqatik qanoq saamasumik tusaruminar­tunillu oqaaseqar­nissaannik ilinniar­tittarpaat. – Ungalusaq “ Ilaqutariittut sungiusaqatigiittarneq iluaqutigisiuk” takuuk.

16-17. Sungiusaqatigiittarneq inuusuttut qanoq iluaqutigisin­naavaat?

¹⁶ Ilaqutariittut sungiusaqatigiittarneq inuusuttut namminneq upperin­nillualer­nissaminnut upperisatillu pillugit allanut tunngavis­saqarluarlutik nassuiaanis­saminnut iluaqutigisin­naavaat. Nittartak­katsinni jw.org-imi allaaserisat “Inuusuttut aperipput” aamma “Inuusut­tuaqqanut immersugassat” iluaqutaasin­naapput. Inuusuttut uppernikkut nakussatsin­nissaannut taavalu namminneq oqaatsiminnik nassuiaanis­saannut iluaqutaasussatut sanaajupput. Ilaqutariittut taakku misissorutsigit upperisagut qanoq saamasumik sunniuteqarluar­tumillu  nassuiarsin­naanerigut tamatta ilikkarsin­naavarput.

¹⁷ Inuusuttup Matthewimik atillip sungiusaqatigiinneq iluaqutigisimavaa. Ilaqutariittut Biibilimik misissueqatigiit­tarnerminni Matthew angajoq­qaanilu atuarfimmi sammineqarsin­naasunik misissuisarput. Ima oqarpoq: “Suut apeqqutigineqarsinnaasut eqqartor­tarparput misissuk­kagullu tunngavigalugit piareersar­tarluta. Upperisara sooq upperinerlugu tunngavilersuisin­naagaangama imminut tatigineruler­tarpunga allanullu saamasumik pissuseqar­nissannut ajornan­nginnerulersitsisarlunga.”

18. Kolossimiut 4:6-imi pingaarutilik suna eqqaaneqarpa?

¹⁸ Paasiuminartumik qularun­naarnar­tumillu nassuiaagaluarluta inuit ilaat paasisaqarusun­navianngillat. Periaaserillutalu saamasumik pissuseqarutta iluaqutaasinnaavoq. (Kolossimiut 4:6 atuaruk). Upperisarput pillugu oqaloqateqaraanni pattaammik milorius­sinertut assersuun­neqarsinnaavoq. Pattaat miloriutipiloorluguluunniit sakkortun­ngitsumik milorius­sinnaavarput. Sakkukit­tunnguamik miloriuk­kutsigu akoruminar­nerussaaq akortaannerlu ingerlateq­qiinnar­neqarsin­naalluni. Taamatuttaaq pissuserissumik saamasumillu oqaloriaaseqarutta inuit tusarnaarumanerusin­naavaatigut oqaloqatigalutalu. Soorunami oqqanniaan­narlutik upperisarpul­luunniit pillugu illaruaatiginiaan­narluta oqaaseqartut oqaloqatigiin­narnissaat pisariaqanngilaq. (Uss 26:4) Inuilli amerlanerit taamaanneq ajorput, ilaat tusarnaarumasarput.

19. Sooq upperisarput illersoraangatsigu saamasuunissarput anguniar­tarparput?

¹⁹ Ersarippoq saamasuunissarput ilinniarutsigu iluaqutaangaarsinnaasoq. Akiuminaatsunik isornar­torsiuerpalaar­tunilluunniit aperineqaruit periaaserillutit akissuteqarfiginias­sagakkit Jehovamut nukissannik tuneqqullutit qinusarit. Eqqaamajuk saamasuuguit oqannin­nguussinnaasut pinngitsoor­tissinnaagakkit. Saamasumik ataqqin­nittumillu akissuteqarnerit killitsis­sutigalugu tusarnaartivit Biibilimi ilumoortut pillugit isummani allanngor­tissinnaavaa. Upperisat pillugu ‘kikkulluunniit tunngavilersueq­qusisut saamallutit ataqqin­ningaarlutillu nassuiaan­nissaannut piareersimajuarit’. (Pet 1. 3:15) Aap, saamasuunerit nukittoq­qutigiuk!