1-2. Sooq Samsonnimik oqaluttuaq soqutigis­savarput?

 ATEQ Samsonni tusaraangakku suna eqqaasarpiuk? Ilimanarpoq angut nukittoorsuaq eqqaasarit. Aammami taamaakkami. Samsonnili ajortumik kingunilimmik aalajangiivoq. Taamaak­kaluartorli Samsonnip upperluarluni iliuusii Jehovap maluginiar­nerusarpai uagullu ilinniarfiginias­sagatsigit Biibilimut ilanngutitippai.

² Jehovap innuttani Israalikkut ikiorniarlugit Samsonni tupinnangaartumik iliuuseqarsin­naanngortippaa. Samsonnip toqunerata kingorna ukiut hundredilik­kuutaat qaangiummata apustilip Paulusip Jehovamit isumassarsisitaalluni upperluartut eqqartoramigit Samsonni ilannguppaa. (Hebr 11:32-34) Samsonnip maligassiaa qiimmaal­laatigisin­naavarput. Allaat atukkamini ilungersunartuni Jehova tatigaa. Allaaserisami matumani sammissavarput Samsonni qanoq ilinniarfigisin­naaneripput aamma maligassiaa qanoq qiimmaal­laatigisin­naaneripput.

3. Samsonni sumik suliassin­neqarpa?

³ Samsonnip inunngornerata nalaani filisterit Israalikkunnut naqisiman­nillutik naalakkersuisuupput. (Eqq 13:1) Filisterit naakkit­taatsorsuummata Israalikkut naalliungaarlutik inuupput. Jehovap Samsonni Israalip ‘filisterit assaannit aniguisitaanissaanut aallaqqaasiisussatut’ toqqarpaa. (Eqq 13:5) Tamannali sapernarsimassaaq! Suliassin­neqarnini naammas­siumallugu  Samsonnip Jehova tatigil­luinnar­tariaqarpaa.

4. Jehovap qanoq Samsonni filisterinit aniguisippaa? (Eqqartuussisut 15:14-16)

⁴ Samsonnip Jehovamik tatigin­ninneranik ikiorumaaraanilu upperin­nilluin­narneranik assersuut eqqarsaatigiuk. Ilaanni filisterit sakkutuut Samsonni Lehimi, Juudamiittumi, tigusariar­torpaat. Angutit Juudakkuusut ersigamik aalajangerput Samsonni akeqqaminnut tunniun­niarlugu. Taamaalilluni Samsonni nunaqqatiminit allunaasarsuarnik nutaanik marlunnik qilersor­neqarluni filisterinukaan­neqarpoq. (Eqq 15:9-13) Jehovalli anersaavanit nakussatsin­neqarluni Samsonni nammineerluni qilerus­saarsin­naasimavoq. Taava “siutituup allerua nutaaq” nassaarigamiuk tigoriarlugu filisterit 1.000-t taassuminnga toqorarpai. – Eqqartuussisut 15:14-16 atuakkit.

5. Samsonnip siutituup alleruanik atuinermigut Jehovamut tatigin­ninnini qanoq ersersippaa?

⁵ Sooq Samsonnip siutituup allerua sakkutut atorpaa? Sakkua eqqumiingaarami. Samsonnip nalunngilaa sunaluunniit sakkugigaluaruniuk aatsaat Jehovap ikiuineratigut ajugaasin­naalluni. Aap, angutip upperluartup Jehovap piumasaa naammas­siniarlugu sakkutut atorsin­naasani atorpaa. Ersarippoq Jehova tatigigamiuk iluatsitsil­luartoq.

6. Samsonnimik oqaluttuaq sumik ilinniarfigisin­naavarput?

⁶ Jehovap suliareqqusani qanorluunniit ajornarpasitsigigaluartut naammas­sinissaannut nakussatsis­sinnaavaatigut. Allaat ilimagin­ngisatsinnik Guutip ikiorsin­naavaatigut. Samsonnimik pissatsitsisoq Jehova tatigiuk, tatigigukkumi piumasaa naammas­siniarlugu ikiorumaarpaatit. – Uss 16:3.

7. Jehovamit siulersor­neqarnerup qanoq pingaaruteqar­tigineranik assersuuteqarit.

⁷ Qatannguterpassuatta sanaartornermut peqataasut Jehova tatigaat. Siornatigut qatanngutitta namminneerlutik naalagaaf­filersaarfiit nutaat sanaartugassallu allat titartarlugillu ilusilersor­tarsimavaat. Nalunaajaasun­ngortulli amerliar­tulermata Jehovap  peqatigiis­sortaanik allannguisoqar­tariaqalersimavoq. Qatanngutit angutit akisussaasut Jehovamit siulersoq­qunermikkut suleriaatsit nutaat misilippaat, soorlu illorsuarnik piseriarlutik nutarsar­tarlugit. Robert, ukiuni kingullerni nunani tamalaani illorsuaatitsinnik suliaqar­tarsimasoq, oqarpoq: “Aallaqqaammut ilaasa suleriaaseq nutaaq paasiuminaatsik­kaluarpaat, suleriaasermi ukiorpassuarni atorsimasatsinnit allaanerummat. Qatanngutilli angutit kajumillutik naleqqussarput allannguinerillu tamakku Jehovap pilluaqqugai ersarippoq.” Tamanna Jehovap innuttaminik siulersuineranut takussutissat ilaannaraat. Ilaatigut una eqqarsaatigis­sallugu pitsaassaaq: “Jehovap siulersuinera qinnutigisarpara, pitsaanerpaamillu kiffartor­niarlunga allannguerusus­suseqarpunga?”

8. Pisut ilaanni Samsonni qilalerluinnarami qanoq iliorpa?

⁸ Samsonnip suliai tupinnartut allat atuarsimas­sagunarpatit. Assersuutigalugu nammineq løveq toquppaa. Kingusin­nerusukkullu illoqarfimmi Ashkalonimi filisterit 30-t toquppai. (Eqq 14:5, 6, 19) Samsonnip nalunngilaa aatsaat Jehovamit ikiorneqaruni tamakku naammas­sisinnaallugit. Tamanna pisut ilaanni erserpoq filisterit 1.000-t toqorareerlugit qilalerluinnarami. Qanoq iliorpa? Nammineq imissarsiornani Jehovamut ikioqquvoq. – Eqq 15:18.

9. Samsonni ikioqqulluni qinummat Jehova qanoq iliorpa? (Eqqartuussisut 15:19)

⁹ Samsonni ikioqqulluni torlulammat Jehovap tupinnar­tuliornikkut imeq puilalersippaa. Samsonni “imereerami kingumut nakussatsippoq inuummaris­sillunilu”. (Eqqartuussisut 15:19 atuaruk). Ukiorpassuit qaangiuttut pruffiitip Saamualip isumassarsisitaalluni Eqqartuus­sisunik allakkat allammagit imeq puilasoq suli piusimagunarpoq. Israalikkut imeq taanna takugaangamikku eqqaasarsimassavaat Jehovap imminut kiffartortut aalajaatsut pisariaqar­titsineranni ikiortarai.

10. Jehovamit ikiorneqarumalluta susariaqarpugut? (Aamma assiliaq takuuk).

¹⁰ Qanorluunniit piginnaaneqaraluarutta Jehovamullu kiffartornermi qanorluunniit naammas­sisaqarsimagaluarutta uaguttaaq Jehova tatigalugu ikiortis­sarsiorfigisariaqarparput. Maniguulluta akuerisariaqarparput aatsaat Jehova tatigigutsigu suliareqqusai naammas­sisinnaagigut. Soorlu Samsonni imermik Jehovap tunniussaanik imerami pissatsin­neqartoq, uaguttaaq Jehovap tunniussai tamaasa atorluarutsigit anersaakkut pissatsin­neqarumaarpugut. – Mat 11:28.

11. Jehovap ikiuinera qanoq tamakkiisumik iluaqutigisin­naavarput? Assersuuteqarit.

¹¹ Ruslandimi qatanngutit malersugaangaartut ilaat Aleksej eqqarsaatigiuk. Atukkamini artornangaartuni suna nukittoq­qutigaa? Nulianilu anersaakkut ittunik sammisaqar­tuartarnertik. Oqarpoq: “Sapinngisamik ullut tamaasa atuaqqis­saarlungalu Biibilimik atuartarpunga. Ullaat tamaasa nuliaralu ullormut allassimaffik eqqartor­tarparput Jehovamullu qinoqatigiit­tarluta.” Qanoq ilinniarfigaarput? Imminut tatigival­laarnata Jehova tatigisariaqaripput. Qanoq? Aalajangersimasumik Biibilimik atuaqqis­saartarnikkut anersaakkullu allanik sammisaqar­tarnikkut uppernitsinnik ineriar­tortitsiuar­nitsigut. Taava Jehovap kiffartor­nitsinni sapinngisamik iliuutsigut pilluaq­qungaarumaarpai. Guutip Samsonni pissatsippaa uaguttaaq pissatsik­kumaarpaatigut.

12. Samsonni qanoq aalajangiinerluppa, tamannalu siuliani misigisimasaanit qanoq allaanerua?

¹² Samsonni uagutsitulli naammal­luinnan­ngitsuuvoq ilaatigullu kukkusumik aalajangiisarluni. Aalajangiinerisa ilaat kingunipiloqangaarpoq. Eqqartuus­sisutut kiffartor­tilluni Samsonnip “arnaq Sorekip Qooruamioq Dalilamik atilik asalerpaa”. (Eqq 16:4) Guutilli Samsonnimut suliareq­qusaanut tamanna naapertuutinngilaq. Siornatigut Samsonni arnamik filisteriusumik pissiaqarsimavoq, tamannali “filisterit saassun­nissaannut” Jehovap periarfis­sarsior­nermini aaqqiineraa. Tamatuma kingornatigut Samsonni filisterit illoqarfianni Gazami arnap atortittartup illuani unnuivoq. Illoqarfik saassun­neqariaan­nanngorlugu isaaffiup matuinik peersinissaanut Guutip Samsonni nukissaqartippaa. (Eqq 14:1-4; 16:1-3) Dalilamulli asannilerami Samsonnip nammineq isummani malippaa, Dalilami filisteriunani Israalimiuugunarmat Samsonnip taamaaliornera filisterit saassun­nissaannut periarfis­siinngilaq.

13. Dalilap Samsonni qanoq uukapaatippaa?

¹³ Dalilap filisterinit aningaasanik akilerneqarluni Samsonni killuutigaa. Immaqa Samsonnip Dalila ima asatigaa allaat takusin­naanagu siunertaqapiluttoq. Dalilap Samsonni apersor­tuarpaa sooq taama nukittutiginersoq. Naggataatigullu oqaluttuuppaa. Ajoraluar­tumilli Samsonnip kukkussutini pissutigalugu nukissuani annaavai. Jehovamillu piffissap ilaani iluarisaajun­naarpoq. – Eqq 16:16-20.

14. Samsonnip Dalilamik tatigin­ninnera qanoq kinguneqarpa?

¹⁴ Samsonnip Jehova pinnagu Dalila tatigigamiuk kingunipilui misigai. Filisterit Samsonni tigusaraat isaarlugulu. Gazami parnaarussaavoq.  Gazamiunillu siornatigut nikanarsarsimasaminit karrinik aserorterummik kaavisitsisun­ngortin­neqarpoq. Filisterit nalliut­torsiorlutik ataatsimuuleramik nikanarsar­niarlugu sassartippaat. Filisterit Dagonimut guutipilummut pilliuteqangaatsiarput upperigamikku taassuma ikiuineratigut Samsonni tigusarisimallugu. Samsonni parnaarus­sivimmiit aatippaat persuarsior­nerminni aliikkutaralugu illaruaatiginiarlugu. – Eqq 16:21-25.

15. Samsonnip qanoq takutippaa Jehova tatigeq­qilersimallugu? (Eqqartuussisut 16:28-30) (Saqqaani assiliaq takuuk).

¹⁵ Samsonni kukkorujus­suaraluarluni Jehovamut kiffartor­tuarpoq. Jehovap kissaatigisaattut filisterinut ajunaarutaasumik iliuuseqar­nissaminut periarfis­sarsior­tuarpoq. (Eqqartuussisut 16:28-30 atuakkit). Samsonnip Jehova qinnuigaa filisterit akiniar­nissaannut periarfis­saqaqqullugu. Samsonnip qinnutaa Guutip ilumoortup tusarpaa nakuarsuan­ngorteq­qillugulu. Tamatuma kingunerisaanik filisterit aatsaat taama amerlatigisut toquppai.

16. Samsonnip kukkunera qanoq ilinniutigisin­naavarput?

¹⁶ Samsonnip kukkussutimi kingunipilui atortariaqaraluarlugit Jehovap piumasaatut iliortuarpoq. Uaguttaaq kukkusimalluta oqaaqqis­saarneqarsimagutta pisinnaatitaaf­fimmilluunniit annaasaqaraluarutta Jehovap piumasaatut iliorun­naanngisaan­nassaagut. (Tuss 103:8-10) Eqqaamajuk Jehova isumakkeerfigin­neriaan­naasarmat. Kukkusimagaluarut­taluunniit Samsonnitulli Jehovap kiffartor­nitsinni nakussatsis­sinnaavaatigut.

17-18. Sooq Michaelip misigisaa qiimmaal­laatigaajuk? (Aamma assiliaq takuuk).

¹⁷ Qatanngut inuusuttoq Michaelimik atilik eqqarsaatigeriaruk. Ilagiinni kiffartortutut pioneritullu ulapputeqartuuvoq. Ajoraluar­tumilli kukkussuteqarnini pissutigalugu ilagiinni pisinnaatitaaffini annaavai. Ima oqarpoq: “Tamanna sioqqullugu Jehovamut kiffartorninni ulapputeqar­tuaannar­tuuvunga. Tassanngaannarli Jehovamut kiffartorninni suliarisar­takkakka suliarisin­naajunnaarpakka. Isumaqan­ngisaan­narsimavunga Jehovap qimassagaanga, eqqarsaatigisarparali taassumunnga attaveqarnera iluarseq­qissinnaanersoq imaluunniit ilagiinni kiffartorsimanittut kiffartoq­qilersin­naanerlunga.”

 ¹⁸ Michael tunniutiin­nannginnami silatusaarpoq. Ima oqarpoq: “Qamannga pisumik qinusarnikkut, atuaqqis­saartarnikkut eqqarsaatigin­neqqissar­tarnikkullu Jehovamut attaveqarluaq­qilernissara sulissutigiuarpara.” Piffissap ingerlanerani ilagiinni kiffartornini pisinnaatitaaf­figeqqilerpaa. Ullumikkut utoqqaanertatut pioneritullu kiffartorpoq. Ima nangippoq: “Pingaartumik utoqqaanertanit tapersersor­neqarninni kajumis­saarneqar­ninnilu paasivara Jehovap suli asagaanga. Ilerasuuteqarnanga ilagiinni kiffartoq­qissinnaalerpunga. Kinaluunniit ilumoorluni peqqissimisoq Jehovap isumakkeerfigisaraa misigisannit ilikkarpara.” Kukkussutigut sapinngisatsinnik iluarsiniar­tarutsigit Jehovalu tatigiuarutsigu qularutigis­sanngilarput kukkussuteqarsimagaluarluta atorsin­naallutalu pilluaq­qusinnaagaatigut. – Tuss 86:5; Uss 28:13.

19. Sammsonnip maligassiaa qanoq nakussatsis­sutigaajuk?

¹⁹ Allaaserisami matumani Samsonnip inuunerani pisut tupinnartut ilaannaat sammivagut. Kukkujuitsuunngilaq, Dalilamulli tunngatillugu kukkussuteqareeraluarluni Jehovamut kiffartor­niartuarpoq. Jehovallu atorunnaanngilaa. Samsonni aqqutigalugu Guuti imaannaan­ngitsumik iliuuseqarpoq. Jehovap suli upperluartutut isigaa, Hebræerit kapitali 11-mi upperluartunut allaatigineqartunut ilannguppaa. Qiimmaal­lannangaarami ilisimallugu Ataatatta qilammiusup asannittup, pingaartumik unamminiar­nartitaqar­nitsinni ikiorneqar­tariaqaraangatta, nakussatsik­kusungaar­tarmatigut! Samsonni ilaarlugu Jehova ima qinnuigisigu: “Guuti Naalagaq! Eqqaannga, nukisseq­qinngalu [pissatsinngalu, tastamantitoĸaĸ].” – Eqq 16:28.